பாயும் வேகம் ஜெட் லீ தாண்டா
பன்ச் வெச்சா இட்லி தாண்டா
Rated PG - for Pseudo-DK, DMK, Liberals, Marxists....
ஊர்ல சொல்றது சொலவடை
உண்மையைச் சொல்றது இட்லிவடை

Saturday, September 29, 2012

அனைத்து உயிர்களும்...



நன்றி: குமுதம் ஜோதிடம்
( வாசகர் விருப்பம் ) 

Read More...

Friday, September 28, 2012

தாண்டவம் FIR

ஜனவரி 1, லண்டன் பாலம் பக்கம் குண்டு வெடிக்கிறது. நம்ம தமிழ் சினிமாவில் இந்தியாவிற்கு வெளியே ஏதாவது நடந்தால் உடனே கீழே சப்-டைட்டில் போட்டுவிடுவார்கள். இந்த படத்திலும் போடுகிறார்கள் ஆனால் சாதாரண சென்னை தமிழர்கள் பேசும் ஆங்கிலத்துக்கு கூட சப்டைட்டில் போடுவது எரிச்சலாக இருக்கிறது. .

லண்டனில் ராத்திரி எம்.ஜி.ஆர் பாட்டு கேட்டுக்கொண்டு டாக்ஸி ஓட்டும் சந்தானம் ( இப்ப நீங்க சிரிக்க வேண்டும்). ரோட்டில் நின்றுகொண்டு இருக்கும் விக்ரமை கூட்டிக்கொண்டு போகிறார். அங்கே விக்ரம் ஒரு கொலை செய்கிறார். அட படம் நல்லா இருக்கே என்று நிமிர்ந்து உட்காரும் போது டைரக்டர் நம்மீது இரக்கப்பட்டு திரைக்கதையில் தாலாட்டி தூங்க வைக்கிறார்.

நாசர் முதல் சீனில் இந்த கொலையை துப்பு துலக்க வருகிறார். நல்லா செய்கிறாரே என்று நினைக்கும் போது இலங்கை தமிழ் பேசி பேசி உசிரை எடுக்கிறார். இவர் பேசும் அச்சு பிச்சு தமிழுக்கு சப்-டைட்டில் போட்டால் தேவலாம் என்றாகிவிட்டது. லண்டனில் எல்லா போலிஸும் தமிழ் பேசுகிறார்கள். சபாஷ்!.

கண் பார்வை தெரியாத விக்ரம் என்பதை காட்ட எல்லா இடத்திலும் காமெராவை பார்க்காமல், ஒரு சைடாக கீழே பார்த்துக்கொண்டு சண்டை போடுகிறார். பேசுகிறார், பியானோ வாசிக்கிறார். கண் பார்வை தெரியாதவர் ஏதாவது வித்தியாசமாக செய்வார் என்று நினைத்துக்கொண்டு போன நமக்கு ஏமாற்றமே!. வாயில் டக்கு டக்கு என்று சத்தம் மட்டும் போட்டு இசையமைப்பாளருக்கு வேலை வைக்கிறார். .

படம் ஆரம்பித்து கொஞ்ச நேரத்தில் அனுஷ்காவை காணவில்லை என்ற ரசிகர்களின் கவலையை போக்க எமி ஜாக்சன் வருகிறார். வழக்கமாக எல்லா தமிழ் பட கதாநாயகியும் செய்யும் வேலையை இவரும் செய்கிறார். பார்க்க அழகாக இருக்கிறார் என்பது தான் ஒரே ஆறுதல்!.

லட்சுமிராய் எவ்வளவு படத்தில் தான் ஹீரோவுக்கு உதவி செய்துவிட்டு கடைசியில் செத்துப்போவார் ? அவரை பார்த்தால் பாவமாக இருக்கு.

இடைவேளியின் போது கொத்தாக சந்தானம் மற்றும் அவருடைய கார் தண்ணீரில் விழ காபி சாப்பிட்டு வந்த பார்த்தால் அதே காரில் அசால்டாக போகிறார்.  லாஜிக்கில் ஓட்டை இங்கு மட்டும் இல்லை, படம் முழுவதும் இருக்கிறது.எது பெரிசு என்று கண்டுபிடிப்பது தான் கஷ்டம்.

கல்யாணம் செய்துக்கொண்ட பிறகு விக்ரமும் அனுஷ்கா வும் இருவரும் தொட்டுக்கொள்ளாமல் ... முடியலப்பா.


இசையும் பாடல்களும் பரவாயில்லை ரகம். படத்தில் விக்ரம் கல்யாண கூட்டத்தோட போகும் போது பீலாவிடும் போது அவர் மனைவியின் தங்கை பார்க்க 'ஆனந்தவிகடன், குமுதம்,..." என்று பேசும் இடம் மட்டும் தான் சிரிப்பு வருகிறது, மற்ற இடங்கள் எல்லாம் சிரிப்பாய் சிரிக்கிறது.

திரை இருக்கிறது, கதை இருக்கிறது ஆனால் திரைக்கதை ?


இட்லிவடை மார்க் 5.5/10

பிகு:இதே வரிசையில் கோச்சடையானை எதிர்ப்பார்க்கலாம் என்று கோடம்பாக்கத்தில் சொல்லுகிறார்கள்.

Read More...

Tuesday, September 25, 2012

பாரத ரத்னா


நாட்டின் உயரிய விருதான பாரத ரத்னா விருதிற்கு திமுக தலைவர் கருணாநிதியின் பெயர் விண்ணப்பிக்கப்பட்டுள்ளதாக தகவல் வெளியாகியுள்ளது. பாரத ரத்னா விருதை வழங்க வேண்டும் என்று திமுகவே விண்ணப்பித்திருக்கிறது.

Read More...

Monday, September 24, 2012

பிங்க் சிலிப் டாப் 10+3

திருநெல்வேலி"யின்"குப்பை" என்ற வலைப்பதிவிலிருந்து இந்த வாரம் பிங்க் சிலிப் பற்றி திரு TS நாகராஜன் அவர்கள் எழுதியிருக்கார்... அதிலிருந்து.. பல கம்பெனிகளிலிருந்து திரட்டப்பட்ட சில அறிகுறிகளைக் கீழே காணலாம்.

1.உங்கள் ஸ்தாபனத்தை இன்னொரு ஸ்தாபனம் take over செய்தாலோ, இன்னொரு கம்பெனியுடன்
mergerஆனாலோ, அதை ஒரு எச்சரிக்கையாக எடுத்துக்கொண்டு வேறு வேலை தேட மு
யற்சி செய்யலாம். புது முதலாளி(boss)க்கு உங்கள் சேவை தேவைப்படும் என்ற அவசியமில்லை.

2.உங்கள் ஸ்தாபனம் நஷ்டத்தில் ஓடிக்கொண்டிருக்கிறது. மற்ற பகுதிகளில் ஆள் குறைப்பு நடந்துகொண்டிருக்கிறது. எச்சரிக்கை.

3.உங்கள் "Boss"ன் நடத்தையில் ஒரு மாற்றம் தெரிகிறது. இதுவரை நீங்கள் விடுமுறைக்குப் போவதைத் தடுத்து வந்தவர், திடீரென்று கூப்பிட்டு "நீங்கள் ஏன் விடுமுறையில் செல்லக் கூடாது?”
என்று கேட்டால் கொஞ்சம் எச்சரிக்கையாக இருக்க வேண்டும். "You are indispensable"
(உங்கள் சேவை தவிர்க்கமுடியாதது) என்று சொன்ன வாய்,"I can manage without you" (நீங்கள் இல்லாமலேயே சமாளித்து கொள்கிறேன்) என்று சொன்னால் - அர்த்தம் புரியவில்லையா?

4.உங்களுக்குக் கொடுத்துவந்த சில விசேஷ சலுகைகள் நிறுத்தப்படும். நீங்கள் இதுவரை அனுபவித்து வந்த "car parking" facility வாபஸ் பெறபடுவது ஒரு signal.

5.வழக்கமாக உங்களுக்குக் கொடுக்கப்படும் பரிசுகள் பல காரணங்களுக்காக நிறுத்தப்படும்.

6.முக்கியமான மீட்டிங்குகளுக்கு உங்களுக்கு அழைப்பில்லை. உங்களுக்குப் பதிலாக உங்களுக்குக் கீழே வேலைப் பார்க்கும் ஊழியர்கள் பங்கு எடுத்துகொள்வார்கள்.

7.நீங்கள் ‘loop‘ ல் வெளியே இருப்பீர்கள். அதாவது கம்பெனியின் முக்கிய நிகழ்வுகளிலும் மற்ற முடிவுகளிலும் உங்கள் பங்கு இருக்காது. சில சமயங்களில் உங்களுக்குத் தெரியாமலேயே அநேக முடிவுகள் எடுக்கப்படும்.

8.திடீரென்று முக்கியம் இல்லாத பணிகளைச் செய்ய உத்தரவுகள் வரும்.

9.உங்களுடைய அன்றாட வேலை அட்டவணையை (work flow) மேலிடம் கேட்டால், உங்கள் மேல் உள்ள நம்பிக்கைக் குறைந்துவிட்டது என்று புரிந்துகொள்ளுங்கள்.

10.நீங்கள் கஷ்டப்பட்டு உருவாக்கிய team கொஞ்சம் கொஞ்சமாக உடைக்கப்படும்.

11.உங்களை மாதிரி தகுதியுள்ள புதியவர்களை வேலைக்கு அமர்த்தி அவர்களுக்குப் பயிற்சி அளிக்க
உங்களை வேண்டிக்கொள்வார்கள்.

12.இதுவரை, நண்பர்களாகப் பழகி வந்த உங்கள் சக ஊழியர்கள் உங்களைத் தவிர்க்க முயற்சித்தால் அது ஒரு நல்ல அறிகுறியில்லை. உங்களைப்பற்றி உங்களுக்கு தெரியாமலேயே ஏதோ ஒரு விஷயம்
அவர்களுக்கு தெரிந்திருக்கிறது.

“வருமுன் காப்போம்” என்பது எக்காலத்திற்கும் எல்லோருக்கும் பொருந்தும்.

பி.கு. மேற்சொன்ன அறிகுறிகள் தனியார் துறையில் வேலை பார்க்கும் இந்திய ஊழியர்களுக்கும்
பொருந்தும்.

இதை தவிர இன்னொன்று இருக்கிறது, அலுவலத்தில் இட்லிவடை படித்தால் வேலை நிச்சயம் காலி ஜாக்கிரதை! பிகு: வேற பாயிண்ட் இருந்தால் எடுத்துவிடலாம்...

Read More...

Sunday, September 23, 2012

மைடியர் பாடிகாட் முனீஸ்வரனே! - 23-9-2012

அன்புள்ள முனி,
தினமும் எழுத வேண்டும் என்று நினைப்பேன். ஆனால் நேற்று வரை எழுத முடியவில்லை. காரணம் என்னவென்று எனக்கே தெரியாது. ஒருவேளை  காரணம் இருந்தாலும் நான் உனக்குச் சொல்ல வேண்டிய அவசியம் இல்லை. ஆனால் மன்மோகன்சிங் திடீர் என்று தூக்கத்தில் இருந்து விழித்து கொஞ்சம் தைரியமாக முடிவு எடுப்பதற்குக்  காரணம் இல்லாமல் இல்லை. நிலக்கரி சுரங்க ஊழலை எப்படி தீர்ப்பது என்று ரூம் போட்டு யோசித்திருப்பார்கள் என்று நினைக்கிறேன். அதை மறக்கடிக்க டீசல் விலை உயர்வு, சில்லரை வணிகத்தில் அந்நிய முதலீடு போன்ற பூதங்களை கொண்டு இதை மறக்கடித்துள்ளார்கள். இரு கோடுகள் தத்துவம் தான். எனக்கொன்று புரியவில்லை சில்லரை வணிகத்தில் அந்நிய முதலீடு செய்தால் பேருந்தில் போகும் போது, சில்லரைத் தட்டுப்பாடு குறையுமா? ஆனால் பெரிய தமாஷ் நிலக்கரி ஊழலில் ஜெகத்ரட்சகன் பெயர் அடிப்பட்ட போது கலைஞர் "முறைகேடு நடந்த சமயத்தில் அவர் எங்கள் கட்சியில் இல்லை" என்று சொல்லிவிட்டார். கிட்டதட்ட கனிமொழி கூட இதே மாதிரி தான் கலைஞர் டிவிக்கு சொன்னார் என்று நினைக்கிறேன். தமிழ் நாட்டில் நகைச்சுவை உணர்வே இல்லை என்று ஏன் தான் ஜெயமோகன் அலுத்துக்கொள்கிறாரோ?

அலுக்காமல் நம்மூரில் நடக்கும் ஒரே விஷயம் அரசியல், ஜாதீய, சமூக அமைப்புகள் நடத்தும் போராட்டம். அமெரிக்காவில் முஸ்லீம் கடவுள் பற்றித்  தப்பாக எடுத்த வீடியோவிற்கு சென்னை அண்ணா சாலையில் போராட்டம் நடத்துகிறார்கள். சென்னையில் மின்சாரம் நேற்று 7 மணி நேரம் இல்லை. ஒரு வேலை இதுகூட அமெரிக்க சதியாக இருக்கலாம். அதுக்கும் போராட்டம் நடத்தலாம். இவர்கள் செய்யும் போராட்டத்தால் தினமும் டிராபிக் ஜாம். எஸ்.வி.சேகர் ஒரு டிராமாவில் சொல்லுவார், இலங்கைப் பிரச்சனைக்கு எல்.கே.ஜி பசங்களுக்கு லீவு விட்டுவிடலாம் என்று.  அதுதான் ஞாபகத்துக்கு வருகிறது.

இலங்கை என்றவுடன் ஞாபகத்துக்கு வருவது இலங்கைக்  கால்பந்து வீரர்களை வீட்டுக்கு அனுப்பிய செயல். முட்டாள் தனம். முன்பு இலங்கையிலிருந்து வி.புலிகளை இங்கே கூப்பிட்டு அடைக்கலம் கொடுத்து பயிற்சி, பணம் எல்லாம் கொடுத்த போது இந்த மூளை எங்கே போனது? அப்போது ஒரு நியாயம் இப்போது ஒரு நியாயமா? நல்ல கூத்து. சரி ஒபமா திரும்ப வருவாரா? பின்லாடனை அழித்ததற்காகவே ஓபாமா திரும்ப ஒருமுறை வருவது நல்லது. ஐ.டி மக்களுக்கு நிறைய வேலை கிடைக்காது என்பதைத் தவிர நமக்கு அவரை எதிர்ப்பதற்கு நல்ல காரணம் இருப்பதாகத் தெரியவில்லை. வகிமாக்கள் விரைவில் ட்விட்டரில் அமெரிக்க எலெக்ஷனுக்காக பிரச்சாரம் செய்ய வாய்ப்பு இருக்கு  என்ற தகவல் உனக்கு அலுப்பா இருந்தாலும் எதுக்கும் சொல்லி வைக்கிறேன்.  

ஆனால் டாக்டர் அய்யா அலுக்காமல் எப்படி அறிக்கை விட்டுக்கொண்டெ இருக்கிறார் என்று உனக்குத் தெரியுமா? லேட்டஸ்ட் "ஒவ்வொரு வன்னியனுக்கும் குல தெய்வம் பாட்டாளி மக்கள் கட்சி தான் இன்று முதல் எல்லா வன்னியனும் எந்த நேரமும் தன் வாயால் உச்சரிக்க வேண்டிய மந்திரம் 'வன்னியன் ஆளணும்' என்பது தான். இந்த ஒன்பது எழுத்து மந்திரத்தில் வன்னியர்களின் எதிர்காலம் உள்ளது என்று சொல்லியுள்ளார். ஐந்து எழுத்து மந்திரம், எட்டெழுத்து மந்திரம் இப்ப ஒன்பதெழுத்து மந்திரம். அடுத்து யார் பத்தெழுத்து  மந்திரம் சொல்ல போகிறார்கள்?

பத்து இருக்கட்டும்.  'முனி 3'ஆம் பார்ட் வர போகிறதாமே. அதற்குள் லாரன்ஸ் நடித்த இரண்டாம் பாகம் ஹிந்தியில் ரீமேக் பேச்சு வார்த்தை நடக்கிறது. இன்னொரு முறை பார்க்கலாம், ஹிந்தியில் ஹிரோயின் பார்க்க நல்லா இருப்பார்கள். 'பர்ஃபி' படம் பார்க்க வேண்டும் ஆனால் தியேட்டரில் சப்-டைட்டில் போடுவதில்லை. ஹிந்தி தெரிந்த யாராவது  என்னுடன் படம் பார்க்க வரலாம், ஒரே கண்டிஷன். கூடவே கதை சொல்ல வேண்டும். இடைவேளியில் ஒரு பாக்கெட் பாப்கார்ன் சன்மானம். அது சரி சிங்கம் 2 வர போகிறதாம், யாருக்காவது அதை பற்றி விஷயம் தெரியுமா?

சிங்கம் 2 பத்தி யாரானும் பின்னூட்டத்தில் சொல்வாங்க. நானிப்போ  அசிங்கம் பத்தி சொல்லிடரேன். ச்சீய் பக்கங்கள் என்று சி.சரவணகார்த்திகேயன் குங்குமத்தில் 'பொதுவில் பேசத் தயங்கும் புதிர் விஷயங்களின் ஹிஸ்டரி' என்று எழுத ஆரம்பித்திருக்கிறார். குங்குமத்துக்கு இது புதுசு இல்லை, முன்பே இது மாதிரி பலான விஷயங்கள் வந்திருக்கிறது @writercskக்கு இது புதுசாக இருக்கலாம். படித்து முடித்த பின் ஏதோ தமிழ் விக்கி படித்த உணர்வு. இன்னும் கொஞ்சம் நல்லா எழுதலாம். இவர் எடுத்துக்கொண்ட விஷயங்களை எல்லாம் தமிழ் மக்கள் மக்கள் சாதாரணமாகப் பேசுகிறார்கள் என்பது இவருக்கு தெரியாமல் இருக்கலாம்.

தமிழ்ப் படத்துக்கு தமிழ் பெயர் என்று ஒரு கூத்து சென்ற ஆட்சியில் நடந்தது. அதே மாதிரி இப்ப லண்டனில் ஒரு உணவிற்கு பெயர் மகாத்மா உணவு என்று வைத்திருக்கிறார்கள். ஹோட்டல் காரர்கள் இதற்கு சொல்லும் காரணம் "மகாத்மா காந்திபற்றி அனைவருக்கும் தெரிந்து இருந்தாலும் அவர் சாப்பாட்டு விசயத்தில் டயட்டை சிறந்த முறையில் கடைபிடித்துள்ளார் என்பது யாரும்அறிந்திராத ஒன்றாகும். அவரது உணவுப்பழக்கம் சிறந்த டயட்டிற்கு எடுத்துக்காட்டாக விளங்கியதன் காரணமாக தற்போது அறிமுகப்படுத்தப்பட்டுள்ள உணவிற்கு அவரது பெயரே சூட்டப்பட்டுள்ளது" சரி இந்த உணவில் என்ன இருக்கிறது என்றால் 12 வகையான பதார்த்தங்கள் போட்டு வாழை இலையில் .. டயட் மீல்ஸ்!

