மர மண்டைகள்

இந்த மாதம் 8 ஆம் தேதி துவங்கி 12 நாட்களுக்கு உலகத்தின் பார்வையே டென்மார்க்கின் திசையை நோக்கிக் கொண்டிருக்கும். ( சும்மா ஒரு பேச்சுக்கு சொன்னேன், அப்ப தான் கட்டுரையில் எழுதணும்). டென்மார்க் தலைநகரம் கோபன்ஹேகனில், உலகநாடுகள் அனைத்தும் பங்கேற்கும், காலநிலை மாறுபாடு தொடர்பான ஒரு பெரிய கருத்தரங்கம் 12 நாட்கள் நடைபெறவிருக்கிறது. உலகம் வெப்பமயமாதல் மற்றுமதன் விளைவுகள், பருவ சுழற்சிகளில் ஏற்பட்டுள்ள மாற்றம் அதற்கான காரணங்கள், மற்றும் அவற்றை சரி செய்வது தொடர்பான பல விஷயங்கள் அங்கு விவாதிக்கப்படவிருக்கின்றன.

இம்மாநாட்டின் முக்கிய நோக்கமே சுற்றுச்சூழலை பாதுகாப்பது என்பதாகும். ஆனால் இம்மாநாட்டின் நோக்கத்திற்கே விரோதமான சம்பவங்கள் உலகின் பல்வேறு இடங்களில் நடைபெற்ற வண்ணம் இருக்கின்றன. அதற்கு சில உதாரணங்கள்:




முதல் உதாரணம்:

சுற்றுச் சூழல் பாதுகாப்பிற்கு விரோதமான விஷயம் அதே கோபன்ஹேகனில் நடைபெற்று வருகின்றது. அதாவது இம்மாநாட்டில் பல தேசங்களிலிருந்தும் முக்கியமான தலைவர்கள் மற்றும் விஞ்ஞானிகள் கலந்து கொள்ளவிருப்பதால், அவர்களின் உபயோகத்தின் பொருட்டு 1200 லிமோ ரக சொகுசு கார்கள் இயக்கப்படவிருக்கின்றன. இவை தவிர 140 விமானங்கள்!! இவற்றால் வெளியேற்றப்படும் கார்பன் - டை - ஆக்ஸைடின் அளவு மிக அதிகம். இவற்றைத் தவிர்த்தாலே கோபன்ஹேகனின் சுற்றுச் சூழல் பெருமளவு பாதுகாக்கப்படும்.

இரண்டாவது உதாரணம்:

அடுத்த உதாரணம் சம்பவிக்கும் இடம், நமது சிங்காரச் சென்னையில்தான். முதன் முதலாக தற்போதைய தமிழக துணை முதல்வர் முக ஸ்டாலின் சென்னை நகர மேயராகப் பொறுப்பேற்ற போது, சென்னையை சிங்காரச் சென்னையாக மாற்றுவேன் என்று உறுதி பூண்டார். ஆனால் இப்போது நடப்பவை அதற்கு நேரெதிர். சுமார் 2000 மழை தரக் கூடிய முதிர்ந்த மரங்கள் வெட்டப்பட்டு அதன் சமாதியின் மீது புதிய சட்டமன்றக் கட்டிடமும், பெரியார் நூலகமும் கட்டப்பட்டு வருகின்றன. இனி வருங்காலத்தில் மரங்களை அழித்து அதன் மீது எழுப்பபட்ட புதிய சட்டமன்றக் கட்டிடத்தில் சுற்றுச் சூழல் பிரச்சனைகள் குறித்து விவாதிப்பார்கள். நல்ல முன்னுதாரணம்தான்!!

இந்நிலையில், வெட்டப்பட்ட ஒவ்வொரு மரத்திற்கும் பதிலாக ஐந்து மரக் கன்றுகள் சென்னை நகரில் நடப்படுமென்று சென்னை நகர மேயர் திரு.மா.சுப்ரமணியம் அவர்கள் கூறியுள்ளார். அது சரி, சென்னை நகர் முழுவதும் கான்கிரீட் மரங்கள் பெருகி வரும் நிலையில் ஒரு மரத்திற்கு பதிலாக ஐந்து மரத்திற்கு இடத்திற்கு எங்கே போவது?? அதை ஏன் மேயர் விளக்கவில்லை ?
விவசாயிகளுக்கு இரண்டு ஏக்கர் இலவச நிலத் திட்டம் போலாகுமோ?? இவ்வாறான கேள்விக்கு இவர் வைத்திருக்கு இன்ஸ்டண்ட் பதில்...மெரீனா கடற்கரையினையொட்டிய கடற்கரைச் சாலை. அதாவது இம்மரக் கன்றுகள் கடற்கரைச் சாலையில் நடப்படுமாம்.
அங்கே சிலை வைப்பதற்கே இடம் இல்லை மரம் நல்ல ஜோக். வெட்டப்படுவதோ நன்கு உயர்ந்து வளர்ந்த மரங்கள், அதற்கு பதிலாக நடப்படுவதோ மரக் கன்றுகள். இவையனைத்தும் என்னிக்கு வளர்ந்து... வார்டு மெம்பர், கவுன்சிலர்,வட்டச் செயலாளர், வட்டத் தலைவர், ஒன்றியச் செயலாளர், ஒன்றியத் தலைவர், மாவட்டச் செயலாளர் கழக செயலாலர் (இதுக்கு நடுல இளைஞரணி லொட்டு லொசுக்கு எல்லாம் இருக்கு)..அப்பறம் பேராசிரியர்...... அப்படி இப்படி என்று ஆகி கன்று என்று முதலமைச்சர் ஆகும் ? முடியாது. பேராசிரியர் ஆனாலே பெரிசு.

