ஹிந்து கடவுள்களே உஷார் !

இரண்டு நாட்கள் முன் டைம்ஸ் டிவியில் திரும்ப திரும்ப Exclusive, First time on TV என்ற விளம்பரத்துடன் எம்.எப்.ஹுஸேன் பேட்டியை ஒளிபரப்பிக்கொண்டிருந்தார்கள்.

இந்தியா வருவதால் உங்களுக்கு பயம் இல்லையா ? ஏன் இப்ப துபாயில் இருக்கீங்க போன்ற கேள்விகள் தான். சீக்கிரமே என் வேலை முடிந்து இந்தியா திரும்புவேன் போன்ற பதில்கள்.


சீக்கிரமே இவர் மீது இருக்கும் கேஸ்களை 'முடிவுக்கு' கொண்டு வர அரசாங்கம் திட்டமிட்டுள்ளது. ஹுஸேனும் உள்துறை அமைச்சர் போன் செய்வார் என்று காத்துக்கொண்டிருக்கிறார். கடந்த ஒரு வார காலமாக இவரை பற்றிய செய்திகள் வர தொடங்கியுள்ளது.


நீண்ட காலமாக அயல்நாட்டில் வசித்து வரும் பிரபல ஓவியர் எம்.எப்.ஹுஸேன் இந்தியாவிற்கு திரும்ப விருப்பம் தெரிவித்துள்ளார். இது தொடர்பாக இந்திய அரசிற்கு உணர்ச்சிகரமான வேண்டுகோளும் விடுத்துள்ளார். இவரது விருப்பத்தின் பேரில், நியாயத்தின் அடிப்படையிலும், பாரதத்தில் வசிப்பதற்கான அவரது தார்மீக உரிமையின் அடிப்படையிலும், அவர் மீதான வழக்குகளை தள்ளுபடி செய்ய வேண்டுமென மத்திய சர்க்கார் உச்ச நீதிமன்றத்தை அணுகப் போவதாக செய்தி வெளியானது.

அதாவது அவர் மீதுள்ள குற்றச்சாட்டுகள் அனைத்தும் ஒரு நியாயமான முடிவிற்கு கொண்டு வரப்பட வேண்டுமாம். மதச்சார்பற்றவர்களின் பார்வையில், அவர் மீதான வழக்குகளைத் தள்ளுபடி செய்ய வேண்டும். அதுதான் இவர்கள் பார்வையில் நியாயமான முடிவு. பாரத மாதாவை நிர்வாணமாக சித்தரித்ததற்காக, பாரதத்தில் வாழுகின்ற தார்மீக உரிமை அவருக்கு அளிக்கப்படவேண்டுமென கோரப்படுகிறது. இதையடுத்து பேட்டியளித்த ஹுஸேன், இந்தியாவில் என் தொடர்பான சட்ட சிக்கல்கள் நீங்குமானால், முதல் விமானத்தில் இந்தியாவிற்கு வந்து உள்துறையமைச்சர் சிதம்பரத்திற்கு நன்றி கூறுவேன் என கூறியிருக்கிறார். சிதம்பரம் தான் கலைக் கண்ணோடு பார்க்க தெரிந்தவர் போல!

இந்தியாவின் பிக்காஸோ என்று பிரபல Forbes பத்திரிக்கையால் வர்ணிக்கப்பட்டவர் ஓவியர் MF ஹுஸேன். மராட்டியத்தில் பிறந்த இவரது ஓவியங்களில் சில 1990 களில் மிகப்பெரிய சர்ச்சையைத் தோற்றுவித்தன. பாரத மாதா நிர்வாணமாக இருப்பது போலவும், ஹிந்து தெய்வமான துர்க்கை ஒரு புலியுடன் புணர்ச்சியில் ஈடுபடுவது போன்றதுமான இவரது இதே பாணியிலான ஹிந்து கடவுளர்களை இழிவு படுத்தும் பல ஓவியங்கள் வெளியிடப்பட்டன. இவை மிகுந்த பரபரப்பை ஏற்படுத்தின. தவிர, மத உணர்வுகளை புண்படுத்தியதாக இவர் மீது தில்லி உயர்நீதி மன்றத்தில் சில வழக்குகள் பதிவு செய்யப்பட்டன. ஆரம்பத்தில் அவை தள்ளுபடி செய்யப்பட்டாலும், தொடர்ந்து விஸ்வ ஹிந்து பரிஷத் மற்றும் பஜ்ரங் தள் போன்ற அமைப்புகளின் போராட்டத்தின் விளைவாக, மத உணர்வுகளை புண்படுத்தியதன் பேரில் இவர் மீது வழக்குகள் பதிவு செய்யப்பட்டு, கைது வாரண்டும் பிறப்பிக்கப்பட்டது. கலை நோக்கத்தோடு வரையப்பட்டது என்று சால்ஜாப்பு சொல்லியவர், விளைவுகளின் தீவிரத்தைக் கண்டு மன்னிப்பு கோரினார். பின்பு மேலும் சட்ட சிக்கல்கள் துரத்தியதால் இங்கிலாந்திலும், துபாயிலுமாக தஞ்சமடைந்தார்.

முன்னர், டானிஷ் பத்திரிக்கையொன்றில் முகமது நபியை கேலிச் சித்திரமாக தீட்டியதற்காக, அந்த ஓவியரின் மீதும், பத்திரிக்கையின் மீதும் இஸ்லாமிய அடிப்படைவாதிகளால் பத்வா பிறப்பிக்கப்பட்டது. இது தொடர்பாக இஸ்லாமிய நாடுகளில் கலவரம் மூண்டு நூற்றுக்கும் மேற்பட்டோர் கொல்லப்பட்டனர். இதன் உச்சமாக, சிரியாவில் உள்ள டானிஷ் தூதரகம் தீக்கிரையாக்கப்பட்டது.

இங்கு இந்தியாவில் பாரத மாதாவையும், ஹிந்து தெய்வங்களையும் கலை என்ற பெயரால் கொச்சைப் படுத்தியவரை மாலை மரியாதைகளுடன் வரவேற்க அரசாங்கம் தயாராகி வருகிறது. கேட்டால் தார்மீக உரிமை!!


"பெற்ற தாயும் பிறந்த பொன்னாடும் நற்றவ வானிலும் நனி சிறந்தனவே" என்றார் பாரதியார். இது, எதையுமே கலைக் கண்ணோடு நோக்கும் ஹுஸேனுக்கு தெரிந்திருக்க வாய்ப்பில்லைதான். ஆனால் தட்டிக் கேட்க வேண்டிய அரசாங்கமும் இப்பொழுது சால்வையுடன் காத்துக் கொண்டிருக்கிறது.

இந்து மதத்துக்கு சகிப்பு தனமை அதிகம். இல்லை என்றால் இவ்வளவு காலமாக இந்து மதம் இருக்குமா ? ஹுஸேனின் தாத்தாக்களையே சகித்துக்கொண்ட இந்து மதம் இவரையும் சகித்துக்கொண்டு போகும்

கட்டுரை யதிராஜ், கொஞ்சம் எடிட் செய்திருக்கிறேன்.