உண்ணாவிரதம் = டீ பார்ட்டி ?

தற்போது தமிழ்நாட்டில் இலங்கை தமிழர்களுக்காக ஏதாவது செய்வது ஃபேஷன் ஆகிவிட்டது. தலைவர்கள் மனிதசங்கலி, வேலை நிறுத்தம், உண்ணாவிரதம் என்று ஈசியான வழிகளை கடைப்பிடிக்க, தொண்டர்கள் தலைவர்களை மீது வைத்திருக்கும் மூடநம்பிக்கை காரணமாக தீக்குளிப்பு ஈடுபடுகிறார்கள்....

இன்று 24 ஆண்டுகளுக்குப் பிறகு இலங்கைத் தமிழர்களுக்காக ஜெயலலிதா உண்ணாவிரதம் இருக்கிறார். (இதற்கு முன்பு கடந்த 1985-ம் ஆண்டு உண்ணாவிரதம் இருந்தார். )

ஜெயலலிதா உண்ணாவிரதம் முழுக்க முழுக்க அரசியல். ஒரு பேச்சுக்கு தேர்தல் அடுத்த வருடம் தான் இந்த வருடம் இல்லை என்று அறிவிப்பு வந்தால் எல்லோரும் அவர்கள் வேலையை பார்க்க போய்விடுவார்கள்.

முன்பு டீ பார்ட்டி வைத்து கூட்டணியை முடிவு செய்தார்கள், ஆனால் தற்போது வெய்யக்காலம் ஆச்சே, அதனால் உண்ணாவிரதம் வைத்து கூட்டணியை முடிவு செய்கிறார்கள்.

இலங்கை தமிழர்கள் மீது எங்கள் கூட்டணி தலைவிக்கு அக்கறை இருக்கிறது. இனிமேல் யாரும் முரண்பட்ட கூட்டணி என்று எங்களை கேலி செய்ய முடியாது என்று வைகோவிற்கு ஒரு ஆறுதல்.

வேற வழியில்லாமல் காலம் கடந்த அறிவிப்பு என்று சொல்லி டாக்டர் ராமதாஸ், முதல்வர் கருணாநிதி, சரத்குமார், திருமாவளவன் ஆகியோர் போராட்டத்தை வரவேற்பதாக கூறியுள்ளனளர்.

ராமதாஸ், திருமாவளவன் அதிமுக பக்கம் போவதற்கு இனிமேல் வாய்ப்பு அதிகமாக இருக்கிறது. திருமாவளவனை திமுக கூட்டணியில் சேர்ப்பதில் காங்கிரஸ் கொஞ்சம் அப்ஜெக்ட் பண்ணும் என்று நினைக்கிறேன். திருமா திமுக கூட்டணியில் இல்லை என்றால் அது ராமதாஸுக்கு தான் நல்லது, கூடுதலாக ஒரு சீட் கிடைத்தாலும் கிடைக்கும்.

ஆனால் ராமதாஸ் கூட்டணி பற்றி இன்னும் முடிவு செய்யவில்லை என்பதையே காட்டுகிறது. 'காலம்கடந்த அறிவிப்பு' என்று இரண்டு நாட்கள் முன்பு கருத்து சொன்னவர், "இலங்கைத் தமிழர்களுக்காக ஜெயலலிதா உண்ணாவிரதம் இருப்பது ஈழத்தமிழர்களுக்கு மிகப்பெரும் ஆறுதலாக இருக்கும்" என்று சில மணி நேரத்துக்கு முன்பு சொல்லுகிறார்.

இந்திய கம்யூனிஸ்ட் பற்றி சொல்லவே வேண்டாம். இவர்களின் சகவாசத்தால் இப்ப ஜெயலலிதாவே உண்டியல் குலுக்க ஆரம்பித்துவிட்டார். ஜாலி தான்.

காங்கிரஸ் பாடு தான் கொஞ்சம் திண்டாட்டமாக இருக்கிறது. ஜெயலலிதாவின் உண்ணாவிரததை எதிர்ப்பதா இல்லை ஆதரிப்பதா என்று குழம்பிபோயிருக்கிறார்கள்.

இலங்கை தமிழர் பிரச்சினைக்காக ஜெயலலிதா திடீர் உண்ணாவிரதம் இருக்கின்றாரே? இது பற்றி உங்கள் கருத்து என்ன? என்று தங்கபாலுவிடம் கேட்டதற்கு அவர் அளித்த பதில்

"இன்னும் இரண்டு நாளில் நிருபர்களை சந்திக்கிறேன். அப்போது அனைத்து கேள்விகளுக்கும் விளக்கமாக பதில் அளிக்கிறேன்"

அதே கேள்விக்கு ஜி.கே. வாசன் அளித்த பதில்

"இலங்கை தமிழர்களுக்காக உண்ணாவிரதம் இருப்பதாக அதிமுக பொதுச்செயலாளர் ஜெயலலிதா அறிவித்துள்ள அரசியல் நாடகம்"

காங்கிரஸில் கோஷ்டி இல்லை என்றால் எப்படி ? அடித்துக் கொள்ளட்டும்.

