வன்முறையின் வரைமுறைகளும் மூக்குடைபடுவதும் - கி.அ.அ.அனானி

முன்னுரை: இதையும் ரெகுலரா அனுப்பற மாதிரி, எ.அ.பாலாவுக்குத் தான் அனுப்ப நினைத்தேன். ஆனால், இந்த "மூக்கு" மேட்டர் பற்றிப் பேசப் போவதில்லை என்று டிவிட்டரில் சொல்லி அவர் ஜகா வாங்கி விட்டதாகத் தெரிந்ததால், நான் எழுதியதை "பிரபஞசப் புகழ்" (எவ்வளவு நாள் தான் உலகப் புகழ் என்று சொல்லிக் கொண்டிருப்பது!) இட்லிவடைக்கு அனுப்புகிறேன். இ.வ இதை தன் பிளாகில் போடுவார் என்று நம்பிக்கை. இ.வ சாருக்கு அட்வான்ஸ் நன்றி.

வன்முறை கண்டிக்கப்பட வேண்டிய ஒன்று..இது அனேகமாக இந்த வாரம் தமிழ் வலைப்பதிவர்களில் நிறையபேர் பதிவு மற்றும் பின்னூட்டம் மூலமாக சொல்லி விட்ட ஒன்று. காந்தி இருந்திருந்தால் தமிழ் கூறும் நல்லுலகின் வலைப்பதிவுகளையும் பின்னூட்டங்களையும் படித்துப் பூரித்துப் போயிருப்பார் :)

அன்னியன் படத்தில் பஸ்ஸில் கதாயாயகியிடம் ஒரு ரெளடி சில்மிஷம் பண்ணுவான்.அதை எதிர்க்கும் கதாநாயகனுக்கும் ஒரு அடி விழும்.கதாநாயகன் பஸ்ஸில் உள்ள மற்ற பயணிகளிடம் இந்த அநியாயத்தைக் கேட்கக் கூடாதா என புலம்ப,அவர்களும் கதாநாயகியிடம் ரெளடி சில்மிஷம் பண்ணியதை உறுதிப் படுத்திக் கொண்டு தர்ம அடி போடத் துவங்குவர். அப்போது சட்டத்தை மதிக்கும் கதாநாயகன் : சட்டத்தைக் கையில் எடுக்காதீர்கள்" என்று சொல்லி அந்த ரெளடிக்கு எதிரான வன்முறையை ??!!! தடுத்து போலிசில் ஒப்படைப்பார். போலிஸ் ரவுடியை அடிக்கத் தொடங்க, உங்களுக்கு அதற்கு உரிமை கிடையாது., சட்டப்படி கோர்ட்டில் ஒப்படைத்து தண்டனை வாங்கிக் கொடுங்கள் " என்று போலிஸ் வன்முறையையும் தடுத்து???!! சொல்வார் நம் கதாநாயகன். அப்புறம் தான் ஹைலைட்டே ..போலிசைப் பார்த்து அந்த ரெளடி " கேட்டீல்ல, இனிமே அடிச்சீங்கன்னா என் வக்கீல்தான் பேசுவார் " என்று பிடித்துக் கொடுத்த கதாநாயகனைக் காட்டிவிட்டு முத்தாய்ப்பாய் " மத்தியானத்துக்கு பிரியாணி சொல்லிடுங்க" என்று நக்கலாக இன்ஸ்பெக்டரிடம் சொல்லுவார். வெளியே வரும் கதாநாயகனிடம் கதாநாயகி " தடவினா தடவிட்டுப் போறான். நீ ஏன் சட்டம், ஒழுங்கு என்று பேசி எல்லார் நேரத்தையும் வீணடித்தாய் " என்று கதாநாயகனிடம் சலித்துக் கொண்டே போவார்.

தமிழ் கூறும் வலையுலகம் இந்தக் காட்சியில் யார் யார் மீது எந்தெந்த மாதிரியான வன்முறைகளை ( எ.கா: வார்த்தை வன்முறை, செயல் வன்முறை, அதிகார வன்முறை) பிரயோகித்தார்கள்? இதில் எந்த வன்முறையெல்லாம் சரி, எந்த வன்முறையெல்லாம் தப்பு என்று அலசலாம். சில பேருக்கு சில பல பதிவுகள் போட ஏதுவாகவும் பல பேருக்கு பின்னூட்ட ஜல்லி மற்றும் ஜால்ரா தட்டவும் வசதியாகவும் இருக்கும்.

