புழலில் ஒரு போர்

வெளியே அனுதினமும் ஆயிரக்கணக்கான போராட்டங்கள் நூதனமான முறையில் பல்வேறு காரணங்களை முன்னிட்டு நடந்து கொண்டிருக்கின்றன. வித்யாசமாக நேற்றைய(5/11) தினம் புழல் சிறையில், ஆயிரக்கணக்கான சிறைவாசிகள் (குற்றவாளிகள்) இணைந்து ஒரு போராட்டத்தை நடத்தியுள்ளனர். அதுவும் எவ்வாறு?? இந்த ஆயிரக்கணக்கானோரில் சிலர் எவ்வித ஆடையும் அணியாமல் நிர்வாணமாக!! ஒருவர் உடம்பில் கீறல்களை ஏற்படுத்திக் கொண்டு தற்கொலை செய்து கொள்வேன் என்று வேறு மிரட்டியுள்ளார். ஆயினும் நிர்வாணப் போராட்டம் நடைபெறவில்லை என சிறை அதிகாரி ராஜேந்திரன் மறுத்துள்ளார், எனினும் போராட்டம் நடைபெற்றது என்றார்.




இவையத்தனையும் எதற்காக?? முல்லை பெரியாறு பிரச்சனையை முன்னிட்டோ அல்லது ஸ்பெக்ட்ரம் முறைகேட்டைக் கண்டித்தோ அல்ல!! சிறைவாசிகளின் வாழ்வாதார பிரச்சனையை முன்னிட்டு. அதாவது சமீபகாலமாக சிறைக்குள் பீடி, சிகரெட் போன்ற புகையிலை வஸ்துக்களை உபயோகப்படுத்த தடை விதிக்கப்பட்டுள்ளதாம். அதனை நீக்க வேண்டி இந்நிர்வாணப் போராட்டம்.

சிறைக்கூடம் என்பது தவறிழைத்தவர்கள் தண்டனைக் காலத்தில் நல்ல விஷயங்களைக் கற்று, திருந்த வேண்டும் என்பதற்காக ஏற்படுத்தப்பட்ட ஒரு இடம். ஆனால் சமீப காலங்களில் சிறைக்கூடம் என்பது ஒரு மூன்று நட்சத்திர ஹோட்டல் அந்தஸ்துஸ்க்கு உயர்த்தப்பட்டுள்ளது. சென்னை மத்திய சிறைக்கு மாற்றாக புழல் சிறைக்கூடம் கட்டப்பட்டு சிறைவாசிகள் அங்கு சகல போகங்களுடனும் இருந்து வருகின்றனர். என்ன வெளியுலகத்தை மட்டும் காண முடியவில்லை. உள்ளேயே சினிமா கூட பார்ப்பார்கள் போலும்!! சமீபத்தில் கோவை குண்டுவெடிப்பு தீவிரவாதி கமலஹாஸனுக்கு கடிதம் வேறு ஒன்று எழுதியுள்ளதைப் பார்க்கையில் அதுவும் உண்டென்று தோன்றுகிறது.


சிறைச்சாலைக்குள் பீடி, சிகரெட், செல்போன் இன்னும் சொல்லப் போனால் கஞ்சா கூட புழங்குவதாக பத்திரிக்கைகளில் அவ்வப்போது அடிபடும். இது போன்ற சீர்கேடுகள் சிறை அதிகாரிகளின் துணையில்லாமல் நடைபெற வாய்ப்புகளே இல்லை. ஏனெனில் சிறைவாசிகளை சந்திக்க வரும் உறவினர்/நண்பர்கள் கடுமையான சோதனைகளுக்குட்படுத்தப்பட்ட பிறகே அனுமதிக்கப்படுவர். சிறை அதிகாரிகள் சிறு ஆதாயங்களுக்காக இது போன்ற விஷயங்களை அனுமதித்து விடுகின்றனர். தவிர சில அதிகாரிகளே இவற்றை ஒரு விலைக்கு சப்ளை செய்வதாகவும் சில பத்திரிக்கைகள் கூறுகின்றன.

அக்டோபர் மாதம் 10 ஆம் தேதி விஜிலென்ஸ் அதிகாரிகள் புழல் சிறையில் நடத்திய அதிரடி சோதனைதான் , பீடி, சிகரெட் தடைக்கு வழிவகுத்ததாகக் கூறப்படுகிறது. பின்பு கூடுதல் சூப்ரின்டெண்ட் திரு.கருப்பையா அவர்கள் போராட்டக்காரர்களை சமாதானம் செய்துள்ளார். எனினும் இனி வரும் காலங்களில் பீடி சிகரெட்டின் மீதான தடை கட்டாயமாக அமல்படுத்தப்படும் எனவும் தெரிவித்தார். இன்னொரு அதிகாரி தெரிவிக்கையில், எவ்வாறு சிறைவாசிகளை பீடி, சிகரெட் பிடிக்காமல் கட்டுப்படுத்த முடியும்?? என்று கேட்டுள்ளார்.


இதென்ன பிரமாதம்!! அடுத்து அண்ணா பிறந்த நாளோ, பெரியார் பிறந்த நாளோ வராமலா போய்விடும்?? அரசு செலவிலேயே சிறைவாசிகளுக்கு இலவச பீடி, சிகரெட் திட்டமே அமல்படுத்தப் பட்டாலும் படலாம். யார் கண்டது?? குற்றவாளிகளின் தயவு தேர்தல் காலங்களில் மிகவும் முக்கியம் அமைச்சரே!!