மணிரத்னம் சார் டைரக்ஷன்ல நானும் ஸ்ரீதேவியும் ஜோடியா நடிக்கற வாய்ப்பு கூட எனக்கு அப்ப வந்தது . ஏவிஎம்மின்னின் திரையரங்க மேலாளர் என்கிட்ட அந்தப் படத்தை ஒத்துக்கச் சொன்னார் . மணிரத்னம் சார் குடிக்கிற மாதிரி ஒரு சீன் வச்சார்னா அவர்கிட்ட கிட்ட போய் குடிக்கிற மாதிரி நடிக்க முடியாது னு சொல்ல முடியுமா ? பெரு கெட்டுப் போயிடும் .அதான் மறுத்துட்டேன் என்கிறார் பசுநேசன் ராமராஜன். குடியினால் தமிழ்நாட்டுக்கு ஏற்பட்ட ஒரே நல்ல விஷயம் இது தான் என்று நினைக்கிறேன்.

ஜெயலலிதா குஜராத் மாநிலம் மட்டும் எப்படி மது மூலம் பணம் கிடைக்காமல் எப்படி ஆட்சி செய்கிறார்கள் என்று அதிகாரிகளிடம் கேட்க ஆரம்பித்திருக்கிறார். ஆனால் விஷயம் தெரிந்தவர்கள், இன்னும் கொஞ்ச நாளில் தமிழ்நாட்டில் பூரண மதுவிலக்கு ஏற்படும் என்று சொல்லுகிறார்கள். பார்க்கலாம்.

வாசகர்களுக்கு ஒரு வேண்டுகோள் உங்க வீட்டில் கடித்து சாப்பிடும் மைசூர்பாக் செய்தால் சுரேஷ் கண்ணன் வீட்டுக்கு பார்சல் அனுப்புங்க. தயவு செய்து கிருஷ்ணா ஸ்வீட்ஸிலிருந்து வாங்கி அனுப்பாதீர்கள், அது அவருக்கு ரஜினி படம் பார்ப்பது மாதிரி.

இப்ப எல்லாம் எது எழுதினாலும் ஒரு வாசகர் கடிதமும், கவிதையும் கூட எழுதுவது தான் ஃபேஷன். அதனால் இந்த வார கவிதையும், கடிதமும் கீழே

முதலிரவு அறையில்
மணமக்கள்
பேசிக்கொண்டார்கள்
அனைத்தையும்
தங்கள், தங்கள்
காதலைத் தவிர
- ப.க.கோமதிமங்கை

இந்த வார வாசகர் கடிதம்

அன்புள்ள இட்லி,

விசு எடுத்த சம்சாரம் ஒரு மின்சாரம் என்ற படத்தை ரிமெக் செய்தால் உங்க சாய்ஸ் யார் ?
அதை படமாக எடுத்தால் ஓடுமா ?

இப்படிக்கு
சங்குமுருகன்

ப்ரியமான சங்குமுருகன்,

தற்போது இந்த படத்தை எடுப்பது நல்லதில்லை. மின்சாரம் மாதிரி சம்சாரம் அடிக்கடி வீட்டுக்கு வந்துவிட்டு போனால் ? அதனால் கூடன்குளம் வநத பிறகு படம் எடுங்கள் ஓடும்.

இப்படிக்கு,
இட்லிவடை, ( முனிக்கும் சேர்த்து ! )

Read More...

ஐயங்கார் செய்திகள்

'அடியேன் வருதபா ரங்கப்ரியதாசன்’ என்றே தன்னை அறிமுகப்படுத்திக் கொள்கிறார் அவர்! தோள்களில் சங்கு-சக்கர குறிகளும், நெற்றியில் திருமண்ணும், வாய்நிறைய நாராயண நாமமுமாக அவரைப் பார்க்கும்போது, வெளிநாட்டவர் என்றால் நம்பமுடியவில்லை!

ஆமாம்... அவரது இயற்பெயர் பெட்ரிகோ. 1979-ல் அர்ஜென்டினாவில், போனாசயஸ் எனும் ஊரில் பிறந்தவர். ரோமன் கத்தோலிக்க பாப்டிஸ்ட் குடும்பத்தைச் சேர்ந்தவர். வருதபா ரங்கப்ரியதாசன் எனும் பெயர், 2 மாதங்களுக்கு முன் ஸ்ரீரங்கத்தில் கொங்கிலாச்சான் ஸ்ரீதர நரசிம்மாச்சார்யரிடம் தாஸ்ய நாமமாகப் பெற்றது.

தினமும் சந்தியாவந்தனம், ஏகாதசி தோறும் முறைப்படி விரதம், பெருமாள் ஸ்துதி என வைணவ அடியாராகவே வாழ்கிறார் வருதபா ரங்கப்ரியதாஸன்.

சரி, இந்து மதத்தில் குறிப்பாக வைணவத்தின் மீது இவருக்கான ஈர்ப்புக்குக் காரணம்?

''சிறு வயதில் வழக்கம்போல பள்ளிப் படிப்புடன் மதம் சார்ந்த கல்வியைத் தொடர்ந் தேன். ஆனாலும், படிப்பது ஒன்று செய்வது ஒன்று என்பதில் எனக்கு உடன்பாடு இல்லை. அதனாலேயே சமய கோட்பாடுகளின் மீது பிடிப்பில்லாமல் இருந்தது. கடவுளைப் பற்றியும் தெளிவில்லாத நிலை. நான் எதிர்பார்த்தது எல்லாம் யதார்த்தமும் நம்பகத் தன்மையுமான ஒரு வழிகாட்டல். அந்த தருணத்தில்தான், இந்து மதத்தின் 'ஈசாவாஸ்ய உபநிடதம்’ படிக்கக் கிடைத்தது. சப்தம், பிரமாணம் ஆகிய அடிப்படைகள் பற்றிய அதன் விளக்கங்கள் என்னைக் கவர்ந்தன. தொடர்ந்து படித்தேன். சில அத்தியாயங்களுக்கு பிறகு உபநிடதம் கடவுளைப் பற்றி பேச... அட, இதுவும் மற்ற நூல்களைப் போலத்தான் என்று படிப்பதை நிறுத்திவிட்டேன். அதன் பிறகு இரண்டு ஆண்டுகள் அந்தப் புத்தகத்தை தொடவே இல்லை!

எனக்கு பதினைந்து வயது இருக்கும். பள்ளியில் வைணவ தோழர்கள் சிலர் கிடைத்தார்கள். பரஸ்பரம் நிறைய பேசுவோம்.  அவர்களது சித்தாந்தத்தை அறிய முற்பட்டபோது, ஸ்ரீகிருஷ்ணரைப் பற்றி நிறையவே சொன்னார்கள். பகவத் கீதையும் தந்தார்கள். அவர்களுடன் பேசப் பேச கண்ணன் மீது அதீத காதலே வந்துவிட்டது'' என்று கூறிவிட்டு பெரிதாகச் சிரிக்கிறார் வருதபா ரங்கப்ரியதாசன்.

அவரே தொடர்ந்து, ''பிறகு என்ன நடந்தது தெரியுமா? சொன்னால் நம்ப மாட்டீர்கள். அன்று இரவே கீதையை முழுவதுமாகப் படித்து முடித்தேன். எனக்குள் பெரிய தாக்கம். இந்து மத வழிபாடுகளும் கோட்பாடுகளும் சொல்லும் செயலும் ஒன்றாக இருக்கும்படியே கற்றுத் தருகின்றன என்பது புரிந்தது. அதன் விளைவு, நான் பாதியில் விட்ட உபநிடதத்தையும் படிக்க ஆரம்பித்தேன்.'' - எனச் சிலிர்ப்புடன் சொல்கிறார்.

பகவத் கீதைகளின் சூத்ரங்களை நன்கு அறிந்து வைத்திருக்கிறார் வரதப்ப ரங்கப்ரியதாசன். 'கீதையின் 18 அத்தியாயங்களிலும் ஆயிரக் கணக்கான சூத்ரங்கள் உள்ளன. ஒவ்வொன்றும் வாழ்க்கையின் ஒவ்வொரு நிலையிலும் அவசியமானது. ஆகவே, ஒன்றைக் காட்டிலும் மற்றொன்று முக்கியமானது எனக் குறிப்பிட்டுச் சொல்வது சாத்தியம் இல்லை. அதன் ஒவ்வொரு அட்சரமும் மகத்துவமானது’ என்பது இவர் கருத்து. பகவத் கீதை மட்டுமல்ல; இன்னும் பல ஞான நூல்களையும் படித்திருக்கும் இவர், அவை கூறும் கதைகளையும், விஞ்ஞான ரகசியங்களையும், சூரிய சித்தாந்தம் முதலான அபூர்வ தகவல்கள் குறித்தும் பெரிதாகச் சிலாகிக்கிறார்.

கிட்டத்தட்ட 38 திவ்யதேசங்களுக்கு பயணித்திருக்கிறார் இவர். ஒவ்வொரு தலத்திலும் ஒவ்வொரு உணர்வு கிடைத்ததாகச் சொல்லும் ரங்கப்பிரியதாசன், அதிகம் தங்கியிருந் தது ஸ்ரீரங்கத்தில்தான்.

வருடம்தோறும் வைகுண்ட ஏகாதசிக்கு தவறாமல் திருவரங்கம் வந்துவிடுவாராம். இங்கே 6 மாதங்கள் தங்கியிருந்து, கொங்கிலாச்சான் ஸ்ரீதர நரசிம்மாச்சார்யரிடம் தேவலகரிகளை கற்றுக் கொண்டதும் சமாஸ்ரானத்தைப் பெற்றுக் கொண்டதும், தனக்குக் கிடைத்த பெரும் பேறு என்கிறார்.

2010-ல் சம்ஸ்கிருதம் பயின்றதுடன், பஞ்சசுத்தம், உபநிடதம், ஆபஸ்தம்ப சூத்ரம் ஆகியவற்றை இவர் கற்றுக் கொண்டதும் ஸ்ரீரங்கத்தில்தான். ''திருவரங்கத்தில் இருக்கும்போது என் தாய் வீட்டில் இருப்பதுபோல் உணர்கிறேன்!'' என்கிறார் பெருமிதத்துடன்.

''புத்தகங்கள் நிறைய கற்றுத் தந்தன என்றாலும், அவற்றை எனக்கு அறிமுகம் செய்ததும் படிக்கும் வாய்ப்பை தந்ததும், நான் சிறு வயதில் சந்தித்த அந்த வைணவ நண்பர்கள்தான். அவர்களால்தான் இஸ்கான் (மிஷிரிசிளிழி) முதலாக எனது ஆன்மிக பயணத்தைத் துவங்க முடிந்தது'' என்று நன்றிப்பெருக்குடன் குறிப்பிடுகிறார் ரங்கப்ரியதாசன்.

தற்போது இவர் வசிப்பது பார்சிலோனாவில். ஆனாலும் தினமும் காலையில் நீராடல், இரண்டுவேளை சந்தியாவந்தனம், ஜபம், திருவாராதனம்... என குறையின்றி தொடர்கிறது இவரது வழிபாடு. ஏகாதசி தினம் என்றால், அரிசி, கோதுமை ஆகியவற்றைத் தவிர்த்து பால்- பழங்கள் மட்டுமே உணவு.

''சம்ஸ்கிருதம் நன்கு தெரியும். தமிழ் கொஞ்சம் கடினம் என்றாலும் அழகு'' என்றவர்,  நம்மாழ்வாரின் திருவாய்மொழியின் முதல் பாசுரத்தை பிறழாது பாடுகிறார்!

''வாழ்க்கைக்கு உதவாத கண்கட்டி வித்தைகளை எனக்குக் காட்டவில்லை வைணவம். மாறாக மது, மாமிசம் ஆகிய தீங்குகளை என்னிடமிருந்து முற்றிலும் நீக்கி, ஆன்ம பலம் தந்து என் வாழ்க்கைத் தரத்தையே மாற்றியுள்ளது' என்று நெகிழ்ந்தவர் தொடர்ந்து கூறினார்:

''இந்தியர்களுக்கு நான் சொல்லும் செய்தி... உங்களில் பலர் தங்களின் ஞானப் பொக்கிஷங்களின் மகிமையை உணராமல் சட்டென்று தங்களின் மதம் மற்றும் கலாசார்த்திலிருந்து வெளியேறி விடுகிறீர்கள். முதலில் நீங்கள் உங்கள் கலாசாரத்தின் மேன்மையை உணர்ந்துகொள்ள வேண்டும் என்பதே எனது வேண்டுகோள்.' என்றார்.

சரி.. எதிர்காலத்தில் இவரது ஆன்மிக பாதை?

''அது ஸ்ரீமந் நாராயணன் விட்ட வழி' என்கிறார் மெல்லிய சிரிப்புடன்!

அனா என்ற ஆனந்தினி வருதபா ரங்கப்ரியதாசனின் மனைவி. சமீபத்தில்தான் இவர்களின் திருமணமும் இந்து மத முறைப்படியே நடந்துள்ளது.

ஆனந்தினி ஸ்பெயினில் கட்டடக் கலை பயின்றவர். கணவரைப் போலவே வைணவத்தில் பற்றுள்ளவர். ஸ்ரீமகா விஷ்ணுவே கண்கண்ட தெய்வம். காரணம்? ''அண்ணன் காட்டிய வழி'' எனச் சிரிக்கிறார். ஆமாம். ஆனந்தினியின் அண்ணன் இந்தியாவுக்கு சுற்றுலா வந்தபோது, நம் பண்பாடு கலாசாரத்தின் மீதான ஈர்ப்பாலும், பிருந்தாவன தரிசனத்தின்போது ஏற்பட்ட அனுபவங்களாலும் விஷ்ணு பக்தராகி

விட்டார். அவர் தாய்நாடு திரும்பியபோது, அவரிடம் ஏற்பட்ட நல்ல மாற்றங்கள் சகோதரிக்கு வியப்பளித்ததாம். அவர் மூலம் ஆன்மிகப் பெரியவர்களது சந்திப்பும் அவர்களது சொற்பொழிவுகளும் தன்னை விஷ்ணு பக்தையாகிவிட்டதாகச் சொல்லிச் சிரிக்கிறார் ஆனந்தினி. எப்போதும் புன்னகை, பக்தி, பணிவு... என கணவருக்கு மிகச் சரியான இணையாகத் திகழ்கிறார் ஆனந்தினி!

நன்றி: சக்தி விகடன்

ஸ்ரீரங்கம் டு அமெரிக்கா - ஸ்கைப் வழியாக தர்ப்பணம்!




‘சுக்லாம் பரதரம் விஷ்ணும்...’ என ஸ்ரீரங்கத்தில் இருக்கும் தமது இல்லத்திலிருந்து பூஜையைத் தொடங்குகிறார் மாதவன். அமெரிக்காவில் இருந்தபடியே ஹரிகிருஷ்ணன் குடும்பத்தினர் அந்த பூஜையில் பயபக்தியோடு கலந்து கொண்டு கன்னத்தில் போட்டுக்கொள்கின்றனர். அதெப்படி ஸ்ரீரங்கத்தில் நடக்கும் பூஜையில் அமெரிக்காவில் இருந்தபடி கலந்துகொள்ளமுடியும்.

‘சாட்’ செய்வதற்காக நம்மில் பலர் பயன்படுத்திவரும் ஸ்கைப் தொழில்நுட்பம் மாதவனுக்குக் கைகொடுக்கிறது. வெளிநாட்டில் இருக்கும் உறவினர்களுக்கு, நண்பர்களுக்கு பூஜை, தர்ப்பணங்களை ஸ்ரீரங்கத்தில் இருந்தபடியே ‘ஸ்கைப்’ வழியாகச் செய்கிறார் மாதவன்.

ஒருமுறை தெரிந்த நபருக்கு கிரஹப்பிரவேசம் செய்து வைக்க சென்னை வந்தாராம். அங்கே சந்தித்த ஒருவர் தாம் அமெரிக்காவில் வசிப்பதாகவும், மிகத் தொலைவிலுள்ள வாத்தியார் (சாஸ்திரிகள்) வீட்டுக்குச் சென்று அமாவாசை தர்ப்பணம் செய்ய சிரமமாக இருக்கிறது என்றும் சொன்னாராம். அதனால், ஸ்ரீரங்கத்திலிருந்தே டெலிஃபோனில் மந்திரங்களைச் சொல்லி தர்ப்பணம் செய்து வைக்க முடியுமா என்று கேட்டாராம். மாதவனும் ஒப்புக் கொண்டாராம். இதுதான் தொடக்கப் புள்ளி. டெலிஃபோனுக்குப் பிறகு மைக், கேமரா, கம்ப்யூட்டர் மூன்றும் இணைந்த ஸ்கைப் தொழில்நுட்பத்தில் தர்ப்பணம், ஆவணி அவிட்டத்தை இந்தியாவில் இருந்தபடியே வெளிநாடுகளில் நடத்தி வருகிறார் மாதவன்.

சார், தமிழ்நாட்டிலிருந்து அமெரிக்க- ஐரோப்பிய நாடுகளுக்கு வேலைக்காகப் போறவங்களுக்கு அரிசி, பருப்பு போன்றவை கிடைச்சுடுது. ஆனால், ஆவணி அவிட்டம், அமாவாசை தர்ப்பணம் செய்யறதுக்கு வாத்தியார் கிடைப்பது அரிது. இந்தக் குறையைப் போக்க ஸ்கைப் டெக்னாலஜி ரொம்ப உதவியாக இருக்கு. நமது இந்துமத சாஸ்திரத்தில் பித்ருக்களுக்குச் செய்ய வேண்டிய தர்ப்பணம் காரியங்களை எக்காரணம் கொண்டும் ஒருவன் விட்டுவிடக்கூடாதுன்னு சொல்லப்பட்டிருக்கு" என்று சொல்லிக் கொண்டே நமக்கு டெமோ செய்து காட்டுகிறார் மாதவன். அன்று அமாவாசை; இரவு ஒன்பது மணியளவில், கலிபோர்னியாவில் இருந்து மாதவனுக்கு ஒரு ஃபோன். அழைத்தவர் ரெடி என்று சொன்னவுடன், மாதவன் கம்ப்யூட்டரை ஆன் செய்து, பொருத்தப்பட்டிருக்கும் மைக்கையும் ஆன் செய்கிறார். இ-மெயிலை ஓப்பன் செய்து சாட் பகுதியைத் தெரிவு செய்தவுடன் கலிபோர்னியாவில் இருப்பவர் மானிட்டரில் வருகிறார். மாதவன் சொல்லச் சொல்ல தர்ப்பண மந்திரங்களைக் கேட்டுத் திருப்பிச் சொல்லி, தர்ப்பணத்தை அரை மணி நேரத்தில் முடிக்கிறார்.

மந்திரங்களை இரவில் சொல்வது சரியா?"

இங்கே இரவாக இருக்கும்போது அங்கே பகல். கர்மத்தைச் செய்து வைப்பவர் இரவில் சொன்னாலும், செய்பவர் பகலில் செய்வதால் தவறில்லை."

‘பரதகண்டே, பாரதவருஷே’ என பாரதத்தைக் குறிக்கும் சொற்கள் வருகிறதே... வேறொரு கண்டத்தில் இருப்பவர் இதைச் சொல்வது முரண்பாடு இல்லையா?

