மைடியர் பாடிகாட் முனீஸ்வரனே! - 1-4-2012

அன்புள்ள முனிக்கு,

ரொம்ப நாள் பிரிந்து இருந்த நாம் இனி ஒன்றாக இருக்கலாம் என்று முடிவு செய்ததின் விளைவாக இந்த கடிதம். எப்படியோ ஏப்ரல்-1 தமிழர்களுக்கு நல்ல நாளாக இருந்தால் நல்லது. அப்பறம் நாம் ஒன்று சேந்த இந்தக் கடிதத்தை ரகசியமாக வைத்துக்கொள்ளவும். இது ராணுவ ரகசியம் போல பொதுவில் வரக் கூடாது. நாம் இரண்டு பேருக்கும் மட்டுமே இந்த உடன்பாடு.

இரண்டு முறை பிறந்த தேதிக்கு உச்ச நீதிமன்றம் உங்க கேஸ் நிலைக்காது, விலகிக்கொள்ளவும் என்று சொன்னவுடன் இது தான் என் பிறந்த தேதி, நான் ரிடையர் ஆகிவிடுகிறேன் என்று ராணுவ தளபதி மரியாதையாக வெளியே போய் இருக்க வேண்டும் அதை விட்டுவிட்டு நம் நாட்டில் இருக்கும் துப்பாக்கி எல்லாம் தீபாவளி துப்பாக்கி என்ற அவரின் கடிதத்தை லீக் செய்துவிட்டு பரபரப்பாக்கிவிட்டார்கள் மீடியா.மீடியாவிற்கும் பொறுப்பு இல்லை, இந்த மாதிரி மிக முக்கியமாக ரகசிய கடிதத்தை எல்லாம் வெளியிடலாமா? இட்லிவடை யார் என்று நாளைக்கே சரக்கு மாஸ்டர் லீக் செய்தால் உடனே வெளியிட்டுவிடுவார்கள் போல... எதற்கும் ஜாக்கிரதையாக இருக்க வேண்டும் இல்லை என்றால் பாம்பு வாலைப் பிடிக்க குரங்கான கதையாகிவிடும்.


பாம்பைக் கட்டிக்கொண்டு குரங்காட்டம் குத்தாட்டம் ஆடும் மல்லிக்காவிற்கு என்ன குறைச்சல்? பாவம் அம்மையார் ரோல்ஸ் ராய்ஸ் கார் வாங்க ஆசைப்பட்டு அவமானப்பட்டுவிட்டார். புக் செய்த கடைக்கு போனால், "எங்கள் காரை உங்களுக்கு விற்க முடியாது" என்று சொல்லிவிட்டார்கள். இங்கிலாந்தைச் சேர்ந்த இந்த ரோல்ஸ் ராய்ஸ் நிறுவனம் வாடிக்கையாளர்களின் பின்னணி மற்றும் இமேஜ் ஆகியவற்றைப் பார்த்து தான் விற்பார்களாம். அது அவர்கள் கொள்கை. வரவேற்க வேண்டிய விஷயம்.


வரவேற்கவேண்டிய இன்னொரு விஷயம் குமுதத்தில் கொஞ்ச நாளாக சிறுகதைகள் பிரசுரிக்க ஆரம்பித்திருக்கிறார்கள். இந்த இலக்கிய மாற்றத்தைத் தொடர்ந்து திமுகவிற்கு ஜால்ரா அடிப்பதை விட்டுவிட்டு அதிமுகவிற்கு ஜால்ரா அடிக்கத் தொடங்கியிருக்கிறார்கள். சங்கரன் கோவிலில் கம்பீர வெற்றி, வெற்றி செல்வி என்று பக்கம் பக்கமாக எழுத ஆரம்பித்துவிட்டார்கள். குமுதமே கடைசியில் ஒரு அதிர்ச்சி தரும் சிறுகதையாகவே மாறிவிட்டது.


