சன்டேனா இரண்டு(14-3-10) செய்திவிமர்சனம்

இந்த வார செய்திகள்...ஆசிரமங்கள்(?) ஸ்பெஷல்.


செய்தி # 1

வயது வந்தோர் உடல் ரீதியாக உறவு வைத்து கொள்வது குற்றமல்ல என்கிறது இந்திய சட்டம். நித்யானந்தர் உடன் சி.டியில் இருந்த நடிகை உட்பட அவர் மீது யாரும் கற்பழிப்பு போன்ற குற்றங்களை சுமத்தவில்லை.

மேலும், அந்த நடிகை தான் சுவாமிகளுக்கு பணிவிடைகள் செய்ததாக பேட்டி அளித்து இருக்கிறார். என்னை பொறுத்தவரை நித்யானந்தருக்கு முன், முதன்மையான குற்றவாளிகள் மூன்று பேர் இருக்கிறார்கள். அவர் செய்தது குற்றம் என்கிற பட்சத்தில்.

முதல் குற்றவாளி, பத்திரிகைகள்தான். யாகவா முனிவர் என்று பெயர் வைத்து கொண்டு, ஒரு நபர் தண்ணியடித்து உளறியதை எல்லாம் ஆன்மிக தொடராக போட்டு, அவரை பிரபல படுத்தியது குங்குமம் இதழ்.இன்று அட்ரஸ் இல்லாமல் இருக்கும் நடன மகான் சிவசங்கர் பாபாவை வளர்த்துவிட்டதும் இந்த பத்திரிக்கையே.

இன்று 'மாட்டி' கொண்டு இருக்கும், கல்கி பகவான்மற்றும் அவரது மனைவி அம்மா பகவான்(?) பற்றி கட்டுரைகள் எழுதாத பத்திரிக்கைகளே இல்லை எனலாம். வாரம் தவராது பணம் வருகிறதே என்று குங்குமம் தொடர் விளம்பரம் செய்துக்கொண்டு இருக்கிறது.

நித்யானந்தரை பலதரப்பிடம் கொண்டு சேர்த்தது கதவை திற காற்று வரும் தொடரும், அதை வெளியிட்ட உலக தமிழர்களின் நாடிதுடிப்பு என கூறப்படும் குமுதம் இதழ்தான். சி.டி. விவகாரத்துக்கு பின் அவரை தற்சமயம் தனது ரிப்போர்டர் மூலம் கிழிகிழி என்று கிழிப்பதும் குமுதம் தான்.

உழைப்பால், தன்னபிக்கையால் வென்றவர்களின் கட்டுரைகளை விடுத்தது, சாமியார்களை தேடிபிடித்து, அவர்களிடம் தொடர்கள் வாங்கும் பத்திரிக்கைகளே முதல் குற்றவாளிகள். ('விகடன்' புகழ் ஜாக்கி வாசுதேவ், யோகா வகுப்புகளுக்கு ஆயிரக்கணக்கில் கேட்கிறாராம்). இவர் என்று மாட்டுவார் என்று தெரியாது.

இரண்டாவது குற்ற்றவாளி, டிவி சேனல்கள். இரவு குறிப்பிட்ட நேரத்தில் எல்லா சேனல்களிலும், யாரோ ஒரு வருங்கால சுவாமிகள், 'ரகுமான் ஆஸ்கார் விருது பெற்றதுக்கு இந்த கல்லே காரணம்' என்கிற ரீதியில் பேசிக்கொண்டு இருக்கிறார். தற்போது லேட்டஸ் வரவு ஆஞ்சநேயர் படம் முன் இருக்கும் சாமியார். இவர்கள் செய்வது டெலி-ஷாப்பிங்!

"மொபைல் மூலம் ஆபாச படங்களை பரிமாறி கொண்டால், அது ஐ.டி சட்டப்படி குற்றம் ஆகும். ஆனால், ஒரே நேரத்தில் பல்லாயிரக்கணக்கான வீடுகளை எட்டக்கூடிய ஒரு தொலைக்காட்சி, நித்யானந்தரின் பாலியல் உறவு சி.டியை, வர்ணனையுடன், திரும்ப திரும்ப ஒளிப்பரப்பியது நமது குடும்ப பண்பாட்டு சூழலையும், குழந்தைகளின் மனநிலையையும் பாதிக்க கூடிய கடும் குற்றம் " என்கிறார் இதழியல் நிபுணர் திரு.கோ. ரவீந்திரன். விழிப்புணர்வு தருவதை விட, சேனல்களின் வணிக நோக்கத்தையே இது தெளிவாக காட்டுகிறது. என்கிறார் அவர்.

"தனது ப்ரைவேசியில் தலையிட்டதற்கு, சன் டிவி மீது அந்த நடிகை , பல கோடி கேட்டு மன நஷ்ட வழக்கு போடலாம்" என்கிறார் ஞானி.


