முழுமையான அரைகுறை

தமிழக மீனவர்களை படுகொலை செய்யும் இலங்கை கடற்படையை கண்டித்து நாகையில் விஜய் வேலாயுதம் பட பிடிப்பை பற்றி பேசியது நல்ல காமெடி( பார்க்க அரைகுறை பதிவு). நடு நடுவே மானே தேனே என்பது மாதிரி எம்.ஜி.ஆர் நடித்த படங்களின் பெயர்கள். இலங்கை அரசு செய்வது அராஜகம், ஏதோ 50-100 மீட்டர் கடல் எல்லையை தாண்டினால் என்ன தப்பு என்பது மாதிரி பேசுவது காமடியின் உச்சம். இவர் வீட்டு காம்பவுண்டுக்குள் ஒரு அடி எடுத்து வைத்தால் இவர் சும்மா இருப்பாரா ? சரி இலங்கை அரசை எப்படி தான் முரட்டுகிறார் என்று பார்த்தால் ""நான் அடிச்சா தாங்க மாட்ட, நாலு மாசம் தூங்க மாட்ட" இதற்கு ஒரு நாடகத்தில் எஸ்.வி.சேகர் எல்.கே.ஜிக்கு லீவு விட்டுவிடலாம் என்று சொல்லுவதை விட காமெடி. உலக வரைபடத்திலிருந்து இலங்கையை தூக்கி விட போகிறாராம். எனக்கு என்னவோ இவர் தீவிரவாதிகளை அடிப்பதில் விஜயகாந்துக்கு போட்டியாக வந்துவிடுவார் என்று நினைக்கிறேன்.

அவர் சிறு வயதில் மீனவ நண்பன் படம் பார்த்ததிலிருந்து மீனவர்கள் மேல் பாசமாம், சொல்கிறார். இந்த உச்சக்கட்ட காமெடியில் எனக்கு உச்சாவே வந்துவிட்டது. கடைசியாக வேலாயுதம் படப்பிடிப்பு முடித்துவிட்டு(அதாவது அவர் வேலை, ஏதோ பொது சேவை மாதிரி பேசுகிறார்) வந்தேன் என்றார் பெருமையாக. கூட்டத்தில் வந்தவர்கள் எல்லாம் வேலை இல்லாமல் இவர் மட்டும் தான்... கடைசியாக ஒரு மகிழ்ச்சி செய்தியையும் சொன்னார், அடுத்த படத்தில் இரண்டு குத்து பாட்டு உண்டாம் ... இவ்வளவு வேதனையிலும், கல்லா மீது ஒரு கண் வைத்திருப்பதில், கலைஞரையும் மிஞ்சியவராகிறார்.
விஜய்யின் தந்தை சந்திரசேகர், ஜெயலலிதாவை போயஸ் தோட்டத்தில், "மரியாதை நிமித்தமாக" இருமுறை சந்தித்ததை நினைத்தால், இவருடைய மீனவ பாசம் புரியும். விஜய் கட்சிக்கு மன்னிக்கவும் மக்கள் இயக்கத்துக்கு மூன்று சீட், விஜயகாந்த், ஜெ, விஜய் எல்லோரும் ஒரே மேடை என்று செய்திகள்... இந்த தேர்தலை காமெடியாக்கும் என்பதில் சந்தேகம் இல்லை.

அடுத்து இன்னொரு நியூஸ் இருக்கு, அதுவும் விஜய் பற்றியது தான். விஜய் இப்பொழுது கல்கியின் பொன்னியின் செல்வனை விழுந்து விழுந்து படித்து நெட்டுருப் பண்ணிக் கொண்டிருக்கிறாராம். காரணம், பொன்னியின் செல்வன் என்ற சரித்திரப் படத்தில் விஜய் ஒரு முக்கிய வேஷமேற்கவிருப்பதுதான். இன்னும் ஜெயமோகன் வசனமே எழுத ஆரம்பித்திருக்க மாட்டார். ஆனால் இவர் எதை நெட்ருப் பண்ணிக்கொண்டு இருக்கிறார் என்று தெரியலை. சரித்திரப் படத்தில் விஜய் என்பதே 23 ஆம் புலிகேசி வடிவேலு ரேஞ்சிற்குத்தான் இருக்கும். அதிலும், பொன்னியின் செல்வனில் விஜய் என்றால், முதுகுத் தண்டில் பனிக் கட்டி வழுக்கிச் செல்வது போல் திகிலாக இருக்கிறது. என்ன கேரக்டரோ தெரியவில்லை, பா.ரா தேடிக்கொண்டிருந்த வந்தியத்தேவன் இவர் தானோ ?
"இந்தக் கதையை மணி ரத்னம் இப்போது சினிமாவாக எடுக்கப்போகிறார் என்றும் ஜெயமோகன் அதற்கு எழுதிக்கொண்டிருக்கிறார் என்றும் கேள்விப்பட்டேன். அவர்கள் என்னை மன்னிக்கத்தான் வேண்டும். விஷயம் தெரிந்ததும் முதலில் சிரித்துவிட்டேன்." என்று எழுதியிருக்கார், ராமாயணத்தையே சுருக்கி ராவணன் என்று எடுக்க தெரிந்த மணி சாருக்கு இதை செய்வது என்ன பிரமாதம்? எனக்கு ஒரே ஒரு கேள்வி தான் மணி சார் பா.ரா நீங்க கொஞ்சம் வசனம் எழுதுங்கள் என்று கேட்டுக்கொண்டால் உங்க பதில் என்னவாக இருக்கும் ?

கமலின் ஆலோசனைப்படி படத்திற்கான குதிரைகளை பிரான்ஸிலிருந்து தருவிக்கிறாராம் மணிரத்னம். குதிரைத் தேர்விலேயே இவ்வளவு கவனம் காட்டும் மணிரத்னம், நடிகர் தேர்விலும் அதைக் காட்டினால் நன்று. இல்லாவிடில் ஆஞ்நேயராக நடிகர் கார்த்திக்கை தேர்வு செய்த மாதிரி ஆகிவிடும். ஆனால் அவர் அனுமாராக நடித்த ராசி தேர்தல் சீட் கிடைத்துவிட்டது :-)


[ எடியூரப்பா திரும்பவும் மேலிடத் தலைவர்களை சந்திக்க டெல்லி சென்றுள்ளார். எடியூரப்பா ரூ.27 கோடி பெற்றதாக இந்த முறை குற்றச்சாட்டு. ஆ.எஸ்.எஸ் தொண்டரான எடியூரப்பாவிற்கு நிச்சயம் விஜய் பெட்டர் ! ]

எது எப்படியோ, இந்த விஜய் வீடியோவால் தாய்மார்களுக்கு மகிழ்ச்சி, குழந்தையை சாப்பிட வைக்க இந்த வீடியோ பயன்படுகிறதாம். பர்மா பஜாரில் டோரா, டாம் & ஜெரி காம்பினேஷனில் இது கிடைக்கிறது.