பாயும் வேகம் ஜெட் லீ தாண்டா
பன்ச் வெச்சா இட்லி தாண்டா
Rated PG - for Pseudo-DK, DMK, Liberals, Marxists....
ஊர்ல சொல்றது சொலவடை
உண்மையைச் சொல்றது இட்லிவடை

Saturday, October 27, 2012

திரையுலகம் - எனக்குத் தெரிந்தவை! - அருண் வைத்யநாதன்


'அச்சமுண்டு அச்சமுண்டு' படம் புகழ் அருண் வைத்யநாதன் பலருக்கு தெரிந்திருக்கும். வலைப்பதிவு ஆரம்ப காலத்தில் 'அகர தூரிகை' என்ற தன் வலைப்பதிவில் எழுதிக்கொண்டிருந்தார். தனக்குச் சரியென்று தோன்றுவதை அழுத்தமாகவும் ஆணித்தரமாகவும், நகைச்சுவை கலந்தும் தன் எழுத்தில் வெளியிடுவார். 'நச் பூமராங்' நல்லா எழுதுவார். ஆரம்பத்தில் இட்லிவடையில் கூட எழுதியிருக்கார்.

அருண் ஐ டி வேலைக்காக அமெரிக்கா வந்த பொழுதிலும் தன் தணியாத தாகமான திரைப்படத் துறையில் தொடர்ந்து ஈடுபட்டு வந்தார். நியுயார்க் ஃப்லிம் அகடமியில் படித்தும் சின்ன சின்னக் குறும் படங்களை எடுத்தும் வந்தார். அருண் இயக்கிய குறும் படங்கள் உலக அளவில் பல்வேறு அவார்டுகளை வென்றன. குறும் பட உலகில் ஒரு கவனிக்கத்தகுந்த இயக்குனரானார். இருந்தாலும் முழு நீளப் படம் ஒன்றை அதையும் தமிழில் எடுப்பது ஒன்றே அவர் கனவாக இருந்தது. 2005 அப்பறம் அவர் பிளாக் பக்கம் திரும்பி பார்க்கவில்லை. பிறகு அச்சமுண்டு அச்சமுண்டு என்ற திரில்லர் படம் எடுத்தார் அருண் (தமிழ் வலைப்பதிவு வைத்திருந்தவர் வேற என்ன எடுப்பார் !). படத்தின் பிரிவியூவிற்கு என்னை அழைத்தார்... ஆனால் போக முடியவில்லை. படத்தில் நடித்த ஸ்நேகா, பிரசன்னா திருமணம் செய்துக்கொண்டார்கள். கைராசிக்காரர் !

அருணுடைய கனவு பல்வேறு போராட்டங்களுக்கு பின் 'அச்சமுண்டு அச்சமுண்டு' என்ற படம் மூலம் நனவாகியது. சீர்காழியைச் சேர்ந்த அருண், தற்பொழுது வசிப்பது சென்னையில்.

இட்லிவடையின் நீண்ட நாள் வாசகர் என்று சொல்லிக்கொள்வதில் அவருக்கு பெருமையா என்று தெரியாது ஆனால் இட்லிவடைக்கு பெருமை. அன்று முதல் இன்று வரை படம் எடுத்தாலும், எழுதினாலும் ஆத்மார்த்தமாக செய்வார்.

பிறந்த நாள் கொண்டாடும் இந்த நாளில் இட்லிவடைக்கு ஸ்பெஷலாக அவருடைய 'திரையுலகம் - எனக்குத் தெரிந்தவை!' என்ற கட்டுரையை வெளியிடுவதில் மிக்க மகிழ்ச்சி
- இட்லிவடை

