சேது சமுத்திர திட்ட பிரச்சினை: மந்திரிகள் கூட்டத்தில் அம்பிகா சோனி வெளிநடப்பு

சேது சமுத்திர திட்ட பிரச்சினை பற்றி நடைபெற்ற மந்திரிகள் கூட்டத்தில் இருந்து மந்திரி அம்பிகா சோனி வெளிநடப்பு செய்தார்.


சேது சமுத்திர கால்வாய் திட்டத்தை எதிர்த்து சுப்ரீம் கோர்ட்டில் வழக்கு தொடரப்பட்டது. இப்பிரச்சினையில் கோர்ட்டில் தாக்கல் செய்வதற்கான பதில் மனுவை மத்திய அரசு தயாரித்து உள்ளது.

இந்த மனு பற்றி மத்திய மந்திரிகள் குழு நேற்று டெல்லியில் கூடி ஆலோசனை நடத்தியது. இதில் மூத்த மந்திரிகள் பிரணாப் முகர்ஜி, அர்ஜுன் சிங், பரத்வாஜ், கபில் சிபல் ஆகியோர் பங்கேற்றனர். மத்திய தரை வழி மற்றும் கப்பல் போக்குவரத்து மந்திரி டி.ஆர்.பாலு, சுற்றுலா மற்றும் கலாசார துறை மந்திரி அம்பிகா சோனி ஆகியோரும் கலந்து கொண்டனர்.

மோதல்

கூட்டத்தில் சேது சமுத்திர திட்டப் பிரச்சினையில் சுப்ரீம் கோர்ட்டில் தாக்கல் செய்வதற்கான மனுவில் இடம் பெற்றிருக்கும் சில கருத்துக்களுக்கு அம்பிகா சோனி ஆட்சேபம் தெரிவித்தார்.

அப்போது சேது சமுத்திர திட்டத்துக்கு அம்பிகா சோனி தடைக்கல்லாக இருப்பதாக டி.ஆர்.பாலு கூறியதாகவும், இதைத்தொடர்ந்து அவருக்கும், அம்பிகா சோனிக்கும் இடையே கடும் வாக்குவாதம் நடைபெற்றதாகவும் தெரிகிறது.

அந்த நேரத்தில் கபில்சிபல் பேசுகையில்; சேது சமுத்திர திட்டம் பற்றி அம்பிகா சோனிக்கு எதுவும் தெரியவில்லை என்று குற்றம் சாட்டினார்.

அதைத் தொடர்ந்து மந்திரிகள் இடையே சூடான வாக்குவாதம் நடைபெற்றது. அப்போது அம்பிகா சோனிக்கு ஆதரவாக யாரும் பேசவில்லை.

வெளிநடப்பு

இது அவருக்கு மேலும் கோபத்தை ஏற்படுத்தியது. உடனே மந்திரிகள் கூட்டத்தில் இருந்து அவர் ஆவேசத்துடன் வெளிநடப்பு செய்தார். அவர் நேராக வீட்டுக்கு புறப்பட்டு போய் விட்டார்.

மூத்த மந்திரியான பிரணாப் முகர்ஜி இதைக் கண்டு அதிர்ச்சி அடைந்தார். உடனே அவர், அம்பிகா சோனியை சமாதானப்படுத்துவதற்காக போனில் தொடர்பு கொண்டு பேசினார்.

ஆனால், அம்பிகா சோனி சமாதானம் அடையவில்லை. மந்திரிகள் கூட்டத்தில் தன்னை அவமதித்து விட்டதாக அவர் தெரிவித்தார்.

பிரதமருக்கு கடிதம்

இந்நிலையில் மந்திரிகள் கூட்டத்தில் நடந்த சம்பவம் பற்றி பிரதமருக்கு அம்பிகா சோனி கடிதம் எழுத உள்ளார்.
(நன்றி: தினத்தந்தி)