பசுமை புரட்சி வேண்டும், பராசக்தி - இன்பா

ஒருநாள் பாரதியின் கனவில் பராசக்தி தோன்றுகிறாள். 'என்ன வரம் வேண்டும் கேள்' என்கிறாள். கோடி,கோடியாய் செல்வங்களுக்கு பதில் அவன் கேட்டது ஒரு வாழ்க்கைமுறை. கவிதை போன்ற வாழ்வை கவிதையாய் கேட்கிறான்.

"காணி நிலம் வேண்டும் - பராசக்தி,காணி நிலம் வேண்டும் " என்றவன் கூடவே நன்மாடங்களுடன் அங்கு ஒரு மாளிகை, கேணி, பத்துப் பன்னிரண்டு தென்னை மரங்கள், நிலாவொளி,கத்துங் குயிலோசை, இளம் தென்றல் இவையெல்லாம் வரமாய் கேட்டான்.

ஒரே மாதரியான வாழ்க்கை, வாகன புகை, கட்டிடங்கள், மேலதிகாரிகளின் அதிகாரம்
எல்லாவற்றுக்கும் மேலாக ஒவ்வொரு நாள் காலையிலும் நாம் இன்றைக்கு வேலையில் இருப்போமா,இல்லையா என்று தெரியாமல் எப்போதும் நமக்குள் இருக்கும் பதற்றம்... இந்த சூழ்நிலையில் பாரதி கேட்ட வாழ்க்கை நம்மை போன்றவர்களுக்கு வெறும் கனவு அல்லது கவிதைதானா? அப்படி ஒரு வாழ்க்கைமுறை நமக்கு எப்போது, எப்படி கிடைக்கும்?

எந்திரமயமான வாழ்க்கை, வேலையில்லா திண்டாட்டம் - இந்த இரண்டுக்கும் ஒரே தீர்வு கிடைக்குமா? விவசாய நாடான இந்தியாவில், 'உழவுத்தொழில்' இதற்க்கு ஏன் ஒரு நல்ல, நிரந்தரதீர்வாக இருக்கமுடியாது?

'முடியும்' என்று அழுத்திசொல்கிறார் இயற்கை வேளாண் விஞ்ஞானி நம்மாழ்வார். அவர் கூறும் இயற்கை வேளாண்மை என்பது , மண்ணை நாசமாக்கும் செயற்கை உரங்கள் எதையும் பயன்படுத்தாமல் எரு, மண்புழு போன்ற இயற்கை வசதிகளை பயன்படுத்துவது ஆகும்

"பிறரிடம் வேலைக்காக கையேந்தி நிற்பவர்களாகத்தான் நம் இளைஞர்களைக் கல்வி நிறுவனங்கள் ஆக்கியுள்ளன என்பது இப்போது வெளிச்சத்துக்கு வந்து விட்டது. எந்த ஒரு நாட்டிலும் அடிப்படைத் தொழில் உழவாகத்தான் இருக்க முடியும். அதை மறந்து உழவுத் தொழிலை, பிற தொழில்களுக்கு சேவை செய்யும் ஒன்றாக மாற்றியதற்கு நாம் கொடுத்த விலை மிக மிக அதிகம். கடந்த பத்து ஆண்டுகளில் இந்தியா முழுவதும் தற்கொலைக்குத் தள்ளப்பட்ட விவசாயிகளின் எண்ணிக்கை ஒண்ணே முக்கால் லட்சத்தைத் தாண்டும். நமக்கு ஏற்பட்ட இழப்பு புரிகிறதா? "