திரையுலகம் - எனக்குத் தெரிந்தவை! - அருண் வைத்யநாதன்

அயோக்கியர்களின் கடைசி புகலிடம் அரசியல் என்றால், முட்டாள்களின் கடைசிப் புகலிடம் சினிமா என்பது போல் ஒரு எண்ணம் பலருக்கு இருக்கிறது. 'பையனுக்கு படிப்பு வர மாட்டேங்குது சார் - பேசாம சினிமாவுல சேத்துடலாம்னு இருக்கேன்' என்று பலர் பேசும் போது, சிரிப்புத் தான் வருகிறது. திரையுலகில் மட்டும் தான் கலை, பணம், அரசியல், புகழ் என்று அனைத்தும் கொட்டிக் கிடக்கிறது. அமெரிக்கத் தொலைக்காட்சியில் தொடராய் வெளிவரும் 'Entourage' பார்த்தால், திரையுலகில் வெற்றி பெற என்னென்ன சவால்களை சந்திக்க நேர்கிறது என்பதைத் தெளிவாய் தெரிந்து கொள்ளலாம். அமெரிக்காவில் இருக்கும் பல விதிகள் இங்கு செல்லுபடியாகாது - ஆனால், அங்கு நடக்கும் அத்தனை தவறுகளும் இங்கு நடக்கிறது. சொல்லப்போனால், இதில் ஜெயிக்க அதிபுத்திசாலியாய் இருக்க வேண்டும் என்பது எனது கணிப்பு. எங்கேயாவது விதிவிலக்குகள் இருக்கலாம். ஆனால், பெரும்பான்மை தருணங்களில் நான் சொல்வது தான் நிஜம். நான் போன வருடமே ஒரு வசூல் கியாரண்டி நடிகரை எனது திரைக்கதை ஒன்றில் நடிக்க ஒத்துக் கொள்ள செய்தேன், ஒரு பெரிய தயாரிப்பு நிறுவனத்தையும் அதே கதையில் ஆர்வம் கொள்ள செய்தேன். எல்லாம் அழகாய் சேர்ந்து வரும் போது, ஏதோ ஒன்று முட்டுக்கட்டை போடும். முக்கால்வாசி, அது சம்பள விஷயமாகத் தான் இருக்கும். ஒன்றல்ல, இரண்டல்ல இதே போல் மூன்று முறை ,மூன்று விதமான கதைகளுக்கு நடந்து முடிந்தது. கட்டிப்பிடித்து 'சூப்பர் சார்' என்று சொல்வதாகட்டும், அடுத்த நாளே தொலைபேசி மூலம் "அந்த காரெக்டர் அப்படியே மனசுலேயே இருக்கு சார்' என்று சொல்வதாகட்டும், 'பட்ஜெட் அனுப்பிட்டீங்கன்னா, படத்தை அனௌன்ஸ் பண்ணிடலாம்' என்று வாக்குறுதி கொடுப்பதில் ஆகட்டும் - யாருமே இங்கு சளைத்தவர்கள் இல்லை. ஆனால், இதையெல்லாம் மீறித் தான் இங்கு ஜெயிக்க வேண்டும். சொல்லப்போனால், இது போன்ற சங்கதிகள் நடக்காத இயக்குனர்களே இல்லை என்பது தான் நிதர்சனமே உண்மை. பலருக்குத் திரையுலகைப் பற்றி தெரிந்து கொள்ள வேண்டும் என்று ஆர்வமிருப்பதால், இதில் நுழைய வேண்டும் என்று சிலர் துடிப்பதால்…நான் சொல்லப் போகும் சில விஷயங்கள் இவர்களுக்குப் பயனுள்ளதாய் இருக்கலாம்.

(1) திரைக்கதை எழுதி ஒரு பவுண்ட் ஸ்கிரிப்ட் வைத்துக் கொள்ளும் மகாத்மாக்களுக்கு - நல்ல விஷயம் தான். அடிப்படையானதும் கூட! ஆனால், தமிழகத்தில் எந்தக் கதாநாயகனும், தயாரிப்பாளரும் அதை படிக்கப் போவதில்லை. எல்லோருக்கும் பிடித்த வார்த்தை 'நரேஷன்' - அதாவது குழந்தைக்கு சொல்வது போல் "சார்…படம் ஓப்பனிங்க்லேயே சார்…" என்று ஆரம்பிக்க வேண்டும். இங்கு படிப்பவர்களை விரல் விட்டு எண்ணி விடலாம். எனவே, விவரித்தல் கலையை பால பாடமாய் பயின்று கொள்ளுதல் உங்கள் பி.பிக்கு நல்லது.

