சன்டேனா இரண்டு (6-12-09) செய்திவிமர்சனம்

இந்த வாரமும் அனுபவம் பேசுகிறது...

செய்தி # 1

கடந்த வார பதிவின் , விடுமுறையில் கோவில்களுக்கு சென்ற என் அனுபவங்களின் தொடர்ச்சி இந்த வாரமும்.

'க்ஷத்திரம் சரீரப் பிரஸ்தாரம்' - என்கிறது கோவிலின் வடிவம் பற்றிய ஆகம விதி.நமது மனித உடலின் சூட்சும வடிவம்தான் கோவில் என்று படித்து இருக்கிறேன். இதையே, திருமூலர் தனது திருமந்திரத்தில் " உள்ளம் பெருங்கோயில் ஊனுடம்பு ஆலயம்" என்கிறார்.

சென்னையில் உள்ள என் உறவினர் வீட்டிற்க்கு சென்றபோது, அவர்கள் ஒரு கோவிலுக்கு அழைத்து செல்வதாக சொன்னார்கள். மறுநாள் காலையில் கிளம்பினோம். முன்னதாகவே கார் புக் செய்து இருந்தனர். அது ஒரு விடுமுறை நாள் என்பதால் கோவிலில் கூட்டம் அலைமோதியது. 50 ரூபாய்க்கு அர்ச்சனை தட்டு வாங்கி, சுமார் ஒரு மணிநேரம் 'க்யூ' வில் நின்று, அர்ச்சனை முடிந்து, அர்ச்கருக்கு 100 ரூபாய் தட்சணை கொடுத்து (இதற்கு குறைவாக கொடுத்தால், கவுரவ குறைவு நேரும் சூழ்நிலை வந்துவிட்டது)...எல்லாம் முடிந்து ஒரு வழியாக வெளியில் வந்தோம்.

"அப்பாடா ..கரெக்ட் டயம். அந்த ......ஹோட்டல் இங்கதான் இருக்கு. கொஞ்சம் லேட் ஆகி இருந்தா டிபன் முடிஞ்சு இருக்கும். பொங்கல் ரொம்ப சூப்பரா இருக்கும்" என்று அந்த வீட்டு பெண்மணி சொன்னார்.

இறை தேடுவதோடு இரை தேடல்.

கோவிலுக்கு செல்வது கூட இங்கே அவசர கதி...எந்திர மயம். பக்தர்களை வெளிய அனுப்புவதில் அர்ச்கர்களுக்கு அதை விட அவசரம்.ஆன்மீக பயணமாகவும் இல்லாமல், இன்ப சுற்றுலாவாகவும் இல்லாத ஒரு அனுபவம் அது.


கோவிலுக்கு வருவோர் மூன்று முறை பிரகாரங்களை வலம் வருதல் வேண்டும். காலையில் வலம் வருதல் நோய்கள் நீக்கும், பகலில் வலம் வருதல் விருப்பங்களை நிறைவேற்றும்,மாலையில் வலம் வருதல் பாவங்களை போக்கும், அர்த்தசாம வலம் மோட்சம் தரும் என்கிறார்கள் பெரியோர்கள்.

எனது சொந்த ஊரான சிதம்பரத்தில்,நடராஜர் கோவிலுக்கு சேர்ந்து போனாலும் சரி. தனியாக போனாலும் சரி. சுவாமி தரிசனம் முடிந்து குறைந்தது ஒரு மணி நேரமாவது வெளிபிரகாரத்தில் அமைதியாய் அமர்ந்து இருப்பேன். அவ்வாறு அமரும் போது, கோவிலுக்கு வந்ததின் முழு பலனையும் அடைவதாக, மனம் மிகவும் லேசாவதாக உணருகிறேன்.


