என் மேல் கேஸ் போடட்டும் - விஜயகாந்த்

ரிப்போட்டரில் வந்த விஜயகாந்த் பேட்டி...

`விருதகிரி' படத்தின் அவுட்-லைன் பற்றிச் சொல்லுங்களேன்?

"இது ஒரு சஸ்பென்ஸ் கதை. ஒரு லைனை வைத்துக்கொண்டு அடுத்தடுத்து பயணிக்கப் போகும் கதை. இப்போதைக்கு கதையின் முழு அம்சத்தையும் கூற முடியாது. படத்தில் போலீஸ் அதிகாரியாக வருகிறேன். அவ்வளவுதான் சொல்ல முடியும்.''

`விருதகிரி'யில் அரசியல் வசனங்கள் இருக்குமா?

"அது வழக்கமானதுதான். நான் அரசியலுக்கு வருவதற்கு முன்பே நடித்த `ஏழை ஜாதி' படத்தில், `ஒலியும், ஒளியும் ஒரு மணி நேரமும், ஐந்து கிலோ அரிசியும் கொடுத்தால் மக்கள் நமக்குத்தான் ஓட்டுப் போடுவார்கள்' எனப் பேசினேன். அந்தப் படத்தில் இன்னொரு காட்சியில், `நீங்கள் ஏழு வருடம் ஆட்சியில் இருந்து 700 கோடி சம்பாதித்தீர்கள். நான் ஆறு வருடம் ஆட்சியில் இருந்து 600 கோடி சம்பாதித்தேன். ஆனால், நம்மையும் தாண்டி புதிய சக்தி உள்ளே வந்துவிடக் கூடாது' என கட்சித் தலைவர் ஒருவர் பேசுவதுபோல் வரும். அப்போதே இப்படியெல்லாம் காட்சிகள் வைக்கப்பட்டன. இப்போது இதைப் பற்றி நீங்கள் கேட்கவா வேண்டும்?''

இப்போதெல்லாம் எந்த சினிமா ஓடும்; எந்த சினிமா காலை வாரும் என்றெல்லாம் கணிக்க முடியாத சூழல் நிலவுகிறதே?

"இதற்குக் காரணம் படத்தின் டைட்டிலுக்குத் தகுந்த எதிர்பார்ப்பு இருப்பதுதான். அந்தக் காலத்து `ஜெகன்மோகினி' படத்தில் எரிகிற அடுப்புக்குள் கால் விடுவது போன்ற காட்சிக்குப் பெரும் எதிர்பார்ப்பு இருந்தது. இப்போது அதுபோன்ற எதிர்பார்ப்புகள் இருப்பதில்லை. நம்மிடம் ஒரு கதையும், எடுக்கும்போது வேறு கதையும் கொடுத்தால் வெற்றியை எப்படி கணிக்க முடியும்? எம்.ஜி.ஆர். சிவாஜி காலத்திலேயே தோல்விப் படங்கள் இருக்கத்தானே செய்தன.''

சரி.. சமீபகாலமாக அறிக்கையின் மூலம் மட்டுமே ஆளுங்கட்சிக்கு எதிரான வார்த்தைகளை வீசுகிறீர்கள்...

"யார் சொன்னது? மக்களின் தேவைகளுக்கு ஏற்ப போராட்டம் நடத்திக் கொண்டுதான் இருக்கிறேன். நீங்கள் சொல்லும் அதிரடி அரசியல் என்னவென்று புரியவில்லை. யாரையாவது அடிக்க வேண்டும் என்கிறீர்களா? மீனவர் பிரச்னைக்காக டெல்லி, ராமேஸ்வரத்தில் ஆர்ப்பாட்டம், விலைவாசி உயர்வு எதிர்ப்புப் போராட்டம் என தொடர்ந்து வேகமாக இயங்கிக் கொண்டிருக்கிறேன். அத்துடன் அறிக்கைகள் மூலமும் அரசின் நிர்வாகத் தவறுகளைச் சுட்டிக்காட்டுகிறேன். ஆனால், பல பத்திரிகைகள் நான் சொல்வதை பெருமளவு வெளியில் காட்டுவதில்லை. இதற்கு கலைஞர் மீதுள்ள பயம்தான் காரணம்.''

வடமாநிலங்களில் நடந்த சட்டமன்றத் தேர்தல்களில் காங்கிரஸ் கட்சி பெருமளவு வெற்றியைக் குவித்திருக்கிறது. அப்படியென்றால் நாடு முழுவதும் காங்கிரஸ் அலை வீசுகிறது என்று எடுத்துக் கொள்ளலாமா?

