அவதார் - விமர்சனம்

டிஸ்கி: வேட்டைக்காரனுக்குப் போட்டியாக கமல், ரஜினி, அஜித் விக்ரம், ஏன் கரண் கதாநாயகனாக நடிக்கும் கனகவேல் காக்க கூட ரிலீஸ் செய்ய தைரியம் இல்லை. மோதிய ஒரே படம் அவதார். விஜய் படத்துடன் தைரியமாக மோதிய அவதார் படத்தை இன்று பார்த்தேன். பார்த்த பின்பு தான் தெரிந்தது வேட்டைக்காரனுடன் நடந்த போட்டியில் அவர்தார் தோற்றுப்போனார் என்று. ஆம் வேட்டைக்காரன் 23 திரையரங்குகளில் வெளியாகிறது. அவதார் 13 திரையரங்குகளில் வெளியாகிறது. இவ்வளவு தான் போட்டி. இனி படத்தின் விமர்சனத்தை பார்க்கலாம்.



ஸ்பெக்டரம், கோடா, ஏன் ஆர்.எஸ்.எஸ் மீட்டிங்குக்கு டிரவுசருடன் போகும் எடியூரப்பாவே தன் படுக்கை அறைக்கு சில லட்சம் செலவு செய்கிறார்.அதனால் இந்த படத்தின் செலவு 1200கோடி. வெளியான முதல் நாளே எவ்வளவோ கோடியை அள்ளியது போன்ற தகவல் எல்லாம் எனக்கு ஆச்சரியம் தரவில்லை.

டைடானிக் படத்தின் இயக்குனர் ஜேம்ஸ் கேமரூனின் அடுத்த பிரமாண்டமான படம் இந்த அவர்தார். அந்த காலத்து நீல நிறத்தில் ராமர் வேஷம் போட்ட என்.டி.ஆருக்கு வால் வைத்தால் எப்படி இருக்கும்? அதே போல வருகிறார் நம் பட கதாநாயகன்.

லார்ட் ஆப் தி ரிங்க்ஸ், ஸ்டார் வார்ஸ் போன்ற படத்தின் காட்சி அமைப்பு ஞாபகப்படுத்தினாலும், 3D படத்தில் பார்ப்பது தனி சுகம். ஸ்டீபன் ஸ்பில்பேர்க், மைக்கல் பே,ரோலண்ட் எம்ரிச் போன்ற புகழ்பெற்ற ஹாலிவுட் இயக்குனர்களுக்கு நல்ல சவால் விட்டிருக்கிறார் ஜேம்ஸ் கேமரூன். இவர் முன்பு டைட்டானிக், ஏலியன்ஸ், டேர்மினேட்டர் ஆகிய படங்களை இயக்கியவர். அவதாரில் படத்தில் திரைக்கதையும் இவரே. இடைவேளிக்கு முன்பு எப்ப இடைவேளி என்று கையில் இருக்கும் வாட்சை பார்க்க வைக்கும் சுமாரான திரைக்கதை.

கூடு விட்டு கூடு பாய்வது என்பது விட்டாலாச்சாரியார் சமாசாரம். மிஷின் வைத்து அதை செய்தால்? ஹாலிவுட்டில் அதை சைன்ஸ் ஃபிக்ஷன் என்கிறார்கள்.. சாமானியர்களுக்கு புரிய கொஞ்சம் கஷ்டமான கதை என்பதால் சுறுக்கமாக கதையை படித்துவிட்டு படம் பார்க்க செல்வது தான் புத்திசாலித்தனம்.

பூமியிலுள்ள எரிபொருள் மற்றும் சில கணிம வளங்கள் தேடி விண்வெளியில் இருக்கும் பாண்டோரா எனும் வேற்று கிரகத்தை முற்றுகையிட வருகிறார்கள் மனிதர்கள். இதில் மனிதர்களே வில்லன்கள். அங்கே நவி எனும் ஒரு விதமான இனம் வாழ்கிறது. பார்க்க நீல நிறத்தில் ஆதி மனிதன் போல இருக்கும் இவர்கள் இயற்கையை நேசிக்கிறார்கள். ரொம்ப நல்லவர்கள்.


இந்த நவி நிற மனிதர்களின் பழக்க வழக்கங்களை கண்டுபிடிக்க அவர்களுடன் உலாவ நவி போன்ற நீல நிற மனிதர்களை டி.என்.ஏயைக் கொண்டு உருவாக்கிறார்கள். பண்டோரா கிரகத்தில் மனிதனால் சுவாசிக்க முடியாது என்பதும் ஒரு காரணம். இந்த மாதிரி ஒரு உருவத்தில் நம் கதாநாயகன் ஜேக் பண்டோராவுக்குள் நுழைகிறார். கிரகத்தின் அழகில் நம்மை போலவே மெய் மறக்கிறார். அங்குள்ள ஒரு நவி பெண்ணுடன் காதல். இதற்கிடையே ஜேக் மனிதர்களின் கைகூலி என்று தெரியவர தர்மசங்கடத்தில் சிக்கிக்கொள்கிறார். அதற்கு பிறகு என்ன என்பதை படத்தில் பார்த்து தெரிந்துக்கொள்ளவும்.

