"வார்த்தை" - 'ஜெஜெ' ன்னு இல்லை

"வார்த்தை" - ஜெஜெ' ன்னு இல்லை

வார்த்தை மாத இதழ் வந்துவிட்டது வாழ்த்துகள். மங்களகரமான மஞ்சள் அட்டை, ஸ்டாம்ப் சைஸ் படங்கள் என்று அழகாக இருக்கிறது.

உள்ளே ஓவியங்கள் படங்கள் எல்லாம் மற்ற சிறுபத்திரிகைகளை நினைவுபடுத்துகிறது.

முதல் இதழ் என்பதால் ஆர்வம்+டென்ஷனுடன் என்ன இருக்கும் என்று திறந்தால், இனிப்பு விளம்பரமும், "ஆம் ! இந்தியா உலகிற்களிக்கும்!" என்ற தலையங்கமும். (பி.கே.சிவகுமார்)

இந்திய கலையிலக்கிய மரபின் செழுமை, தொன்ம மேன்மை, ஜனநாயகப் பண்பு, பொருளாதார வளர்ச்சி ஆகியவற்றில் பெருமைப்படுகிறவர்கள் தங்களையும் பிறரையும் அறியும் முயற்சி 'வார்த்தை'....என்ற தலையங்கம் நல்லவேளையாக சுத்தமாகப் புரியவில்லை. கடைசியில் 'எந்தரோ மகானுபாவுலு அந்தரிகி வந்தனமுலு' என்ற வரி மட்டும் புரிகிறது. :)

"வார்த்தையில் குறைகள் இருக்கலாம், அவை புதிய குறைகளாக இருப்பின் மகிழ்வோம்" என்கிறார்.

ஆனால் விளம்பரத்தில் கொடுத்திருந்தபடி ஜெயமோகனார் எழுதியது எதுவும் இல்லை. அதனால் ஜெயஸ்ரீ கோவிந்தராஜனும் எழுதவில்லை(சமையல் மாமி அக்கா ). இவர்களை ஈடுகட்டுவதற்காக இன்னும் அதிகமான பேரை எழுதவைத்திருக்கிறார்கள். அப்படியும் முதல் இதழ் ஜெ'ஜெ'ன்னு இல்லை.

"தமிழின் முக்கியமான, முக்கியம் பெறப் போகும் படைப்பாளிகள் முதல் இதழை அணி செய்கிறார்கள். அறிவித்த சிலர் எழுத இயலாமைக்கு வருந்துகிறோம். அறிவிக்காத பலர் எழுதியிருப்பது மகிழ்ச்சி'" என்ற குறிப்பைப் போட்டு சமாதானம் செய்கிறார்கள்.

இருவரும் எழுதாதாததால் மனமுடைந்து நாம் ஆவலுடன் எதிர்பார்த்த ஹரன் பிரசன்னா ஆசிரியர் பொறுப்பிலிருந்து வெளியேறிவிட்டார் என்று தெரிகிறது. (ஜெயமோகன் சார், இந்த விளைவுகளை யோசித்தாவது நீங்கள் கொஞ்சம் பெரியமனது பண்ணியிருக்கலாம்.)

இந்த இதழில் என்னவெல்லாம் இருக்கிறது ?

கேள்வி பதில் பகுதி - ஜெயகாந்தன். சாம்பிளுக்கு ஒன்று...

நவீனத்துவ நோக்கில் எஸ்.ராமகிருஷ்ணன் ஜெயமோகன் குறித்து உங்கள் பார்வை என்ன ?

எல்லாரைக் குறித்தும் ஏதாவது பார்வை வைத்திருக்க வேண்டும் என்பது ஒரு நியதியா என்ன? நான் ஒரு விமரிசகனும் அல்ல, வாசகனும் அல்ல.

(இவர்களுக்கெல்லாம் கேள்வி அனுப்பி பதில் எதிர்ப்பார்ப்பவர்கள் பொறுமைசாலிகள்.)

* குறியிட்ட கேள்விக்கு துக்ளக் ஸ்டைலில் 100ரூ பரிசு. அந்த கேள்வியை படிக்க பக்கம் 3-4க்குச் செல்லவும்.

கட்டுரைகள் 13 இருக்கின்றன. துகாராம், கோபால்ராவ், செழியன், சேதுபதி அருணாசலம், ரெ.கார்த்திகேசு, வ.ஸ்ரீநிவாசன், நாகரத்தினம் கிருஷ்ணா, லதா ராமகிருஷ்ணன், சுகா, கே.எம்.விஜயன், இரா.முருகன், எம்.கே.குமார், மணி வேலுப்பிள்ளை, பி.ச.குப்புசாமி

அஞ்சலி கட்டுரை - கோபால் ராஜாராம்,

புத்தக விமர்சனம் - வே சபாநாயகம்

சிறுகதை - நாஞ்சில் நாடன், அ.முத்துலிங்கம், எஸ்.ராமகிருஷ்ணன், பா.வண்ணன், வெ.இறையன்பு

கவிதை - தமிழச்சி தங்கபாண்டியன், சல்மா, நிர்மலா, பி.கே.சிவகுமார், வ.ஜ.ச.ஜெயபாலன், ஹரன் பிரன்சன்னா. (அந்தப் பக்கங்களை சுலபமாகத் தாண்டி ஓடியேவிட்டேன்.)

மொத்தம் 96 பக்கங்கள். லேயவுட் சூப்பர்.

ஒரு கதையும், இரண்டு கட்டுரைகளும் குறிப்பிடும்படி இருந்தன. அடுத்த இதழ் வரும் வரை இந்த விமர்சனம் போதும்.

கடைசியாக 'ஓர் ஆரம்பப்பள்ளி ஆசிரியரின் குறிப்புகள்' (பி.ச.குப்புசாமி) நன்றாக இருந்தது.

டென்ஷனாக படிக்க ஆரம்பித்த எனக்கு கடைசியில் 'நோ-டென்ஷன் டிராக்டர்' விளம்பரம் அந்த டென்ஷனைப் போக்கியது.

வார்த்தை குழுவிற்கு இட்லிவடையின் வாழ்த்துகள். அடுத்த விமர்சனம் இதன் ஒரு ஆண்டு நிறைவு மலருக்கு.