"நவீன வேளாண்மையில் நிலத்தடி நீர் உறிஞ்சப்படுகிறது என்றால், இயற்கை வேளாண்மையில் மண்ணின் நீர்ப்பிடிப்புத்தன்மை நிலைநிறுத்தப்படுகிறது. விளைநிலங்களில் பலவகை மரங்களை இணைத்தும், கால்நடைகளை வளர்த்தும் பயிர்த்தொழிலை கைக்கொள்வதுதான் இயற்கை வேளாண்மை.. இவற்றால் பூமியின் வெப்பம் தணியும். காற்றில் கரியமில வாயு குறையும். உலக வெப்ப மயமாதலுக்கு எதிரான சுற்றுச்சூழல் நடவடிக்கைகளில் உள்ளூர் இயற்கை விவசாயியும் கை கோர்ப்பவன் ஆகிறான் " என்று கூறும் அவர் இயற்கை வேளாண்மையில் கிடைக்கும் விளைபொருட்களின் மதிப்பை உணர்ந்துதான் வெளி நாடுகள் பன்மடங்கு விலை கொடுத்து அவற்றை இறக்குமதி செய்கின்றன. அமெரிக்காவிலும் இங்கிலாந்திலும் கூட உழவர் சந்தைகள் முளைக்கின்றன என்கிறார் நம்மாழ்வார். .

இதைபோலவே, விவசாயத்திற்க்கான இன்னொரு திட்டம்.... நடைமுறையில் வெற்றிகரமாக, சத்தமில்லாமல் சாதித்துகொண்டிருக்கும் ஒரு திட்டம் பற்றி பார்ப்போம்.

பசுமைபுரட்சியின் தந்தை என்று பாரதரத்னா விருது பெற்ற மறைந்த டாக்டர் c. சுப்ரமணியன் அவர்கள் " விவசாய நிலங்களுக்கு தனித்தனி குணங்கள் உண்டு. ஒட்டு மொத்தமாக ஒரே மாதிரியான விதைகளையும் உரங்களையும் நிலத்தில் பயன்படுத்தாமல் அந்தந்த நிலங்களின் தன்மைக் கேற்றவாறு பயன்படுத்த வேண்டும்..அதற்குத் தேவையான நீர்நிலை மேலாண்மையும் அறுவடைக்கு முன்னால் தேவைப் படும் தொழில் நுட்பமும் விவசாயிகளுக்கு அளிக்கப் பட வேண்டும்..வெறும் விவசாய உற்பத்தி மட்டுமல்லாமல் உணவுப் பொருளை பதப்படுத்துதல், செறிவுபடுத்துதல் உணவுப் பண்டமாக மாற்றுதல், மற்றும் மார்க்கெட்டிங் பற்றியும் விவசாயி அறிந்து கொள்ள வேண்டும்..இதையெல்லாம் விட முக்கியமான ஒன்று நவீன விவசாய டெக்னிக்குகள் சுற்றுச்சூழலை கெடுக்காமலும் மனிதர்களுக்கு தீங்கு விளைவிக்காமலும் இருக்க வேண்டும்." என்று கூறி, இதற்க்கு செயல் வடிவம் தருவதற்க்காக அவர் தொடங்கிய அமைப்புதான் NAF எனப்படும் National Agro Foundation. இதை அவர் தொடங்கும்போது அவர் வயது 90.

என்ன செய்கிறார்கள் என்றால், நவின இயந்திரங்கள், புதிய பரிசோதனை முறைகள் சுருங்க சொன்னால் "ஹைடெக் விவசாயம்" அல்லது "விஞ்ஞான வேளாண்மை" எனலாம். நடைமுறையில் செலவு எப்படி என்றால், சாதரணமாக ஒரு விவசாயி மண் பரிசோதனை செய்ய ரூ. 800 ஆகிறது, ஆனால் இந்த NAF அமைப்பிடம் வெறும் ரூ.50 மட்டுமே ஆகிறது.

நதிநீர்பிரசினை, பொய்க்கும் வானம் இவற்றையெல்லாம் தாண்டி, NAF உதவியோடு சத்தம்போடாமல் சாதித்து காட்டிஇருக்கிறார்கள் நம் காஞ்சிபுரம் மாவட்ட விவசாயிகள்.