'கோபுர தரிசனம் பாப விமோசனம்' என்று அடிக்கடி கூறுவார் எங்கள் பாட்டி. எங்காவது வெளியூர் பயணம் போகும்போது, பேருந்தின் சன்னல் வழி தெரியும் கோபுரங்களை கண்டு, கன்னத்தில் போட்டுக்கொண்டே வரும் வாழக்கம் உடையவர் அவர். அவரது இந்த பழக்கத்தை அப்போது நான் கிண்டல் செய்தது உண்டு. இப்போது, கோவில்கள் இல்லாத வெளிநாட்டில் பணி நிமித்தமாக இருக்கும் போதுதான் நம் கோவில்களின் அருமை புரிகிறது. பாட்டியின் அருமையும்.

ராஜகோபுரம் என்பது ஒரு லிங்க ரூபம், ஸ்தூல லிங்கம் என்று படித்தேன்.

வெளிப்பிரகாரத்தில் அமர்ந்து காலையும் , மாலையும் புறாக்கள் பறக்கும் கோபுரங்களின் அழகை ரசித்தது உண்டா நீங்கள்?


கோயிலுக்குள் இருந்து வெளியேறும் போது, கொடிமரத்தின் முன்னால் மட்டும் சாஷ்டாங்க நமஸ்காரம் செய்ய வேண்டும். பஞ்சஅங்க நமஸ்காரம் என்பது பெண்களுக்கு. தலை, கைகள், முழந்தாள் ஆகிய அங்கங்கள் மட்டும் தரையில் படும் விதத்தில் வழிபாடு செய்வது.அஷ்டாங்க நமஸ்காரம் என்பது ஆண்களுக்கு. தலை, காதுகள், கைகள், தோள்கள், முகவாய்க்கட்டை ஆகிய எட்டு உறுப்புக்களும் பூமியில் படும்படி வணங்குதல்.

கல்லூரி படிக்கும் நாட்களில், கோவிலுக்கு போனால், குனிந்து, விரல்களால் தரை தொட்டு, முத்தம் இடுவேன். அதுதான் நான் செய்யும் நமஸ்காரம். சட்டை அழுக்காகிவிடும் என்ற பயம் அல்லது ஸ்டைல் என்று கூட வைத்து கொள்ளலாம்.

நமஸ்காரம் என்பது "உன் பாதங்களே சரணம் '' என்னும் ஒரு சரணாகதி தத்துவம் என்று பின்னால்தான் புரிந்து கொண்டேன். இப்போதும், பலபேர் கோவில்களில் இந்த மாதரியான 'ஸ்டைல்' நமஸ்காரம் செய்வதை பார்க்க நேரிட்டது.

கோவில்களுக்கு செல்லும் முன்பு, சிறிது நேரம் நமது வீட்டு பூஜை அறையில் பிராத்தனை செய்து, நமது மனத்தை தயார் படுத்துதல் நலம் என்று தோன்றுகிறது. மீண்டும், கும்பகோணம் பக்கம் வருவோம்.

தஞ்சை மாவட்டம் பாபநாசம் அருகே இருக்கும் 108 திவ்ய தேசங்களில் ஒன்று திரு கவித்தலம் என்னும் கபிஸ்தலம். கஜேந்திர மோட்ச தலம். திருமங்கை ஆழ்வரால் பாடல் பெற்ற தலம்.
காவேரி கரையில் இருப்பதால் ஆற்றங்கரை கண்ணன் என்று அழைக்கப்படும் மூலவர் கஜேந்திர வரதர். தாயார் ரமாமணிவல்லி. இங்கு இருக்கும் இந்த கோவிலின் அருமைகள் குறித்து உள்ளூர்க்காரர்களுக்கே தெரியவில்லை என்பது பெரிய சோகம்.

ஒரு நண்பர் குறிப்பிட்டதை போல, பிஸினஸ்சென்டர் ஹைடெக் கோவில்களுக்கும், பிசியான கோவில்களுக்கும் செல்வது வெறும் கால,பண விரயம்தான்.