பாரத தேசத்தின் பெயர் மட்டுமில்லை. ‘யமுனா’, ‘சிந்து’, ‘தப்தி’, ‘சரஸ்வதி’ என நமது நாட்டின் நதிகளின் பெயர்களும் வருகின்றன. எந்த நாட்டில் இருந்தாலும் தமது தாய்நாட்டையும், அதன் வளத்தையும் சொல்லி வழிபடுவதில் முரண்பாடு இல்லை."

இதை சாஸ்திரங்கள் அனுமதிக்கிறதா?

ஒருகாலத்தில் கோயில்களில் மட்டுமே உபன்யாசங்கள் நடந்துகொண்டிருந்தன. இப்போது லைவாக டி.வி.யில் பார்க்க முடிகிறது. மொபைலில் காலர்டியூனாக வேத மந்திரங்களை வைத்திருக்கின்றனர். சி.டி., டி.வி.டி.க்களில் விஷ்ணு சகஸ்ரநாமம், அஷ்டோத்திரங்களைக் கேட்டு பாராயணம் செய்கிறார்கள். நமது சாஸ்திரங்கள் தொழில் நுட்பங்களை எதிர்க்கவில்லை."

ஸ்கைப் மூலமாக வேறு என்ன செய்கிறீர்கள்?

எனக்குத் தெரிந்த தம்பதிகள் குழந்தைக்கு, பிறந்த பதினைந்தாவது நாளில் புண்ணியாஜனம் ஸ்கைப் மூலம் செய்து வைத்திருக்கிறேன். அமெரிக்கர்களில் சிலர் ஜோசியத்தில் நம்பிக்கை உள்ளவர்கள், ஜோசியம் பார்த்து சில ஹோமங்களைச் செய்து தரச் சொல்வார்கள். சதாபிஷேகம், தன்வந்திரி ஹோமம், சுதர்சன ஹோமம், மஹாலெக்ஷ்மி ஹோமம் போன்றவற்றைப் பதிவுசெய்து, இ-மெயில் மூலம் இந்த அமெரிக்கர்களுக்கு அனுப்புவேன். ஸ்ரீரங்கம் நரசிம்ம அய்யங்கார் என் குரு."

எதிர்காலத்தில் திருமணம் கூட ஸ்கைப் வழியாக நடந்தால் ஆச்சர்யப்பட ஒன்றுமில்லை!

- நன்றி கல்கி

Read More...

Friday, September 21, 2012

மகாபாரதம் தமிழாக்கிய ம.வீ.ராமானுஜாசாரியார்


அச்சு இயந்திரம் கண்டுபிடிக்கப்பட்டு இந்தியாவிற்கு வந்தபிறகு அச்சேறிய முதல் மொழி தமிழ்தான். கி.பி. 1800க்குப் பிறகு, அச்சிடுதல் குறித்த சட்டங்கள் விரிவாக்கப்பட்டு பரவலாக அச்சிடுதல் நடைபெற ஆரம்பித்தது தமிழகத்தில் அவ்விதம் திருக்குறளிலிருந்து
பற்பல நூல்களும் அச்சுவாகனம் ஏறி உலாவர ஆரம்பித்தன. தமிழ்த் தாத்தா சங்க இலக்கியங்களையும், காப்பியங்களையும் மீட்டுக் கொடுத்த வரலாறு நாம் அறிவோம்.


உ.வே.சா. போன்று தமிழ் இலக்கிய உலகிற்கு எண்ணற்ற சான்றோர்கள் தங்கள் வாழ்நாளை அர்ப்பணித்து பணியாற்றியுள்ளனர். அவர்களில் நாம் அறிந்துகொள்ள வேண்டிய மாமேதை தான் ம.வீ. ராமானுஜாசாரியார்.

திருச்சிக்கு அடுத்த மணலூரில் அந்த கிராமத்து முன்சீஃபாக பணியாற்றிய வீராசாமி ஐயங்கார் - கனகம்மாள் தம்பதியருக்கு 1866 ஏப்ரல் 16ஆம் தேதியன்று இரண்டாவது மகனாக இவர் பிறந்தார்.


வளர்ந்து, படித்து, சில காலம் கும்பகோணம் நேட்டிவ் ஹைஸ்கூலில் தமிழ்ப் பண்டிதராக பணியாற்றி பின்பு கும்பகோணம் காலேஜில் பணியாற்றினார். கும்பகோணம் நேடிவ் ஹைஸ்கூலில் இவர் பணியாற்றிய காலத்தில் நேரம் இருக்கும் போது, உ.வே.சா அவர்களைச் சந்தித்து இலக்கியங்களை வாசித்து இன்பம் அடைந்திருந்தார். அப்போது, உ.வே.சா சம்ஸ்க்ருதத்தில் சிறந்த பண்டிதர்கள் பலரை அடிக்கடி சந்திப்பார். அவர்கள் மஹாபாரதத்தில் உள்ள சில சிறந்த, அரிய விஷயங்களைச் சொல்லக்கேட்ட பிறகு, ஐயர் "வில்லிபுத்தூர் ஆழ்வார் ஒப்புயர்வற்ற சிறந்த மகாகவி. அவர் வடமொழி மஹாபாரதத்தில் உள்ள விஷயங்களையெல்லாம் விடாமல் பாடியிருந்தால் மிக நன்றாய் இருந்திருக்கும்" என்று பல முறை கூறுவார்.


பின்பு மஹாபாரதத்தைத் தமிழில் மொழி பெயர்ப்பது குறித்து சிற்சில முயற்சிகள் நடைபெற்றன.


1903-ல் ஆசாரியார் தமது நண்பர்கள் கேட்டுக்கொண்டதற்கிணங்க மஹாபாரதத்தைத் தமிழாக்க துணிந்தார். ஆயினும் இந்தப் பெரிய காரியத்தில் ஏற்படக்கூடிய சிரமங்களை நினைத்து இவர் மனம் கலங்க ஆரம்பித்தார். பிறகு ஒருவாறாக மொழிபெயர்க்கத் தொடங்கினார்.

கிட்டத்தட்ட 25 வருடங்களாக இந்த மொழிபெயர்ப்புப் பணியை இவர் செய்து, மஹாபாரதத்தை தமிழில் அச்சிட்டுக் கொடுத்தார். இதற்காக இவர் தமது ஆசிரியர் பணியையும் விட்டு விலகினார்.

ஆரம்பத்தில் இந்தப் பணியினுடைய சிரமங்களை நோக்கி வை.மு. சடகோப ராமானுஜாசாரியார் உள்ளிட்ட பெரியவர்கள் சிலர் இதை தனியொரு ஆளாகச் செய்யவேண்டாம் என்று கூறி தடுக்க முனைந்தனர். ஆயினும் இவர் கண்ணபிரானது திருவருள் ஒன்றையே துணையாகக் கொண்டு இந்த மலைபோன்ற காரியத்தை எடுத்துக்கொண்டார்.

வனபர்வம் இரண்டாம் பாகத்தில் தாம் இந்த மொழிபெயர்ப்புக்காக மேற்கொண்ட சிரமங்களையும், துன்பங்களையும், வேதனைகளையும் பல பக்கங்களில் விரித்துரைத்துள்ளார். அதில் ஒன்றை இங்கே குறிப்பிடலாம்.


தெரிந்த ஜோதிடர் ஒருவர் இந்த வேலையைப் பற்றி ஒரு சீட்டில் ஆரூடம் எழுதி இவரிடம் கொடுத்து அனுப்பினார். மஹாபாரத பதிப்புப் பணிக்காக ஏற்கனவே பல்வேறு துன்பங்களைத் தாங்கியிருந்த இவர், இந்த ஆரூடச் சீட்டு என்னவிதமான துன்பத்தைத் தரப்போகிறதோ என்று கருதி தாமே அதைப் பிரித்துப் பார்க்காமல் ஒரு உறைக்குள் வைத்து அரக்கு முத்திரையிட்டு பத்திரப்படுத்தி வைத்தார். மஹாபாரத வெளியீடு பூர்த்தியாகிய வேளையில் அந்தச் சீட்டினை எடுத்து படித்துப் பார்த்திருக்கிறார். இதை இவரே இவ்விதம் கூறுகிறார்:


"... அந்தக் காகித உறையைப் பிரித்துப் பார்த்ததில் `பாரதம் தமிழ் செய்யக்கேட்கிறது. வருஷம் மூணு செல்லும். இதில் கவலை அதிகம்' என்று எழுதியிருந்தது. ஆதியில் திவான் பகதூர் ரகுநாதராயர் சி.எஸ்.ஐ. அவர்களும், ஷ்ரீமான் வை.மு. சடகோப ராமானுஜாசாரியார் அவர்களும் பல காரணங்காட்டி தடுத்தார்கள். பிறகு என் அம்மானும் தமக்கையாரும் தடுத்தார்கள். ஷ்ரீமான் வி. கிருஷ்ணஸ்வாமி ஐயர் அவர்களும் மற்றும் பலரும் இது முற்றுப்பெறாது என்று சொல்லியிருந்தார்கள். அவற்றோடு செட்டியாருடைய ஆரூடமும் சேர்ந்து என் மனத்திற்கு இன்ன கவலையை உண்டாக்கியிருக்குமென்பதை அறிஞர்கள் ஊகிக்க வேண்டும். கோவிந்த செட்டியார் எழுதிக் கொடுத்த ஆரூடத்தை என்னோடு இடைவிடாமல் பழகிக் கொண்டிருப்பவர்களுக்கும் சொல்லாமல் 22 வருஷகாலம் மனத்தில் வைத்துக் கொண்டு இருந்தது சிரமமாகவே இருந்தது."


இந்த மாபெரும் பணிக்காக இவர் தனது அரசு வேலையை உதறித் தள்ளியது மட்டுமில்லாமல், இவரது மகன் எம்.ஆர். ராஜகோபாலனும் தனது பணியை துறந்து விட்டு தகப்பனாருக்கு உதவியாக இருந்து வந்தார்.


இந்த மிகப்பெரும் பணியின் பரிமாணத்தை இன்றைய சூழ்நிலையில் நாம் உணருவதற்கு ஆசாரியாரின் கீழ்க்கண்ட வரிகளை நாம் படிக்க வேண்டும்.

"எடுத்துக் கொண்ட காரியம் மிகப் பெரிதும் பெரும் பொருட்செலவினால் நிறைவேறக் கூடியதும் பல வருஷங்களில் நடந்து வந்ததும் ஆகையால் பல கனவான்களுடைய பேருதவி இன்றியமையாததாய் இருந்தது.... சம்பளம் படிச் செலவுகளும், வாங்கிய கடனுக்கு வட்டியும் முதலாக பலவகைகளிலும் பெருந்தொகை செலவாயிற்று. சுமாராகக் கணக்கு பார்த்ததில் ரூ.1,35,000க்கு மேல் செலவு தெரிகிறது... ஆரம்பச் செலவுகளுக்கும்... அச்சிடுவதற்குமாக ரூ.10,000க்கு மேல் கடன் வாங்க வேண்டிற்று. அதற்கு சுமார் 22 வருஷமாக சாதாரணமான வட்டி என்ன ஆகியிருக்கும் என்பது நான் தெரிவிக்க வேண்டியதில்லை.... என்னுடைய இதர வரும்படிகளாலும் ஈடானது போக பாக்கி ரூ.15,000 என் கைப்பொறுப்போடு இந்த மகாபாரதம் பூர்த்தியாகியிருக்கிறது."


இவருக்குத் திருவாவடுதுறை, திருப்பனந்தாள் திருமடங்கள் மிகப் பெரிய உதவிகளை ஆரம்பகாலம் தொட்டுச் செய்து வந்திருக்கின்றன. 1932ல் ஒருவர் ரூ.15,000 கைநட்டம் ஆக வேண்டுமென்றால் அவர் எவ்வளவு பெரிய லட்சிய வெறியோடு இந்த மாபெரும் பணியைச் செய்திருப்பார் என்பது நமக்கு விளங்காமற் போகாது.


ஆசாரியார் வெளியிட்ட பதிப்புகள் யாவும் தீர்ந்துபோன பின் கும்பகோணம் சிவராமகிருஷ்ண ஐயர் 1945-1959 காலகட்டத்தில் மீள்பதிப்புச் செய்தார். அந்தப் பிரதிகளும் இப்பொழுது கிடைப்பதில்லை.

சிவராமகிருஷ்ண ஐயரின் பேரன். எஸ். வெங்கட் ரமணன் (ஸ்ரீசக்ரா பப்ளிகேஷன்ஸ்) இந்த மாபெரும் பணியை இப்பொழுது நிறைவேற்றியிருக்கின்றார்கள்.

அடக்கத்தின் மறு உருவமான ரமணனிடம் இது குறித்து நாம் கேட்ட பொழுது, "ஆசாரியார் 25 வருஷம் உழைத்தார், நிறைய நஷ்டப்பட்டார். அவருக்குப் பின்பு எனது தாத்தா செய்த பணியை நான் செய்ய வேண்டுமென்ற ஒரே நோக்கம் தான் என்னை இந்த மாபெரும் பணியில் ஈடுபட வைத்தது. 2000த்தில் இதற்கான பணியை ஆரம்பித்தேன்.


முதல் பிரதியை காஞ்சி ஷ்ரீஜெயேந்திரர் வெளியிட்டார். 2004 வரையிலும் முதல் நான்கு பாகங்களை வெளியிட்டேன். பின்பு ஏற்பட்ட பொருளாதாரச் சிக்கல்களினால் 2007-2008ல் தான் மீதி ஐந்து பாகங்களை என்னால் வெளியிட முடிந்தது.


இந்த மஹாபாரதப் பதிப்பு பூர்த்தியான பிறகு பண்டித சா.ம. நடேச சாஸ்திரிகள் சம்ஸ்க்ருதத்திலிருந்து தமிழில் மொழிபெயர்த்து 6 வால்யூம்களாக வெளியிட்ட ராமாயணம், ஆசாரியார் மாப்பிள்ளை எஸ். ராமானுஜாசாரியார் மொழிபெயர்த்த ஹரி வம்சம், வைத்தியநாத தீட்சிதரின் வைத்தியநாத தீட்சிதீயம் என்ற தர்ம சாஸ்திர நூல், விஷ்ணு சஹஸ்ரநாமத்திற்கு சங்கரர், பராசரபட்டர் ஆகியோரின் பாஷ்யங்களை ஆசாரியார் தமிழில் மொழி பெயர்த்த நூல் ஆகியவற்றைத் தொடர்ந்து வெளியிடலாம் என்று எண்ணி இருக்கின்றோம். ஹிந்து சமுதாயமும் சான்றோர்களும் எங்களுக்குத் துணை நின்றால், இந்தப் பணி விரைவில் நிறைவேறும்" என்று கூறினார்.


ம .வீ. ராமானுஜாசாரியார் மஹாபாரதப் பதிப்புப் பணியில் பட்ட அதே கஷ்டங்களை, இப்பொழுது வெங்கட் ரமணனும் எதிர்கொண்டு வருகிறார். தமிழர் என்றோர் இனமுண்டு, தனியே அவர்க்கோர் குணமுண்டு என்பது இதுதானோ என்னவோ?

100 வருடங்களாக நாம் மாறாமலேயே இருக்கின்றோம் என்பதை இந்நூலுக்கு அணிந்துரை எழுதிய டி.என். ராமச்சந்திரனின் கீழ்க்கண்ட கூர்மையான வார்த்தைகள் நிரூபிக்கின்றன.

"நம் அன்பர் தம் கடமையைச் செய்து விட்டார். நாம் நம் கடமையைக் கைகழுவி விட்டோம். சனாதன தர்ம சனாதனிகள் என்று கூறி வருவோர் உரிய கழுவாய் தேடிக் கொள்வார்களாக."


( 2008 அக்டோபர் விஜயபாரதம் இதழில் வெளியானது )


வெங்கட ரமணனை தொடர்பு கொள்ள  - ++91 9894661259.

9/135 Nammalwar street, East tambaram, chennai.

மகாபாரதத்தின்  புத்தகங்களின் விலை -  Rs 4500. இன்னும் சில பதிப்புகளே உள்ளன. அதுவும் சில பர்வங்கள் ஸ்டாக் இல்லாமலும் இருக்கலாம்.

நான் விசாரித்த போது, பப்ளிஷ் செய்ய பெரிய மூலதனம் வேண்டும் என்றும், விரும்புபவர் எண்ணிக்கை பொறுத்தே மீண்டும் பதிப்பிக்க போவதாகவும் சொன்னார்..  

அப்டேட் :
வடமொழியில் ஸ்ரீ வேத வியாசரால் அருளிச்செய்த ஸ்ரீ மகாபாரதத்திற்கு சரியான தமிழ் ஆக்கம்

கும்பகோணம் காலேஜ்  லேட் சமஸ்க்ருத பண்டிதர் மகாவித்வான் சதாவதானம் ஸ்ரீ  உ-பய-வே தி.ஈ. ஸ்ரீநிவாஸாசாரியார் ,
கும்பகோணம்  அத்வைதசபா பண்டிதர்கள்,
மகாவித்வான் பிரம்மஸ்ரீ வேதாந்தகேசரி மஹாமஹோபாத்யாய  பைங்காடு ஸ்ரீ கணபதி சாஸ்திரிகள் ,
மகாவித்வான் பிரம்மஸ்ரீ கருங்குளம் ஸ்ரீ கிருஷ்ண சாஸ்த்ரிகள் , ஸ்ரீ வேங்கடாசாரியார் அவர்களால் மொழிபெயர்க்கப்பட்டு,

கும்பகோணம் காலேஜ் ரிடையர்ட் தலைமை தமிழ்ப்பண்டிதர் பாஷாபாரத துரந்தர, மஹாமஹோபாத்யாய  ,
 மணலூர் வீரவல்லி இராமனுஜாச்சரியாரால் தொகுக்கப்பட்டு

கும்பகோணம் ஸ்ரீ மகாபாரதம் பிரஸ்ஸில் லேட் சிவராமகிருஷ்ணய்யரால் அச்சிட்டு உரிமை பெறப்பட்டு வெளிவந்ததின் மறுபதிப்பு .
                                     ஸ்ரீ சக்ரா பப்ளிகேஷன்ஸ் -  சென்னை


Name of the publisher : S.Venkataramanan (Grandson of Kumbakonam Late S.Sivaramakrishnaiyer)
Sri Chakra Publications.
9/135 Nammalwar street, East tambaram, Chennai.
Ph: +91 9894661259 

Read More...

Thursday, September 20, 2012

புரட்டாசி சனிக்கிழமை - அர்ச்சனை ஸங்கல்பம் - இலவச சேவை

அனைவருக்கும் பெருங்குளம் ஸ்ரீ ஸாய் நவரத்ன விலாஸ் ஜோதிட நிலையம் தங்கள் வாழ்த்துக்களை தெரிவித்து கொள்கிறது.

நமது ஜ்யோதிஷ நிலையம் சார்பில் புரட்டாசி மாத சனிக்கிழமை(அனைத்து சனிக்கிழமைகளிலும்) தோறும் விஷ்ணு ஸகஸ்ரநாம பாராயணம் நடக்கிறது.



அதற்கு ஸங்கல்பம் செய்ய விருப்பமுடையவர்கள் தங்கள் கோத்திரம், பெயர், நக்ஷத்ரம், ராசி, லக்னம், வேண்டுதல்(திருமணம், வேலை... Etc) போன்றவற்றை எனக்கு மெயில் செய்யலாம்.