"வடமாநிலங்களில் அலை வீசுவது இருக்கட்டும். தெற்கில் உள்ள ஆந்திரா, கர்நாடகா, கேரளாவில் கூடத்தான் அலை வீசுகிறதாம். ஆனால், 67-ம் ஆண்டுக்குப் பிறகு இன்றுவரை தமிழகத்தில் அலை வீசியதா? ஆனால், 72-ம் ஆண்டில் இருந்து காங்கிரஸ் கட்சியைப் புறக்கணித்து யாரும் ஆட்சி நடத்தியதில்லை. அதனால்தான் கச்சத்தீவு முதல் இப்போதுள்ள முல்லைப் பெரியாறு வரை பிரச்னை நீண்டுகொண்டே போகிறது'' என்றவர், (முரசொலி பத்திரிகையில் முல்லைப் பெரியாறு விவகாரம் குறித்து முதல்வர் வெளியிட்ட அறிக்கைகளை விலாவாரியாகச் சுட்டிக் காட்டிவிட்டு),

" ஆரம்பத்தில் மத்திய அமைச்சரைக் கண்டித்து ஆர்ப்பாட்டம் என்றார். அடுத்து, மத்திய அரசைக் கண்டித்து ஆர்ப்பாட்டம் என்றார். இறுதியாக, முல்லைப் பெரியாறு பிரச்னை குறித்து பொதுக் கூட்டம் என்ற ரேஞ்சில் விளம்பரம் கொடுத்துவிட்டு, அதையும் கடைசி நேரத்தில் ஒத்தி வைத்துவிட்டார். இப்போது வழக்கு நிலுவையில் உள்ளதைக் காரணம் காட்டுகிறார். ஆனால், கண்டன ஆர்ப்பாட்டம் அறிவித்தபோதே வழக்கு நிலுவையில் இருந்தது தெரியாதா? இப்படி புறநானூற்று வீரம் புறமுதுகு காட்டி ஓடுவது ஏன்? ஆக, தமிழினத்தை அழிக்கும் துரோகிதான் கலைஞர். தமிழினத்தைக் காட்டிக் கொடுத்த துரோகியும் கலைஞர்தான். தமிழக நலனில் சிறிதும் அக்கறை இல்லாதவர். தன் குடும்பம் சம்பாதிப்பது மட்டும்தான் அவரது நோக்கம். இந்த வார்த்தைகளைச் சொல்வதற்காக என் மேல் வழக்குப் போடட்டும். பார்த்துக் கொள்ளலாம்.''

இலவச கலர் டி.வி, கேஸ் அடுப்பு, ஒரு ரூபாய் அரிசி போன்றவற்றுக்கு ஏழை மக்களிடம் வரவேற்பு இருக்கத்தானே செய்கிறது?

"தவறாகச் சொல்லாதீர்கள். இப்படியெல்லாம் வரவேற்பு இருந்தால் தேர்தல் காலத்தில் ஒவ்வொரு ஓட்டுக்கும் பணம் கொடுக்கும் கலாசாரத்தை ஏன் செய்கிறார்கள்? இவர்களின் செயலுக்கு வரவேற்பு இல்லை என்பதால்தானே? அத்துடன் இதுபோன்ற இலவசங்களில் கோடி கோடியாகச் சம்பாதிப்பதுதான் நடக்கிறதாம்.''

அதற்காக, ஏழை மக்களின் உயிர் காக்கும் திட்டமான `கலைஞர் காப்பீட்டுத் திட்டத்'தைக்கூட குறை சொல்வது நியாயமா?

" இந்தத் திட்டமே குளறுபடியான திட்டம்தான். இந்தத் திட்டம் ஒன்றும் கலைஞர் மூளையில் உதித்த திட்டம் அல்ல. ஆந்திராவில் ஏற்கெனவே இத்திட்டம் செயல்படுத்தப்பட்டு வருகிறது. ஒரு விளம்பரத்தில் ஒரு கோடிப் பேர் பயன்பெறுவார்கள் என அரசு சொல்கிறது. மற்றொரு விளம்பரத்தில் அறுபது லட்சம் என்கின்றனர். அமைச்சர் பன்னீர்செல்வமோ, 69 லட்சத்து 44,959 குடும்பங்களை இணைத்துள்ளோம் என்கிறார். உண்மையில் எவ்வளவு பேர்தான் பயன்பெறுவார்கள் என்று சொல்லவில்லை. திட்டத்தின் ஆரம்பகட்டமே இவ்வளவு குளறுபடியாக இருந்தால் எப்படி?

