குடுகுடுப்பைக்காரர் வேடத்தில் வந்த எம்.பி

விழுப்புரத்தில் பல பகுதிகளில் குடுகுடுப்பைக்காரர் வேடத்தில் உலா வந்த திண்டிவனம் எம்.பி. கோ.தன்ராஜ்.

திண்டிவனம் பாமக எம்.பி. கோ.தன்ராஜ் குடுகுடுப்பைக்காரர் வேடத்தில் சென்று பொதுமக்களிடம் கருத்துகளை கேட்டறிந்தார்.

திண்டிவனம் எம்.பி. தன்ராஜ், மக்களிடம் நெருங்கிப் பழகி தொகுதி மக்களின் சுக, துக்க நிகழ்ச்சிகளிலும் அடிக்கடி பங்கேற்பார்.

இவர் தன்னைப் பற்றியும், தமது கட்சியைப் பற்றியும் தொகுதி மக்கள் என்ன நினைக்கின்றனர் என்பதை அறியவும், தங்கள் கட்சியினரின் செயல்பாட்டை கண்காணிக்கவும் விழுப்புரம் மாவட்டத்தின் பல்வேறு இடங்களில் செவ்வாய்க்கிழமை குடுகுடுப்பைக்காரர் வேடத்தில் சென்றார்.

இவ் வேடத்தில் விழுப்புரம் மாவட்ட பாமக அலுவலகத்துக்கு வந்தார். அங்கிருந்தவர்களுக்கு இவரை அடையாளம் தெரியவில்லை.

அப்போது "நல்லகாலம் பொறக்குது, உங்கள் கட்சிக்கு நல்ல காலம் பொறக்குது' என்றவாறு வந்தவர், பாமக இளைஞர் அணி மாநாடு குறித்து விசாரித்தார்.

அதன் பின்னரே அடையாளம் கண்டு கொண்ட அவரது கட்சியினர் அவரிடம் சகஜமாக பேசினர்.

இதேபோல் இவர் விழுப்புரத்தைச் சுற்றியுள்ள கிராமங்களுக்குச் சென்று பொதுமக்களிடம் கருத்துகளை கேட்டறிந்தார்.

எசாலம் கிராமத்துக்கு குடுகுடுப்பைக்காரர் வேடத்தில் எம்.பி. வந்ததை அறிந்து அவரை பொதுமக்கள் சூழ்ந்து கொண்டதால் அங்கு பரபரப்பு ஏற்பட்டது.
இட்லிவடை மாதிரி இப்ப எம்.பிக்களும் முகமூடி அணிய ஆரம்பித்துவிட்டார்கள். போட்டோவுக்கு நல்லா போஸ் கொடுத்திருக்கிறார்.

( செய்தி: தினமணி )