பாயும் வேகம் ஜெட் லீ தாண்டா
பன்ச் வெச்சா இட்லி தாண்டா
Rated PG - for Pseudo-DK, DMK, Liberals, Marxists....
ஊர்ல சொல்றது சொலவடை
உண்மையைச் சொல்றது இட்லிவடை

Saturday, December 10, 2016

அதிமுக உடையாது - ஹரன் பிரசன்னா

அதிமுக தற்போதைக்கு உடையாது என்பது கிட்டத்தட்ட உறுதியாகிவிட்டது. எதிர்பார்த்ததுதான். அடுத்த நான்கரை வருடங்களை யாரும் வீணாக்க விரும்பமாட்டார்கள். எம்ஜியார் இறந்தபோது ஜெயலலிதா இருந்த நிலையைவிட ஒப்பீட்டளவில் கம்பீரமான நிலையிலேயே இருக்கிறார் சசிகலா. ஜெயலலிதாவுக்கு அன்றைக்கு இருந்த மிகப்பெரிய ப்ளஸ் பாய்ண்ட் - கரிஷ்மா. சினிமா புகழ். இது இன்று சசிகலாவுக்குக் கிடையாது. அன்று ஜெயலலிதாவுக்கு மிகப்பெரிய மைனஸ் என்று எதுவும் கிடையாது. இன்று சசிகலாவுக்கு ஏகப்பட்ட சுமைகள். இதையும் மீறி அவரை மக்கள் ஏற்றுக்கொண்டாகவேண்டும் என்பதே சசிகலாவின் முன்னே உள்ள மிகப்பெரிய சவால். ஆனால் மக்கள் இதையெல்லாம் எளிதில் கடந்து செல்வார்கள் என்பதே எரிச்சலூட்டும் முகத்திலறையும் உண்மை.


அடுத்த தேர்தல் வரை சசிகலாவுக்குப் பிரச்சினை இல்லை. உள்ளாட்சி தேர்தல் மற்றும் நாடாளுமன்றத் தேர்தலில் மிக மோசமாகத் தோற்றாலும் பெரிய கவலை இல்லை. சட்டமன்றத் தேர்தலே முதல் இலக்கு. எம்ஜியார் இறந்தபோது அதிமுகவின் இரண்டாம் கட்டத் தலைவர்கள் அனைவருக்குமே ஜெயலலிதா ஒரு பொருட்டில்லை. தானே தலைமையேற்க சரியான ஆள் என்று எண்ண பலர் இருந்தார்கள். இன்று சசிகலாவுக்கு இப்பிரச்சினை இல்லவே இல்லை. அடிமையில் மோகம் கொண்ட அமைச்சர்கள் அடுத்த தலைமைக்குத் தயாராக இருக்கிறார்களே ஒழிய, தானே தலைவர் என்றறிவிக்கும் அளவுக்கு தைரியமாக இல்லை. கட்சியை உடைத்துக்கொண்டு போனாலும் சில வருடங்களில் அரசியலில் காலி ஆகிவிடுவோம் என்று தெரிந்திருக்கிறது. அதையும் மீறி கட்சியை உடைக்கும் தேவை திமுகவுக்கு இருக்கிறது.

நம் மக்களின் இன்னொரு பிரச்சினை, ஒரு தடவை ஓர் அரசியல்வாதிக்கு எதிராக ஒரு தேர்தலில் வாக்களித்துவிட்டால், அவருக்குத் தண்டனை வழங்கிவிட்டதாக மானசீகமாக முடிவெடுத்துவிடுவார்கள். சசிகலா கட்சிப் பொறுப்பை ஏற்றுக்கொள்வதை விரும்பாத மக்கள் எதிர்வரும் பாராளுமன்றத் தேர்தலில் அதிமுகவை மிக மோசமாகத் தோற்கடித்துவிட்டால், அதற்கடுத்த சட்டமன்றத் தேர்தலில் அந்தக் கோபத்தை மறந்துவிடுவார்கள். இது சசிகலாவுக்கு இருக்கும் இன்னுமொரு சாதகம்.

இதையும் மீறி எதிர்வரும் சட்டமன்றத் தேர்தலில் சசிகலா தலைமையில் அதிமுக தேர்தலைச் சந்தித்தால் தோற்கும் வாய்ப்புகளே அதிகம். தோற்கவேண்டும் என்றே நானும் விரும்புகிறேன். நான்கரை ஆண்டுகள் என்பது மிக நீண்ட காலம். அரசியல் அதிகாரமும் பணமும் இந்த நான்கரை ஆண்டுகளில் எப்படி வேண்டுமானாலும் செயல்படச் சொல்லும். இதை மீறி, தொடர்ச்சியாக இரண்டு முறை ஏற்கெனவே அதிமுக வென்றிருக்கும் வேளையில், மூன்றாவது முறையாக வெல்வது அத்தனை எளிதல்ல. ஜெயலலிதாவின் கரிஷ்மா என்றும் சசிகலாவுக்குக் கைக்கூடப் போவதுமில்லை. ஜெயலலிதா இருந்தபோது தள்ளி வைத்திருந்த நிலையிலேயே சசிகலாவின் குடும்பத்தினர் உருவாக்கிய பிரச்சினைகள் நமக்குத் தெரியும்.