இந்த மாவட்டத்தில் 40 கிராமங்களில் சுமார் 1200 ஏக்கர் விவசாய நிலங்களில் டெக்னாலஜியுடன் கூடிய பல்முக முன்னேற்றத்தைக் கொண்டு வந்து காட்டியிருக்கிறது NAF அமைப்பு. அரிசி, கரும்பு, ரோஜா, காய்கறிகள், வேர்கடலை, சோளம் போன்ற பயிர்வகை களில் 40 முதல் 150 சதவீதம் வரை லாபத்தை ஈட்டியிருக்கிறார்கள்

"விஞ்ஞான முறைகள் குறித்து, விவசாயிகளிடம் விளக்குவதுதான் ஆரம்பத்தில் சிரமம்" என்கிறார் இந்த அமைப்பை தற்போது நடத்திவரும் சி.எஸ் அவர்களின் மகன் ராஜசேகர். From Lab to Land என்பதே இவர்களது கான்செப்ட்.

காஞ்சிபுரம் மாவட்ட மாற்றங்களை நேரடியாகபோய் பார்த்துவிட்டு, "இளைஞர்களே வாருங்கள் விவசாயத்திற்கு" என்று அழைப்பு விடுத்திருக்கிறார் டாக்டர் அப்துல்கலாம் அவர்கள்.

"காஞ்சிபுரம் மாவட்ட விவசாய நிலங்களில் நான் கண்ட காட்சிகள் மிகவும் அற்புதமானவை. நவீன இயந்திரங்கள் வயல்வெளிகளில் இயங்கிக் கொண்டிருந்தன. விவசாயிகள் தங்கள் நிலத்தின் மண்ணை ஆராய்ச்சிக் கூடங்களில் கொடுத்து அதன் தன்மையைக் கேட்டறிந்து கொண்டிருந்தார்கள். அவர்களின் நிலத்தின் தன்மைக் கேற்றவாறு எத்தகைய உரங்களை, உழும் முறைகளைப் பயன்படுத்த வேண்டும் என்று நிபுணர்கள் சொல்லிக் கொடுத்துக் கொண்டிருந்தார்கள். ஆராய்ச்சிக் கூடத்தில் அதுவரை சுமார் 7000 மண்வகைகளை டெஸ்ட் செய்திருப்பதாகச் சொன்னார் ஒரு நிபுணர். "முன்பைவிட இப்போது நான் மும்மடங்கு அதிகம் சம்பாதிக்கிறேன்'' என்று ஒரு விவசாயி மகிழ்ச்சியுடன் சொன்னாரே, அதன் ரகசியங்கள் இவைதான். 'நிலமென்னும் நல்லாள் அங்கே பரிபூரண திருப்தியுடன் சிரித்துக் கொண்டிருக்கிறாள' " என்று எழுதுகிறார் கலாம் அவர்கள்.

"காஞ்சிபுரம் மாவட்டத்தில் கண்டது போல் செல்வம் தரும் தொழி லாக விவசாயம் மாறி விட்டால் இளைஞர்கள் ஆர்வமாக அதில் ஈடுபட நிச்சயம் வருவார்கள்" என்று உறுதியோடு, அவருக்கே உரிய நம்பிக்கை கனவோடு கூறுகிறார் டாக்டர் கலாம் அவர்கள்.

படிப்படியாக இந்த திட்டங்களை இந்தியா முழுவதும் செயல்படுத்த இருக்கிறார்கள் NAF அமைப்பினர். அப்படி செய்யும் பட்சத்தில் இந்தியாவில் இன்னொரு பசுமை புரட்சி வரும் நாள் வெகு தொலைவில் இல்லை என்று தோன்றுகிறது. இனி, நம் மாணவர்கள் மற்றும் இளைஞர்களின் சாய்ஸ் 'விவசாயம்' ஆகும் என நம்பிக்கையோடு நாம் காத்திருப்போம்.

இன்று பராசக்தியிடம் நாம் வேண்டும் வரம், நமது கூட்டுபிராத்தனைக்கான வேண்டுகோள் இப்படி இருக்கட்டும். .

"பசுமை புரட்சி வேண்டும், பராசக்தி,பசுமை புரட்சி வேண்டும்"

(நன்றி : நக்கிரன், nationalagro.org மற்றும் ஆலோசனை தந்த என் நண்பன் ஸ்ரீனிவாசன்)