மூன்றாவது குற்றவாளி, வேறு யார்? நம்பி ஏமாறும் பொது மக்களே. சென்ற மாதம், நித்யானந்தர் புதுச்சேரி வந்து இருந்தார். பேருந்து நிலையம் அருகே இருந்த ஒரு திடலில் அமர்ந்து கொண்டு, தனது கையில் இருக்கும் மந்திர கோலினால், பக்தரின் தலையை தொட்டு ஆசிவாதம் செய்து விட்டு போனார். கட்டண டாய்லெட்டுக்கு 2/= ரூபாய் கொடுக்க யோசிக்கும் நாம், சாமியாரிடம் ஆசி வாங்க நீண்ட வரிசையில் நின்று ஒவ்வொரு பக்தரும் செலுத்திய தொகை ரூ. 2000.

முதல் மூன்று குற்றவாளிகளை யாரும் தண்டிக்க முடியாது என்பதாலும், பரமஹம்ச நித்யானந்தர் மீது எந்த பெண்களும் குற்றம் சுமத்த காரணத்தாலும், அவரை நிரபராதி என நாம் மன்னித்து விடலாம்தானே??


செய்தி # 2

திருவண்ணாமலையில் ஒரு நெல் மண்டி உரிமையாளரின் மகனான ராஜசேகர், 18 வயதிலியே 'பைத்தியம்' என்று விமர்சிக்க பட்டார். அதன் காரணம், அந்த வயதில், அவர் ஆன்மிகம் பேசியதுதான். பின், திருவண்ணாமலையில் சாமியார்களுடன், ஒரு பரதேசி போல சுற்றி திரிந்தவர், சில வருடங்களில் அங்கு 300 ஏக்கர் பரப்பிலான ஆசிரமம் கட்டும் நித்யானந்தராக உருவானது எப்படி?

விஜயகுமார் என்கிற சென்னையில் அலுவலகத்தில் பணியாற்றி வந்த ஒரு நபர், இங்கிலாந்து அரண்மனைகளுக்கு ஒப்பான ஒரு ஆசிரமத்தை ஆந்திராவில், ஒரு பத்து வருடங்களுக்குள் உருவாக்கி கொள்ளும் கல்கி பகவானாக உருவானது எப்படி?

கோவில் கட்டுவதருக்கு வீடு வீடாக உண்டியல் குலுக்கி கொண்டு இருந்த ஒரு நபர், இன்று 1000 கோடி ருபாய் மதிப்பு உள்ள வேலூர் ஸ்ரீபுரம் பொற்கோவில் கட்டியதின் மர்மம் என்ன?

இதன் காரணம் நீங்கள் அறியும் முன், ஒரு உதாரணம் சொல்கிறேன். ஆண்டு வருமானம், பத்து லட்சத்தை தாண்டினால், வருமான வரி கட்டவேண்டும் என்பது விதி. எனக்கு தெரிந்து ஒரு கல்வி நிறுவனத்தை நடத்தி வந்தவர், ஆண்டு வருமானம் கோடிக்கு மேல் சம்பாதித்து கொண்டு இருப்பவர், வரிகள் ஏதும் செலுத்தியதாக நான் அறியவில்லை. அதன் காரணம், அவர் தனது பள்ளியை ஒரு அறக்கட்டளை ஆரம்பித்து, அதன் கீழ் நடத்தியதுதான்.

ஆடிட்டராக இருக்கும் ஒரு நண்பர் என்னிடம் சொன்னார். "அறக்கட்டளை அல்லது டிரஸ்ட் என்கிற பெயரில் நீங்கள் எவ்வளவு வேண்டுமானாலும் சம்பாதிக்கலாம். நிலம், சொத்து வாங்கினாலும், பல வரி சலுகைகள் உண்டு. கருப்பு பணத்தை கோடி கோடியாக சம்பாதித்து வைப்பவர்கள், தங்கள் பணத்தை பாதுகாப்பாக வைப்பதற்கு "அறக்கட்டளை" திட்டத்தை(!) பயன்படுத்தி கொள்கிறார்கள் " என்றார். ஆசிரமங்களும் இதை போல வரி விலக்கு பெறுவதால், சாமியார்களை தொழில் அதிபர்களும், அரசியல் புள்ளிகளும், பண முதலைகளும் பயன்படுத்தி கொள்கிறார்கள் என்றும் தெரிவித்தார் அவர். சாமியார்களும் ஆசிரம டிரஸ்ட் பெயரில் எல்லா வித வசதிகளையும் அனுபவிக்கிறார்கள்.

சுவாமிகள் அனைவரும் திடீர் கோடீஸ்வரர்கள் ஆகிறார்கள் அல்லது ஆக்கபடுகிறார்கள்.

