இன்று வந்த மெயில்

இட்லிவடை !!
இந்துவாகிய நீங்கள் மற்றும் உங்கள் இந்து நண்பர்கள் அவ்வப்பொழுது முஸ்லிம் மதத்தை பற்றியும் முஸ்லிம்கள் பற்றியும் அவதூறாக எழுதி வருகீறீர்கள். சில சமயம் சில நல்ல அறிவுறைகளையும் கூறி வருகீறீர்கள்!! நன்றி!! ஆனால் முஸ்லிம்களை மட்டுமே குறை சொல்ல நீங்கள் சிரத்தை எடுப்பதாகவே தெரிகிறது..சில மாதங்களுக்கு முன்னால் ஒரு இரானிய திரைபடத்தில் ஒரு பெண் (விபச்சாரம் செய்தவள்) கல்லால் அடித்து கொள்வதை போல் எல்லா முஸ்லிம் நாடுகளிலும் செய்வது போலவும், முஸ்லிம்கள் எல்லாம் இப்படிதான் எனவும், முஸ்லிகள் எல்லாம் இதை ஆதரிப்பதை போலவும் எழுதி இருந்தீர்கள். ஆனால் கெளரவக் கொலைகள் இந்துகளிடமும் நடைமுறையில் உள்ளது, இதற்கு தற்போது நடந்த நிருபமா கொலை ஒரு உதாரணம்! இதை பற்றி நீங்கள் எழுதுவீர்கள் என்ற நம்பிக்கை என்னிடம் இல்லை, இதுதான் அடுத்த மதத்தின் மேல் உள்ள காழ்புணர்ச்சி, ஒரு தவறை தானோ தன் குடும்பத்தினரோ தன் மதத்தை சார்ந்தவரோ செய்யும் பொது அது தவறாக உங்களுக்கு தெரிவதில்லை!! வாழ்க உங்கள் சேவை!!

விகடனில் வந்திருக்கும் ஒரு கட்டுரை உங்களின் கவனத்திற்கு!!