மெயில் செய்ய வேண்டிய முகவரி: ramjothidar@gmail.com.

குறிப்புகள்:
[1] இது முற்றிலும் இலவச சேவை.
[2] ஒரு குடும்பத்திற்கு 5 பெயர்கள் மட்டுமே சேர்க்கப்படும்.
[3] பிரஸாதம் வேண்டுவோர் புரட்டாசி கடைசி சனிக்கிழமைக்குள் கூரியர் சார்ஜ் மட்டும் அனுப்பிவைத்தால் பிரஸாதம் தபாலில் அனுப்பப்படும். [ஸ்ரீ சக்ர டாலர், அக்ஷதை, ஸ்ரீ சூர்னம், கையில் கட்டிக் கொள்ள கயிறு] [4] நமது ஜ்யோதிஷ நிலையம் சார்பில் நடைபெற்ற சனிப் பெயர்ச்சி மஹா யாகம், குருப் பெயர்ச்சி யாகம் போன்றவற்றில் கலந்து கொண்டு பெயர் பதிவு செய்தவர்களுக்கு இது முற்றிலும் இலவசம்.
[5] நீங்கள் கொடுக்கும் பெயர்கள் அனைத்து புரட்டாசி சனிக்கிழமைகளிலும் ஸங்கல்பம் செய்யப்படும்.
[6] இது அனைத்து மக்களுக்கும் உரிய சேவை.

மேலதிக விபரங்களுக்கு: போன்: +91-9790891864

நன்றி.
---
ஜோதிடம் எங்களது தொழிலல்ல...எங்களது உயிர்.

அடியேன் தாஸன்
பெருங்குளம் ராமகிருஷ்ணன் ஜோஸ்யர் MCA, MA(Ast) நவதிருப்பதி ஸ்தலம் பெருங்குளம் கோவில் , கிராமம் பரம்பரை ஜோதிடர் இருப்பு:சென்னை.
ஜோதிடம்: http://kuppuastro.blogspot.com/

Read More...

Wednesday, September 19, 2012

டேட்ஸ் விநாயகர்


இந்த வருடம் வெங்கட்நாராயணா சாலையில் பேரிச்சம்பழத்தில் உருவான விநாயகரை செய்துள்ளார்கள். நேற்று இதை பார்க்க நல்ல கூட்டம் இருந்தது. வருடா வருடம் இதே இடத்தில் இந்த மாதிரி விதவிதமான பிள்ளையாரை பார்க்கலாம். ஒரு முறை கிரிக்கெட் விளையாடுவது மாதிரி கூட இருந்தது. இந்த பேரிச்சம் பழம் எல்லாம் எங்கிருந்து வந்தது ?

ஐக்கிய அரபு அமீரகத்தின் பொருளாதாரம் இதனால் கூடியிருக்கிறது என்று சொல்லுகிறார்கள்

Read More...

Monday, September 17, 2012

ரா.கி.ரங்கராஜன் - ஒரு ஆத்மார்த்த அஞ்சலி-- கடுகு

முன்குறிப்பு: இந்தக் கட்டுரையில் நிறைய ‘நான்’ வருவதைத் தவிர்க்க முடியவில்லை. நான் அறிந்த ரா.கி.ர’ வைப்பற்றி எழுதும் போது, என் அனுபவ பூர்வமான விஷயங்களைச் சொல்லும்போது இது சாத்தியமல்ல, கூடிய வரைக் குறைத்திருக்கிறேன்!


என் எழுத்துக்கு ஊக்கமும் ஆக்கமும் தந்த முக்கியமானவர்களில் ஒருவர் ரா.கி.ரங்கராஜன்..

அவரை எப்போது முதன் முதலில் படித்தேன்? பல வருஷங்களுக்கு முன்பு ஒரு சிறுவர் பத்திரிகையில் ( அணில்? ஜிங்க்லி ? கல்கண்டு?) ‘பிரபலங்கள் பிள்ளைகள்” என்ற வரிசையில் கல்கி ராஜேந்திரன் அவர்களை, ரா.கி.ர பேட்டி கண்டு எழுதினார்.. அப்போதே அவர் எழுத்தின்மீது எனக்கு அபிமானம் ஏற்பட்டது!




அதன் பிறகு குமுதத்தில் வந்த பல கதை, கட்டுரைகளைப் படித்து ரசித்து இருக்கிறேன். குமுதத்தில் எழுதுபவர்கள் எல்லாரும் நன்றாக எழுதுகிறார்களே என்று யோசித்ததும் உண்டு. அதனால் அதில் எழுதும் பல எழுத்தாளர்களூக்கு விசிறியாகி விட்டேன். பின்னால் நான் குமுதத்தில் எழுத ஆரம்பித்த (1963) பிறகு எனக்குத் தெரியவந்தது, ரா,கி,ர, , ஜ,ரா,சு, மற்றும் புனிதன் ஆகிய மும்மூர்த்திகள்தான் அந்தப் ‘பலர்’ என்று! அவர்களில் அதிகப் புனைபெயர் கொண்டவர் ரா,கி,ர’ வாகத்தான் இருக்கும் என்பது என் யூகம்.

(ஒரு சமயம் தினமணி கதிரில் அவர் படத்தைக் கார்ட்டூனாகப் போட்டு ஒரு துணுக்கு வந்ததது. ” நான் இரண்டு டஜன் புனைப்பெயர்களை வைத்துக் கொண்டு எழுதுவதாகச் சொல்கிறர்கள். அதெல்லாம் ஒன்றுமில்லை.... எனக்கு இருப்பதெல்லாம் ஒரே ஒரு டஜன் புனைப்பெயர்கள்தான் !-ரா.கி.. ர..) (40 வருஷத்திற்கு முந்திய துணுக்கு, நினைவிலிருந்து எழுதியுள்ளேன். லேசான தவறு இருக்கலாம்!)

அந்தப் புனைபெயர்களையெல்லாம் தெரிந்து வைத்துக்கொண்டு மேலும் ரசித்துப் படித்தேன். இப்படி பல அவதாரங்களை எடுத்த அவர் இன்று இல்லை. அவருக்கு நான் ரசிகன் மாணவன், குடும்ப நண்பன். இவற்றுடன் சில வருஷங்களுக்கு முன்பு, ஆண்டவன் செய்த ஏற்பாட்டினால் ஒரு திருமணம் மூலம் அவரது உறவினனும் ஆனேன்.

அவர் 60-களில் புரசைவாக்கத்தில் குடி இருந்தார். அவர் வீடும் என் மனைவியின் வீடும் மிக மிக அருகில் இருந்தன. ஆகவே அவர் வீட்டிற்குப் பல தடவை போயிருக்கிறேன்.

அவரது கற்பனையின் வேகம், அவர் எழுதும் கதை கட்டுரைகளில் இருப்பதைப் போல பேச்சிலும், கடிதங்களிலும் தெரியும்.. பேனாவா, இங்க் போட்ட ஸ்கூட்டரா என்ற சந்தேகம் தோன்றும்.. அவரது பேனா அரை புட்டி இங்க் பிடிக்கும்: பேனா நிப்போ பட்டையோ பட்டை.!

ரா.கி, ர.-வைச் சந்திக்கும்போதெல்லாம் குமுதத்தின் ‘உள்’ விவரங்களைத் தெரிந்து கொள்ளும் ஆர்வத்தில் சில கேள்விகளைக் கேட்டு வைப்பேன். (இதெல்லாம் 1964 வாக்கில் நடந்தவை.) அவர் சிலவற்றைத் தவிப்பார். ஆனாலும் நிறைய சொல்லியிருக்கிறார், அவை எனக்கு மட்டும்தான்.

வார்த்தைக்கு வார்த்தை எடிட்டர், எடிட்டர்தான். அவர் வீட்டில் அதிக உயரத்தில் இல்லாத பரண் இருந்தது. அதைக் காட்டினர். அங்கு நிறைய புத்தகங்கள் இருந்த\ன..” இது எல்லாம் எடிட்டர் கொடுத்து என்னைப் படிக்கச் சொன்ன புத்தகங்கள்தான்” என்றார். அவரைப் பார்த்து எனக்குp பொறாமையாக இருந்தது.

அவருடைய மனைவி திருமதி கமலாவும் என் மனைவி கமலாவும் சிநேகிதர்கள். இருவரும் கடிதங்களில் குடும்ப விஷயங்களைப் பரிமாறிக் கொள்வார்கள்.

அவரது மனைவி திருமதி கமலாவின் பிறந்தகத்தில் ஒரு மூத்த உறவினரின் பெயர் கமலா என்பதால் இவருக்குச் ‘சின்னக்கமலா’ என்று பெயர் வந்து விட்டது. ரா,கி,ர-வும் ’சின்னக்கமலா’ என்ற பெயரில் ஒரு நாவலை எழுதிவிட்டார்!


யாராவது உறவினர்களோ போரடிக்கும் நண்பர்களோ வீட்டிற்கு வந்தால் இவர் பேப்பரும் பேனாவுமாக, சில சமயம் புரூஃப்களுடன் மொட்டைமாடிக்குப் போய் விடுவார். ஒரு சமயம் சொந்தமாக வீடு கட்டினார். எல்லாம் திருமதி ரா. கி. ர.தான் மேற்பார்வை. இப்படி அவர் காரியம் யாவினிலும் திருமதி கமலா கை கொடுத்ததால், ரா,கி,ர. குமுதம் பத்திரிகைக்கு முழுமனதுடனும் முழுமையாகவும் ஈடுபட முடிந்தது. ரா. கி. ர.-விற்கு வீட்டில் நடக்கும் விஷயங்களில் நிறைய விஷயங்கள் தெரியாது.

* * *
நான் டில்லியிலிருந்த போது அவரிடமிருந்தது வந்த, ஒரு வரி, இரண்டு வரி கடிதங்கள்தான் என் எழுத்து ஆர்வத்திற்கும், வளர்ச்சிக்கும் நீராகவும் உரமாகவும் உதவின. ( “என்ன ஓய், டில்லியில் பூகம்பமாமே., என்ன செய்து கொண்டிருக்கிறீர்? --ராகிர. இப்படிதான் இருக்கும் கடிதம். அவ்வளவுதான். அடுத்த செகண்ட் அரக்கப் பரக்கக் கிளம்பிப் போய் தகவல் திரட்டி, மொபைல் போஸ்டாபீஸில் சாயங்காலம் ஆறு மணிக்குக் கட்டுரையை அனுப்பிவிடுவேன். அடுத்த நாள் காலையில் என் கட்டுரை குமுதம் ஆபீசுக்குப் போய் சேர்ந்துவிடும். (’அடுத்த நாளேவா?’ என்றெல்லாம் கேட்காதீர்கள். அது ஒரு பொற்காலம்!)

ஒரு சமயம் ரா. கி. ர. என் னை வீட்டிற்கு அழைத்திருந்தார். ”ராத்திரி சாப்பிட வந்து விடுங்கள். உங்களுக்காக நான் ஆபீஸிலிருந்து சீக்கிரம் வந்து விடுகிறேன்” என்றார்.

”சரி சார் ....... ஏழு ஏழரைக்கு வந்து விடுிகிறேன்” என்றேன்,

’அவ்வளவு சீக்கிரம் வேண்டாமே!. ஒன்பது மணிக்கு வந்து விடுங்கள் எனக்கு அது தான் சீக்கிரம்” என்றார்.

அன்றிரவு ’சீக்கிரமாக’ ஒன்பதரைக்கு வந்து விட்டார், சாப்பிட்டோம். சிறிது நேரம் பேசிக்கொண்டிருந்தோம். அப்போது ஆபீஸ் பையன் வந்தான். நீளமான கேலி ப்ரூஃப்புடன் அதைக் கொடுத்துவிட்டு காலையில ஐந்து மணிக்கு வர்றேன் சார் . அதுக்குள்ளெ பாத்து வெச்சிட்டீங்கன்னா, வாங்கிட்டு போய்டுவேன்...... ப்ரஸ்ல சொன்னாங்க .”. என்றான்.

”சரி வந்து விடு” என்று சொன்னார்.

நான் உடனே விடை பெற்று கிளம்பினேன்.
* *
ஒரு சமயம் ரா. கி. ர விற்கு அமெரிக்காவிற்கு விஜயம் செய்ய அமெரிக்க அரசு அழைப்பு விட்டது . போகலாமா வேண்டாமா என்று யோசித்தார். அந்த சமயம் அவர் தொடர் கதை வந்து கொண்டிருந்தது என்று ஞாபகம். அதனாலும் வேறு காரணங்களாலும் அவர் அந்த அழைப்பை ஏற்கவில்லை. அது பற்றி பின்னால் வேடிக்கையாக அவர் சொன்னது:” அமெரிக்கா போக வேண்டுமென்றால் பேண்ட் போட்டுக் கொள்ளவேண்டும் . இது வரை நான் பேண்ட் போட்டுக்கொண்டதே கிடையாது ஆகவே எல்லோரும் என்னை விசித்திர பிறவியாகப் பார்ப்பார்கள் என்ற தயக்கமும் கூச்சமும் ஒரு காரணம் ”என்றார்.

அவர் எழுதிய நாவல்களில் மிகச் சிறந்ததாக படகு வீடு நாவலைக் கூறுவார்கள். அந்த நாவலுக்காகவும் வேறு ஒரு நாவலுக்காகவும் (அடிமையின் காதல்?) தகவல் திரட்ட காஷ்மீர், ராஜஸ்தான் ஆகிய இடங்களுக்குச் செல்ல, இரண்டு தடவை டெல்லி வந்து என் வீட்டில் தங்கினார். அவர் கையுடன் கொண்டு வந்திருந்த 200 பக்க, பவுண்ட் நோட் புத்தகத்தில் குறிப்புகளை எழுதி வைத்திருந்தார், மெள்ள அதை எடுத்துப் பார்த்தேன்.. கிட்டதட்ட 200 பக்கமும் ஒரு நாவல் அளவு குறிப்புகள்.!

அவரது திறமையையும் உழைப்பையும் பார்த்து அண்ணாந்து பார்த்து வியந்திருக்கிறேன். பிறகு கொஞ்சம் கொஞ்சமாக அண்ணாந்து பார்ப்பது குறைந்துவிட்டது. அதன் காரணம் எளிமையாகவும் பந்தா இல்லாமலும் அவர் பழகிய விதம்தான். அது .மட்டுமல்ல; என்னை குட்டி எழுத்தாளனாகப் பார்க்காமல் என தகுதியைவிட சற்று கூடுதல் உயரத்திற்கு என்னைத் தூக்கி வைத்ததுதான்.


முதன் முதலில் அவர் என்னைப் பார்த்த போதுச் சொன்னது “ அட, இவ்வளவு இளைஞராக இருக்கிறீர்கள்!. டில்லி வாழ்க்கையில் ரொம்ப காலம் ஊறிக்கொண்டிருப்பவர் என்று நினைத்தேன்,”

அவர் அவ்வப்போது நடப்பு சேதிகளை வைத்துக்கொண்டு ’குறும்புப்பா’ எழுதுவார். லிமெரிக் வகைப் பாடல்கள்.. அவை எனக்குப் பிடிக்கும். அவரைப் பின்பற்றி நானும் எழுதினேன். குமுதத்தில் போட்டதுடன், எனக்குக் கடிதமும் எழுதிப் பாராட்டி ஊக்கமளித்தார்.

பல வருஷங்களுக்கு முன்பு, அவரது திருமணமான மகளுக்கு ஒரு பிரச்னை ஏற்பட்டது. தீர்வுகாண அவர் எடுத்த முயற்சிகள் பலனளிக்கவில்லை. சென்னை வந்த அவரைச் சந்தித்த போது சற்று வருத்தத்துடன் விவரங்களைச் என் மனைவிடமும் என்னிடமும் சொன்னார்,

பிறகு அவருக்குத் தெரிவிக்காமலேயே நாங்கள் சில முயற்சிகள எடுத்தோம். லேசாக பலன் அளிக்கும் அறிகுறிகள் தென்பட்டன. ஆனால் பிரச்னை தீரவில்லை. இருந்தும் அவர் எங்களுக்கு மிகவும் நெகிழ்ச்சியுடன் நன்றி கூறினார்

இது நடந்து 40 வருஷங்களுக்குப் பிறகு, அவர் என்னைப் பற்றி அண்ணாநகர் டைம்ஸில் ஒரு பெரிய கட்டுரை எழுதியபோது ஞாபகமாக எங்கள் சிறிய முயற்சியைப் பற்றி குறிப்பிட்டிருந்தார், ( நானே மறந்து விட்ட விஷயம் அது!)

( அண்ணாநகர் டைம்ஸில் அவர் எழுதிய கட்டுரயைச் சுருக்கி கடந்த் பிப்ரவரியில் வெளியான ‘கமலாவும் நானும்” என்ற என் புத்தகத்திற்கு அணிந்துரையாகப் போட்டிருந்தேன்.).

நான் சமீபமாகத்தான் சென்னைக்கு குடிவந்தவன் என்பதாலும் நான் இருக்கும் பேட்டையில் அவர் கட்டுரைகள் வரும் எந்த டைம்ஸும் வருவதில்லை..என்பதாலும் அதிகம் படிக்க முடியவில்லை. ஒரு சமயம் அவரை அவருடைய வீட்டிற்குப் போயிருந்தபோது அவரிடம் அதைச் சொன்னேன். ( (அவருடைய கட்டுரைகள் வாராவாரம் ஐந்து ( அல்லது எழோ?) டைம்ஸ்களில் வந்து கொண்டிருந்தன.)


”அதனாலென்னய்யா..இப்படிவாரும்” என்று அடுத்த அ றைக்கு அழைத்துச் சென்று, அண்ணாநகர் டைம்ஸில் வந்த கட்டுரை புத்தகங்களைக் கொடுத்தார். ஒரே மூச்சில் படித்தேன். ’கட்டுரைகள் எப்படி எழுதவேண்டும்’ என்று தெரிந்து கொள்ள விரும்புபவர்கள் வேறு எந்தப் புத்தகத்தையும் படிக்க வேண்டாம். . இவருடைய புத்தகங்களைப் படித்தால் போதும் என்று நிச்சயமாகச் சொல்வேன்..

இண்டர்நெட், கூகுள், ஈ-மெயில் எல்லாம் வந்த பிறகு அதில் இரவு பகல் பார்க்காமல் ஆழ்ந்து விட்டார். அவ்வப்போது ஏதாவது சந்தேகம் கேட்பார். முக்கியமாக தமிழில் தட்டச்சு செய்வது எப்படி என்று அவருக்குத் தெரியவில்லை. நான் ஒரு பெரிய கில்லாடி என்பது அவரது (தவறான) கணிப்பு. ஒரு நடை வந்து போங்களேன் என்பார் அவர் வீட்டிற்குப் போய் எனக்குத் தெரியாததையும் தெரிந்த மாதிரி விளக்கி விட்டு வருவேன்.


கடந்த சில மாதங்களாக அவர் உடல் நலமில்லாமல் இருந்தார் மாத்திரை மருந்துகள் காரணமாக தூங்கிக்கொண்டும் , லேசான மயக்க நிலையிலும் இருந்தார் தெளிவு ஏற்பட்டதும் என் பெயரை எழுதிக்காட்டி போன் போடச் சொல்லுவாராம்.அவர் என்னிடம் முக்கியமாகப் பேசியது: அவருடைய ’லைட்ஸ் ஆன்’ கட்டுரைகளைப் புத்தகமாகப் போடுவதைப் பற்றிதான்.