அதற்கு பதிலாக, கும்பகோணம் என்று இல்லை. உங்கள் பகுதிக்கு அருகாமையில் இருக்கும் ஒரு புராதன கோவிலுக்கு செல்லுங்கள். அங்கு நந்தவனத்தில் பூத்து இருக்கும் மலர்களை உங்கள் கரங்களால் பறித்து அர்ச்சனைக்கு தாருங்கள்.

தரிசனம் முடிந்த பின், பிரகாரத்தில் மௌனமாய் அமருங்கள். கோவிலின் வரலாற்றை, பழமையை நினைவு கூறுங்கள்.

கோவிலுக்கு உங்களால் இயன்ற உதவிகளை செய்யுங்கள். குறைந்த பட்சம் இருண்டு கிடக்கும் கோவிலுக்கு ஒரு மின் விளக்காவது பொறுத்துங்கள். .

உங்களின் ஆன்மீக பயணம் கலை உணர்வை தூண்டுவதாய், மன நிறைவையும் அமைதியையும் தருவதாக இருக்கட்டும்.

"ஆலயம் தொழுதல் சாலவும் நன்று"

செய்தி # 2

அரசியல்,சினிமா செய்திகள் கடந்து ஆன்மீக பதிவுகள் உருவான விதமும், நன்றி அறிவித்தலுமே இன்றைய இரண்டாவது செய்தி.

புள்ளப்பூதங்குடி கோவிலின் தொடர்பு எண் வேண்டும் என்று வெளிநாட்டில் இருக்கும் வாசகர் ஒருவர் கேட்டதாக சொன்னார் இட்லி. அந்த நண்பர் அங்கு இருந்தபடியே பணம் அனுப்பி ,பூஜை நடத்த் விரும்புவதாகவும் சொன்னார்.

நான் எதுவும் குறித்து கொள்ளவில்லை.பாபநாசத்தில் இருக்கும் எனக்கு நன்கு தெரிந்த ஒரு அர்ச்சகர் ஒருவரை தொடர்பு கொண்டு கேட்டதற்கு அவர் தந்த பதில் இதோ...

"கேட்கிறததுக்கு ரொம்ப சந்தோஷமா, பெருமையா இருக்கு இன்பா. இப்போ அவர் உத்தியோக நரஸிம்மரை மனசார நினைத்து வேண்டி கொள்ளட்டும். எப்போ முடியுதோ அப்போ நேரில் வந்து பூஜை செய்தால் போதும். அல்லது இந்த பக்கம் இருக்கிற அவரோட நண்பரையோ இல்ல உறவினரையோ கோவிலுக்கு நேரா வந்து பூஜை பண்ண சொல்லுங்க. பகவான் சேவை வியாபாரம் ஆகி விட கூடாது". என்றார்.

என்ன நண்பர்களே..அவர் சொல்வது சரிதானே?

இது போன்ற கோவில்கள் பற்றி எல்லாரும் தெரிந்து கொள்ளவேண்டும் என்பதுதான் என் பதிவுகளின் நோக்கமும். மறைந்து கிடக்கும் கிராமத்து கோவில்கள் பற்றி சிறப்பு பதிவுகள் எழுத விரும்புகிறேன். ஆண்டவன் அருள் புரிவாராக.


சொந்த அனுபவங்களை எழுதுமாறு சொல்லி, முழு சுதந்திரம் தந்து இருக்கும் இட்லி வடை அவர்களுக்கு முதல் நன்றி.எனது குடும்பத்துக்கும், எனது தனிப்பட்ட ஆன்மீக சிந்தனைகளுக்கும் வழி காட்டியாய் விளங்கி வரும் என் பாட்டியார் சந்தான லட்சுமி அவர்களுக்கு என் வணக்கங்கள்.

பொறுமையாய் படிக்கின்ற வாசக நண்பர்களுக்கும் நன்றிகள் பல.

(இனி ..அடுத்த வாரம்)

அன்புடன்,
இன்பா