மக்கள் ஆசிரமங்களை தேடி போகும் காரணம் என்ன??

"அரசியல்வாதிகள் ஊழல் பேர்வழிகள். இவர்களால் தங்கள் பிரச்சினைகளை தீர்க்க முடியாது எனும் விரக்தி நிலையில் மக்கள் சாமியார்களை தேடி போகிறார்கள். இரண்டும்,ஒரே குட்டையில் ஊறிய மட்டைகள் என்று பிரேமானந்தா, நித்தியானந்தா போன்றோர் உணர்த்தினாலும், மீண்டும் அடுத்த சாமியாருக்கு அவர்கள் தயாராகி விடுவார்கள். ஊடகங்களும், பத்திரிக்கைகளும் சாமியார்களின் எஜென்ட்டுகளாக வேலை பார்ப்பதே சிக்கலுக்கு காரணம்" என்று விளக்குகிறார் பத்திரிக்கையாளர் ஞானி.

"நம்மால் பதில் கண்டு பிடிக்க முடியாத, தீர்வு காண முடியாத விஷயங்களுக்கு, பிறரின் உதவியை நாட வேண்டி உள்ளது. இந்த வெற்றிடத்தைதான் சாமியார்கள் நிரப்புகிறார்கள்.காவி உடை தரித்தவர்கள் எல்லாம் நல்லவர்கள் என்னும் எண்ணம் நம் மனதில் இருக்கிறது. அவர்கள் சொல்வதை கண்ணை மூடி கொண்டு, ஏற்று கொள்வதில்தான் பிரச்சினை தொடங்குகிறது " என்கிறார் மன நல மருத்துவர் ஷாலினி.

நித்யானந்தர் விவகாரத்துக்கு பின் முதல்வர் கருணாநிதி அறிக்கை ஒன்றை வெளியிட்டார். அதில் "இனி சாமியார்களின் நடவடிக்கைகளை கண்காணிக்க ஒரு தனி குழு அமைக்கபடும்" என்கிறார்.

அறநிலைய துறை அதிகாரிகளை கொண்டு அந்த குழு அமைக்கப்படும் என்று தெரிவித்து இருக்கிறார் முதல்வர்.

"ஒரு குற்றவாளியை இன்னொரு குற்றவாளி எப்படி விசாரிக்க முடியும். அறநிலைய துறையினரும், அரசியல்வாதிகளும் ஊழல் குற்றவாளிகளே " என்கிறார் திரு. ராம.கோபாலன்.

எனது சென்ற பதிவில், ஒரு வாசக நண்பர் குறிப்பிட்டது போல, கிறிஸ்துவ திருச்சபைகளிலும் பாதிரியார்களின் அத்துமீறல்கள் நடைபெறுவதாக நாம் பார்க்கிறோம். ஜமாஅத் என்கிற பெயரில் பள்ளிவாசல்கள், தங்களது பகுதிகளில் அடக்குமுறைகளில் ஈடுபட்டு வருவதும் நாம் அறிந்ததே. இவற்றை தடுக்க என்ன செய்ய போகிறார் நம் முதல்வர்??

[ சோ இந்த வார துக்ளக்கில் இவ்வாறு எழுதியிருக்கிறார் .....இந்த விவகாரமே ஹிந்து மதத்திற்கு எதிராகச் செய்யப்படுகிற சதி என்ற சிலருடைய பேச்சு, ஏற்கத்தக்கதாக இல்லை 'எத்தனையோ பாதிரியார்கள்ப் பற்றி இம்மாதிரி செய்திகள் வருகின்றன; ஆனால் பத்திரிகைகளும், டெலிவிஷன்களும் அவற்றை ஏன் பிரபலப்படுத்தவில்லை?" என்று சிலர் கேட்கிறார்கள். இதற்கு காரணம் இருக்கிறது

இந்த மாதிரி பாதிரியார்கள், மிகக் குறுகிய வட்டத்தில் இயங்குகிறவர்கள். ஆகையால் அவர்களைப் பற்றிய செய்திகள் பலரது கவனத்தை ஈர்க்காது. அதனால் அது மீடியா வர்த்தகத்துக்கு லாயக்கில்லை. லட்சக்கணக்கான மக்களை பக்த்தர்களாகக் கொண்ட சாமியாரைப் பற்றிய செய்தி என்றால், அதில் பலர் அக்கறை காட்டுவார்கள்; வர்த்தகம் நன்றாக இருக்கும். இது தான் காரணமே தவிர ஹிந்து மதத்தினருக்கு எதிரான சதி எதுவும் இல்லை"... ]

(நன்றி..இனி அடுத்த வாரம்).

- இன்பா

( சில பகுதிகளை இந்த வாரம் எடிட் செய்திருக்கிறேன் )