என்னையே போடச் சொன்னார். அதிலுள்ள சிரமத்தை எடுத்துக் கூறி வேறு யாரிடமாவது சொல்லுகிறேன் என்று சொன்னேன். நண்பர்கள் சுபாவிடம் கூறினேன் அவர்கள் இப்போது அந்த முயற்சியில் ஈடுபட்டுள்ளனர்.
* * *
ரா. கி. ர. பன்முக எழுத்துத் திறமை கொண்ட ஒரு எழுத்தாளர். அவருடன் பழகி, பாடங்கள் பலவற்றைக் கொண்டவன் என்ற முறையில் அவருக்கு நான் நன்றிக் கடன்பட்டிருக்கிறேன். கண்ணீர் மல்க என் சிரம் தாழ்ந்த அஞ்சலியை அவருக்குச் சமர்ப்பிக்கிறேன்.

பின்குறிப்பு: ரா.கி.ர பற்றி நீங்கள் எழுத வேண்டும் என்று கேட்டுக்கொண்ட உடனே இட்லிவடைக்கு எழுதி அனுப்பிய கடுகு சாருக்கு நன்றி.

Read More...

Sunday, September 16, 2012

லூஸ் மோகன்


அஞ்சலி

Read More...

Saturday, September 15, 2012

பேயோன் பக்கம் - ஒரே ஒரு கேள்வி



அன்புள்ள பேயோன்,
எனக்கு நீங்கள் யார் என்று தெரியாது, ஆனால் நீங்கள் வார வாரம் விகடனில் எழுதிவருவதை பார்க்கிறேன். எனக்கு தமிழ் படிக்க தெரியாது அதனால் பார்க்கிறேன் என்று குறிப்பிட்டுள்ளேன். அப்படியே படிக்க தெரிந்தாலும் விகடனில் படிக்க ஒன்றும் இல்லை பார்க்க தான் நிறைய இருக்கிறது. தமிழ் படிக்க தெரியாது என்ற ஒரே ஒரு குறை தான், மற்றபடி ரொம்ப சந்தோஷமாகவே இருக்கிறேன்.

சரி கேள்விக்கு வருகிறேன். முதல் பேயோன் பக்கத்தில் மேலே உள்ள படத்தை பார்த்தவுடன் உங்கள் மீது காதல் கொண்டேன். அதே படத்தில் உங்கள் பின்னாடி இருக்கும் உங்கள் மனைவி என்னை முறைப்பது மாதிரியே தெரிந்ததால் காதலிக்கும் ஆசையை உடனே கைவிட்டேன். இது எனக்கு பழக்கம் தான்.
( 0 0 0 0 0 - 5 சொட்டு கண்ணீர் )
ஆனால் வாசகர் கடிதம் எழுதாமலேயே என்னை மாதிரி படம் பார்க்கும் வாசகர்களின் ஆசையும் பூர்த்தி செய்துவிட்டீர்கள். அடுத்த இதழிலிருந்து பேயோன் பக்கத்தில் இந்த அம்மணியை கட் செய்து போட்டுவிட்டீர்கள். ( முதல் பேயோன் பக்கத்துக்கு பிறகு மற்றவை சுமார் என்ற விமர்சனம் இதனால் கூட இருக்கலாம், அதை பற்றி கவலைப்படாமல் தொடந்து உங்கள் பக்கத்தை பார்த்து வருகிறேன்). நிற்க.
விகடன் ஆபீஸில் வேலை செய்யும் ஒருவரை நேற்று டிராபிக் சிக்னல் சிகப்பாக இருக்கும் போது 60 செகண்டுக்கு பார்த்தேன். படம் விஷயத்தை பற்றி கேட்டதற்கு "உங்களுக்கு பாம்பு கண்கள் சார் எப்படி கண்டுபிடித்தீர்கள் ? " என்றார். அதற்குள் சிக்னல் பச்சையாக மாற போகிறபோக்கில் "பேயோன் சார் தான் எடுக்க சொல்லிவிட்டார்" என்று சொல்லிவிட்டு போய்விட்டார்.

ஒவ்வொரு வெற்றிக்கு பின்னாலும் ஒரு பெண் என்று அடிக்கடி சொல்லி கேள்விப்பட்டிருக்கிறேன் ஆனால் நீங்கள் அப்படி இல்லை என்று நிருபித்துவிட்டீர்கள்.

இஞ்ஞனம்,
Mrs.வெற்றிவேல் ஐயங்கார் ஐ.பி.எஸ்.
( ஐ.பி.எஸ் என்று போட்டதற்கு காரணம் கேஸ் வராமல் தடுக்க தான் )



மற்ற எழுத்தாளர்களுக்கு வாசகர் கடிதங்கள் தொடரும்... ( இட்லிவடைக்கும் வரவேற்கப்படுகிறது
!)

Read More...

Friday, September 14, 2012

ஒரே ஒரு ஊரிலே ... ஜெ குட்டி கதை

ஒரு ஊரில் ஒரு பெரும் வியாபாரி இருந்தார். அந்த வியாபாரி சில காலம் வேறொரு சிறிய வியாபாரியுடன் இணக்கமாக இருந்து வியாபாரம் செய்து வந்தார். சில காலத்திற்கு பின் அவர்களுக்கிடையே பிணக்கு ஏற்பட்டது. உடனே அந்த பெரும் வியாபாரி, இந்த சிறிய வியாபாரி தவறு செய்ததாகவும், தன்னை ஏமாற்றியதாகவும், அவரிடம் பணிபுரிபவர்களை கொத்தடிமைகளாக நடத்துவதாகவும் கூறி அவர் மீது புகார் கூறினார்.

இந்த குற்றச்சாட்டினால் கவலை அடைந்த அந்த சிறிய வியாபாரி, தனது நண்பன் மூலம் ஒரு பெரிய வழக்கறிஞரை அணுகினான். ஆனால் அந்த வழக்கறிஞர் தன்னால் இந்த வழக்கை ஏற்று நடத்த முடியாது என்று கூறிவிட்டார். இருப்பினும் அன்று மாலை அந்த சிறிய வியாபாரி, வழக்கறிஞர் வீட்டிற்கு சென்று காத்துக்கொண்டிருந்தார்.


வழக்கறிஞர் வந்தவுடன், தன் வழக்கிற்காக வாதாட வேண்டும் என்று அவரிடம் மீண்டும் மன்றாடினார் அந்த வியாபாரி. அந்த வியாபாரியின் மீது பரிதாபப்பட்டு, வழக்கினை ஏற்று நடத்த சம்மதம் தெரிவித்தார். அந்த வழக்கறிஞர் வழக்கு தொடர்பான ஆவணங்களை எடுத்து வருமாறு அந்த வியாபாரியிடம் தெரிவித்தார்.

இதையடுத்து மறுநாள் வழக்கு தொடர்பான ஆவணங்களை வழக்கறிஞரிடம் ஒப்படைத்தார் வியாபாரி. ஆவணங்களை படித்து பார்த்த வழக்கறிஞர் இந்த வழக்கினை தன்னால் நடத்த முடியாது என்றும், நீங்கள் வேறொரு வழக்கறிஞரை பார்த்துக்கொள்ளுங்கள் என்றும் கூறினார். ஆனால் அந்த வியாபாரி உங்களைத்தான் நம்பி வந்துள்ளேன். இந்த வழக்கினை நீங்கள் தான் வெற்றிக்கரமாக முடித்து தர வேண்டும் என்று வேண்டினான். வியாபாரியின் இந்த வேண்டுகோளினை கேட்ட வழக்கறிஞர், தனது பிற பணிகளை ரத்து செய்துவிட்டு வியாபாரியின் வழக்கை எடுத்துக்கொள்ள சம்மதம் தெரிவித்தார்.

வெகுவிரைவில் வழக்கு விசாரணைக்கு வந்தது. அந்த வழக்கறிஞரின் வாதத்தால் அந்த சிறிய வியாபாரி வழக்கில் இருந்து விடுபட்டார். ஆனால் பிறகு அந்த வழக்கறிஞரை சந்திக்கவும் இல்லை; நன்றியும் கூறவில்லை. அந்த வியாபாரியின் நண்பன், வழக்கறிஞரின் வாதத்திறமையால் தான் இந்த வழக்கு வெற்றி பெற்றது என்றார்.

அதற்கு அந்த வியாபாரி என் மேல் தொடுக்கப்பட்ட வழக்கு உண்மையிலேயே பலவீனமானது. இதில் வழக்கறிஞரின் பங்கு ஒன்றும் இல்லை. பணத்திற்காக தான் இந்த வழக்கறிஞர் இதர பணிகளை விட்டு விட்டு வாதாடினார் என்று அந்த வியாபாரி கூறினான்.

கதையில் வரும் இந்த வியாபாரி கருப்பாக இருப்பார். அவர் நிறம் மட்டும் கருப்பாக இருந்தால் பரவாயில்லை. ஆனால் அவர் உள்ளமும் கருப்பு என்பதை அவர் நிரூபித்துவிட்டார். இதுபோன்று தான் ஒரு சிலர் காரியம் கைகூடும் வரை உடன் இருந்து விட்டு பின் நம் மீதே பழிச்சொற்களை நாள்தோறும் அள்ளி வீசி வருகிறார்கள். ஆனால் யார் என்ன பேசினாலும், என் கடன் பணி செய்து கிடப்பதே என்ற குறிக்கோளுடன் மக்கள் நலத்திட்டங்களை நான் செயல்படுத்திக்கொண்டிருக்கிறேன்.

இந்த கதையை ஜெயலலிதா சொன்னவுடன் அரங்கில் பலத்த கைத்தட்டல் ஏன் தட்டினார்கள் என்று யாருக்காவது தெரியுமா ?

Read More...

Thursday, September 13, 2012

பாஹுகாவிடமிருந்து நாம் தப்பித்தோம் – அமெரிக்கா மாட்டிக் கொண்டது! – எஸ்.குருமூர்த்தி

பாஹுகாவிடமிருந்து நாம் தப்பித்தோம் – அமெரிக்கா மாட்டிக் கொண்டது! – எஸ்.குருமூர்த்தி

1980-ஆம் ஆண்டில் அமெரிக்க தேசியப் பொருளாதார ஆராய்வுக் குழு தீர்க்கதரிசனத்துடன், ‘குடும்பங்களை அழிக்கும் வகையில் அரசாங்கத்தின் சமூகப் பொருளாதாரக் கொள்கைகள் அமைந்திருக்கின்றன. அதன் விளைவுகள் பயங்கரமாக இருக்கும்’ என்று கூறியது. அதன் பிறகும் அந்தக் குழுவின் எச்சரிக்கையையும் பரிந்துரைகளையும் அமெரிக்க அரசாங்கம் கவனத்தில் கொள்ளாமல், அதே கொள்கைகளைக் கடைப்பிடித்தது. அது மட்டுமல்லாமல், குடும்பங்களை நிலைகுலைய வைக்கும் இக்கொள்கைகளைத் தீவிரப்படுத்தியது. அமெரிக்க அறிவு ஜீவிகளும், பத்திரிகைகளும், பொதுக்கருத்தை உருவாக்குபவர்களும் கூட, இந்தப் போக்கையே ஆதரித்து வந்தனர். இதற்குப் பின்னணியில் மூன்று சக்திகள் முக்கியமாக இருந்தன.

ஒன்று – குடும்பங்களைக் குலைக்கும் அத்துமீறிய தனி நபர் மற்றும் மனித உரிமை சிந்தனைகள், அதற்கான வாதங்கள், அமைப்புகள்; இரண்டு – பெண்களைக் கொச்சைப்படுத்தி, வக்கிரப்படுத்தும் பெண்ணுரிமை சிந்தனைகள், வாதங்கள், அமைப்புகள்; மூன்றாவது – இவற்றை எல்லாம் தங்களுடைய சொந்த நலனுக்காகத் தூண்டி பயன்படுத்தும் அமெரிக்கத் தொழில் அமைப்புகள், பெரிய பெரிய கம்பெனிகள். தொழில் அமைப்புகள் ஏன் குடும்பங்களை அழிக்க முயல வேண்டும்? காரணம், இதுதான் மேற்கத்திய கலாசாரம் மற்றும் பொருளாதாரத்தின் தற்காலிகமான பலமும், நிரந்தரமான பலவீனமும். முதலில் ‘எப்படி பொருள்கள் தயாரிக்கும் கம்பெனிகள் மறைமுகமாக குடும்பங்களைக் குலைக்கவும் கலைக்கவும் முயல்கின்றன. அதன் மூலமாக ஆதாயம் தேடுகின்றன’ என்று பார்ப்போம். பின்பு எப்படி தனி நபர் – மனித உரிமை மற்றும் பெண்ணுரிமை சிந்தனையாளர்கள், அமைப்புகள், போராளிகள்.... போன்றோர் குடும்ப அமைப்புகளைக் கலைத்து அழித்தார்கள் என்று பார்ப்போம்.

குடும்பங்கள் எந்த அளவுக்குக் குலைகின்றனவோ அந்த அளவுக்கு வியாபாரம் அதிகமாகிறது. அதனால்தான் பொருள்கள் தயாரிக்கும் கம்பெனிகள், குறிப்பாகப் பன்னாட்டுக் கம்பெனிகள், அதைப் பார்த்து உள்நாட்டுக் கம்பெனிகள் தங்களுடைய விளம்பரங்களில் குடும்பங்கள் என்றாலே, ‘கணவன், மனைவி, ஒன்று அல்லது இரண்டு குழந்தைகள்’ என்றே குடும்பங்களைச் சித்தரிப்பார்கள்.

அப்பா அம்மாவுடன், தாத்தா பாட்டியுடன் ஏதாவது ஒரு விளம்பரத்தைப் பார்த்திருக்கிறீர்களா? அப்படி தாத்தா, பாட்டியுடன் குடும்பங்கள் இருந்தால் எப்படி மேலும் கோடிக்கணக்கில் வீடுகளும், டி.வி. களும், ஏஸிகளும், கார்களும், மற்ற சாதனங்களும் வியாபாரம் ஆகும்? அதனால்தான் ஒரு குடும்பத்தில் சேர்ந்து வாழ்கிறவர்கள் எண்ணிக்கை குறையக் குறைய, வியாபாரம் அதிகம் ஆகிறது எனகிற அடிப்படையில், ‘குடும்பங்கள் என்றாலே கணவன், மனைவிதான். தாத்தா – பாட்டி, அப்பா – அம்மா கிடையாது’ என்ற ஒரு கருத்தை குறிப்பாக பொருட்கள் தயாரிக்கும் கம்பெனிகள் உருவாக்குகின்றன.

அப்போது தாத்தா – பாட்டி, அப்பா – அம்மா என்ன செய்வார்கள்? மேற்கத்திய நாடுகளில் அவர்களும் தனித்தனி வீடுகளில் இருப்பார்கள். அல்லது முதியோர் இல்லத்தில் இருப்பார்கள். கம்பெனிகள் அவர்களுக்கும் தனித்தனியாக தேவையானப் பொருள்களை வியாபாரம் செய்யும். ஆக, குடும்பங்கள் சேர்ந்திருப்பது வியாபாரத்துக்கு நல்லதல்ல என்று கம்பெனிகளுக்குத் தெரியும். அதனால் அவர்கள் தங்கள் வியாபார உத்தியை குடும்பங்கள் பிரிவதற்காக பயன்படுத்துகின்றனர்.

இப்படித்தான் அமெரிக்காவில் குடும்பங்களை கம்பெனிகள் முதலில் பிரிக்க ஆரம்பித்தன. 1950-ல் ஒரு அமெரிக்கக் குடும்பத்தில் 3.5 பேர் இருந்தனர். இப்போது 2.5 நபர்கள் மட்டுமே. இதனால் அமெரிக்காவில் 3.5 கோடி அதிக வீடுகள், ஏஸிக்கள், டி.வி.கள், கார்கள், குளிர்சாதனப் பெட்டிகள்... தயாரிப்பும் விற்பனையும் அதிகம் ஆகியது.

சென்ற இதழில் குறிப்பிடப்பட்ட, எப்படி குடும்பங்களின் முக்கியமான பணிகளான உணவு சமைப்பது, சுத்தம் செய்வது, துணி துவைப்பது போன்ற பணிகளை குடும்பங்கள் செய்யாமல், இக்காரியங்கள் எல்லாம் வியாபாரம் செய்யும் கம்பெனிகளின் கைக்குப் போய் விட்டன என்று அங்கலாய்க்கிறது. தவிர, அமெரிக்காவில் உணவு தயாரிக்கும் பன்னாட்டுக் கம்பெனிகளான ‘மாக்டொனால்ட்ஸ்’, ‘பர்கர் கிங்’, ‘நெஸ்லே’ போன்றவை அமெரிக்கக் குடும்பங்களின் அடுப்பங்கரையை காலி செய்து, அக்குடும்பங்களுக்கு உணவு சமைத்து வினியோகிப்பதை வியாபாரமாக்கி, பல்லாயிரக்கணக்கான கோடி ரூபாய் லாபம் சம்பாதிக்கின்றன. இதற்கு தனி நபர் – பெண்ணுரிமை இயக்கங்கள் துணை நின்றன.

இது பற்றி மேலும் கூறுகிறது அமெரிக்க ஆய்வுக் குழு: ‘அப்படி பொருள் தயாரிப்பவர்கள் மற்றும் வியாபாரிகள், குடும்பங்களின் மாமூலான வேலைகளைக் கூட வியாபாரமாக்கி, குடும்பங்களைப் பொறுப்பில்லாத அமைப்புகளாக – குறிப்பாக பெண்களைப் பொறுப்பற்றவர்களாக மாற்றியது ஒரு பக்கம். இன்னொரு பக்கம் குழந்தை பாதுகாப்பு, அவர்களின் படிப்பு, குடும்பங்களில் உள்ளவர்கள் எதிர்காலம்... போன்ற மிக முக்கியமான பொறுப்புகள் எல்லாவற்றையும் அரசாங்கமே ஏற்று வருகிறது. அதாவது அரசாங்கம் குடும்பங்களைப் பொதுவுடமையாக்கி இருக்கிறது.

இப்படியே போனால், பிறக்கிற குழந்தைகளைப் பேணுகிற பொறுப்பும் தாய் – தந்தையரிடமிருந்து அரசாங்கத்துக்குப் போய் விடுகின்ற வாய்ப்பு இருக்கிறது. இப்படி குழந்தைகளைப் பேணும் அடிப்படையான வேலைகள் கூட குடும்பங்களில் நடக்கவில்லை என்றால், குடும்பங்கள் என்பதற்கு என்ன பொறுப்பு இருக்கும்? அதேபோல், வேலையற்ற இக்குடும்பங்கள் எப்படி நிலைத்திருக்கும் என்கிற கேள்விகளையும் எழுப்பியது அந்த ஆய்வுக் குழு.

