மண்டேனா ஒன்று 23/08/2010

ராஜீவ் காந்தியின் 66 ஆவது பிறந்த தினத்தை முன்னிட்டு, தில்லியில் நடைபெற்ற ராஜீவ் காந்தி ஸத்பவன விருது வழங்கும் விழாவில் கலந்து கொண்டு காங்கிரஸ் தலைவி சோனியா காந்தி வீரவுரையாற்றினார். இவ்வுரையின் ஹைலைட், "சாதி மத வேறுபாடுகளைத் தூண்டி விட்டு அரசியல் ஆதாயம் பெற முனையும் யாரையும் விட்டு வைக்க மாட்டோம்; இந்த ஒரு விஷயத்தில் மட்டும் சமாதானம் செய்து கொள்ளவே முடியாது" என்று எழுச்சியுரையாற்றினார். இவ்விழாவில் மத நல்லிணக்கத்திற்காக பாடுபட்ட மெளலானா வஹியுதீன் கான் பாராட்டப்பட்டு, பணமுடிப்பு பரிசளிக்கப்பெற்றார்.




இவ்விழாவில் அன்னையின் எழுச்சியுரை, பாரட்டப்படக் கூடியது மட்டுமல்லாமல், மிகவும் துணிச்சலானதுவும் கூட. எப்படியென்று கேட்டால், இவரது பேச்சின் முக்கிய சாராம்சம், சாதி, மத வேறுபாடுகளை தூண்டிவிட்டு, ஆதாயம் பெற முனைபவர்களை தண்டிக்காமல் விட மாட்டோம் என்கிறார். அதாவது ஹிந்துக்களைத் திருடன் என்றும், ஹிந்துக்கள் மங்கலத்திற்காக நெற்றியில் அணியும் திலகத்தை நெற்றியில் ரத்தம் வடிகிறது என்று எள்ளி நகையாடியும், அவ்வப்போது சந்தர்ப்பம் கிடைக்கும்போதெல்லாம் ஹிந்துக்களின் நம்பிக்கைகளையும், ஹிந்துக்களின் ஆதர்ஸமான ராமன் குடிகாரன் என்றும், எந்த ஐஐடியில் பொறியியல் படித்தான் என்றும் குறிவைத்து சாடுவதையும் வழக்கமாகக் கொண்டிருப்பவர்களுடன் சமரசம் செய்து கொள்வது இயலாது என்று அர்த்தமாகிறது. ஈ.வி.கே.எஸ் இளங்கோவனையே விஞ்சி விட்டார் என்றால் மிகையல்ல. அன்னையின் இப்பேற்பட்ட மதநல்லிணக்க உணர்வும், தேசிய சிந்தனையும் புல்லரிக்க வைக்கிறது.

இன்னும் சற்று யோசித்தால், சீக்கியக் கலவரத்தில் முக்கியப் பங்காற்றிய காங்கிரஸ் தலைவர்களான ஜகதீஷ் டைட்லர் மற்றும் சஜ்ஜன் குமார் போன்றவர்களுக்கும் இந்த எச்சரிக்கை பொருந்தக் கூடும். நல்லவேளை, "ஒரு பெரிய மரம் வீழ்ந்தால், பூமி அதிர்வது இயற்கையே" என்று முத்துதிர்த்த தலைவர் இன்று இல்லை; இருந்திருந்தால் அவருடனும் இவ்விஷயத்தில் சமரசம் செய்து கொள்ள முடியாது என்று கூறியிருப்பார். இப்பேற்பட்ட துணிச்சலுடன் வெளிப்படையாக எச்சரிக்கை விடுத்த பேச்சை பாராட்டாமல் என்ன செய்வது?

அநேகமாக இந்த எச்சரிக்கை கேரள முதல்வர் அச்சுதானந்தனுக்கும் பொருந்துமெனவே தெரிகிறது. கேரளாவை சீரழிக்கும் மத அடிப்படைவாதத்திற்கெதிராக சமீபகாலமாக கருத்து தெரிவித்து வரும் கேரள முதல்வரும், இடதுசாரித் தலைவருமான அச்சுதானந்தன், மற்றும் பெங்களூர் குண்டுவெடிப்பு தொடர்பாக மதானியைக் கைது செய்துள்ள கர்நாடக அரசு ஆகியவற்றிற்கும் இந்த எச்சரிக்கை செல்லுபடியாகும்.

இவ்வளவெல்லாம் ஏன்? ராமனும், ராமாயணமும் வெறும் கற்பனையே!! எல்லாம் கட்டுக்கதை என்று உச்சநீதி மன்றத்தில் பிரமாணப் பத்திரம் தாக்கல் செய்து, ஹிந்துக்களைப் புண்படுத்திய தன் தலைமையிலான ஐக்கிய முற்போக்கு கூட்டணிக்கே மக்களைப் பிரித்தாளும் சூழ்ச்சி செய்யாதீர்கள் என எச்சரிக்கை விடுத்துள்ளார். இதுவன்றோ தேச பக்தி? எத்தனை காந்தி வந்தாலும் இந்த தேச பக்திக்கு ஈடாகுமா?

கருணைகாகக் காத்திருக்கும் அஃப்ஸல் குரு, அஜ்மல் கஸாப் போன்று மனிதக் குருதியில் மதநல்லிணக்கத்திற்காக புனித வேள்வி நிகழ்த்திய தலைவர்களை தண்டிக்க வேண்டும் என கூக்குரலிடும் பண்டாரப் பரதேசிகளான பாஜக, ஆர்.எஸ்.எஸ், விஸ்வ ஹிந்து பரீஷத் போன்றவர்களுக்கும், பெரும்பான்மையான ஹிந்துக்களைக் கொண்ட தீவிரவாதிகளான மாவோயிஸ்டுகளுக்கெதிராக கூக்குரலிடுபவர்களுக்கும் இந்த கடும் எச்சரிக்கை விடுக்கப்படுகிறது.

தவிர, இனி தனிப்பட்ட ஒரு சாதியினருக்கு மட்டும் இட ஒதுக்கீடு, தனிப்பட்ட ஒரு மதத்தினருக்கு மட்டும் சலுகைகள் மற்றும் புனிதப் பயணத்திற்கான படிகள், தேர்தலில் ஜாதியை முன்னிறுத்தி வேட்பாளர்கள் நிறுத்தப்படுவது, சிறுபான்மையினரை ரட்சிப்பதற்காகவே நாங்கள் அவதரித்துள்ளோம் என்ற வசனம் பேசும் கட்சிகள் போன்ற சமூக அவலங்கள் களையப்பட்டு, மத மற்றும் சமுதாய நல்லிணக்கம் புத்துணர்ச்சி பெறும் என்ற நம்பிக்கையை அன்னையின் வீரவுரை நமக்கெல்லாம் உணர்த்துகிறது.

எங்கோ இருக்கும் ஆர்பஸானோவில் பிறந்து, இந்தியாவில் இருக்கும் ஆண்டிப் பண்டாரங்களுக்காகவே தன்னை அர்பணித்துக் கொண்ட இந்த அற்புதத் தலைவியைப் பெற நாம் என்ன தவம் செய்தோமோ?
- யதிராஜ்

ஓணம் வாழ்த்துகள்!