வன்முறை கண்டிக்கப்பட வேண்டிய ஒன்று.. கருத்தைக் கொண்டிருக்கும் சாத்வீகமான என் நண்ப வலைப்பதிவர் ஒருவரை ( அவரும் violence down! down! பின்னூட்டம் போட்டவர்தான் ) பஸ்ஸில் உன்னுடன் பயணிக்கும் போது இதே மாதிரி உன் மனைவிக்கு நடந்தால் உன் எதிர்வினை என்னவாக இருக்கும் ? என்று கேட்டு வைத்தேன். " அந்த ஆளோட செவுள்ளயே ரெண்டு விடுவேன் " என்று சற்றும் யோசியாமல் பட்டென்று சொன்னார் அந்த காந்தியின் வாரிசு. அடுத்தது தான் ஹைலைட் "

நான் செய்யுறது தப்புதான் ஆனால் அந்த நேரத்தில் உடனடி உந்துதல் எதிர்வினை அதுவாகத்தான் இருக்கும் " என்று அதற்கு சூப்பர் விளக்கம் வேறு கொடுத்தார். " ஒரு கன்னத்தில் அடித்தால் மறு கன்னத்தைக் காட்ட நாம ஒண்ணும் காந்தி இல்லியே " என்று அவர் மனசின் ஓரமாக உட்கார முயன்ற காந்தித் தாத்தாவையும் ஒரே போடாக போட்டுத் தள்ளி விட்டர். இதிலிருந்து எனக்கு ஒன்று புரிந்தது. " வன்முறை தவறு மற்றும் வன்முறை கண்டிக்கப் பட வேண்டும் " என்பதின் அருஞ் சொற்பொருள் " நான் மற்றும் எனக்குத் தெரிந்தவர் செய்யும் வன்முறை தவிர, மற்ற எல்லா வன்முறைகளும் தவறு . அதே போல் என் மீது மற்றும் எனக்கு வேண்டியவர் / தெரிந்தவர் மீது பிரயோகிக்கப் பட்ட அனைத்து வன்முறைகளும் கண்டிப்பாக கண்டிக்கப்பட வேண்டும்" என்பதுதான்.

அதே போல வன்முறையை எதிர்க்கும் எல்லாரிடமும் பொதுவாகப் பார்க்கும் ஒரு விஷயம் " இதை எதிர்க்கவில்லை என்றால் இது என் / எனக்குத் தெரிந்தவர்கள் மீது பிரயோகப்படுத்தப்பட்டு விடக் கூடிய சாத்தியக் கூறு உள்ளது " என்கின்ற ஆதார பயம் தான்.

டிஸ்கி: தலைப்பில் மூக்குடைபடுவது என்று போட்டது அனைவரையும் படிக்க வைக்கப் பண்ண மொள்ளமாரித்தனம்தான் தவிர "மூக்கு" நிகழ்வுக்கோ இந்தப் பதிவுக்கோ எந்த சம்பந்தமும் கிடையாது. ஆனால் அந்த விஷயத்தை வைத்து "ஜல்லி" அடிக்கும் அனைவருக்கும் சம்பந்தமுண்டு :)

வாழ்க ஜனநாயகம்... வளர்க (எனக்குத் தோதான) வன்முறையற்ற சமுதாயம்!!!

கி.அ.அ.அனானி

'எவ்வளவு அடிச்சாலும் தாங்குறான்… இவன் ரொம்ப…. நல்லவன்' மாதிரி 'எந்த போஸ்ட் அனுப்பினாலும் இந்த (கை)புள்ள போடுகிறான்' என்று அனுப்பி அடிவாங்க வைக்கும் நண்பருக்கு என்றென்றும் அன்புடன் இட்லிவடையின் நன்றி.

இந்திய சிலைகள் பல மூக்கு உடைப்பட்டு இருப்பதற்கு காரணம் இப்போது புரிகிறது :-)