ஆண் பெண் சேர்க்கைக்காக ஒரு இடம் தேவை என்கிற அளவுக்கு மட்டும், மேற்கத்திய நாடுகளில் குடும்பங்களின் நிலை மாறிவிட்டன. அதற்கு மேலும் விகாரங்கள் – திருமணமில்லாமல் சேர்ந்திருப்பது, திருமணமில்லாமல் குழந்தைகளைப் பெறுவது, குழந்தைகள் வேண்டாம் என்று ஒப்பந்தமிட்டுக் கொண்டு ஆண் பெண் சேர்க்கை, ஓரினச் சேர்க்கை என்று உருவானதில் ஆச்சரியம் என்ன இருக்க முடியும்?

மேலும் இப்போது பெரிய சவாலாக உருவாகியிருக்கும் சந்தைப் பொருளாதாரத்தைப் பற்றி ஒரு சித்தாந்த ரீதியான ஒரு பிரச்னையையும், அப்போதே தீர்க்கதரிசனமாக எழுப்பியது அமெரிக்கத் தேசியப் பொருளாதார ஆய்வுக் குழு. இந்த சந்தைப் பொருளாதாரம் தனிநபர் உரிமையின் ஆதாரத்தில் அமைந்தது என்பதை ஒப்புக் கொண்டு, அந்த ஆய்வுக் குழு மேலும் கூறியது: ‘சந்தைப் பொருளாதாரம் தனி நபர் உரிமையின் அடிப்படையில் உருவாகி வளர்ந்தாலும், கடந்த 200 ஆண்டுகளாக அது பெரிய அளவில் வெற்றி அடையக் காரணம், குடும்பங்களுக்கு குணங்களையும், கலாசாரத்தையும் உருவாக்கி, வளர்த்து மக்களைப் பண்படுத்தும் அமைப்புகள் இருந்ததுதான். அப்படிப்பட்ட குடும்பங்களை அழிய விட்டால், தனி நபர் உரிமை அடிப்படையிலான சந்தைப் பொருளாதாரமும், ஜனநாயகமும் அழிந்து விடும். மேலும் தனி நபர் உரிமை, அரசியல் உரிமை, கலாசார உரிமை – என எல்லாமே அழிந்து விடும்.’ என்கிறது அந்தக் குழுவின் அறிக்கை.

அந்தக் குழு முடிவில் இப்படி கூறியது : ‘வருகிற 10 ஆண்டுகளுக்கு அமெரிக்கா, பொருளாதார முறையினால் சமுதாயத்தில் (குடும்பங்களில்) என்ன விளைவுகள் ஏற்படுகின்றன என்பது பற்றி சிந்தித்து செயல்பட வேண்டும்’ என்றது. அதைத்தான் அமெரிக்க அரசு செய்யவில்லை. அந்தக் குழு கூறிய சிறந்த கருத்துக்களுக்கு அமெரிக்க அரசாங்கம் செவிமடுக்காததால்தான், இன்று ஆபத்து அமெரிக்காவுக்கு மட்டுமல்லாமல், அமெரிக்காவிலிருந்து உலகமெங்கும் ஏற்றுமதியாகி வரும் அமெரிக்கக் கலாசார – சமுதாய – பொருளாதாரக் கொள்கைகளால், உலகுக்கும் ஆபத்து ஏற்பட்டிருக்கிறது. குடும்பங்கள் குலைந்து, கலைந்து, கம்பெனிகளின் கையில் சிக்கிக் கொண்டதும், பின்பு அரசாங்கத்துக்கு அடிமையானதும்தான் இந்த ஆபத்துக்கு அடிப்படைக் காரணம்.

குடும்பங்கள், அரசாங்கத்துக்கு அடிமையாவது ஆபத்து என்பதை, பல ஆயிரக்கணக்கான ஆண்டுகளுக்கு முன்னமே பாகவத புராணத்தில் வியாச பகவான் தெளிவாகக் கூறியிருக்கிறார். கம்சனின் மாமனார், ஜராசந்தனின் ஆலோசகரான பாஹுகா என்கிற அறிவுஜீவியிடம் கம்சன், ‘தான் எப்படி மக்களை அடிமைப்படுத்துவது?’ என்று கேட்டான். அதற்கு பாஹுகா இப்படி கம்சனுக்கு அறிவுரை கூறினார் : “உன்னுடைய கஜானாவைத் திறந்து மக்களுக்கு பணத்தைக் கொடுத்து, அவர்களை உழைக்காமல் ஜாலியாக வாழ வகை செய்; அவர்களுடைய குடும்பங்களைக் குலைத்து, கலைத்து அழித்து விடு; பெண்களை தங்கள் கற்பைவிட, உடல் இன்பத்தை அனுபவிப்பதே முக்கியம் என்று நினைக்க வை.

“அப்பா – அம்மா, தாத்தா – பாட்டி எல்லோரும் கிழங்கள். உபயோகம் இல்லாதவர்கள் என்று பிள்ளைகளுக்குப் பாடம் சொல்லிக் கொடு; வரம்பில்லாமல், தான் மட்டும் அனுபவிப்பதுதான் வாழ்க்கையின் நோக்கம் என்று மக்களை நம்ப வை; அப்படிச் செய்து விட்டால், அவர்கள் தர்மம், நியாயம், கடமை, தவம் இவை எல்லாவற்றையும் எள்ளி நகையாடுவார்கள்; இவற்றைப் பற்றி பேசுகிறவர்களைப் பைத்தியக்காரன் என்று நினைப்பார்கள்; இப்படி மக்களை நிலைகுலைய வைத்து விட்டால், ஆடு மாடுகள், எப்படி மேய்ப்பவன் சொன்னபடி நடக்கின்றனவோ, அப்படி நீ சொன்னபடி அவர்கள் நடப்பார்கள். நீ அவர்களுக்கு கசையடி கொடுத்தாலும் அதைப் பிரசாதம் போல ஏற்றுக் கொள்வார்கள்.” பாஹுகாவின் இந்த சிறந்த பொருளாதாரக் கொள்கைகளை நம் நாடு ஏற்காததால்தான், நாம் பிழைத்தோம். இன்று மேற்கத்திய நாடுகள் குறிப்பாக, அமெரிக்கா பாஹுகாவின் பொருளாதாரத்தை முழுமையாக ஏற்று, குடும்பங்களை அழித்து, பெண்களைக் கொச்சைப் படுத்தி, குடும்பங்களை வியாபாரிகளுக்குக் காவு கொடுத்து, அரசாங்கத்துக்கு அடிமையாக்கி இருக்கிறது. பாஹுகாவிடமிருந்து நாம் தப்பித்தோம். ஆனால் அமெரிக்கா மாட்டிக் கொண்டது.
நன்றி: துக்ளக்

Read More...

Wednesday, September 12, 2012

நீங்க எப்போது ?





நீங்க எப்ப சச்சின் திரும்பி வர போறீங்க ?

Read More...

ரா.கி.ரங்கராஜன் அஞ்சலி கட்டுரை - 3

சமீபத்தில் மறைந்த, எழுத்தாளர் ரா.கி.ரங்கராஜனுடன், தான் பழகிய பசுமையான நினைவுகளை நம்முடன் பகிர்ந்து கொள்கிறார் பாக்கியம் ராமசாமி:
குமுதம் ஆசிரியர் எஸ்.ஏ.பி., ஒரு குரு; இணை ஆசிரியர் ரா.கி.ர., இன்னொரு குரு. எடிட்டர் எஸ்.ஏ.பி., மகா பெரியவாள் மாதிரி. என்னை பொறுத்தவரை ரா.கி.ர.,வும் சகல விதத்திலும் என் மதிப்புக்குரிய பெரிய குரு. அவரை வெறுமே, "பெரியவர்' என்று சொல்வது, உரிய மரியாதை கொடுத்தது ஆகாது என்று நினைப்பேன். ஆகவே, அவர் எனக்கு, "சின்ன மகாப் பெரியவர்!' ரா.கி.ர.,வோடு, நான் ஏறக்குறைய, 40 ஆண்டு ஒட்டிக் கொண்டு இருந்திருக்கிறேன்.

கலைக் களஞ்சியம் பிரியரான அவரே, ஒரு கலைக் களஞ்சியம். எடிட்டர் எஸ்.ஏ.பி., பீரோ, பீரோவாகப் புதுப் புத்தகங்கள் படிப்பார். ரா.கி.ர., அதே பீரோ புத்தகங்களை ஆசிரியர் படித்தானதும், படித்து முடிப்பார்.
எவ்வளவு பெரிய, தடித்த சிக்கலான ஆங்கில நாவலாக இருந்தாலும், ரா.கி.ர., ஒரு சவாலாக எடுத்து, மொழி பெயர்த்துத் தள்ளிவிடுவார்.
ஒரிஜினலே தமிழ்தானோ என்று எண்ணும்படி, மொழிபெயர்ப்பு சரளமாக இருக்கும்.
"எதை மொழி பெயர்ப்பு செய்ய வேண்டுமோ, அதில் இரண்டு பாரா ரசித்துப் படித்துவிட்டு, புத்தகத்தை மூடி விடுங்கள். இனி, அந்த இரண்டு பாரா விஷயமும், உங்கள் சொந்த சொத்து. அதை எழுதின வெள்ளைக்காரனுக்கு, அது சொந்தமில்லை. போனால் போகிறது என்று, அந்த இங்கிலீஷ்கார பாத்திரங்களின் பெயரைப் போட்டுக் கொள்ளுங்கள். மற்றப்படி, பூராப் பூரா உங்களுடைய சரளத்துக்கு ஏற்ப எழுதித் தள்ளுங்கள். அதுக்குன்னு அவன் ஒரு பாரா எழுதியதற்கு, மொழி பெயர்ப்பு செய்கிறவர். ஒரு பக்க வியாக்கியானம் பண்ணிவிடக் கூடாது. பணமும், பத்தாயிருக்கணும், பொண்ணும், முத்தாயிருக்கணும்,' என்பார்.
குமுதத்தில் பணிபுரிந்த போது, ரா.கி.ர.,வையும், அவரது பன்முக எழுத்தாற்றலையும், வியந்து கொண்டிருப்பது தான் என் முக்கிய, இனிய பொழுது போக்காக இருந்தது.

ரா.கி.ர.,வின் மொழிபெயர்ப்பைப் பற்றி, இன்னொரு உதவி ஆசிரியரான புனிதன் கிட்டே வியப்பேன். "என்னடா இது... ரங்காச்சு (ரா.கி.ர.,) என்ன ஏதாவது பசுமாடா? வைக்கோலைக் கொண்டு வந்து போட்டு, முதுகைத் தட்டினால் பாலாக் கறக்கிறாரே!' மேரி கொரல்லி பக்கத்திலே கூடப் போக முடியாது என்று ஆசிரியரே சொன்னார். ஆனால், ரா.கி.ர., பூந்து விளையாடி சபாஷும் வாங்கி விட்டார். மேரி கொரல்லி புத்தகம், தமிழக முன்னாள் முதல்வர் அண்ணாதுரையால் வெகுவாக சிலாகித்துப் படிக்கப்பட்ட கடின நடை ஆங்கில நாவல்!

சவால் என்றால், ரா.கி.ர.,வுக்கு சர்க்கரைக் கட்டி. இலக்கியத்தில் மட்டுமல்ல, சொந்த வாழ்க்கையிலும், எந்த சவாலுக்கும் பின்வாங்காதவர். ரா.கி.ர.,வுக்கு சைக்கிள் ஓட்டத் தெரியாது.

சைக்கிளே ஓட்டத் தெரியாது என்ற போது, மோட்டார் சைக்கிள், கார், ஆட்டோ, லாரி பற்றி எல்லாம் தனித்தனியாக சொல்ல வேண்டிய அவசியமில்லை.
ஒரு மத்தியான நேரத்தில், ஆபீஸ் புறக்கடைப் பக்கம் போய், டிபன் பாக்சுகளைக் கழுவி, உதறிவிட்டு, இலாகாவுக்குள் நுழைந்து கொண்டிருந்த போது, எங்கள் கவனத்தை வராந்தாவில் நிறுத்தப்பட்டிருந்த, அரை டஜனுக்கும் மேற்பட்ட புத்தம் புது சைக்கிள்கள் கவர்ந்து இழுத்தன.

எங்கள் கோஷ்டி, புது சைக்கிள்களை வேடிக்கை பார்க்க, ஷெட்டுக்குப் போயிற்று.
ரா.கி.ர.,வின் வழக்கம் எதையும், சந்தேகத்துக்கிடமின்றிக் கேட்டு அறிந்து கொள்வார். வாழ்க்கையில் அறிஞராகவதற்கு இந்த குணம் முக்கியம் என்றும் கூறுவார்.
"என்ன திடீர்ன்னு இத்தனை புது சைக்கிள்... யாருக்கு?' என்றார்.
சைக்கிள்களின் பக்கத்திலேஇருந்த அக்கவுண்ட்ஸ் இலாகா, "அண்ணாச்சி' பதில் சொன்னார்... "ஓரொரு டிபார்ட்மென்ட்டுக்கும், ஒரு சைக்கிள்ன்னு ஒதுக்கி இருக்காங்க!'
உடனே, என் பக்கம் திரும்பி, "நம்ம டிபார்ட்மென்ட்டுக்கு எதை எடுத்துக்கலாம்?' என்றார் ரா.கி.ர., அக்கவுன்ட்ஸ், "அண்ணாச்சி' சிரித்தபடி அவசரமாக, "அதெல்லாம் சைக்கிள் ஓட்டத் தெரிஞ்சவங்களுக்கு தான். உங்க டிபார்ட்மென்ட்லே யாரும் சைக்கிள் ஓட்றதில்லையே...' என்றார்.
ஏதோ கிரிக்கெட் மாட்ச் விவாதம் என்று நினைச்சு, "என்னாச்சு ஸ்கோர்?' என்றார் அங்கு வந்த, குமுதம் வெளியீட்டாளர் பார்த்தசாரதி.
அக்கவுன்ட்ஸ் அண்ணாச்சி, எந்த விஷயத்தையும், வெளியீட்டாளருக்கு அழகாகப் போட்டுத் தருவார்; அதாவது, விளக்குவார்.
"ஆர்.கே.ஆர்., அண்ணனுக்கு சைக்கிள் வேணுமாம்!' வெளியீட்டாளர் சிரித்தார் குறும்பாக, "ஏன்... ஆசிரிய இலாகாவுக்கு ஒண்ணு ஒதுக்க வேண்டியது தானே?'
"அதில்லே... அங்கே யாரும் சைக்கிள் ஓட்டறதில்லையே...' என்றார் அக்கவுன்ட்ஸ் அண்ணாச்சி.

"என்ன ரங்கராஜன் சார்... சைக்கிள் ஓட்டத் தெரிஞ்சவங்களுக்குத்தான் சைக்கிள். நீங்கள் ஓட்டறீங்களா... சொல்லுங்கள்?' என்றார் வெளியீட்டாளர்.
ரா.கி.ர.,வும் சிரித்தார். "சைக்கிள் ஓட்டறது என்ன பெரிய வித்தையா, கம்பசூஸ்திரமா... ஒரு மணி நேரத்திலே கத்துக் கொண்டால் தீர்ந்தது...' என்றார்.
எதிர் சவால் விட்டார் வெளியீட்டாளர்... "சார்...
இன்னிக்கு சனிக்கிழமை; நாளைக்கு ஞாயிற்றுக்கிழமை லீவு. உங்களுக்கு ஒரு மணி இல்லை; ஒரு நாள் தருகிறேன். நீங்கள் திங்கட்கிழமை, வந்து ஓட்டிக் காட்டினால், ஒரு சைக்கிள் இல்லே. இரண்டு சைக்கிள் உங்களுக்குக் கொடுத்துடறோம்...' என்றார்.

ரா.கி.ர., அனாயாசமாக, "சவாலுக்கு தயார்.
திங்கட்கிழமை ஓட்டிக் காண்பிக்கிறேன்...' என்றார்.
சவாலுடன் சனிக்கிழமை கழிந்தது.
ஞாயிறு தினம், காலை நேரு பார்க் மைதானத்தில், ரா.கி.ர., தனக்கு சைக்கிள் கற்றுத் தர, "அடி'யாட்களை, அதாவது, அடிபட்டுக் கொள்ளத் தயாராக உள்ள சில ஆபீஸ் நண்பர்களை வரவழைத்துக் கொண்டார். ஜாதகம் சரியில்லாத ஒரு வாடகை சைக்கிளை வரவழைத்துவிட்டார்.
மூன்று பேர் வந்தனர். கிராம தேவதை முன் பலிகடாவை, நிறுத்துவது போல சைக்கிளை கிழக்குப் பக்கமாக நிறுத்தியாயிற்று.
வேட்டியை தார்ப்பாச்சு போட்டுக் கட்டிக் கொண்டு, சைக்கிள் பெடலில் கால் வைத்தார் ரா.கி.ர.,

"பார்த்து... பார்த்து... பார்த்து...' பல குரல்கள்.
அதற்குள், ரா.கி.ர., தன் முதல், "விழுதலை' தரையில் பதிவு செய்து விட்டார்.
அடுத்து என்ன? பயிற்சிப் பட்டாளம் அவரைத் தூக்கி நிறுத்த, மீண்டும் பதவியேற்பு - சைக்கிள் ஆசனத்தில் அமர்ந்தார்.

பின்னணி வீரர்களின் சப்போர்ட்டில் ரா.கி.ர., சில அடிகள் முன்னேறினார்.
"உடம்பை வளைக்காதீங்க... நேரா பாருங்க!' சப்தங்களும், சமிக்ஞைகளும் வந்துகொண்டிருக்கும் போதே, சைக்கிள் ஒரு, திரிகோணாசனத்தை தவறாகச் செய்தவாறு, விசித்திரமாக வளைந்து திருகி ஒரு டமால்!
இந்தத் தடவை, ரா.கி.ர.,வின் சிராய்ப்புகள், ஆறுக்கும் மேலே என்று கணக்கிடப்பட்டது.

இப்படியே ஓட்டப் பழகுவது, கீழே விழுவதுமாக இருந்தது.
சூரிய அஸ்தமனத்துக்குப் பிறகு, போர் நிறுத்தப்படும் என்ற மகாபாரத கால யுத்த தர்மத்தை ஒட்டி, இருட்டிய பின், சைக்கிள் ஓட்டும் பயிற்சி நிறுத்தப்பட்டது.
அதற்குள், ரா.கி.ர., பாதி பீஷ்மர் ஆகி விட்டார். கைத்தாங்கலாக பாசறைக்கு - அவரது வீட்டுக்கு அழைத்துச் செல்லப்பட்டு, படுக்கையில் கிடத்தப்பட்டார்.
"ஆளுங்க சுகம் இல்லை...' என்றார்.

"சில பேர் காலை வாரி விட்டுட்டாங்க...' என்று, என்னைப் பார்த்தார்.
நான் சைக்கிளைப் பிடித்துக் கொண்டு, அவரோடு ஓடி வரவில்லை என்பதையே அப்படிக் குறிப்பிட்டார்.

திங்கள் காலை ஆபீசுக்கு தகவல் பறந்தது.
ரா.கி.ர., ரொம்ப அடிபட்டுக் கொண்டு விட்டதாக!
எடிட்டர், வெளியீட்டாளர், ஒர்க்ஸ் மானேஜர், எடிட்டோரியல் என்று சுமார் ஒரு முக்கால் டஜன் பேர்வழிகள், ரா.கி.ர.,வை உடனடியாகப் பார்க்கப் புறப்பட்டாயிற்று.