"Trees Foundation Of India" வைச் சேர்ந்த சுப்ரஜா தரணி அவர்கள் கூறுகையில், வெட்டப்பட்ட மரங்களுக்கு பதிலாக மரக் கன்றுகள் நடப்படுமா என்பதே சந்தேகமென்ற நிலையில், நடப்பட்டாலும், அனைத்துமே வளர்ந்து பலன் தருமா? என்று கேள்வியெழுப்பியுள்ளார். அவர் மேலும் கூறுகையில், பொதுவாகவே வெட்டப்படும் மழை தரும் மரங்களுக்கு பதிலாக, அலங்கார மரங்களே நடப்படும். அவற்றால் விளையும் பலன்களும் மிகக் குறைவு என்று தெரிவிக்கிறார்.

"வளர்ச்சி மற்றும் முன்னேற்றப்பணிகளில் பொதுவாகவே பலிகடாவாக்கப்படுவது சுற்றுச் சூழல்தான்" என்று ஆதங்கப்படுகிறார் வன விலங்குகளின் வாழ்வை படம் பிடிப்பவரும், சுற்றுச் சூழல் ஆர்வலருமான திரு.சரவண குமார். அவர் மேலும் கூறுகையில், மெரினாவில் அனைத்து மரக் கன்றுகளையும் நடுவதற்கு இடமில்லையென்றும், மேலும் நடப்படக்கூடிய கன்றுகள் முற்றும் வளர்ச்சி பெறுமளவு பராமரிகப்படுமா என்பதையும் கருத்தில் கொள்ள வேண்டும் என்று கூறுகிறார். அதாவது சுமார் பத்தாயிரம் மரங்கள் வளர்க்க வேண்டுமென்றால், சுமார் முப்பதாயிரம் கன்றுகளை நடவேண்டுமாம். மெரினாவில் இடமிருக்கிறதா??

ஏற்கனவே தமிழகத்தில் பருவ மழை சரிவரப் பெய்வதில்லை. அதிலும் குறிப்பாக சென்னையில் மழை என்றாலே அது வங்கக் கடல் புயலை நம்பித்தான். இந்த வருடம் அதுவும் சரிவர இல்லை. தவிர, உலக வெப்பமயமாதலால் சென்னை நகரம் 2100 க்குள் கடலில் மூழ்கும் அபாயம் ஏற்படலாம் என்ற விஞ்ஞானிகளின் பகீர் ஆய்வு வேறு பயமுறுத்துகிறது. இந்நிலையில் இரண்டாயிரம் காஸ்ட்லியான உயிர்களை பலி கொடுத்து பெரியார் பெயரில் ஒரு நூலகமும் (உ.வே.சா பெயர் வைத்தாலும் கூட), சட்ட மன்றக் கட்டிடமும் அவசியம்தானா? ஏற்கனவே இருக்கின்ற சட்டமன்றக் கட்டிடத்தில் விவாதங்கள் நடத்தியே துவரம் பருப்பு விலையையும், காய்கறி விலையையும் குறைக்க முடியவில்லை. மொத்தத்தில் எது முக்கியமோ அதற்கு முக்கியத்துவம் கொடுக்கப்படுவதில்லை.

இதற்கு என்ன பதில் ?

நமது முந்தைய ஜனாதிபதி திரு.அப்துல் கலாம் அவர்களுக்கும், இன்றைய ஜனாதிபதி திருமதி.ப்ரதிபா பாட்டீலிற்கும் இருக்கும் வித்யாசங்களை எண்ணி மாளாது
முந்தைய ஜனாதிபதி சுற்றுச் சூழலை பாதுகாக்கும் பொருட்டு மரங்களை வளர்க்க வேண்டுகோள் விடுக்கிறார். ஆனால் இன்றைய ஜனாதிபதி சென்ற ஆண்டு அந்தமான் பயணம் மேற்கொண்ட போது அவரது ஹெலிகாப்டர் தரையிறங்குவதற்காக சுமார் 400 மரங்கள் அடியோடு வெட்டி சாய்க்கப்பட்டன. இதற்கு பதிலாக ஐந்து மரக் கன்றுகள் வேண்டாம் மொத்தமாக 10 மரக் கன்றுகள் நட்டாலே போறும். வெட்ட பட்ட மரங்களில் பெரும்பாலனவை 100 வயதுக்கு மேல்.

கோபன்ஹேகன் காலநிலை மாநாடு பற்றி வாய்கிழிய விவாதித்தால் மட்டும் போதாது. அதற்கு முன்னுதாரணமாகத் திகழ முயற்சிக்கவாவது வேண்டும். ஒருபுறம் பைசா பெறாத பயணத்திற்காக 400 மரங்களை வெட்டி சாய்க்கிறோம். மறுபுறம் சுற்றுச்சூழல் பாதுகாப்பு பற்றி உபன்யாசம் செய்கிறோம்.

முட்டாள்களை மர மண்டை என்று சொல்லுகிறோம். படத்தில் மரத்துக்கு இருக்கும் அறிவு கூட நமக்கு இல்லை.

( கட்டுரை கூட்டணி: யதிராஜ் + இட்லிவடை )