கடைசியாக இலங்கைத் தமிழர்கள் குறித்து அக்கறை காட்டுவது போல நடித்து தமிழர்களை ஜெயலலிதாவால் ஏமாற்ற முடியாது என்று கனிமொழி கூறியிருக்கிறார்.

அப்பாவிற்கு போட்டியாக யாராவது வந்தால் மகளுக்கு கோவம் வரத்தான் செய்யும். என்ன செய்ய !

பிகு: விஜயகாந்த் பற்றி ஏன் எதுவும் சொல்லவில்லை என்று தயவு செய்து கேட்காதீர்கள். கூட்டணி வைக்கலாமா வேண்டாமா என்று குழம்பி போயிருக்கிறார். தற்போது விஜயகாந்த் கட்சியில் அதிர வைக்கும் “பஞ்ச்” டயலாக் இது
“கூட்டணி வைத்தால் தலைவன் காலி”
“தனித்து போட்டியிட்டால் தொண்டன் காலி”

இன்று உண்ணாவிரத்தில் ஜெயலலிதாவின் பேச்சு

அதிமுக சார்பில் இலங்கையில் படுகொலை செய்யப்பட்டு வரும் இலங்கை தமிழர்களுக்காக எந்தவித நடவடிக்கையும் எடுக்காமல் இலங்கையில் நடைபெற்றுவரும் இனபடுகொலையை தடுத்து நிறுத்தவும், போரை நிறுத்தவும், மத்திய மாநில அரசுகளை கண்டித்தும், இலங்கை தமிழர்களுக்கு ஆதரவு தரும் வகையில் இந்த போராட்டம் நடைபெறுகிறது.

கடந்த ஆண்டு 2008ல் இந்திய அரசு இலங்கைக்கு ஆயுதங்களை அளித்துக்கொண்டு இருப்பதாக பத்திரிகைகளில் செய்திகள் வந்தன. காங்கிரஸ் தலைமையிலான மத்திய அரசு இந்த செய்திகளை மறுக்கவில்லை. இந்திய ராணுவ அதிகாரிகள் இலங்கைக்கு பயணம் மேற்கொண்டதாக செய்திகள் வந்தன. இதற்கு மத்திய அரசு பதில் அளிக்கவில்லை. மாநில அரசும் கேள்வி எழுப்பவில்லை.

இலங்கை ராணுவ வீரர்கள் இந்தியாவில் பயிற்சி மேற்கொண்டார்கள். இதை ஜெயா டிவில் ஒளிபரப்பு செய்யப்பட்டது. இதுகுறித்து நான் எதிர்ப்பு தெரிவித்தேன். ஆனால் கருணாநிதி எதிர்ப்பு தெரிவிக்கவில்லை.

இலங்கையில் நடக்கும் இனப்படுகொலை இந்திய அரசின் ஒப்புதலோடு நடந்துகொண்டிருக்கிறது. இதில் திமுக அரசுக்கும் தொடர்பு உண்டு. ஒரு நாடு மற்றொரு நாட்டுக்கு ராணுவ பயிற்சி அளிப்பது வழக்கமான ஒன்றுதான். ஆனால் இலங்கைக்கு அளிக்கப்படும் பயிற்சி யாருக்காக அளிக்கப்படுகிறது. தமிழர்களுக்கு எதிராக பயிற்சி அளிக்கப்படுகிறது.

இலங்கை அரசுக்கு இந்திய அரசு ஆயுதங்களை அளித்திருக்கிறது. அதிநவீன ஆயுதங்களை அளித்துள்ளது. பயிற்சிகளையும் அளித்துள்ளது. தமிழர்களின் காவலர் என்று சொல்லும் கருணாநிதி, காங்கிரஸ் கட்சிக்கு ஏன் ஆதரவு தருகிறார்.

சட்டத்தின் முன் அனைவரும் சமம், கல்வி மற்றும் வேலை வாய்ப்பில் சம உரிமை ஆகிய இலங்கைத் தமிழர்களின் கோரிக்கைகளை நாங்கள் ஆதரிக்கிறோம். இலங்கைத் தமிழர்களின் சுய நிர்ணய போராட்டத்தை நாங்கள் அங்கீகரிக்கிறோம். இலங்கை அரசியலமைப்புச் சட்டத்திற்கு உட்பட்ட, சுய நிர்ணய அதிகாரம் பெற்ற தமிழர் நாடு வேண்டும் என்ற அவர்களின் போராட்டத்தை நாங்கள் ஆதரிக்கிறோம். ஆயுதம் ஏந்திய போராட்டத்தை எதிர்க்கிறோம்.

இன்று யார் யார் எல்லாம் வந்து ஜெக்கு பொன்னாடை போர்த்துகிறார்களோ அவர்கள் எல்லாம் ஜெ கூட்டணிக்கு வர வாய்ப்பு இருக்கிறது. போர்த்திய பொன்னாடைகளை இலங்கை தமிழர்கள் (மற்றும் தமிழ்நாட்டு தமிழர்கள்) தங்கள் வசதிக்கேற்ப தலையில் போட்டுக்கொள்ளலாம்