காயம் நிறையப்பட்டிருந்தாலும், ரா.கி.ர., இந்தளவு போராடி இருக்கிறாரே என்று அவருக்கு வீரப் பதக்கம் தராத குறையாக அனைவரும் பாராட்டினோம்.
ஒருவழியாக அனைவரும் விடைபெற்றோம். அப்போது, ரா.கி.ர., இருந்த வீடு விசாலமாக இருந்தாலும், வெள்ளாளத் தெருவில் ஒரு நீண்ட குறுகிய சந்துக்குள் இருந்தது. எதிரே, ஆள் வந்தால், யாராவது ஒருத்தர் வழி விட்டால்தான், மற்றொருவர் முன்னுக்குப் போக முடியும்.

ஆசிரியரும், வெளியீட்டாளரும் ஆச்சரியப்பட்டனர். எதிரே ஆள் வருவதற்குப் பதில், ஒரு எருமை மாடு வந்து விட்டது. ஒரே கலாட்டாவாகி, எப்படியோ ஒதுங்கி, அது எங்களுக்கு வழி விட்டு, நாங்கள் அதற்கு வழிவிட்டு மெயின் தெருவுக்கு வந்து சேர்ந்தோம்.

"இத்தனை குறுகிய சந்திலா, ரா.கி.ர., இருக்கிறார்?' என்று ஆசிரியரும், வெளியீட்டாளரும் வியந்தனர். "இங்கெல்லாம் வாடகைக்கு வீடு இப்படித்தான் சந்திலும், பொந்திலும் கிடைக்கிறது...' என்று யாரோ உரக்க முணுமுணுத்தனர்.
அடுத்த வாரமே, சிப்பந்திகளின் வீடு பிரச்னைக்கு தீர்வு ஏற்பட்டு விட்டது.
காரியாலயத்தின் அன்பளிப்போடு, சிப்பந்திகளின் வைப்புத் தொகை ஓரளவுடன், குடியிருப்புகள் எழுந்தன.

"ஹை வாஷ்பேசின், ஹை பால்கனி, ஹை ஷவர், ஹை மொசைக்' என்று குதூகலத்துடன் புதிய வீடுகளுக்கு (குமுதம் குவார்ட்டர்ஸ்) எல்லாரும் குடியேறினோம், ரா.கி.ர.வின் பெயரைச் சொல்லிக் கொண்டு!
***

பாக்கியம் ராமசாமி
( நன்றி: தினமலர் )
---------------------- * ------------------------ * ---------------------
‘லைட்ஸ் ஆப்’ - ரா.கி.ரங்கராஜன்
ஆறு மாதங்களுக்கு முன் ரா.கி.ரங்கராஜன் உடம்பு சுகம் இல்லாமல் இருக்கிறார் என்று கேள்விப்பட்டபோது சங்கடமாக இருந்தது. வருத்தத்துக்கும் சங்கடத்துக்கும் வித்தியாசம் இருக்கிறது.

பல முறை அவருடன் தொலைபேசியில் பேசியிருந்தாலும் ஒரே ஒரு முறைதான் அவரை நேரில் சந்தித்திருக்கிறேன். அந்த முதல் சந்திப்பிலேயே அவரிடம் பல நாள் பேசியது போன்ற உணர்வு. 80+ வயதிலும் மூன்று மணி நேரம் பேசிக்கொண்டு இருந்தார். சந்தித்ததை பற்றிச் சொல்வனத்தில் அப்போது எழுதியிருந்தேன் [http://solvanam.com/?p=4323] .

இன்று அவர் ஆச்சார்யன் திருவடி அடைந்தார் என்ற செய்தி கேட்டபின் அந்தச் சந்திப்பு பற்றி கட்டுரையில் எழுதாமல் விட்ட ஒன்றை இங்கே பகிர்ந்து கொள்கிறேன்.

அந்த மூன்று மணி நேரச் சந்திப்பில் ‘லைட்ஸ் ஆன் வினோத்’ பக்கம் பேச்சு திரும்பியது.

“லைட்ஸ் ஆன் வினோத்” என்ற பெயரில் குமுதத்தில் எழுதினேன்; பிறகு அந்தத் தலைப்பை குமுதம் உபயோகிக்கக் கூடாது என்று சொல்லிவிட்டார்கள். அதனால் கல்கியில் ‘சைட்ஸ் ஆன்’ என்று எழுதினேன். தற்போது துக்ளகில் ‘டெலிவிஷயம்’ என்ற தலைப்பில் எழுதுகிறேன்,” என்றார். இவர் எழுதிய எல்லாவற்றையும் பைண்ட் செய்து வைத்திருந்தார் அவர் மனைவி கமலா. அவைகளை என்னிடம் காண்பித்தார். ரஜினி இமயமலை போவது தொடங்கி சிலுக்கின் அடுத்த படம் எப்போது என்று எல்லாமே இருந்தது.

“இதிலிருந்து தேர்ந்தெடுக்கப்பட்ட சிலவற்றை ஒரு புத்தகமாகப் போட வேண்டும், உங்களுக்கு யாரையாவது தெரியுமா ?” என்றார். ஆச்சர்யமாக இருந்தது. எனக்கு தெரிந்த சில பதிப்பகங்களின் பெயர்களைச் சொன்னேன்.

“நானே அவர்களிடம் கேட்டேன்.. ஆனால் தட்டிக்கழிக்கிறார்கள்… இத்தனைக்கும் அவர்களை எனக்கு நல்லாத் தெரியும். எனக்கு அவர்களிடம் இந்த வயசில் திரும்பக் கேட்க என்னவோ போல இருக்கு,” என்றார்.

மனசுக்குள் இனம்புரியாத ஒரு வருத்தம் குடிக்கொண்டது.

“சார் நானே போடுகிறேன்” என்றேன்.

“உங்களுக்கு எதற்கு சிரமம்..”

“பரவாயில்லை சார்…”

“நீங்களே ஒரு 100 பகுதிகளை தேர்ந்தெடுத்துவிடுங்கள்,” என்றார்.

அவர் முகத்தில் மகிழ்ச்சியைப் பார்க்க முடிந்தது. பைண்ட் செய்யப்பட்ட எல்லா ‘லைட்ஸ் ஆன்’ புத்தகங்களையும் கவர்ந்து கொண்டு பெங்களூர் வந்தேன். பல பகுதிகளை வாசிக்க முடிந்தது ஆனால் புத்தகம் சம்பந்தமாக எதுவும் செய்ய முடியவில்லை.

ஒரு முறை அவரிடம் தொலைபேசியில் பேசியபோது இதைச் சொன்னேன். அவர், “பரவாயில்லை இங்கே நண்பர் ஒருவர் போடுகிறேன் என்று சொல்லியிருக்கார்,” என்றார். அந்தப் புத்தகங்களைத் திரும்ப அனுப்பினேன்.

ஒரு எழுத்தாள நண்பர் சில மாதங்களுக்குமுன் அவர் உடம்பு முடியாமல் இருக்கிறார் என்று சொன்ன போது ‘லைட்ஸ் ஆன்’ புத்தகம் நினைவுக்கு வந்து சங்கடப்படுத்தியது.

“எப்படியாவது சில காப்பிகளாவது போட்டு அவர் கடைசி ஆசையை நிறைவேற்ற வேண்டும் என்று எழுத்தாளர் ‘சுபா’ முயற்சி எடுத்துள்ளார்,” என்று அவர் சொன்ன போது கொஞ்சம் சந்தோஷமாக இருந்தது.

ஆனால் இன்று தன் எழுத்தைப் புத்தக வடிவில் பார்க்காமலேயே நம்மை விட்டுப் போய்விட்டார் என்று நினைக்கையில் வருத்தமாக இருக்கிறது.

அவர் எனக்குக் கையெழுத்துப் போட்டுக் கொடுத்த புத்தகத்தைப் பார்க்கும் போது… எப்படியாவது ‘லைட்ஸ் ஆன்’ புத்தகத்தை கொண்டு வந்திருக்கலாமோ என்று தோன்றுகிறது. மனம் மீளமுடியாத அழுத்தத்தில் கனக்கிறது.

-o00o-


ஹென்ரீ ஷாரீயரின் ‘பாப்பியான்’ என்ற புத்தகத்தை ‘பட்டாம்பூச்சி’ என்ற மொழிபெயர்ப்புப் புத்தகத்தில் ஆத்மார்த்தமாக சுஜாதா எழுதிய அணிந்துரையிலிருந்து சில பகுதிகளை இங்கே பகிர்ந்துக்கொள்கிறேன்–

“ரங்கராஜன் சுதந்திரம் வந்த புதுசிலிருந்தே எழுதி வருகிறார் என்பது என் அனுமானம். ஆரம்ப காலங்களில் அவர் கலைமகள் போன்ற பத்திரிகைகளில் எழுதினார். அவருடைய சிறுகதைகள் ‘பல்லக்கு’ என்ற புத்தகமாக வெளிவந்துள்ளது. துவக்க நாட்களிலேயே குமுதம் நிறுவனத்தில் சேர்ந்து அவர்கள் ‘கல்கண்டு பத்திரிகையுடன் கூடவே வெளியிட்ட ‘ஜிங்லி’ என்ற சுவாரஸ்யமான சிறுவர் பத்திரிகைக்குத் துணை ஆசிரியராக இருந்திருக்கிறார். ‘ஜிங்லி’யின் அகால மரணத்திற்கு வருத்தப்பட்டவர்களில் நானும் ஒருவன். பிறகு குமுதம் ஆசிரியர் குழுவில் சிறுகதைகளும் தொடர்கதைகளும் எழுதத் துவங்கினார். அதேசமயம் குமுதத்தில் ‘சூர்யா’ என்பவர் தரமான சிறுகதைகளை எழுதிவந்தார். ‘ஹம்சா’ என்பவர் வேடிக்கை நாடங்களும் டி.துரைஸ்வாமி துப்பறியும் கதைகளும் ‘கிருஷ்ண குமார்’ திகில் கதைகளும் ‘மாலதி’ குறும்பு கதைகளும் ‘முள்றி’ மழலைக் கட்டுரைகளும் ‘அவிட்டம்’ நையாண்டிக் கவிதைகளும் எழுதி வந்தார்கள்.

பிற்காலத்தில் நான் குமுதத்தில் எழுதத் துவங்கி ஆசிரியர் குழுவுடன் பரிச்சயம் ஏற்பட்டது. அப்போது ‘சூர்யா’ வின் செய்தி என்கிற சிறப்பான சிறுகதைக்கு ஏதோ ஒரு நிறுவனம் பரிசளித்திருந்த செய்தியில் கதையின் ஆசிரியர் ரா.கி.ரங்கராஜன் என்று குறிப்பிட்டிருந்தது. விசாரித்ததில் நான் மேற்சொன்ன அத்தனை எழுத்தாளர்களும் ரங்கராஜன் ஒருவரே என்கிற விவரம் தெரிந்து எனக்கு அப்போது ஏற்பட்ட பிரமிப்பு இன்னும் விலகவில்லை.

ஓர் எழுத்தாளர் கதை, கட்டுரை, நாடகம், கவிதை எழுதுவது எல்லாம் சகஜம். என்னாலேயே முடிகிறது. ஆனால் எப்படி ஒரே எழுத்தாளரால் நடையிலேயே கருத்திலோ உருவத்திலோ எதுவும் தொடர்பு இல்லாமல் தனித்தனி மனிதர்கள் போல எழுத இயலும்? இந்தப் பல்திறமைக்கு ஒரே ஒரு முன்னோடிதான் உள்ளார்: கல்கி.

நேரில் சந்திக்கும்போது ரங்கராஜன் இத்தனை திறமைகளையும் ஒரு சின்னப் புன்னகையில் மறைத்துவிடுவார். ஒரு தபால் தலையில் அடங்கிவிடக்கூடிய திறமை உள்ள எழுத்தாளர்கள் எல்லாம் சுயவிளம்பரமும் பட்டங்களும், பரிசுகளும் ஏற்பாடு பண்ணிக்கொண்டு சொந்தப் பெருமையில் குளிர்காயும் சூழ்நிலையில், ரங்கராஜன் ஒரு கர்ம யோகி; குமுதம் ஸ்தாபன விசுவாசம்; ஆசிரியர் எஸ்.ஏ.பி மேல் பக்தி; கிடைத்தது போதும் என்கிற திருப்தி; சக எழுத்தாளர்கள் மேல் பொறாமையற்ற பரிவு நேசம்; வெள்ளைச் சட்டை வெள்ளை வேட்டி நெற்றியில் ஸ்ரீசூர்ணம், நண்பர்களைக் கண்டால் கட்டி அணைத்து முதுகில் ஒரு ஷொட்டு; பெரிசு பெரிசாக குண்டு பேனாவில் எழுதப்பட்டச் சிறகடிக்கும் எழுத்து. ஏறக்குறைய ஒரு லைப்ரரி அளவுக்கு இவர் எழுதியிருக்கும் கதை, கட்டுரைகள் அனைத்தையும் திருமதி கமலா ரங்கராஜன் பைண்டு பண்ணி வைத்திருக்கிறார். இவரது படைப்புகள் திரைப்படங்களாக வந்திருக்கின்றன. சின்னத்திரையில் வந்திருக்கின்றன.

இத்தனை சாதனை படைத்தவருக்கு, குறைந்தபட்சம் ஒரு பொன்னாடை கூட போர்த்தாதது தமிழகத்தின் விசித்திரமான முரண்பாடுகளில் ஒன்று!”

-o00o-

கடைசியாக சில லைட்ஸ் ஆன் பகுதிகள்…

தளபதி என்றதும் நினைவு வருகிறது.

குட்லக் தியேட்டரில் இரண்டு பிரிவியூ தியேட்டர்கள் இருக்கின்றன. இரண்டிலும் ஒரே சமயத்தில் தளபதி படம் போட்டார்கள். அப்படியும் கூட்டம் தாங்காமல் நடுநடுவே நாற்காலிகளைப் போட்டு சமாளிக்க நேரிட்டது. ஜி.வி.தான் வரவேற்றுப் பேசினார். மணிரத்தினம்? எங்கேயும் காணோம். Two is company, three is crowd.
(குமுதம்)

‘பரவை’ பறந்தார்!

நாட்டுப்புறப் பாடல்களில் புகழ் பெற்று விளங்கும் பரவை (பறவை அல்ல) முனியம்மா, ஜெயா டி.வி.யில் தன் அனுபவங்களை விவரித்தார். இப்போது அறுபது வயதாகிறதாம். ஆறு வயது முதல் கிராமப்புறங்களில் பாடி வருவதாகச் சொன்னார். சில பாட்டுக்களைப் பாடிக் கொண்டிருந்தவர், விருட்டென்று நாற்காலியைவிட்டு எழுந்து விட்டார். பேட்டியாளர், ‘ஏன்? என்ன விஷயம்? நான் ஏதாவது தப்பாகப் பேசிவிட்டேனா?’ என்று பதறினார்.

‘அதெல்லாமில்லை. இந்தப் பாட்டைச் சும்மா பாடக் கூடாது. ஆடிக் கொண்டேதான் பாடணும்,’ என்று விளக்கிய பரவையம்மாள், ‘வெத்திலை பாக்கு கொழுந்து வெத்திலை’ என்ற பாட்டை ஆடிப் பாடி அமர்க்களப்படுத்தி விட்டார். ஆம். There is a story in everyone’s life.
(துக்ளக்)

சுஜாதா தேசிகன்
(நன்றி:சொல்வனம் )

Read More...

Tuesday, September 11, 2012

சோ பேட்டி(கள்)

புதிய தலைமுறை, விகடனுக்கு சோ அளித்த பேட்டிகள்

புதிய தலைமுறை


soo02_chunk_1_(new) by w1tamilan

விகடன் பேட்டி


Read More...

Monday, September 10, 2012

ஜெ மேடையில், ரஜினி கூத்து - குமுதம்





நன்றி: குமுதம்
இந்த நிகழ்ச்சி ஜெயா டிவியில் வரும் போது ரஜினி பேச்சு எடிட் செய்யப்படுமா/படாதா ?

Read More...

பத்ரி, வன்மையாக கண்டிக்கிறேன் !

கார்ட்டூன் அரசியலில் இந்த வாரம் இரண்டு கார்ட்டூன்கள் பற்றியது. ஒன்று முதல்வர் ஜெயலலிதா , இந்தியப் பிரதமர் மன்மோகன் சிங் ஆகியோர் குறித்து மிகவும் ஆபாசமான , அருவருக்கத்தக்க ஒரு கார்ட்டூன் ஒன்றை இலங்கை பத்திரிக்கை போட்டுள்ளது. அடுத்து இந்திய நாடாளுமன்றத்தையும் தேசியச் சின்னத்தையும் அவமதித்து கார்ட்டூன் வரைந்ததாக அசீம் திரிவேதி என்பவர் கைது செய்யப்பட்டுள்ளார். இதை பற்றிய செய்திகளை நீங்களே படித்து தெரிந்துக்கொள்லலாம். இது சரியா தவறா என்ற விவாதம் தனியாக வைத்துக்கொள்ளலாம்

தற்போது வைஷ்ணவம் படிக்கும் பத்ரி தன்னுடைய பதிவில் ஒருவருக்கு இப்படி கமெண்ட் எழுதியுள்ளார்.

தேசிய கீதத்தை அவமானம் செய்வதை, தேசியக் கொடியை எரிப்பதை அல்லது கேவலப்படுத்துவதை எல்லாம் முழுமையாக அனுமதிக்கவேண்டும் என்பது என் கருத்து. - பத்ரி

என்ன படித்து என்ன பிரயோஜனம். நான் அறிவுஜீவி எனக்கு எல்லாம் தெரியும், நான் ஐ.ஐ.டியில் படித்த அதே அறிவுடன் தான் எல்லாவற்றையும் அணுகுவேன் என்று வீம்பு பிடித்தால் என்ன செய்வது ?

மும்பையில் கொடி எரிந்துவிட கூடாதே என்று போராடியதை டிவியில் பார்க்கும் இவர் போன்றவர்களுக்கு அந்த உணர்வு எப்படி தெரியப் போகிறது ? சட்டம் எல்லாமே மக்களின் உணர்வுகளின் வழியாக வடிவம் பெற்றவையே அன்றி டேபிள் சேர் போட்டு எழுதப்பட்டவை அல்ல. எங்கே, முகமது நபிக்கு படம் போட்டது சரி என்று சொல்லச் சொல்லுங்கள் பார்க்கலாம். அப்போது மதம் மக்கள் நம்பிக்கை எல்லாம் வந்துடிவும் அதுவே ஹிந்து இந்தியா இந்தியன் என்றால் முற்போக்கும் அறிவுமே முன்னிற்கும். இது செக்யூலர்களின் முற்போக்கு வியாதி

ஒரே நல்ல செய்தி: நல்ல வேளை பத்ரி தமிழ் புத்தகம் பதிப்பிக்கும் தொழிலை தேர்ந்தெடுத்தார், ஏதாவது கல்லூரி அல்லது பள்ளிக்கு டீச்சராக போயிருந்தார் ? அவரிடம் பயிலும் மாணார்களுக்கு கொஞ்ச கூட தேச பக்தியே இல்லாமல்.... நினைத்துக்கூட பார்க்க முடியவில்லை.

பத்ரியின் இந்த பின்னூட்டத்தை இட்லிவடை வன்மையாக கண்டிக்கிறது

Read More...