(2) ஒரு விஷயத்தை எழுதி முடித்தவுடனேயே, கடவுள் நம்பிக்கை இருந்தால் , ஓடிப் போய் அவர் முன் இரண்டு கைகளையும் கூப்பி வைத்து வேண்டி விட்டு, அடுத்த நிமிடமே அதை முறைப்படி பதிவு செய்து கொள்ளுதல் புத்திசாலித்தனமான விஷயம். திரை எழுத்தாளர்களுக்கான சங்கம் ஒன்று இருக்கிறது. 'அதெல்லாம் சுத்த ஹம்பக்' என்று பெருமூச்சு விடுபவர்கள், பல சமயங்களில் பிரச்சினை என்று ஒன்று வரும் போது எல்லோரும் கேட்கும் விஷயம் "ஏம்பா கதையை ரெஜிஸ்டர் பண்ணியிருக்கியா? அந்த டீடெய்ல்ஸ் கொடு" என்பது தான் என்பதை மறந்து விடக் கூடாது. நீங்கள் சூடம் ஏத்தி சத்தியம் அடித்தாலும், மேற்கொண்ட விஷயம் இல்லையெனில் பலவான் வெற்றி பெறுவார்.

(3) எனக்குத் திரையுலகம் கத்துக் கொடுத்த மிகப்பெரிய விஷயம் - பொறுமை. இங்கு எதுவுமே கிடுகிடுவென நடக்காது. ஒவ்வொரு திரைப்படமும் உருவாக ஒரு வருடம் முதல் மூன்று வருடம் வரைக் காத்திருந்தே ஆக வேண்டும். பெரிய பெரிய இயக்குனர்களுக்கே அது தான் விதி. ஒரு திரைப்படம் செய்து முடித்தவுடன் நீங்கள் கற்றுக் கொள்ளும் முதல் விஷயம் இதுவாகத் தானிருக்கும் - "திரையுலகில் மிக சுலபமான விஷயம் ஒரு கதையை எழுதுவது தான்!". "எப்பிடிடா இந்தப் படம் எல்லாம் எடுக்குறாங்க" என்று நீங்கள் கேட்கும் அத்துணை படங்களும், பல சவால்களை மீறி கஷ்டப்பட்டுத் தான், ஒரு பொறுமையான போராட்டத்திற்குப் பிறகே வெளியே வந்திருக்கிறது.

(4) உங்களுக்கு ஜால்ரா போடாத, கதையறிவு உள்ள சில நண்பர்களை …குறிப்பாய் எழுத்தைப் பற்றித் தெரிந்த நாலு நண்பர்களை உரைகல்லாய் வைத்துக் கொள்ளுதல் சாலச்சிறந்த விஷயம். அவர்கள் ஆயிரம் கேள்விகள் எழுப்பும் போது, உடனடியாய் பதில் சொல்லி சமாளிப்பீர்கள். ஆனால் அந்தக் கேள்வியில் நியாயமிருந்தால், தானாகவே உங்கள் மனம் அதை செப்பனிடுவதில் இறங்கும். இது மிக முக்கியம்! அதே சமயம் - எதை நீங்கள் மிக உறுதியாக நம்புகிறீர்களோ, அதை விட்டுக் கொடுக்காமல் இருக்கும் ஞானச்செருக்கும் வேண்டும். வாதத்துக்கும் விதண்டாவாதத்துக்கும் ஒரு மெல்லிய கோடு உண்டு - அது தான் உங்களின் லட்சுமண ரேகை!

(5) திரையுலகில் இருக்க நினைப்பவர்கள் இந்த ஐந்து விஷயங்களை படிக்க வேண்டும். மனிதர்களை, சமகால நிகழ்வுகளை, நல்ல இணையதளங்களை, புத்தகங்களை, திரைப்படங்களை! இது பால பாடம் - பலர் படிக்க மறுக்க பாடமும் கூட.

