பாயும் வேகம் ஜெட் லீ தாண்டா
பன்ச் வெச்சா இட்லி தாண்டா
Rated PG - for Pseudo-DK, DMK, Liberals, Marxists....
ஊர்ல சொல்றது சொலவடை
உண்மையைச் சொல்றது இட்லிவடை

Monday, November 17, 2014

உப பாரதம் - அத்தியாயம்-1 வியாசரின் வ்யாஸ சந்தேகம்

வியாசருக்கு உறக்கம் நன்றாக வந்தது.

வருடக் கணக்கில் ஒரு தவம் போல... தோராயமாக பத்து வருடம் இருக்கும். அப்பப்பா.. எவ்வளவு ஓலைச் சுவடிகள் எழுதித் தள்ள வேண்டியிருந்தது. ஓலைப் போதாமல் இருபத்தி எட்டு நாள் நடக்க வேண்டிய குருஷேத்திரப் போரைக் கூட பதினெட்டு நாள் என்று சுருக்கிவிட்டார். எலும்புகள் எல்லாம் தேய்ந்து விரல் சூம்பிப்போய் கடைசி அத்தியாயம் எழுதியபின் அவர் மோதிரமே கழன்று விழுந்தது.

எவ்வளவு பனை ஓலை என்று கணக்குப் பண்ண முடியாமல், பிற்காலத்தில் யாராவது இதை எல்லாம் டிஜிட்டல் செய்து பார்த்துக்கொள்ளட்டும் என்று அறை மூலையில் குவித்து வைத்தார்.

அவரின் அஸுரத்தனமான எழுத்து வேகத்தால் அத்தியாயம் எழுதக் கூட போதுமான பனை ஓலை கிடைக்காமல் திண்டாடினார். சில சமயம் பனைமரத்துக்குப் பக்கத்திலேயே கயிற்றுக் கட்டிலில் படுத்துக்கொண்டு மரத்தில் இலை துளிர்விடுகிறதா என்று கூர்ந்து பார்த்துக்கொண்டிருந்தார். வியாசருடைய எழுத்தைப் படிக்கத் துடித்துக்கொண்டிருந்த வாசகர்கள் அவரைச் சுற்றி வட்ட வடிவமாக உட்கார்ந்திருந்தார்கள். இவர்கள் தங்களை வியாசர் இலக்கிய வட்டம் என்று சொல்லிக்கொண்டாலும் ஊர் இவர்களை "வியாஸவாஸகவட்டம்” என்று ஊர் மக்கள் பாஸத்தோடு அழைத்தார்கள்.

இப்படியாக வியாசரும்பனை ஓலைக்குக் காத்திருந்த சமயத்தில் வாசகர் வட்டத்தில் சிலர் கேட்ட கேள்விகளுக்கு பதில் அளித்தார்; சில சமயம் அவர் பதில்கள் பெரிதாக இருக்க மேலே இருந்த வட்ட நிலாவே அரைவட்டமாகத் தேய்ந்தது.

பனை இலைக்குக் காத்திருந்த சமயம், தூக்கத்திற்கு அஞ்சி வியாசர் தியானம் கூட செய்யவில்லை, அப்படியும் ஒரு நாள் விடியற்காலை அவருக்குக் கொஞ்சம் தூக்கமும் கூடவே தூறலாய் கனவும் வந்தது.

கலியுகம் எந்த வருஷம் என்று சரியாகத் தெரியவில்லை. பெட்டியில் ஒருவர் டி.சர்ட் போட்டுக்கொண்டு மஹாபாரதத்தைப் பற்றிப் பேசிக்கொண்டிருந்தார் “...இது யாருக்குப் பயன்படும் என்பதில் எனக்கு எந்தச் சந்தேகமும் இல்லை. இந்துத்வாவின் மகத்தான எழுச்சிக் காலத்தில் நவீனத்துவர்கள் அதற்கு எதிர்திசையில் கடுமையாக வேலை செய்யவேண்டிய காலம் இது”

புரியாமல் வேறு சேனலை மாற்றினார் வியாசர். அதில் கிருஷ்ணர் லிப்ஸ்டிக் போட்டுக்கொண்டு பேசியதும் இவருக்கே புரியாமல் இருப்பதைப் பார்த்து திடுக்கிட்டு எழுந்துவிட்டார். பகல் கனவு பலித்துவிட்டால்?

நேராக பரந்தாமனிடம் சென்று "இது என்ன சோதனை கலியுக வரதா!! அவர்கள் பேசும் பாஷை எனக்கு சுத்தமாகப் புரியவில்லையே?”

கிருஷ்ணர் சிரித்துவிட்டு “நீர் சமஸ்கிருத்தில் எழுதினீர் அதையே தமிழ்’படுத்தி’விட்டார்கள்”

"சிலரது பாஷ்யம் புரியவில்லை.. தங்களுக்கு அவகாசம் கிடைத்தால்..” என்று சீரியல் அப்பா மாதிரி செண்டன்ஸை முடிக்காமல் வியாசர் இழுக்க... பதறிய பரந்தாமனோ, "என்னிடம் வராதே சீரியலுக்கு வசனம் எழுதும் என் சிஷ்யன் ஒருவன் சென்னையில் இருக்கிறான் அவன் பெயரும் ராகவன் தான்..” என்று சொல்லி யோகநித்திரைக்குத் திரும்பினார்.

தொடரும்...

5 Comments:

jaisankar jaganathan said...

பயமா இருக்கு. அவ்ளோ தான். மகாபாரதம் நவீன வடிவத்தில்

நல்ல வேளை. நவீனப்படுத்தினார்கள். ஒருத்தன் இருக்கான். பின்னவீனத்துவத்ஹ்டுக்கு என்று. அவன் மட்டும் எழுதினான்னா கண்ணனோட கோபிகையை வர்னிச்சே நாவலை வித்துடுவான்

Anonymous said...

so many people are eagerly waiting for venmurasu daily.

Anonymous said...

so many people are eagerly waiting for venmurasu daily.

Kannan said...

ராகவனே எழுதியது போல் நன்றாக உள்ளது.

Anonymous said...

அந்த பெண்ணை மாடு முட்டியபின்னர்தான் அடுத்த பதிவு வரும் போல .