ஏழைகளுக்கு மருத்துவக் காப்பீட்டுத் திட்டம் தேவைதான். கலைஞர் காப்பீட்டுத் திட்டம் ஏழைகளுக்குத் தினையளவு நன்மையென்றால், இதைச் செயல்படுத்தும் நிறுவனங்களுக்கு பனையளவு கொள்ளையடிக்க வழி செய்துள்ளது. இதற்காக முன்கூட்டியே ஒரு பெருந்தொகையை முதல்வர் தனியார் காப்பீட்டு கம்பெனிக்கு வழங்கியுள்ளார். காப்பீட்டு கம்பெனிக்கு 517 கோடி ரூபாய் செலவாகும் என எந்த அடிப்படையில் கணக்கிட்டுக் கொடுக்கப்பட்டது என்பது எமனுக்கே வெளிச்சம்.

இதைச் சொல்வதால் என் மீது புழுதி வாரித் தூற்றுகிறார். இதனால் அவரது கைகள்தான் அழுக்காகும். வாரித் தூற்றிய புழுதியும் எதிர்க்காற்றால் அவர் மீதுதான் வந்து படியும். நான் என்ன சொல்கிறேன் என்பதை ஆராய வேண்டுமே தவிர, இவர் யார் இதைச் சொல்ல என்ற ஆணவப் போக்கு இருக்கக் கூடாது. இதைவிட வேடிக்கை என்னவென்றால், ஒரு திருமண விழாவில் கலைஞர், `சாதியை மறந்து அனைவரும் தமிழராய் ஒன்றுபட வேண்டும்' என்கிறார். தமிழ்நாட்டில் சாதி அரசியல் செய்து, சாதிக் கட்சிகளோடு கூட்டணி வைத்து, சாதியை வளர்த்துவிட்டவரே கலைஞர்தான்.''

மத்திய அரசின் செயல்பாடுகள் எப்படித்தான் இருக்கிறது?

"கடந்த ஐந்து ஆண்டுகள் தி.மு.க.விற்கு காங்கிரஸ் கட்சி ஜால்ரா போட்டது. இப்போதுள்ள ஐந்தாண்டுகள் மக்களை ஏமாற்றுவதற்காக ஆட்சி செய்யப் போகிறது.''

மத்தியில் அங்கம் வகிக்கும் தி.மு.க. அமைச்சர்கள் எப்படிச் செயல்படுகிறார்கள்?

"கொள்ளையடிப்பதில் போட்டி போடுகிறார்களாம். ஸ்பெக்ட்ரம் ஊழல் பெரும் பரபரப்பாகப் பேசப்படுகிற விஷயம். இந்த ஊழல் பற்றி ஒரு வார்த்தையாவது கலைஞர் பேசினாரா? அதுவும், அமைச்சரின் அலுவலகத்தில் சி.பி.ஐ. விசாரணை நடக்கிறது. இது மிகப் பெரிய விஷயம். இதை மூடி மறைத்து ஏமாற்றும் வேலையில் ஆட்சியாளர்கள் இறங்குகிறார்கள். இந்த விவகாரத்தில் ராசா கூறும்போது, இந்தப் பதவியில் முன்பு இருந்த அமைச்சரின் வழிகாட்டல்படிதான் செயல்படுகிறேன்' என்கிறார். இதன் மூலம் தயாநிதி மாறனை வம்புக்கு இழுக்கிறாரா ராசா? அதுமட்டுமன்றி பிரதமரின் ஆலோசனைப்படிதான் செயல்பட்டேன் என்கிறார். இவர்கள் ஊழல் செய்வதற்கு பிரதமரா ஆலோசனை கூறுகிறார்? தி.மு.க. சார்பில் மத்தியில் அங்கம் வகிக்கும் அமைச்சர்கள் ஊழலில் திளைக்கிறார்கள். கலைஞருக்கு ஊழல் விஞ்ஞானி என்ற பெயரையே சர்க்காரியா கமிஷன் கொடுத்தது. அப்புறம் இவர்கள் செயல்பாடு எப்படி இருக்கும்?'

இலங்கையில் முள்வேலி முகாம்களில் அடைக்கப்பட்டுள்ள தமிழர்கள் சொந்த ஊருக்குத் திரும்புவதற்கு நமது எம்.பி.க்கள் குழுவின் விசிட்தானே காரணம்?