(6) ஆறுவது சினம். தகுதியற்றவர்களின் வெற்றியைப் பார்த்து சினம் கொள்ளும் நீங்கள், தகுதியானவர்களின் வெற்றியைக் காணும் போது மகிழ்ச்சி அடையும் பக்குவத்தையும் வளர்த்துக் கொள்ள வேண்டும். "எல்லாம் லக்குப்பா!" என்று ஒற்றை வரியில் எதையும் முடிக்காதீர்கள். திரையுலகம் (ஏன், வாழ்க்கையே) - அந்த இரண்டு வார்த்தைகளில் அடக்கி விடக்கூடிய அளவுக்கு சுலபமில்லை. இந்தக் குணமானது, உங்களின் நாளைய வெற்றியின் போது மிகப் பிரயோஜனமாக இருக்கும்! ஊழ்வினை உறுத்து வந்து ஊட்டும் என்பது போல், நல்வினை நாளைய வெற்றியில் கண்டிப்பாய் பங்கு பெறும்.

(7) மேலே சொன்ன ஒரு விஷயத்தில் ஊடுருவி பார்த்தால் ஒரு உண்மையும் இருக்கிறது - பணம். அதை சம்பாதிக்கும் பட்சத்தில் நம்பர் ஏழு உங்களை நெருங்காது (அந்தப் பாழாய்ப் போன விஷயம், சுலபமும் கிடையாது). விளம்பர உலகம், கார்ப்பரேட் பிலிம்ஸ் என்று பல விதமான முறையில் பணம் சம்பாதிக்கும் யுக்தியை வளர்த்துக் கொள்ளுங்கள். "இவன் பொழச்சுப்பான்" என்ற நம்பிக்கையை அவர்களுக்குக் கொடுங்கள். அப்படி ஏதாவது சம்பாதித்தால், குடும்பத்தினரை ஒரு நல்ல டின்னருக்கு அழைத்து செல்லுங்கள். "மச்சி…ஒரு பீரடிப்போமோ" என்று இறங்காமல், இதை நீங்கள் செய்தால் அவர்கள் மனம் குளிர வாய்ப்புண்டு. குறிப்பாய், திருமணனமானவர்கள் கண்டிப்பாய் செய்ய வேண்டிய விஷயம் இது. நாளை நீங்கள் வெற்றி பெறும் போது, மாற்றி மாற்றி போன் அடித்து அதை மற்றவர்களிடம் பகிர்ந்து கொள்ளப் போவதும் அவர்கள் தான். இதன் உபரி விஷயம் - தேவைகளைக் குறைத்துக் கொள்ளுங்கள்.

(8) உங்களை சுற்றி உள்ளவர்கள் - குறிப்பாய் உறவினர்கள்,சில நண்பர்கள் சதா உங்களின் முயற்சிகளைக் கேள்வி எழுப்பிக் கொண்டே இருப்பார்கள். "ஏண்டா/டி, அவன்லாம் சூர்யாவோட படம் எடுக்கறான்…நீ ஏன் சூர்யாவைப் போய் பார்க்கக்கூடாது" என்பதில் ஆரம்பித்து, "ஹே, நம்மலாம் மிடில் க்ளாஸ், இது தேவையா" என்பது வரை பல விதமான 'எமோஷனல் பிளாக்மெயில்' மற்றும் 'அட்வைஸ் மழை" அவ்வப்போது இடியுடன் வந்து தாக்கும். இதிலிருந்து தப்ப ஒரே வழி தான் இருக்கிறது - நிலவில் ஜாகை மாற்ற வேண்டும், இன்னொரு வழியும் இருக்கிறது - "நேத்து நீ ஒரு ஐடியா சொன்னியே, சூப்பர்" என்று பேசும் நபர்களை உங்களை சுற்றி வைத்துக் கொள்ளுதல். டிரைவிங் லைசன்ஸுக்கு எட்டு போடுவது மாதிரி இது முக்கியம்!

