வாய் நிறைய வாக்குறுதிகள்!

தேர்தலுக்குத் தேர்தல் அனைத்து அரசியல் கட்சிகளும், அதன் தலைவர்களும் வாக்குறுதிகளை அள்ளி வீசுவது சகஜமே!! கடந்த பாராளுமன்றத் தேர்தலின் போது, திமுக, தங்கள் கட்சி வெற்றி பெற்று மத்திய ஆட்சியில் பங்கு வகிக்கும் நிலை வந்தால் சென்னையை குடிசைகளே இல்லாத நகரமாக்குவேன் என்றும் கூவத்தை 1967 - ல் சொன்னது போலவே மணக்கச் செய்வேன் என்றும் உறுதியளித்தது. சமீபத்தில் விஜயகாந்த் கூட ஸ்ரீவைகுண்டம் இடைத்தேர்தலில் தேமுதிக வெற்றி பெற்றால், ஸ்ரீவைகுண்டத்தை வைகுண்டமாக மாற்றுவேன் என்றார். இவற்றையெல்லாம் கூட ஒரு வகையில் சேர்த்து விடலாம். அதாவது கடினமாக முயன்றால் செய்துவிடலாம். ஆனால் விஷயம், விடுதலை சிறுத்தைகளின் திருமாவளவன் தேர்தலுக்கு முன் வீரவுரையாற்றிய கூட்டங்களில் அளித்த இரு வாக்குறுதிகள் பற்றியது. ....

1. கடந்த ஆண்டு கோவையில் ஏதோ ஒரு பொதுக்கூட்டத்தில் வீரவுரையாற்றிய, இனமான மற்றும் மானமிகு திருமாவளவன் அவர்கள் பாபர் மசூதியை கட்டவதற்காக தனது தொண்டர்படையுடன் சிறப்பு ரயில் மூலமாக அயோத்திக்கு டிசம்பர் மாதம் கிளம்பப் போவதாக மிகப்பெரிய அதிர்வெடியைத் தன்னாலும் வீச முடியும் என நிரூபித்தார். ஆனால் என்ன காரணமோ தெரியவில்லை டிசம்பர் மாதம் வந்து சென்றுவிட்டது ஆனால் திருமாவளவன் இன்னும் கிளம்பிய பாடில்லை.இந்த வருடம் கிளம்பப் போவதாக போன வருடம் கிளம்பாததற்கு காரணம் கற்பித்தார். எந்தவொரு பதவியிலுமில்லாத போதே மசூதி கட்டப் புறப்படப் போவதாகச் சொன்னவர் இப்போது மத்திய அரசை ஆதரிக்கும் கூட்டணியில் ஒரு பாராளுமன்ற உறுப்பினராக இருக்கிறாரே?? சொன்னதைச் செய்வாரா திருமா?? மசூதியோடு சேர்த்து ராமர் கோவிலையும் கட்டுவாரா "மதச்சார்பற்ற" "திருமால்" வளவன்??


2. அவரது இரண்டாவது வாக்குறுதி, முதல் வாக்குறுதியைத் தூக்கிச் சாப்பிடுமளவிற்கு பெரிய அணுகுண்டு. அதுவாவது, இலங்கையில் நடக்கும் இனப்படுகொலைக்கு துணைபோவதாக அகில இந்திய காங்கிரஸ் கட்சியை தூஷித்து, அதன் தமிழக கிளையை புல் பூண்டு இருந்த இடம் தெரியாமல் அழிக்கப்போவதாக சபதமியற்றினார். பிறகு இடையில் என்ன பேரங்கள் நிகழ்ந்தனவோ வாக்களர்களாகிய நம்மைப் போன்ற மூடர்களுக்குத் தெரிய வாய்ப்பில்லை. திடீரென்று அன்னை சோனியா காந்திதான் இலங்கைத் தமிழர்களுக்கு இருக்கும் ஒரே நம்பிக்கைச் சுடர், விடிவெள்ளி என்றெல்லாம், ஸ்டாலினைப் புகழும் தமிழக காங்கிரஸார் போல் அன்னையைத் துதிக்க ஆரம்பித்து விட்டார். இதற்கு காரணம் என்னவாக இருக்கும் என பல்வேறு விதமாக ஆராய்ந்தும் வாக்காளர்களின் சிற்றறிவுக்கு எட்டவில்லை. ஒருவேளை, இலங்கையில் தமிழர்கள் இனப்படுகொலை செய்யப்படவே இல்லையா அல்லது அதற்கு இந்திய அரசாங்கம் அதாவது காங்கிரஸ் கட்சி உடந்தையாக இல்லை என்று நம்பத் தகுந்த புலி வட்டாரங்கள் மூலமாக திருமாவிற்கு தகவல் கிடைத்து விட்டிருக்குமா அல்லது வேறு ஏதாவதா?? ஆக இனி காங்கிரஸ் வளர்வதற்கு திருமா பாடுபடப் போகிறாரா?? வாக்குறுதி என்னவாயிற்று??

--யதிராஜ சம்பத் குமார்

நீதி: திருமா வளவள என்று பேசுவார் அதை எல்லாம் சீரியஸாக எடுத்துக்கொள்ள கூடாது.