கோர்ட் நேரம்

சில வாரங்களுக்கு முன்பு டிராபிக் ராமசாமிக்கு சென்னை உயர்நீதிமன்றம் "நேரத்தை வீண் அடித்ததற்காக" ரூ10,000/= அபராதம் விதித்தது. அப்படி என்ன கோர்ட் நேரத்தை வீண் அடித்தார் என்று பார்க்கலாம். சென்னை பாரிஸ் கார்னரில் தெருவில் நடக்கும் பட்டாசு விற்பனையை பாதுகாப்பு நலன் கருதி வேறு இடத்துக்கு மாற்ற உத்திரவிட வேண்டும் என்று கூறி பொதுநல வழக்கு ஒன்றை தொடந்தார்.

வழக்கு விசாரனையில் அரசு தரப்பு "ஏற்கனவே 2008-ம் ஆண்டு இம்மாதிரி வழக்கிற்கு இந்த நீதிமன்றம் தீர்ப்பளித்துள்ளது" என்று கூறினார். இதற்குப் பதிலளித்த டிராபிக் ராமசாமி, உயர்நீதிமன்ற உத்தரவை சென்னை போலீஸ் கமிஷனர் பின்பற்றாததால் மீண்டும் இந்த வழக்கை தொடர்ந்ததாக தெரிவித்தார்.
அதற்கு பிறகு நீதிபதிகள் தங்கள் தீர்ப்பில்

இந்த பிரச்சினை தொடர்பாக 2008-ம் ஆண்டு தொடரப்பட்ட வழக்கிற்கு உயர்நீதிமன்றம் ஓர் உத்தரவை பிறப்பித்திருந்தது. இந்திய வெடிபொருட்கள் சட்டத்தை போலீஸ் கமிஷனர் முறையாக பின்பற்ற வேண்டும். பாதுகாப்பு விதிகளை முறையாக கடைபிடிக்க வேண்டும் என்றும் தீர்ப்பளித்திருந்தது. இதை போலீஸ் கமிஷனரோ மற்ற அதிகாரிகளோ சரியாக பின்பற்றவில்லை என்றால் மனுதாரர் நீதிமன்ற அவமதிப்பு வழக்கை தொடர்ந்திருக்கலாம். அதற்கு மாறாக அவர் புதிய வழக்கு தொடர்ந்ததால் நீதிமன்ற நேரத்தை வீண் அடித்ததற்காக டிராபிக் ராமசாமிக்கு ரூ.10,000 அபராதம் விதிக்கிறது. மேலும் இந்த மனுவும் தள்ளுபடி செய்யப்படுகிறது என்று தீர்ப்பில் தெரிவிக்கப்பட்டுள்ளது.

சில கேள்விகள்:
1. வாய்தா என்ற ஒன்று வைத்துக்கொண்டு எவ்வளவு நேரம் வீண் அடிக்கப்படுகிறது ? இந்திய நீதிமன்றங்களில் மொத்தமாகத் தேங்கியுள்ள வழக்குகளின் எண்ணிக்கை சுமார் மூன்று மில்லியன். இதற்கு யார் காரணம்? ட்ராபிக் ராமசாமி போன்றோர்களா அல்லது வாய்தா மேல் வாய்தா வாங்கி வழக்கு தொடுத்தவர்களை ஆண்டிப் பண்டாரங்களாக்கும் வழக்கறிஞர்களா?
2. ஒரு கேஸ் போடும் முன்பு இதற்கு முன் இதே மாதிரி வழக்கு தொடுத்திருக்கிறார்களா என்று பொது ஜனம் ஆராய்ச்சி செய்துவிட்டு தான் கேஸ் போட வேண்டுமா ?
3. போப்பால் விஷ வாயு வழக்கு 26 வருடம் நடைபெற்று இதனால் கோர்ட் நேரம் வீணாகவில்லையா ?
4. 'கற்பு' குறித்த வழக்கில் குஷ்புவை பழிவாங்கும் நோக்கத்துடன் அவருக்கு எதிராக தமிழ்நாடு முழுவதும் 23 வழக்கு போட்டது இது எந்த வகை ?
5. அப்சல் குரு, கசாப், மற்றும் பலருக்கு மரண தண்டனை கொடுத்த பின்பு நடவடிக்கை எடுக்காமல், மத்திய அரசு மனு மீது உட்கார்ந்துக்கொண்டு இருப்பது வீண் இல்லையா ?
6 சொத்து குவிப்பு வழக்கில் ஜெ வழக்கை வேறு ஊருக்கு மாற்றுவது, பின்பு அதை மொழிபெயர்க்க செய்வது என்று செய்வது எல்லாம் எந்த கணக்கில் சேர்ப்பது ?
7. தினகரன் ஆபீஸ் எரிக்கப்பட்ட வழக்கில் வீடியோ சாட்சி இருந்தும் கோர்ட் நேரத்தை வீண்ணடிக்க கூடாது என்ற நல்ல எண்ணதில் கேஸை மூடிவிட்டார்கள்.
8. மயானக் கூரை, இலவச செருப்பு என்று வழக்கு நடக்கும். ஆனா, கழகத்துல ஐக்கியம் ஆயிட்டா கேஸ் இல்லாம போயிடும். எல்லாம் நேரம் தான்!
9. கர்நாடக உயர் நீதிமன்றத் தலைமை நீதிபதி விவகாரத்தில் நடந்த கூத்து இன்னும் முடியவில்லை. அவர் விடுப்பில் இருக்கிறாரா அல்லது சிக்கிம் ‎நீதிபதியாக இருக்கிறாரா என்று சட்ட அமைச்சரே குழம்பு போயிருக்கார்.
10. இதை தவிர காவிரி, முல்லை பெரியார், நீதிமன்றப் புறக்கணிப்பு என்று பெரிய பட்டியல் இருக்கிறது...


பட்டாசு வெடித்து சேதம் நடந்தால் அரசும் நீதிமன்றமும் என்ன செய்யும் ? நஷ்ட ஈடாக குடும்பத்துக்கு 10,000 தரும். இது தான் சமுக நலமா ?