(9) உங்களுக்கு ஒன்பதில் குரு இருந்தால்  சொந்தக் காசைப் போட்டு படம் எடுக்கமாட்டீர்கள் - ஏனெனில், தயாரிப்பாளராவது என்பது ஒரு கடுமையான சவால். அதுவும் குறிப்பாய் தமிழகத்தில்! தைர்யலஷ்மி உங்களோடு ஓவர் டைம் போட்டு தோழியாய் இருக்க வேண்டும். தயாரிப்பாளர் மற்றும் இயக்கம் என்று முதல் படத்தில் இறங்கும் போது, இயக்கம் கண்டிப்பாய் அவதிப்படும். ஒரு நல்ல தயாரிப்பாளர் கிடைப்பது எவ்வளவு பெரிய மனோபலம் என்பது கிடைக்கும் போது தான் தெரியும். 'அவர் முதல் படத்திலே தயாரித்தாரே…இவர் வெற்றி பெற்றாரே' என்று உடனே விவாதத்தில் இறங்க வேண்டாம். எல்லா விஷயத்திலும் விதிவிலக்குகள் உண்டு - அவை விதியாகா!

(10) 'இது தான் ஜெயிக்கும்' என்று சிலர் சொல்லும் சூத்திரங்களைக் கேட்டு, ஜெயித்த படத்தின் சாயலில் எதுவும் எழுதாதீர்கள். பத்தில் ஒரு படம் வெல்லும் ஒன்பது படம் ஊற்றிக்கொள்ளும் . பலரைத் திரும்பி பார்க்க வைக்கும் படங்கள், வித்தியாசமான களத்தோடு தைரியமாய் முயற்சிக்கப்பட்டவை தான். ஹாலிவுட்டில் எழுத்தாளர்கள் ஒன்று சொல்வார்கள் "Give me the same, but different!" - மேஜர் சுந்தர்ராஜன் போல் இதைத் தமிழில் மொழிபெயர்க்க வேண்டிய அவசியம் இல்லை என்று நினைக்கிறேன். தினமும் நான்கு பக்கங்கள் எழுதுவது என்பதைக் கொள்கையாக வைத்துக் கொள்ளுங்கள் - ஃபேஸ்புக், டிவிட்டரில் எழுதுவது இதில் சேர்த்தி கிடையாது.

இதையெல்லாம் படித்து, பின்பற்றி படமும் எடுத்தால், மறக்காமல் எனக்கும் தகவல் தெரியுங்கள் - வெற்றி நிச்சயம், அட்வான்ஸ் வாழ்த்துக்கள்!

இட்லி வடை பத்து ஆண்டுகளாய் நடத்தப்பட்டு வருகிறதென்பதில் எனக்கு மட்டற்ற மகிழ்ச்சி. நான் அதிகம் படிக்கும் வலைத்தளங்களில் இதுவும் ஒன்று. கொஞ்சம் அடிக்கடி எழுதினால் இன்னும் நன்றாக இருக்கும். பத்தாவது பாயிண்டையே அவரின் வாழ்த்து செய்தியாய் அளித்து, மென்மேலும் வளர வாழ்த்துகிறேன்.


பி.கு :- "எல்லாம் சரி, உங்களோட அடுத்த படம் எப்போ?" என்று கமெண்டாதீர்கள்!. மூடி மறைத்து பின்பு பூதாகரமாய் வெளியே தெரிய, திரைப்படம் என்பது 2ஜி ஊழல் இல்லை - ஒவ்வொரு நாளும் உழைத்து வருகிறேன். கண்டிப்பாய் கூடிய விரைவில் எல்லாம் கூடி வந்ததும் சொல்வேன். எனக்கு வேண்டியது எல்லாம் நல்லுள்ளங்களின் வாழ்த்துக்கள் மட்டுமே :)


17 Comments:

Ananth said...

Good read.


Ananth Kaliannan.
Chicago.

Anonymous said...

அருண் வைத்யனாதன் இதை எழுதியதற்கும் மொட்டைத்தலையுடன் இருப்பதற்கும் தொடர்புண்டா :).
ஒரு படம் எடுத்து அடுத்து எடுத்து வெளியிடுவதற்கும் இடையே இத்தனை அறிவுரைகள் சொல்வது கொஞ்சம் அதிகம்தான்.

Anonymous said...

Okay. But "how to become a Hero"?

Arun Vaidyanathan said...

@Anonymous - Unfortunately, people in Tamil film industry who has done several movies won't share anything about the industry that easily. Had it been shared then and there in each and every department, we would have had so many nice books which could have helped number of people. There is no stopping in learning in this industry but sharing of 'any' knowledge is need of the hour. Life itself is a learning process - The spirit of the article is to guide people who wants to do something in the industry but doesn't have any guide or god father. - Arun Vaidyanathan

bala said...

excellent post
the points are not just for cinema but for life as well

kothandapani said...