இன்று ஜெயலலிதா இல்லாத நிலையில், சசிகலாவின் தலைமை உருவாகி வரும் சூழலில், இவர்கள் மிக வெளிப்படையாகவே அதிகார வட்டங்களை உருவாக்குவார்கள். இது 1996 அளவுக்குக் கூட அதிமுகவைக் கொண்டு செல்லும் வாய்ப்பு உண்டு. கூடவே தமிழ்த் தேசியவாதிகளின் பங்களிப்பும் சேர்ந்துகொண்டால், நிலைமையை நினைக்கவே கஷ்டமாக இருக்கிறது.


இன்னொரு பக்கம் இரண்டாவது பலம் பொருந்திய கட்சியான திமுகவின் நிலையையும் பார்க்கவேண்டும். கருணாநிதியின் அதிகாரம் இல்லாத அரசியல் அந்நேரம் உருவாகி இருக்கும். வாரிசுச் சண்டைகள் எல்லாம் ஓய்ந்து ஸ்டாலின் நிச்சயம் முக்கியத்துவம் பெற்றிருப்பார். இப்போதே கிட்டத்தட்ட அப்படித்தான். சரியான கூட்டணியுடன் ஸ்டாலின் வெல்லும் வாய்ப்புகளே அதிகம். அந்த வாய்ப்பை உறுதி செய்யவேண்டியதே இன்றைய திமுகவின் முக்கிய வேலையாக இருக்கவேண்டும். பாஜக புழைக்கடை வழியாக வருகிறது, நூலேணியில் இறங்கி வருகிறது என்றெல்லாம் கதை பேசிக்கொண்டிருந்தால், சசிகலாவிடமும் தோற்க வேண்டிய அவல நிலை உருவாகினாலும் ஆச்சரியப்படுவதற்கில்லை.



அதிமுகவை உடைப்பது குறித்து அதிமுகவினரை விட திமுகவினர் பதற்றமடைகிறார்கள். அதிமுகவை பாஜக உடைக்கக்கூடாது என்று திமுகவினர் பதறுவதைப் புரிந்துகொள்ளமுடிகிறது. திமுககூட அதிமுகவை உடைக்கக்கூடாது என்று நினைக்கமாட்டார்கள் என்று நம்புகிறேன். வாய்ப்புக் கிடைக்கும்போது எதிரணியை உடைப்பதையும் உள்ளடக்கியதுதான் அரசியல். மற்ற கட்சிகளைவிட நல்லாட்சியைத் தருவோம் என்பதே ஒரு முக்கியக் கட்சியின் முதன்மை நோக்கமாக இருக்கும். இதன் பின்னணியில் நல்லது செய்வதை என்பதை அடிப்படையாகக் கொண்டு ஒரு கட்சியை உடைப்பதும் அந்த வெற்றிடத்தில் ஆட்சியைப் பிடிப்பதும் அரசியல்தான்.



இந்த அரசியலை எத்தனை வெளிப்படையாக மேற்கொள்கிறார்கள் என்பதே முக்கியமானது. பணத்தின் மூலம் இதைச் செய்வதுதான் பிரச்சினைக்குரியதே ஒழிய, அரசியல் வாய்ப்பைப் பயன்படுத்திக்கொண்டு செய்வது பெரிய பாவமல்ல. இதற்காக திமுகவினர் பதறுவதை விட்டுவிட்டு யதார்த்தத்தைப் பற்றி யோசிப்பது நல்லது. இதைச் சொல்வது ஏனென்றால் இது பாஜகவுக்கும் பொருந்தும். :-) ஆனால், பொன் இராதாகிருஷ்ணனும் தமிழிசையும் எத்தனை நல்லவர்கள் என்றால், ஒரு ஃபோன் போட்டு, இப்படி அதிமுக தத்தளிக்கும்போது அதை உடைக்கும் அரசியல் செய்யாதீர்கள் என்று கேட்டுக்கொண்டால், அதில் உள்ள நியாயத்தைப் புரிந்துகொண்டு உடனே ஏற்றுக்கொண்டு இன்னும் அமைதியாகிவிடுவார்கள். அத்தனை நல்லவர்களைப் பார்த்து பின்வாசல் அவதூறுகளைப் பரப்பாதீர்கள். மீறினால் நரகம் நிச்சயம். :-)

நன்றி: ஹரன் பிரசன்னா  முக நூல் பக்கம்.