டைட்டானிக் படத்துக்கு இசையமைத்த ஜேம்ஸ் ஹார்னர் தான் இந்த படத்துக்கும் இசை. நன்றாக இருக்கிறது ஆனால் புதுமையாக இருக்கிறது என்று சொல்ல முடியாது.

ஒரு பெரிய மரத்தை அழிக்கும் காட்சியில் நிஜமாகவே பிரம்மாண்டம் தெரிகிறது. ஆர்ட் டைரக்டர் யார் என்று தெரியவில்லை அவ்வளவு கற்பனை. பைபர் வைத்து பூக்களை ஷோக்கேஸுல் பார்த்திருப்போம். அது கொஞ்சம் அதிகமாகவே உபயோகப்படுத்தியிருக்கிறார்கள். பறவையில் பறக்கும் காட்சி கொஞ்சம் அதிகமாகவே காட்டியதாலோ என்னவோ கொஞ்சம் திகட்டுகிறது. எதை வெட்டணும் எதை வெட்டக்கூடாது என்று குழம்பிபோனதாக தெரிகிறது. நீல நிறத்தில் இருக்கும் மனிதர்கள் வில் வைத்துக்கொண்டு இருப்பர்கள் கடைசியாக வில்லன்களை அழிக்க திடீர் என்று நம்ம நீல நிற ஹீரோ ஜேக் துப்பாகியுடன் வருவது கொஞ்சம் சொதப்பல். இன்னொரு முறை பார்த்தால் கிராபிக்ஸில் என்ன தப்பு என்று நிறைய கண்டுபிடிக்கலாம் என்று நினைக்கிறேன்.

சிவாஜி படத்தில் ரஜினியை ஒரு பாட்டுக்கு வெள்ளைக்காரனாக காண்பித்ததற்கே பெருமையாக பேசிக்கொண்ட நாம், அவதார் படத்தில் 60 சதவீதம் கம்ப்யூட்டர் கிராபிக்ஸ் மாயாஜாலம் என்றும் போது பெரும் வியப்பாக இருக்கிறது. இந்த படத்தின் இரண்டாம், மூன்றாம் பகங்களை எடுக்க முடிவு செய்திருப்பதாக படித்தேன். அப்படி செய்தால் எவ்வளவு தூரம் அது ஹிட்டாகும் என்று தெரியாது. இன்னும் கொஞ்சம் செலவு செய்தால் இந்த டெக்னாலஜியை வைத்து முழுக்க முழுக்க கம்ப்யூட்டரிலேயே நடிகர் நடிகைகளை வைத்து படம் பண்ணிவிடுவார்கள்.

இந்த படத்தின் வெற்றிக்கு கிராபிக்ஸா மார்கெட்டிங்கா என்றால் ? விடை மார்கெட்டிங்க் என்று சொல்லுவேன்.

படம் பார்த்துவிட்டு வெளியே வரும் போது நாமும் பண்டோரா கிரகத்திலிருந்து வெளியே வரும் உணர்வு. ஆனால் அது கொஞ்சம் நெரம் தான் நீடிக்கிறது.....வெளியே வரும் போது வேட்டைக்காரன் படம் விட்டு வரும் ரசிகர்களை பார்த்துதான் நாம் சென்னையில்தான் இருக்கிறோம் என்று தெரிந்துக்கொள்ள முடிகிறது. வேட்டைக்காரன் ரசிகர்களுக்கு என் நன்றி.


இட்லிவடை மார்க் - 7.0/10


2Dயில் ஓசி டிக்கெட் கிடைத்தாலும் பார்க்காதீங்க.

இந்த படம் நிச்சயம் சூப்பர் டூப்பர் ஹிட் என்பது எதிர்ப்பாத்த ஒன்று தான்.

திருச்செந்தூர், வந்தவாசி இடைத்தேர்தல்களின் முடிவையே எதிர்பார்த்த ஒன்று தான் என்று ஜெயலலிதாவே அறிக்கைவிடும் போது நான் இந்த மாதிரி அறிக்கைவிடக்கூடாதா ?


படத்தின் டிரைலர்




படம் பாக்க கண்ணாடி கொடுத்திருக்கிறேன், பார்த்துவிட்டு திருப்பி தாங்க ப்ளீஸ் :-)