"அது அப்பட்டமான நாடகம். தமிழினத் துரோகி டக்ளஸ் தேவானந்தாவுடன்தானே இவர்கள் இலங்கையை வலம் வந்தார்கள். அந்தத் துரோகியோடு இந்தத் துரோகிகள் சேர்ந்தால் உருப்படுமா? மக்கள் சொந்த ஊருக்குத் திரும்புவதாக இவர்கள்தான் செய்தி பரப்புகிறார்கள். அது உண்மையென்று நான் நம்பவில்லை.''

உலகத் தமிழ்ச் செம்மொழி மாநாடு பற்றி என்னதான் சொல்கிறீர்கள்?

"இலங்கைத் தமிழர் பிரச்னையில் இவர்கள் ஆடிய தப்பாட்டத்தை மறைப்பதற்காகத்தான் இப்படியொரு அறிவிப்பை வெளியிட்டார்கள். ஆரம்பத்தில் ஒன்பதாவது உலகத் தமிழ் மாநாடு என்றார்கள். அதற்குரிய அனுமதியை வாங்காததால் உலகத் தமிழ்ச் செம்மொழி மாநாடு என்றார்கள். இதுபோன்ற செயல்பாடுகளால் தமிழர்களிடையே பிரித்தாளும் சூழ்ச்சியை ஏற்படுத்துகிறார் கலைஞர். மூத்த தமிழறிஞர் சிவத்தம்பி இதோ வருகிறார், அதோ வருகிறார் என்றார். கடைசியில் பார்த்தால் தமிழக அரசின் பாதுகாப்பில்தான் இருக்கிறாராம். இதைவிடக் கொடுமை, `உளியின் ஓசை' படத்திற்காக கலைஞருக்கு அவரே விருது கொடுத்துக்கொள்ளப் போகிறாராம். அந்தப் படத்தில் ஏதாவது ஒரு வசனத்தை எனக்குச் சொல்லுங்கள் பார்க்கலாம். நாற்பது வருடங்களுக்கு முன்பு வந்த, `மனோகரா' படத்தின் வசனங்கள்தான் எனக்குத் தெரியும். நல்லவேளை நோபல் பரிசுக்கென்று ஒரு கமிட்டி இருக்கிறது.''

வரும் தேர்தலுக்குள் தமிழக அரசியலில் அணி மாற்றம் நடக்கும் என்கிறார்களே?

"கூட்டணி மாற்றம் என்பது பதவி ஆசையால் நடப்பது. ஏன் ஒவ்வொரு தேர்தலுக்கும் மாறுகிறார்கள் என்பதை அவர்களிடம்தான் நீங்கள் கேட்க வேண்டும். நான் அ.தி.மு.க. கூட்டணியில் சேரப் போகிறேன் என்றெல்லாம் எழுதினார்கள். நிழலுக்கு மாலை போட எனக்கு விருப்பமில்லை என்பதை எத்தனை முறைதான் சொல்வது!''

ஆனால், விரைவில் சட்டமன்றத் தேர்தல் வரும் என்கிறார்கள். அதை எதிர்கொள்ள நீங்கள் தயாரா?

"கட்சி ஆரம்பித்து எதிர்கொண்ட தேர்தல்களில் எங்கள் கட்சி டெபாசிட் இழக்காமல் மக்களிடம் பெயர் பெற்று வருகிறது. ஒவ்வொரு தேர்தலிலும் எங்களுக்கான வாக்கு வங்கி அதிகரித்துக்கொண்டே போகிறது. இந்நிலையில், எப்போது தேர்தல் வந்தாலும் எதிர்கொள்ளத் தயாராகவே இருக்கிறோம்.''

`கூத்தாடிகளின் பின்னால் தமிழக இளைஞர்கள் செல்கிறார்கள்' என பா.ம.க. நிர்வாகிகள் உங்களைக் குறிவைத்துப் பேசியிருக்கிறார்களே?

"அவர்கள் ஜெயலலிதாவையும்தான் கூத்தாடி எனக் கூறியிருக்கிறார்கள். இப்படிச் சொன்னவர்கள்தான் அ.தி.மு.க.வுடன் கூட்டணி வைத்துக் கொண்டார்கள். மக்களால் மறக்கப்பட்ட கட்சி பா.ம.க. அதைப் பற்றி பேசுவதில் எந்தப் பிரயோஜனமும் இல்லை. எனக்கென்று ஏராளமான அரசியல் பணிகள் இருக்கின்றன'' என்றதோடு பேட்டியை முடித்துக்கொண்டு `விருதகிரி' படத்திற்கான அடுத்தகட்ட வேலைகளுக்காக நம்மிடம் இருந்து விடைபெற்றார் விஜயகாந்த்.

விருதகிரி வெற்றி பெற வாழ்த்துகள் :-)