Thursday, September 06, 2012

முதலிரவுக் கதை - எழுதியவர் ?

சில நாள்களுக்கு முன் பிரபலம் ஒருவர் Facebookல் இந்த மாதிரி எழுதியிருந்தார்.

எஸ்.ரா சிறுகதைத் தொகுப்பு முழுவதையும் ஒரே மூச்சில் படித்துமுடித்துவிட்டேன். படு சாதா சப்பை நடையில் ஆரம்பித்து, போகப்போக... :((

இனி சாதாரணமாக வந்தான், போனான் என்று எழுதப்படும் கதைகள் எதுவும் எனக்குப் புரியாது போலிருக்கிறதே :((((((((

#சாபவிமோசனம்கிடைக்குமா?


இவர் இந்த மாதிரி போட்ட அதே சமயம் இட்லிவடைக்கு ஒரு சிறுகதை வந்தது. எஸ்.ராவே இப்படி அடி வாங்கும் போது இந்த கதையை போட்டு எழுதியவருக்கு அடி வாங்கிக்கொடுக்க வேண்டாம் என்று இருந்துவிட்டேன். இப்போது சரக்கு மாஸ்டர் கொடுத்த தைரியத்தில் இந்த சிறுகதையை இங்கே வாசகர்களுக்கு கொடுக்கிறேன்.

இதை எழுதியவர் யார் என்று கண்டுபிடிப்பவர்களுக்கு ஒரு புத்தகம் பரிசு !


முதலிரவுக் கதை

எச்சரிக்கை: உங்களுக்கு ஐக்மோபோபியா என்றால் இந்தக் கதையைப் படிக்காதீர்கள். சில இடங்களில் ரத்தம் இருக்கலாம்!


“இதுக்கு முன்னாடி எப்பவாவது இந்த மாதிரி மயக்கம் வந்திருக்கா?”

டார்ச் லைட் ராதாவின் கண்களைக் கூசச் செய்ய, ‘இல்லை’ என்பது போல அவள் லேசாகத் தலையை அசைக்க

முரளி “இது தான் முதல் தடவை டாக்டர்... போன வாரம் பில்லா படம் பார்க்கும் போது” என்று தொடர்ந்தான்..

"ஓ"

“படத்தில் ரத்தம் வரும் சீன்ல எல்லாம் குழந்தை மாதிரி முகத்தைத் திருப்பிக்கிட்டா... படம் முடிந்து திரும்ப வரும் போது ஷி வாஸ் நாட் நார்மல்.. அப்படியே மயங்கி என் மேல விழுந்துட்டா டாக்டர்”

டாக்டர் பல்ஸ் பிடித்துப் பார்த்தார்.

"பீரியட்ஸ் எல்லாம் எப்படி?”

"நார்மல் தான் டாக்டர்...”

"டேட்?"

"ம்... போன மாசம் 20”

"கல்யாணம் ஆகி எத்தனை மாசம் ஆச்சு?" என்று டாக்டர் கேட்ட போது முரளிக்குக் கொஞ்சம் ஆச்சரியமாக இருந்தது.

"நாலு மாசம்" என்றான்.

புதிதாகத் திருமணம் ஆன அடையாளங்கள் களைகட்டியிருந்த முகத்தில் ஓர் இனம்புரியாத பதட்டம் குடிகொண்டிருந்ததை டாக்டர் சதாசிவம் கவனித்தார்.

“மிஸ்டர் முரளி, நான் இவங்க கிட்ட கொஞ்சம் தனியா பேசனுமே!”

ஒரு கணம் தயங்கிய பின் “ஸ்யூர் டாக்டர். நான் வெளியே வெயிட் பண்றேன்” என எழுந்து சென்றவனைச் சில நிமிடங்களுக்குப் பின் அவர் உள்ளே அழைத்தார்.

“சரியான காரணத்தைக் கண்டுபிடிக்க உங்க மனைவியை நான் ஹிப்னோஸிஸ் பண்ண நீங்க அனுமதிக்கனும்.”

மார்பிள் தரையைப் பார்த்தவாறு மௌனமாக உட்கார்ந்திருந்த ராதாவைப் பார்த்துக் கொண்டே “ஓ.கே டாக்டர்" என்றான். அவள் பார்வையில் பயம் தெரிந்தது.

உடனே இன்டர்காமில் யாரையோ அழைத்துப் பேசினார் டாக்டர்.

“இன்னும் ஒரு ஒரு மணி நேரத்துல டாக்டர் சம்பத்தைப் பாருங்கள். ஐந்தாவது மாடி, எக்ஸ்ரே பக்கத்துல இருப்பார். நத்திங் டு வொரி.. இந்த விஷயத்தை அப்படியே மறந்துட்டு ஒரு காபி சாப்பிட்டுட்டு மேலே வந்துடுங்க... ஐ வில் ஆல்சோ பி தேர்"

ஐந்தாவது மாடியில் கூட்டம் அதிகமாக இல்லை. யாரோ இரண்டு பேர் எக்ஸ்ரேவிற்குக் காத்துக் கொண்டிருந்தார்கள். ஒருவர் கையில் இருந்த குமுதத்தில் மடங்கிய திரிஷா சிரித்துக்கொண்டு இருந்தார்.

“Dr.SAMPATH, MBBS,M.D.,C.Ht.” என்ற பெயர்ப் பலகையைத் தாண்டி உள்ளே சென்றார்கள்.

“குட் மார்னிங் டாக்டர்” என்றவுடன் நிமிர்ந்து பார்த்த டாக்டர் சம்பத் ஒரு புன்னகையுடன் அவர்களை வரவேற்றார். கலர் இல்லாத பஞ்சு மிட்டாய் போல இருந்தது அவர் தலை. டாக்டர் சதாசிவம் அவர்களுக்கு முன்னரே அங்கு வந்திருந்தார்.

டாக்டர் சம்பத் அடுத்த புன்னைகையுடன் "எப்பலேர்ந்து இந்த மாதிரி?" என்று ஆரம்பித்தார்.

"இப்ப தான் டாக்டர் கொஞ்ச நாளா..." என்றான் முரளி.

"இவங்க சொல்லட்டும்.. இவங்க தான் இப்ப பேசணும்..."

“ம்... எனக்கு எப்போ இந்த மாதிரி பயம்வரத் தொடங்கிச்சுனு தெரியல டாக்டர். ஆனா ரொம்ப நாளாவே இருக்கு. இப்ப இரண்டு மூன்று மாசமா கொஞ்சம் அதிகமா இருக்கு"

"எப்போலாம் வருது?"

"கத்தி, பிளேடு, ஊசி இதெல்லாம் யூஸ் பண்ணிட்டுத் தான் இருக்கேன். அப்படி ஒன்னும் பெருசா பயம் இல்ல. ஆனா இப்ப கொஞ்ச நாளா...”

“சொல்லுங்க”

“கத்தியைப் பார்த்தா உடம்புல ஏதோ ஒரு இடத்துல வெட்டுற மாதிரி தோணுது. ஊசியால துணி தைக்கும் போது அது கண்ணுல வந்து குத்திருமோனு பயமா இருக்கு. பிளேடுங்கற வார்த்தையைக் கேட்டாலே பயமா..."

அவள் சொல்வதை எந்தச் சலனமின்றிக் கேட்டுக் கொண்டிருந்தார் டாக்டர் சம்பத்.

"இன்னிக்கு காலையில நடந்தத சொல்லு" முரளி குறுக்கிடவும் ராதா தொடர்ந்தாள்.

“காலையில தூக்கக் கலக்கத்துல எழுந்து பால் பாக்கெட் கட் பண்ணலாம்னு கத்திரியைத் தேடினேன், கிடைக்கல. சரினு பக்கத்துல இருந்த காய்கறி வெட்டுற கத்தியை எடுத்து கட் பண்ணும் போது விரலை வெட்டிட்டேன். ரத்தம் கொட்ட ஆரம்பிச்சிருச்சு. அப்படியே பாலோடு பாக்கெட்டைக் கீழே உதறிட்டு கையைத் தண்ணில காட்டினேன்” அதற்கு மேல் தொடர முடியாமல் நிறுத்தினாள்.

“ம்.. ரிலாக்ஸ். என் கூட வாங்க... முரளி.. நீங்க வேணும்னா இங்கேயே இருக்கலாம்.. உங்க சாய்ஸ்"

"நானும் வரேன் டாக்டர்" என்று அவசரமாகச் சொன்ன முரளியிடம் ஒருவித பதட்டம் தெரிந்தது. எல்லாவற்றையும் கவனித்துக் கொண்டிருந்த டாக்டர் சதாசிவம் அமைதியாக அவர்களைத் தொடர்ந்தார்.

ஒரு சின்ன அறை. சாய்வாக அமைக்கப்பட்ட ஒரு நாற்காலிப் படுக்கை. மிதமாகக் குளிரூட்டப்பட்ட அறையில் ரம்மியமான வெளிச்சம். புத்துணர்வு தரும் நறுமணம் என்று எழுத்தாளர்கள் வர்ணிக்கும் அழகு எதையும் ராதாவால் அச்சூழலில் கவனிக்க முடியல்லை.

டாக்டர் சொன்னவாறு அந்தச் சாய்வு நாற்காலியில் அவள் படுத்துக்கொள்ள மெல்ல முனுமுனுப்பாய் ஏதோ ஒரு தேவியை நினைத்துக்கொண்டாள்.

அவள் நிதானமாக செட்டில் ஆவதற்கு அவகாசம் அளித்த டாக்டர் மெதுவாக பேசத் தொடங்கினார்.

“க்ளோஸ் யுவர் ஐஸ்.. நான் பத்துல இருந்து ஒன்னு வரைக்கும் எண்ணுவேன். மெதுவா… ரொம்ப மெதுவா.. உனக்குப் பிடிச்ச தனிமையான ஒரு இடத்தை மனசுல உருவகிச்சிக்கோ.. யாருமே இல்லாத ஒரு கடற்கரைல இருக்குற மாதிரியோ.. வானத்துல பறக்குற மாதிரியோ... தனியா ரிலாக்ஸ்டா... ரிலாக்ஸ்.. டென்ல இருந்து நான் ஒன் எண்ணும்போது நீ அந்த இடத்துக்குப் போயிருக்கனும். டென்... நைன்.. எயிட்.. செவென்.. ரிலாக்ஸ்.. சிக்ஸ்.. ஃபைவ்.. ஃபோர்.. ரிலாக்ஸ்.. ரிலாக்ஸ்.. த்ரீ.. டூ... ஒன்… ரிலாக்ஸ்... ராதா.. யூ ஆர் அலோன்.. ஸோ ரிலாக்ஸ்ட்.. ஃப்ரீ.. ஃப்ளையிங் இன் த ஏர்... ரிலாக்ஸ்”

அறை முழுதும் ஒரு அமைதி நிலவியது.. முரளிக்கு இதெல்லாம் புதிதாக இருக்க, ராதா அப்படியே ஆழ்ந்த உறக்க நிலைக்குச் சென்றிருந்தது தெரிந்தது.

“ராதா..”

டாக்டர் ராதாவிடம் மேலும் பேசப் பேச ஒன்றுக்கு ஒன்று தொடர்பில்லாத பல கதைகள் வெளிவந்தன. அவ்வப்போது உணர்ச்சிவசப்பட்ட அவளை அடிக்கடி அமைதிபடுத்த வேண்டியிருந்தது.

“தியேட்டர்ல படம் பார்த்தியா ராதா.. பில்லா..”

“டாக்டர்.. கத்தியால அவ கழுத்தை அறுத்தாங்க... டாக்டர்... எனக்கு மயக்கமா வருது.. அவ மயங்கிட்டா... செத்துட்டா... நான் மயங்குறேன்.. முரளி..”

“ராதா.. யூ ஆர் ஆல்ரைட்.. விஆர் வித் யூ”

“நான் ப்ளட் டொனேட் பண்றேன்.. பாவம் அவங்க. என் ரத்தத்தை ஒரு பாட்டில்ல எடுக்குறாங்க. எனக்கு மயக்கமா வருது. ”.

“யூ ஆர் ஆல்ரைட்.. ராதா.. வலிக்கிதா?”

ராதா மெதுவாக ஒவ்வொரு வார்த்தைக்கும் நீண்ட இடைவெளி விட்டுப் பேசிக்கொண்டிருந்தாள்.

“ஆமா. தம்பிக்கு ஆக்ஸிடெண்ட். பெட்ல படுத்திருக்கான். நர்ஸ் அவனுக்கு ஊசி போடுறாங்க. வலியில அவன் முகத்தை ஒரு மாதிரி பண்றான். வெளியே கூட்டிட்டுப் போங்க... இப்பவே என்னை வெளியே கூட்டிகிட்டு போங்க ப்ளீஸ்!"

“ரிலாக்ஸ்... எங்க வலிக்கிது உனக்கு? ராதா.. எங்க இருக்க?”

“நான் ஐ.சி.யூ.ல இருக்கேன்”

“என்ன ஆச்சு உனக்கு?”

“ஒருத்தன் பெட்ல படுத்திருக்கான். ஒடம்பெல்லாம் கட்டு போட்ருக்காங்க. மூக்குல.. மூக்குல...
"மூக்குல என்ன ?"
"ரத்தம் வடிஞ்சிருக்கு. தண்ணி கேட்குறான் டாக்டர்.. வலியில கத்துறான்.. ப்ளீஸ் தண்ணி கொடுங்க...”

“உனக்கு ஒன்னும் ஆகல. ரிலாக்ஸ்.. ராதா.. வலிக்கல பாரு”

“வலிக்கிது டாக்டர். பிளேடு கையில வெட்டிருச்சு. ஸ்ஸ்ஸ்... ரத்தம் கொட்டுது.. அம்மா காப்பித்தூள் வச்சு அமுக்குறாங்க. எனக்கு வலிக்கிது....”

“ரிலாக்ஸ்.. ராதா... எல்லாம் ஆறிடுச்சு. யூ ஆர் கம்ப்ளீட்லி ஆல்ரைட். ஒன்னுமே இல்ல. பத்திரமா இருக்க”

“ராதா”

“...”

“ராதா... வலி போயிருச்சு உனக்கு... பிளேடு பார்த்தா பயமாயிருக்கா? சொல்லு கத்தியைப் பார்த்து ஏன் பயப்படுற? ராதா..”

“ஆமா... டாக்டர்... கத்தி... கத்தி இருக்கு...”

“சொல்லுமா.. எங்க இருக்கு?”

“டாக்டர்.. ஃபர்ஸ்ட் நைட்ல... ஆப்பிள்... கத்தி...”

“சொல்லும்மா.. கத்தி யார் கையில இருக்கு?”

“கையில இல்ல டாக்டர்.. வாயில”

“.........”

"ரூம் முழுசும் பூவா இருக்கு. பூமாலை நிறைய தொங்குது.. காத்தாடி வேகமா ஓடிட்டு இருக்கு... அவரு...”

உறைந்து போயிருந்த முரளியைத் திரும்பிப் பார்த்தார் டாக்டர்.

“சொல்லும்மா...”

“அவர்.. கோபமா ஒரு ஆப்பிளை எடுத்து அதைச் சரசரனு வெட்டித் தரையில போட்டு.. அதுல ஒரு துண்டை அப்படியே கத்தியில குத்தியெடுத்து வாயில வெச்சு......” ராதாவின் குரல் கம்மி தொண்டையை அடைத்தது.

“சொல்லு”

“வாயை மூடிட்டுக் கத்தியை அப்படியே இழுக்குறார்... டாக்டர்.............” அப்போது ராதா போட்ட சத்தம் அந்த அறையையே அலற வைத்தது.

டாக்டர் சம்பத் முரளியை வெறித்துப் பார்க்க, டாக்டர் சதாசிவமும் எதையோ கண்டுபிடித்துவிட்டது போல் முரளியை நோக்க, ராதா இன்னும் விம்மியபடி இருந்தாள்..

“…...”

“டாக்டர்.. கத்தி... கத்தி அவரோட ரெண்டு லிப்ஸையும் கிழிச்சு... ரத்தம் சட்டையில வடிஞ்சு............" அப்படியே மயங்கிப் போனாள்.

டாக்டர் சதாசிவம் முரளியை பார்க்க, டாக்டர் சம்பத் "பயப்பட ஒன்றும் இல்லை, சில வருடங்களுக்கு முன் 'புது புது அர்த்தங்கள்' படம் பார்த்ததால் ஏற்பட்ட விளைவு. நான் கூட போன வாரம் டிவியில் பார்த்தேன் என்றார்.

எழுதியவர் யார் என்று கண்டுபிடித்தால் புத்தகம் பரிசு.

Read More...

Tuesday, September 04, 2012

சிங்களத் தீவினுக்கோர் பாலம் அமைப்போம்

விடுதலைப் புலிகளுக்கு சிங்கள அரசு ஒரு முற்றுப் புள்ளி வைத்த பிறகு தமிழ் நாட்டில் திடீர் என்று தேர்தலுடன் தமிழ் பற்றும் வர தொடங்கியது.

அடையாள உண்ணாவிரதம், போராட்டம், மாநாடு என்று பலவிதங்களில் தமிழர்களை பாதுகாக்க வேண்டும் என்று தினமும் யாராவது கிளம்புகிறார்கள். அப்பாவி மக்களுக்கு தலையில் கொத்தமல்லி மிளகாயை அரைக்க ஆரம்பித்திருக்கிறார்கள் நம் அரசியல்வாதிகள்.

வைகோ, ஜெயலலிதா, கருணாநிதி, ராமதாஸ் என்று எல்லோரும் இதில் ஒற்றுமையாக இருப்பது வேடிக்கை!

இதன் விளைவாக நேற்று தமிழகத்தில் சிங்களர்களுக்கு எதிராக தஞ்சை அருகே மாதா ஆலயத்துக்கு சாமி கும்பிட வந்த சிங்களர்களை வெளியேற்றகோரி பல்வேறு அமைப்புகள்(மதிமுக, வி.சிறுத்தைகள்) போராட்டம் நடத்தினார்கள்.

போராட்டம் நடத்த வேண்டும் என்றால் பிரதமருக்கு கடிதம் எழுதுங்கள், இல்லை பீச் பக்கம் 0.5 நாள் இரண்டு ஏர் கூலர் உடன் உண்ணாவிரதம் இருங்கள், இல்லை இலங்கை தூதரகம் முன் ஆர்பாட்டம் செய்யுங்கள் அதை விட்டுவிட்டு பொதுமக்களை விரட்டும் இந்த கோஷ்டியை என்ன செய்வது ? தமிழ்நாட்டிலிருந்து தினமும் இலங்கைக்கு பலர் போய் வருகிறார்கள், அவர்களின் கதி என்ன ஆகும் தேவை இல்லாத வம்பை விலைக்கொடுத்து வாங்குகிறார்கள் ? சில மாதங்களுக்கு முன் கேரளாவில் தமிழர்கள் தாக்கப்பட்ட போது பொங்கி எழ இவர்களுக்கு என்ன யோக்கியதை இருக்கிறது ?

நிச்சயம் எல்லா அரசியல் பெரிய தலைவர்களும் இந்த செயலுக்கு கண்டனம் தெரிவிக்க வேண்டும்... ஆனால் செய்யமாட்டார்கள்..

Read More...

Saturday, September 01, 2012

ஆப்பிள் Vs சாம்சங்






இது கூட திருட்டு தான் !

Read More...