பதவி படுத்தும் பாடு..!!

ஆந்திர முதல்வர் Y.S.ராஜசேகர ரெட்டி ஹெலிகாப்டர் விபத்தில் அகால மரணமடைந்த சம்பவம் மிகப்பெரிய அதிர்ச்சி மற்றும் சோகத்தினைத் தோற்றுவித்திருக்கும் இவ்வேளையில் அடுத்ததாக ஒரு சோகம் அவரை அடக்கம் செய்வதற்கு முன்பாகவே ஆரம்பித்து விட்டது. அது அடுத்த முதல்வர் யாரென்ற கேள்விதான். ராஜசேகர ரெட்டி இறந்தவுடன் ஆந்திர நிதியமைச்சரும் ஆந்திர மூத்த காங்கிரஸ் தலைவருமான திரு.ரோஸையா தற்காலிக முதல்வராக நியமனம் செய்யப்பட்டார். மேற்கொண்டு நடவடிக்கைகள் ஒருவார துக்ககாலத்திற்கு பிறகு மேற்கொள்ளப்படுமென காங்கிரஸ் காரிய கமிட்டியில் முடிவு செய்யப்பட்டிருந்தது.

இவை ஒருபுறமிருக்க, நேற்று மதியமே அதாவது ஆந்திர முதல்வர் அடக்கம் செய்யப்படுவதற்கு சில மணிகளுக்கு முன்பாகவே சுமார் 120 ஆந்திர சட்டசபை உறுப்பினர்கள் ( YSR ஆதரவாளர்கள்) அடுத்த முதல்வராக மறைந்த ஆந்திர முதல்வரின் மகன் ஜெகன் மோகன் ரெட்டியே நியமிக்கப்பட வேண்டும் என கோஷங்கள் எழுப்பத் துவங்கி விட்டனர். அதுமட்டுமில்லாது மொத்த காங்கிரஸ் உறுப்பினர்களான 154 பேரில், 120 பேர்களின் ஆதரவு ஜெகன் மோகன ரெட்டிக்கே இருக்கிறது என்று ஒரு அடையாள அணிவகுப்பையும் நடத்தி விட்டனர். இதற்கிடையே அடுத்த முதல்வர் பதவிக்கு சில சீனியர் காங்கிரஸார் மத்தியில் போட்டியிருப்பதாக ஹேஷ்யங்கள் நிலவுகின்றன. ஆந்திர பிரதேச காங்கிரஸ் கமிட்டித் தலைவரான திரு.ஸ்ரீனிவாஸ் மற்றும் பாராளுமன்ற உறுப்பினரான ஜெய்பால் ரெட்டி மற்றும் சிலர் இப்போட்டியில் இருப்பதாகத் தெரிகிறது. மேலும் ஜெகன் மோகன ரெட்டியை முதல்வராக ஏற்பதில் இவர்களுக்கு கருத்து வேறுபாடு இருப்பதாகவும், இச்சமயத்தில் அதனை வெளிப்படுத்துவது விவேகமாக இராது என்ற காரணத்தால் அவர்கள் அமைதி காப்பதாக பத்திரிக்கைச் செய்திகள் தெரிவிக்கின்றன.

கூட்டம் சேர்த்துக் கொண்டு கோஷ்டி கானம் இசைப்பது என்பது காங்கிரஸாரின் மரபு போலும். இது எம்மாநிலத்திற்கும் விதிவிலக்கில்லை என்றாகிவிட்டது. இவர்கள் அடையாள அணிவகுப்பு நடத்தியதோடு மட்டுமல்லாமல், இந்திராவிற்குப் பிறகு ராஜீவ் பிரதமராகப் பொறுப்பேற்றார் ஆதலால் ராஜசேகர ரெட்டிக்குப் பிறகு அவரது வாரிசான ஜெகன் மோகன் ரெட்டி முதல்வராக்கப்படுவதில் தவறில்லை எனவும், ஓமர் அப்துல்லா மற்றும் ஏ.கே.அந்தோணி போன்றோர் அவர்களது இளவயதிலேயே முதல்வராக்கப்பட்டுவிட்டனர் எனவும் தங்களது கோஷ்டி கானத்திற்கு ஸ்ருதி கூட்டுகின்றனர். இவர்களின் இக்கூற்று மத்திய காங்கிரஸாரிடையே எரிச்சலை ஏற்படுத்தியுள்ளதாகத் தெரிகிறது. இந்த துக்ககரமான வேளையில் இது போன்ற கோரிக்கைகள் பரிசீலிக்கப்பட மாட்டாது என்றும் ஒரு வார காலத்திற்குப் பிறகு மேலிட காங்கிரஸ் காரிய கமிட்டியில் இதுகுறித்து இறுதி முடிவெடுக்கப்படுமென வீரப்ப மொய்லி அறிவித்திருக்கிறார். வாரிசு அரசியல் என்பது இந்திய அரசியலில் தவிர்க்கமுடியாத ஒன்று என்றாகிவிட்ட நிலையில், இவர்களின் கோரிக்கையும் தவிர்க்க இயலாததே. ஆயினும் அடக்கம் செய்யப்பட்ட இடத்தில் மண்ணின் ஈரம் கூட இன்னும் உலராத நிலையில் இவர்களின் கோஷ்டி கானத்திற்கு ஜெகன் மோகன ரெட்டி கூட எதிர்ப்பு தெரிவிக்கவில்லை. கையை உயரே உயர்த்தி அரசியல் வாதிகளின் ட்ரேட் மார்க வணக்கத்துடன் டெலிவிஷன் சானல்களில் காட்சியளிக்கிறார். இந்நிலை அவரின் தந்தை இறந்த சோகத்தை விட மேலானது.


அண்ணன் எப்பொழுது கிளம்புவான், திண்ணை எப்பொழுது காலியாகும் என்ற பழமொழிதான் நினைவுக்கு வருகிறது இந்த அவலங்களைப் பார்க்கும் போது.


- யதிராஜ சம்பத் குமார்