'கெளரவக் கொலை என்பது ஒரு காட்டுமிராண்டித்தனமான செயல்.' - அண்மையில் உச்ச நீதிமன்றம் தெரிவித்த கருத்து இது.
இந்தக் காட்டுமிராண்டித்தனத்துக்கு ஓர் இளம் பெண் பத்திரிகையாளரே பலியாகியிருப்பதாக வெளியாகியுள்ள செய்தி பல்வேறு தரப்பினரையும் அதிர்ச்சிக்கு உள்ளாக்கியிருக்கிறது.தாலிபான் பாணி கொடூரச் செயலாலகக் கருதப்படும் கெளரவக் கொலைகள் (Honour Killings) என்பது இஸ்லாமிய நாடுகளில்தான் மிகுதியாக இருக்கிறது என்பது பொதுவான புரிதலாக இருக்கிறது. ஆனால், அமெரிக்கா போன்ற வளர்ந்த நாடுகளிலும் மிகுந்திருக்கிறது என்பதை ஐக்கிய நாடுகளின் ஆய்வறிக்கையைக் கண்டால் உணர முடியும்.
ஒவ்வொரு ஆண்டும் கெளரவக் கொலைகள் என்ற பெயரில் ஏறத்தாழ 5 ஆயிரம் இளைஞர், இளைஞிகள் தங்களது குடும்பத்தினரால் கொல்லப்படுகின்றனர் என்கிறது, ஐக்கிய நாடுகள் அமைப்பின் புள்ளிவிவரம்.
குடும்ப கெளரவத்தைக் கெடுத்துவிட்டதாகக் கூறி, குடும்ப உறுப்பினர் ஒருவரை அவர் குடும்பத்தைச் சேர்ந்த ஏனைய உறுப்பினர்கள்கள் கொலை செய்யும் கொடூரச் செயலே கெளரவக் கொலைகள் எனப்படுகிறது.
இந்தியாவைப் பொறுத்தவரையில் ஹரியானா, பீகார் போன்ற மாநிலங்களில் தான் அதிக எண்ணிக்கையிலான கெளரவக் கொலைகள் நடந்திருக்கின்றன. வீட்டின் கட்டுப்பாடுகளை மீறி சாதி, மதம் மாறி திருமணம் செய்து கொள்ளும் இளைஞர்கள், இளைஞிகளே இத்தகைய பாதக நிலைக்கு ஆளாகின்றனர்.
இத்தகையதொரு வழக்கில், ஹரியானா நீதிமன்றம் கடந்த மார்ச் 30 ஆம் தேதி அளித்த தீர்ப்பு, நாடு முழுவதும் பரபரப்பை ஏற்படுத்தியது இங்கே நினைவுகூரத்தக்கது.
ஹரியானா மாநிலம் கர்னல் என்ற இடத்தைச் சேர்ந்த மனோஜ் என்பவரும், பாப்லி என்ற பெண்ணும் ஒருவரை ஒருவர் உயிருக்கு உயிராக காதலித்தனர். திருமணம் செய்து கொள்ள முடிவெடுத்தனர். ஆனால் இவர்களது காதல் திருமணத்துக்கு கடும் எதிர்ப்பு தெரிவித்த பாப்லியின் உறவினர்கள், பஞ்சாயத்தைக் கூட்டினர். பஞ்சாயத்திலும் திருமணம் செய்து கொள்ளக்கூடாது என தீர்ப்பு அளிக்கப்பட்டது. அதனையும் மீறி மனோஜ் - பாப்லி ஜோடி திருமணம் செய்து கொண்டது. இதனால் ஆத்திரமடைந்த பாப்லியின் உறவினர்கள், 2007 ஆம் ஆண்டு ஜூன் மாதம், அவர்கள் இருவரையும் கடத்திச் சென்று கொடூரமாக கொலை செய்தனர்.
இது தொடர்பான வழக்கில் குற்றவாளிகள் என நிரூபிக்கப்பட்ட பாப்லியின் சகோதரர் சுரேஷ், மாமா ராஜேந்தர் மற்றும் பரு ராம், ஒன்றுவிட்ட சகோதரர்கள் குர்தேவ் மற்றும் சதீஷ் ஆகிய 5 பேருக்கும் கொலைக் குற்றத்தின் கீழ் மரண தண்டனை விதித்தும், காரில் கடத்த உதவிய கிராம பஞ்சாயத்து தலைவர் கங்கா ராஜ் என்பவருக்கு கடத்தல் மற்றும் சதி திட்டக் குற்றச்சாற்றின் கீழ் ஆயுள் தண்டனையும் வழங்கி, ஹரியானா கர்னல் செசன்ஸ் நீதிமன்றம் தீர்ப்பளித்திருந்தது.
பொதுவாக, கல்வி அறிவு குறைந்த கிராமப்புற பகுதிகளிலேயே இந்தக் கெளரவக் கொலைகள் நிகழ்த்தப்படுகின்றன என்று சொல்லப்படுவதுண்டு. ஆனால், இந்த விஷயத்தில் கல்வி என்பது ஒரு பொருட்டே அல்ல என்பதையே ஜார்கண்டைச் சேர்ந்த பெண் பத்திரிகையாளர் நிருபமா பதக் கொல்லப்பட்ட சம்பவம் கோடிட்டுக் காட்டுகிறது.
நிருபமா பதக் கொலை...
டெல்லியில் உள்ள ஒரு வணிக பத்திரிகை ஒன்றில் நிருபராக பணியாற்றியவர் நிருபமா பதக் (வயது 22). இவர் கடந்த 29 ஆம் தேதி தனது வீட்டில் தூக்கிட்டுத் தற்கொலை செய்துகொண்டதாக காவல்துறையினர் விசாரணை நடத்தினர். அவரது உடல் பிரேதச பரிசோதனைக்கு அனுப்பப்பட்டது. அதில், அவர் தற்கொலை செய்யவில்லை என்பது தெரியவந்தது. மேலும் அவருடைய வயிற்றில் 3 மாத கரு இருந்தது. நிருபமாவின் கழுத்துப் பகுதியில் கயிறு மூலம் இறுக்கப்பட்டு, அவர் கொலை செய்யப்பட்டு இருப்பதும் தெரியவந்தது.
இதையடுத்து, காவல்துறையினர் கொலை வழக்கு பதிவு செய்து விசாரணை நடத்தினர். நிருபமாவின் குடும்பத்தினரிடம் காவல்துறையினர் நடத்திய விசாரணையில் மின்சாரம் தாக்கியதில், நிருபமா இறந்ததாக தெரிவித்தனர். இதனால், சந்தேகம் அடைந்த காவல்துறையினர், நிருபமாவின் தாய் மற்றும் தந்தையிடம் விசாரணை நடத்தினர். இதில் நிருபமா உயர்ந்த சாதியைச் சேர்ந்தவர் என்றும், அவர் தாழ்ந்த ஜாதியைச் சேர்ந்த பிரகான்சு ரஞ்சன் என்ற வாலிபரை காதலித்து வந்ததும் தெரியவந்தது.
இந்த காதல் விவகாரம் நிருபமாவின் பெற்றோர்களுக்கு தெரிந்ததால் எதிர்ப்பு தெரிவித்துள்ளனர். மேலும் பிரகான்சுவையும் மிரட்டியுள்ளனர்.
இந்தநிலையில், காதலை கைவிட மறுத்ததால் தாய் மற்றும் தந்தையால் நிருபமா கொலை செய்யப்பட்டு இருக்கிறார் என்று காவல்துறை தரப்பு தெரிவிக்கிறது. இதைத்தொடர்ந்து அவருடைய தாய் சுபாவை காவல்துறையினர் கைது செய்து செய்து விசாரித்து வருகின்றனர். நிருபமாவின் தந்தை தர்மேசிடமும் தொடர்ந்து விசாரணை நடத்தப்பட்டு வருகிறது.
இந்த விசாரணையின் முடிவில், நிருபமா கெளரவக் கொலைக்குதான் இரையானாரா என்பது உறுதி செய்யப்படும்.
கெளரவக் கொலைகளைப் பொறுத்தவரை வெளியுலகுக்கு தெரியவரமால், வீட்டிலேயே மூடி மறைத்துவிடுவதற்கான சாத்தியம் அதிகம் என்பதால் உண்மை நிலையை வெளிக்கொணர்வது கடினம் தான் என்கின்றனர் சமூக ஆர்வலர்கள்.

நீங்க இப்போது எழுதியிருப்பது மாதிரி ஜெய் ஹனுமான் எழுதிய விமர்சனம் அது. யாரையும் புண்படுத்தும் நோக்கம் எங்களுக்கு இல்லை. புரிதலுக்கு நன்றி.