குடும்ப கட்டுப்பாடு விளம்பரத்தில் ராமதாஸ் - பா.ம.கவினர் கொந்தளிப்பு

`கு.க.' விளம்பர பேனரில் ராமதாஸ் படம்-பா.ம.க.வினர் கொந்தளிப்பு...

ராமநாதபுரம் மாவட்டத்தில் ஆண்களுக்கான நவீன குடும்ப கட்டுப்பாடு அறுவை சிகிச்சை முகாம் கடந்த 24-ந்தேதி முதல் இன்று வரை 3 நாட்கள் நடைபெற்றது. இதற்காக தமிழக அரசின் சுகாதாரத்துறை சார்பில் குடும்ப கட்டுப்பாட்டை வலியுறுத்தி மாவட்டம் முழுவதும் பிரசார ஊர்தி வலம் வந்தது.

இந்த ரதத்தில் பா.ம.க. நிறுவனர் டாக்டர் ராமதாஸ் தலைப்பாகை அணிந்திருப்பதுபோல் படம் அச்சிடப்பட்ட விளம்பரபேனர் கட்டப்பட்டு இருந்தது. அந்த பேனரில், டாக்டர் ராமதாஸ் கூறுவதுபோல், "நான் செஞ்சுக்கிட்டேன்! நீங்க எப்போ?'' என்ற வாசகமும் இடம் பெற்று இருந்தது.

இந்த ரதம் நேற்று மாலை ராமநாதபுரம் பஸ் நிலையம் அருகே வந்தது. அப்போது அந்த பகுதியில் நின்று கொண்டிருந்த பா.ம.க.வினர் பிரசார ஊர்தியில் தங்கள் கட்சி தலைவர் படம் இடம் பெற்றிருப்பதை பார்த்து அதிர்ச்சி அடைந்தனர். உடனே அந்த வாகனத்தை நிறுத்தி சம்பந்தப்பட்டவர்களிடம் விளக்கம் கேட்டனர். இதில் இரு தரப்பினருக்கும் இடையே வாக்குவாதம் ஏற்பட்டது.

இதையடுத்து பா.ம.க. நிர்வாகிகள் கலெக்டர் கிர்லோஷ் குமாரிடம் புகார் கூறினர். இதுபற்றி சுகாதாரத்துறையினரிடம் கேட்டறிந்த கலெக்டர் உடனடியாக அந்த படத்தை அப்புறப் படுத்த உத்தரவிட்டார்.

ஆனால் பிரச்சினையை சும்மாவிடக்கூடாது என்று கங்கணம் கட்டிய பா.ம.க.வினர் சர்ச்சைக்குரிய அந்த விளம்பர பேனரை படம் எடுத்து தலைமைக் கழகத்துக்கும் அனுப்பி வைத்துள்ளனர்.