மைடியர் பாடிகாட் முனீஸ்வரனே! - 12-09-08

நீண்ட நாட்களுக்கு பிறகு முனி கடிதம்.

மை டியர் இட்லிவடை,

முதலில் ஒரு கேள்வி : காந்திக்கு பிறகு அதிகம் பாதயாத்திரை போனவர் யார் ? விடை கடைசியில சொல்றேன்...

ஹேப்பி ஓணம். காலை எஸ். எஸ். ம்யூசிக் பார்த்தியா? ஓணம் ஸ்பெஷல். ஜிலுஜிலுன்னு எல்லாமே முண்டு கட்டிய பெண்டுகள் பாட்டா போட்டான். பண்டிகைகளை இப்படித்தான் செலிபரேட் செய்யணுமா? ஒரு தார்மீகக் கோபம் வந்தாலும் ப்ரோக்ராமை விடாம பார்த்து முடிச்சிட்டுத்தான் எந்திரிச்சிப் பல் விளக்கப் போனேன்.

ஆய்வுச் சாலை Big Bang நியூஸ் படிச்சியா? ப்ளாக் ஹோல் பிரச்னை அது இதுன்னு பலபேர் பீதி கிளப்பிட்டுத் திரியறாங்க. நீ அதுக்கெல்லாம் பயப்படாத. பிரபஞ்சம் உருவான விதத்தை ரொம்ப சின்ன சைஸ்ல செஞ்சி பாத்திருக்காங்க. அவ்ளோதான். அப்படியே ஒரு ப்லாக் ஹோல் உருவானா, தொட்டு எடுத்து நெத்தில பொட்டா வெச்சிக்கலாம். பெரிய ப்ராப்ளம் எதுவும் இல்லை. ஆனா இந்த சம்பவத்த வெச்சி ஒரு நல்ல சயின்ஸ் ஃபிக்‌ஷன் எழுதலாம்னு தோணுது. சே, இந்த சமயம் பாத்து சுஜாதா செத்துப் போயிட்டாரு. சுஜாதாவுக்கு அடுத்தபடியா வாசகர் வட்டம் உள்லதா சொல்லிக்கறவங்களுக்கு சயின்சும் தெரியாது, ஃபிக்‌ஷனும் தெரியாது. அதான் ப்ராப்ளம். சரி விடு.

அமெரிக்க சாட்டிலைட் ஒன்று இந்தியாவின் தெற்கு பக்கம் பெரிய ப்லாக் ஹோல் இருக்கு என்று அமெரிக்காவுக்கு தகவல் அனுப்பியுள்ளது. உடனே அமெரிக்காகாரர்கள் பிளைட்டை பிடித்து வந்து பார்த்திருக்கிறார்கள். பார்த்தவுடன் தான் அவர்களுக்கு விஷயம் தெரிந்ததாம் - அது பவர் கட்டான தமிழ்நாடு என்று.

அறிவிக்கப்பட்ட மின்வெட்டு, அறிவிக்கப்படாத மின்வெட்டுன்னு ஆற்காடு வீராசாமி சும்மா பூந்து விளையாடறாரு. மக்க்ள் ரொம்ப கொதிச்சிப் போய் இருக்கறதா பத்திரிகைக்காரங்க நியூஸ் போடறாங்க. இப்ப ஏதாவது எலெக்‌ஷன் வந்தா கழக ஆட்சி பூட்டகேசாம். பேசிக்கறாங்க. கலைஞர் என்னடான்னா ரேஷன் கடைல உளுத்தம் பருப்பு என்ன விலை, பயத்தம்பருப்பு என்ன விலைன்னு அரைப்பக்க அட்வர்டைஸ்மெண்ட் குடுத்துக்கிட்டிருக்கார். கூடிய சீக்கிரம் பீகார், ஒரிசா, பாகிஸ்தான், உஸ்பெகிஸ்தான்ல எல்லாம் நம்மைவிட அதிக நேரம் பவர்கட்னு புள்ளிவிவரத்தோட அரைப்பக்க விளம்பரம் குடுக்கறதுக்கு ஏற்பாடு செஞ்சிக்கிட்டிருக்காராம். ஆனா ஒரு விஷயம் தெரியுமா உனக்கு? எங்க எவ்ளோ நேரம் பவர்கட்டாக இருந்தாலும் கட்சிக் கூட்டங்கள்ள நல்லாவே லைட்ஸ் எரியுது. குறிப்பா தி.மு.க. கூட்டங்கள். போன சண்டே ஒரு பக்தன் ஸ்பெஷல் பிரியாணி படையல்னு கூப்பிட்டான். நாக்கு செத்துக் கிடக்கறனேன்னு ஒண்ணாம் நம்பர் பஸ் பிடித்து மந்தைவெளிலேருந்து திருவொற்றியூர் வரைக்கும் போனேன். சொன்னா நம்பமாட்டே. நல்ல சூரிய வெளிச்சம் இருந்த நேரத்துலேருந்து, மிட்நைட் வரைக்கும் ரோடு ஓரம் கொம்பு நட்டு டியூப் லைட்ஸ் எரியவிட்டுக்கிட்டிருந்தாங்க. மொத்தம் எப்படியும் நூறு லைட் இருக்கும். குறைஞ்சது ஏழு மணிநேரம் எரிஞ்சிது. மேடைல யார் யாரோ பேச்சாளர்கள் பேசினாங்க. இலவச கலர் டிவி பத்தி ரொம்பப் பெருமையா பேசினாங்க. டிவிய குடுத்துட்டு கரெண்ட் கட் செஞ்சதப் பத்தி மட்டும் கவனமா பேச மறந்துட்டாங்க.