சசிகலா அதிமுக பொதுச் செயலாளரானால் பிராமண சமூகத்தின் அக்கறையான ஆதரவு கிடைக்காது - எஸ்.வி.சேகர் ( கடைசியாக நகைச்சுவையுடன் முடிப்பது மரபு )




5 Comments:

Jaisankar Jaganathan said...

பாவம் எஸ் வி சேகர். உண்மையிலேயே காமடியன் ஆகிட்டார். நான் மஞ்ச கமெண்டை சொல்லுறேன்

kothandapani said...

என்ன நடக்கும் என்பதை விட, இவர் என்ன நடக்க வேண்டும் என்று எதிர்பார்ப்பதை வெளி படுத்தி உள்ளார் ..4 ஆண்டுகள் ஜெயா பெற்று தந்த வெற்றியை அனுபவியுங்கள் என்று ஆதங்கப்பட்டுள்ளார் ..ஜெயாவாலேயே அடக்க முடியாத மன்னார்குடி மாபியா ஆட்டம் அட்டகாசமாக தொடங்கிவிடும்...உள்ளாட்சி தேர்தலுக்கு பின்னர் அதிமுக உடைவது உறுதி நாம் விரும்பிகிறோமேமோ இல்லையோ இது தான் நடக்கும்

kothandapani said...

என்ன நடக்கும் என்பதை விட, இவர் என்ன நடக்க வேண்டும் என்று எதிர்பார்ப்பதை வெளி படுத்தி உள்ளார் ..4 ஆண்டுகள் ஜெயா பெற்று தந்த வெற்றியை அனுபவியுங்கள் என்று ஆதங்கப்பட்டுள்ளார் ..ஜெயாவாலேயே அடக்க முடியாத மன்னார்குடி மாபியா ஆட்டம் அட்டகாசமாக தொடங்கிவிடும்...உள்ளாட்சி தேர்தலுக்கு பின்னர் அதிமுக உடைவது உறுதி நாம் விரும்பிகிறோமேமோ இல்லையோ இது தான் நடக்கும்

kothandapani said...

ஜெயலலிதாவிற்கு சசிகலா மாதிரி இட்லிவடைக்கு எ.அ.பாலா
அப்போ ஹாரன் பிரசன்னா OPS மாதிரியா

Bala V said...

பிஜேபிக்காரரார இவருக்கு தி மு க வந்துவிடக்கூடாதென்ற பெருங‌கவலை. எனவே அதிமுக உடையாது கனவு காண வேணடாமென்கிறார். திமுக என்ன நினைக்கிறது? அதிமுக உடைந்து பலன் அடைய எதிர்பார்க்கிறது என்ற பீதியைக் கிளப்புகிறார். இதற்கெல்லாம் காரணம் பி ஜே பிக்கு ஒன்றும் இப்போது தேறாது எனவே தி மு க உள்ளுழைந்து விடக்கூடாது.

அதிமுக இப்போது உடையக்கூடாதென்றுதான் தி மு க எதிர்ப்பார்க்கிறது. காரணம் உடைந்தால் இவரகளே செய்தார்கள் என மக்கள் நினைப்பார்கள். போச்சு! எப்படி தானே ஜெயலலிதா கருநாநிதியை முதல்வராக தன் முட்டாள்தனத்தால், எவனையோ த்த்தெடுத்து, அவனுக்கு மணம் செய்து ஊர்மக்களின் சாபத்தை வாங்கி கருநாநிதிக்குப்பலனைக் கொடுத்தாரோ, அதையே சசிகலா செய்ய் அதிமுக அதுவாகவே மெல்ல மெல்ல உடையட்டும் எனத்தான் தி மு க பார்க்கிறது. அதற்காக காத்திருக்கும்.

அதே வேளையில் தற்போது அதிமு க உடைந்தால் ஊர் ரெண்டு பட்டால் கூத்தாடிக்குக் கொண்டாட்டம் என்பதைப் போல ப்ல அதிமுக காரர்களுக்கு தன் மத்திய பலத்தைக்காட்டி ஆசை காட்டி, இழுத்து குறுக்கு வழியில் நேரடியாகவோ, அல்லது பொரோக்ஸியாக நுழையும்.

இது தி மு கவுக்கு எப்படி பிடிக்கும்?

ஆக, இவரின் அதிமுக உடையாது என்பதுதான் என கருத்தும்.

குழ்ம்பிய குட்டையில் ஆதாயம் தேடி குறுக்கு வழியில் ஆட்சியில் வரத்துடிக்காமல் நேரடியாக மக்களிடம் சென்று அவர்கள் மனத்தில் இடம்பிடிக்க பிஜேபி பலபத்தாண்டுகள் பாடுபட்டால் வழியுண்டு.