தமிழ் எழுத்தாளர்கள் எல்லாம் ஒரு குழுமம் ஆரம்பித்து அம்பது பேர் வால் பிடிக்க ஆரம்பித்தவுடன் அவர்களுக்கு தலை கால் புரிவதில்லை. மேதாவி மாதிரி எங்களுக்கு எல்லாம் தெரியும் என்று சொல்லிக் கொண்டு சகட்டு மேனிக்கு எல்லோரையும் விமர்சனம் செய்யப் புறப்பட்டுவிட்டார்கள். சமீபத்தில் காந்தி, சங்கராசாரியார், பெரியார் என்று செயமோகன் ரொட்டேஷன் போட்டு விமர்சித்து வருகிறார். இவர்கள் யாரும் இதற்கு மறுப்பு தெவிக்க முடியாது, கேள்வி கேட்க முடியாது. ஏன் என்றால் இவர்கள் இறந்துவிட்டார்கள். கடைசி வரவு கூடங்குளம். அதுவும் கிட்டத்தட்ட செத்துவிட்டது என்பது குறிப்பிடத்தக்கது. மாமல்லன் போன்றவர்கள் இணையத்தில் இல்லை என்றால் இந்த மாதிரி தமிழ் எழுத்தாளர்கள் எல்லோருக்கும் திருநீறு பூசிவிடுவார்கள்.


திருநீறு கூட வரவாயில்லை, ஆனால் ராமநவமி வரும் சமயம் விஜயகாந்த் நீர்மோரில் மேலும் நீர் என்று தண்ணி பற்றி பேசியதைப் பலரும் கண்டுகொள்ளவில்லை. காரணம் சங்கரன்கோயில் தோல்வியாகக் கூட இருக்கலாம். சங்கரன்கோயில் முடிவை பெரிதாக எடுத்துக்கொள்ளவில்லை என்று சொல்லிவிட்டார். சங்கரன் கோயிலில் போட்டியிட்டவர்களில் ஒரு கட்சிக்கு கூட டெபாசிட் கிடைக்கவில்லை என்பது தமிழ்நாட்டுத் தேர்தல் வரலாற்றில் முதல் முறையாம். இதற்கிடையே ஜெயலலிதா சேது சமுத்திரத்தில் உள்ள ராமர் பாலத்தை வரலாற்றுச் சின்னமாக அறிவிக்க வேண்டும் என்று சொல்ல, உடனே டி.ஆர்.பாலு உட்பட திமுக எம்.பிக்கள் பிரதமரை சந்தித்து மனு கொடுத்திருக்கிறார்கள். இலங்கை தமிழர் பிரச்சனைக்கே மனு கொடுத்தவர்கள் இவர்கள். ஆஹா!

ஆஹா என்று சொல்லுபவர்கள் 91.9 ஆஹா ஃஎப் எம் கேட்கவும். 'சோவின்' முகபது பின் துக்ளக் 1-4-2012 முதல் கேட்கலாம். ஆஹா குமுதம் குழுமத்தின் ரேடியோ என்று நான் சொல்லத் தேவை இல்லை. அப்டியே நான் சொல்லி அறிந்து இருந்தாலும் ஆஹா என்று இட்லி வடையை பாராட்டத் தேவையில்லை. சோவிடம் ஒரு கேள்வி கேட்க வேண்டும் - ஜெயலலிதா சசி ஒன்று சேர்ந்ததற்கு துக்ளக் முதல் பக்கத்தில் காட்டூன் உண்டா ? கடந்த ஒரு வருடமாக ஒரு கார்ட்டூன் கூட ஜெயலலிதாவை பற்றியது இல்லை என்பதை யாராவது கவனித்தார்களா ? புது பொலிவுடன் துக்ளக் வருமா ?


கர்ணன் புது பொலிவுடன் வந்திருக்கிறது. அதே போல திரும்ப அக்கா தங்கை படம் ஒன்று புது பொலிவுடன் வந்துவிட்டது. . நாடகப்பிரியா நடிகர் தான் என்ன செய்வது என்றறியாமல் என்று குழம்பி இருக்கிறார். பேசாம இரண்டு மாதம் அதிமுகவில் சேர்ந்திருக்கலாம். நாடகப்பிரியா நண்பரை காட்டிலும் வெட்டி பேச்சு பேசும் காடுவெட்டியின் கடைசி ஸ்டேட்மெண்ட் இது "அனைத்துக் கட்சிகளும் தனித்தனியே நின்று தேர்தலை சந்தித்தால் தமிழ்நாட்டில் பா.ம.கா தான் ஆட்சியை பிடிக்கும்" எனக்கு தெரிந்து பஸ்ஸில் சீட் பிடிக்க கூட இவர்கள் லாயக்கு இல்லை.

ஸ்டார்ட் மியூசிக் "வாரயோ தோழி வாரயோ...."
இந்த உருக்கமான கடித்ததை நீங்கள் ஏற்றுக்கொள்ள வேண்டும்

இப்படிக்கு பாசமுள்ள,
இட்லிவடை