திரையில் ஜெயிக்க பத்து points கொடுத்து இருக்கும் அருணால் பெரியதாக ஒன்னும் சாதிக்க முடியவில்லை இதுவரை. எனவே பதினொன்றாக வேறு ஒன்று தேவைபடுகின்றது. அதை அறிந்தவர்கள் திரையில் வெல்கின்ரர்கள். அருணும் அதை அறியும் போது பெரியதாக சாதிப்பார்.

Dhanapal Padmanabhan said...

These are good thoughts for a new comer to understand the industry. Sharing knowledge is great thing, often people don't take it in right spirit.

Anonymous said...

//@Anonymous - Unfortunately, people in Tamil film industry who has done several movies won't share anything about the industry that easily. Had it been shared then and there in each and every department, we would have had so many nice books which could have helped number of people. //

@Arun,

Don't you count "Cinema Viyabaram" by Cable Shankar as one such book?

Anonymous said...

கடைசியில அருண்தான் இட்லி வடையா?!

அனானி

Ramesh M said...

Thank You Arun for writing this. You are a good/generous teacher sharing the insight and experience for many who want to get there. Here is more from Arun's mind on Nayakan. Looking at some of the comments, i wonder if people appreciate his serious/sincere intent and the great contribution... taking so much of efforts in imparting knowledge...

Kamal's Views
http://www.thehindu.com/arts/cinema/of-course-velu-nayakan-doesnt-dance/article4008896.ece

The producer's views
http://www.thehindu.com/todays-paper/tp-features/tp-sundaymagazine/living-in-past-glory/article4039603.ece

dr_senthil said...

அந்த மனோதத்துவ டாக்டர் போல கோட்டை விட்டுடீங்களே.. அருண்.. மஞ்சள் கமெண்டும் நீங்களே போட்டுடீங்க

R. J. said...

So Idly vadai is being served from the USA! (Thuppu: அருண் ஐ டி வேலைக்காக அமெரிக்கா வந்த பொழுதிலும்..)

Happy B'Day! We got stuck to IV despite the hard truths listed by Writer Para!

-R. J.

ச.சங்கர் said...

”சூப்பர் “

வித்தியாசமான கட்டுரை.

Also bold attempt to decode Tamil Cinema Industry :)

ச.சங்கர்

ச.சங்கர் said...

”சூப்பர் “

வித்தியாசமான கட்டுரை.

Also bold attempt to decode Tamil Cinema Industry :)

ச.சங்கர்

Srikanth said...

Very well written Arun; Passing the knowledge/lesson learnt [called Software evangelism] is the success of computer/software industry. You have started this trend for Tamil Film making. I wish many more experienced people talk about film making process, its perils surrounding it etc. This will help stream line the career plan for future aspirations. Knowing Arun and his focus towards the goal and his efforts, I feel he should be applauded for documenting a process. Please do an English version of this, so that I can share with folks with similar interests but speak other languages.

Anonymous said...

Arun, You're a one-film wonder. I watched your film "AA" - an example of great disappointment and poor casting. This article is a self-marketing like how those celluloid creatures who pop up whenever they are about to sign a new project.

I keep reading your comments and only feel you're another self-claimed pseudo intellect like Kamal Hasan. I do not want to pull a community here but you guys will never change....like OOPS concepts - INHERITANCE continues.

It's a surprise to know that guy like you - want to enjoy the best of USA but do lip service in Tamil. Do not be another "Chomsky" who keeps criticizing USA but loves living in the same country. If you're an intellect as you sound and who do not care about materialistic existence, then come back to Seergazhi or Chennai then chest beat about your Tamil.... buddy.

Don't be a hypocrite!

I'm sure you earn here and invest in New Jersey.

Anonymous said...

இப்படி ஒரு இயக்குனர் இருக்கிறாரா. இவரையும் கேள்விபட்டதில்லை. இவர் எடுத்த படத்தையும் கேள்விபட்டதில்லை