சரோஜா பார்த்தியா? படம் நல்லா இருக்குனு ரிப்போர்ட். இங்கிலீஷ் பட காப்பின்னு சிலபேர் சொல்றதெல்லாம் பொறாமைல கிளப்பி விடறதாம். அம்மா க்ரியேஷன்ஸ் சிவாவுக்கு ரொம்ப நாளுக்கப்பறம் இது ஒரு நல்ல ப்ரேக்காம். தொடர்ந்து நிறைய படம் செய்யப்போறார்னு என் கோடம்பாக்க ஃப்ரெண்ட் குவார்ட்டர் சுப்புராயன் சொன்னான். பைதவே, சுப்ரமணியபுரம் ஹீரோ ஜெய் சம்பளம் இப்ப எழுவது லட்சமாமே? கேள்விப்பட்டியா? ஒரு படம் ஹிட் ஆகிட்டா உடனே ஏத்திடறாங்க. ஹும். நானும் எத்தனையோ வருஷமா முனி உத்தியோகம் செஞ்சிக்கிட்டிருக்கேன். இன்னும் ஹாஃப் ப்ளேட் ப்ரியாணி, 90 மில்லி சரக்குக்கு மேல யாரும் படையல் போடறதே இல்லை.

இன்னொரு சினிமா நியூஸும் சொல்லிடறேன். இன்னும் ரிலீசே ஆகாத ‘காதலில் விழுந்தேன்’ படம் அந்த நாக்கமுக்க பாட்டால பிரபலமாச்சு இல்லையா? இப்ப அந்த பாட்டை மட்டும் ரீஷூட் செய்து ரெகுலரா சன் டிவில ஆட் போடறாங்க. என்னடானு பாத்தா கலாநிதி மாறன் வழங்கும் சன் பிக்சர்ஸ் வெளியீடாம்! பல காலமா ப்ரொடக்‌ஷன்ல இருந்த படம் அது. பாட்டு ஹிட் ஆனதால வந்த வாழ்வு! சன் டிவி வாங்கிட்டாங்க போல இருக்கு.


தமிழ்நாட்டின் வால் மார்ட் சரவணா ஸ்டோர்ஸ் பற்றி எரிஞ்சத கேள்விப்பட்டேன். ரொம்ப வருத்தமா இருந்திச்சி. அந்தமாதிரி ஒரு நெரிசலான இடத்துல இப்படியெல்லாம் விபத்து நடந்தால் எத்தனை பேருக்கு கஷ்டம்? ஆனா சம்பவத்துக்கு அப்பறம் வர்ற நியூசெல்லாம் ரொம்ப டேமேஜிங்கா இருக்கு. அண்ணன் தம்பிங்களுக்கு நடுவுல பெரிய பகையாம். டிவி விளம்பரங்கள்ள ஹனுமான் மாதிரி குதிச்சி வந்து கைகூப்பிக்கிட்டு இருந்த செல்வரத்தினம் அண்ணாச்சி செத்துப் போனப்ப, அவரோட புள்ளை, தன்னோட சித்தப்பாமார்கள் பத்தி ஏகப்பட்ட புகார் செஞ்சாராம். தன்னோட அப்பா ஏகப்பட்ட மனப்புழுக்கத்தோடதான் செத்ததாகவும், அவரை நிம்மதியா வாழவிடாம சொத்தை அபகரிக்க நினைச்ச அவரோட தம்பிகள் கூடிய சீக்கிரம் என் வயிறு எரியறமாதிரி எரிஞ்சி போவாங்கன்னு அழுதுக்கிட்டே சாபம் விடாராம். அந்த சாபம்தான் இப்ப பத்தி எரிஞ்சிதாம்! எனக்கென்ன தெரியும்? ரங்கநாதன் தெருவுல பேசிக்கிட்டாங்க. நான் பொட்டுக்கடலை சாப்பிட்டுக்கிட்டே நைசா காதைக் கொடுத்துக் கேட்டதுதான்.

டிவிட்டர் பக்கம் போறியா? அது ஒரு வேலைக்காகாத கண்டுபிடிப்புன்னு எனக்குத் தோணுது. ஆரம்ப மயக்கம் சீக்கிரம் தீர்ந்துடும். பொதுத் தகவல்களுக்கு வலைப்பதிவு இருக்கு. தனித்தகவல்களுக்கு ஈமெயில் இருக்கு. உடனே பேசணும்னா மெசஞ்சர். இது எதுவுமில்லாம எல்லாம் கலந்துகட்டி ஒரு மாதிரி கிக் சேராத காக்டெயில் சரக்கா தெரியுது எனக்கு. பேஜர் மாதிரி சீக்கிரம் வழக்கொழிந்துவிடும் என்று தோணுது. உன் கருத்தென்ன?

படம் வருவதற்கு முன்பே பெண் ரசிகர்களுக்கு என்ன கோபமோ :-)











விடை: இந்திய பயணம் பற்றி எழுதிக்கொண்டிருக்கும் எழுதாளர் தான் :-)

இப்படிக்கு,
முனி