அபூர்வ சகோதரர்கள்

திருவள்ளுவர், சர்வக்ஞர் சிலைகள் பற்றி இன்பா & இட்லிவடை...

ஒரு வழியாக அய்யன் திருவள்ளுவர் சிலை திறப்புவிழா பெங்களூருவில் இனிதே நடந்துவிட்டது.

"நான் 18 ஆண்டுகளுக்கு முன் ஒரு சபதம் செய்திருந்தேன். கடந்த 18 ஆண்டுகளாக பெங்களூரில் நடக்கும் எந்தவொரு நிகழ்ச்சிக்கும் யார் என்னை அழைத்தாலும், "பெங்களூரில் திருவள்ளுவர் சிலை மூடப்பட்டு கிடக்கிறது. அது என்றைக்கு திறந்து வைக்கப்படுகிறதோ அன்று தான் பெங்களூரு வருவேன்' என, சொல்லியிருந்தேன்.அந்த சபதத்தை நான் நிறைவேற்றவில்லை. முதல்வர் எடியூரப்பா நிறைவேற்றி கொடுத்திருக்கிறார்."

என்று சொன்னார் நம் முதல்வர்.

"இதைபோன்று தமிழ்நாட்டை இந்தியாவின் முதன்மை மாநிலம் ஆக்குவேன் என்று எதாவது சபதம் போட்டு இருக்காரா. அதை வேறு 'யாராவது' வந்து நிறைவேற்றுவார்களா" என்று 'டெலிபதி'யில் என்னிடம் கேட்டார் நண்பர் மானஸ்தன். தெரியவில்லை. அப்படி எதாவது 'போட்டுஇருந்தால்' , மகன்...பேரன்.. கொள்ளு பேரன்.. எள்ளு பேரன் என அவரது வரும் தலைமுறையில் யாராவது நிறைவேற்றலாம்.

"காவேரி நடுவர்மன்ற தீர்ப்பை நிறைவேற்றினால்தான் பெங்களூரு வருவேன் என அவர் ஏன் சபதம் போடவில்லை" - இப்படி 'மப்'பில் கேட்டவர் நம்ம முனி. போதாகுறைக்கு "கடந்த 18 ஆண்டுகளாக பெங்களூருவில் நடக்கும் எந்தவொரு நிகழ்ச்சிக்கும் அவர் வரவில்லையா. 'சன்' பிரச்சினைகளை தீர்க்கும் நிகழ்ச்சி அங்க இருக்கிற அவரோட பண்ணை வீட்டுலதான நடந்துச்சு" என்று வேறு ஏடாகூடமாக கேள்வி கேட்டார்.

இதெற்கெல்லாம் பதில் நீங்கள்தான் சொல்லவேண்டும்.

வள்ளுவர்க்கு மாற்றாய்(?), சர்வக்ஞர் சிலையை சென்னையில் வைப்பதற்கான சகல ஏற்பாடுகளும் நடந்திருக்கிறது (இல்லை என்றால் சும்மா விடுவார்களா வா(மு)ட்டாள் நாகராஜ் வகையறாக்கள்)

சிலை திறந்து, மனம் திறந்து அவர் பேசியதாவது.

"பக்கத்து மாநில முதல்வர் என்ற முறையில், நீண்ட நாட்களாக கர்நாடகாவுடன் தொடர்புடையவன் என்ற முறையில் எனது நன்றி. இன்னும் சில நாட்களுக்கு பின் சென்னையில் நடக்க இருக்கிறது சர்வக்ஞர் சிலை திறப்பு விழா. இந்த இரண்டும், இரண்டு சிலை திறப்பு விழாக்களை குறிப்பது அல்ல. இரு மாநில மக்களது இதயங்களை திறந்திருக்கிற சிறப்பு விழாக்கள்.சர்வக்ஞர், கன்னடத்தில் படைத்துள்ள உரைப்பாக்களை எல்லாம் இறையடியார் என்ற தமிழறிஞரைக் கொண்டு தமிழில் மொழி பெயர்த்து, அவர் கவிதை நடையில் தந்துள்ள உரைப் பா என்ற நூலை வெளியிட்டு மகிழ்ந்தது தான் தமிழக அரசு.நண்பர்கள்: இப்படி முடியாத காரணத்தால், கர்நாடகத்தில் உள்ள தமிழர்கள், கன்னடர்களோடு சேர்ந்து இருவரும் ஒருவராக யார் வந்தால், இந்த காரியம் நிறைவேறும் என்று எதிர்பார்த்து, அங்கே என்னையும், இங்கே இவரையும் (எடியூரப்பா) முதல்வர்களாக தேர்ந்தெடுத்திருக்கின்றனர்"

என்று பேசினார்.

முத்தாய்ப்பாக ஒரு பாசமலர் கட்சியை அரங்கேற்றினார்.

"அவரை விட நான் மூத்தவன் என்பதால், எனக்கு 86 வயது, அவருக்கு 67 வயது என்பதால், எல்லாரையும் அழைப்பது போல "தம்பி' என்று அழைக்கலாம். இந்த இரண்டு சகோதரர்களும், இந்தியாவில் மற்ற மாநிலங்களுக்கு வழிகாட்டத்தக்க ஒரு நிலையை உருவாக்கியிருக்கிறோம். இதை மற்ற மாநிலங்கள் புரிந்து கொள்ள வேண்டும். இதில் எந்த அரசியலும் கிடையாது. இது அறவியல் தான்"

என்றார்.

அதான் எடியூரப்பா 'தம்பி' ஆகிவிட்டாரே. தமிழர்நலன் கருதி காவேரி,ஒகெனக்கல் பற்றி எதாவது 'பிட்டு' போடுவார் என்று எதிர்பார்த்தால், தன் பண்ணைவீட்டின் நலன் கருதி கவனமாக 'சென்சார்' செய்துவிட்டார்.

பொதுவாக சிலை திறப்பினால் காக்கா,குருவிகளுக்கு பலன் உண்டு. மக்களுக்கு?

பொதுவாகவே இரண்டு மாநில மக்களிடையே பகமைஉணர்வு நிலவுகிறது. "தமிழக - கர்நாடகா அணிகள் ரஞ்சி ஆடினாலே அது இந்தியா - பாகிஸ்தான் போலிருக்கும்" என்று ஒரு கிரிக்கெட் விமர்சகர் சொல்லிஇருந்தார். இந்த சிலை பரிமாற்றம், லாகூருக்கு பஸ் விட்டதைபோல அமையலாம்(!).

யாருக்காவது எதன் மீதாவது கோவமா? உடனே 'உள்ளூர் தமிழனை அடித்து உதை' என்பதான மனோவியாதி இலங்கை, மலேசியா மட்டுமில்லாது நம் பக்கத்துக்கு மாநிலமான கர்நாடகாவிலும் பரவிஇருக்கிறது. இந்த முயற்சி அந்த வியாதியை குணப்படுத்தவேண்டும் என அந்த முனிஸ்வரனை வேண்டிக்கொண்டு, வரவேற்போம்.

ஒன்று கொடுத்தால்தான், இன்னொன்று என்று முடிவாகிவிட்டது. நம்ம ஈரோடு நாகராஜ் ஸார் சொன்ன kaveri for full tassmak production என்ற முறையில், 'வாழும் வள்ளுவர்க்கு' அடியேனின் சில யோசனைகள்.

கூவம் நதி நீரை காவேரிக்கு மாற்றாய் பகிரலாம்.

எப்படி தன் வீட்டை மக்களுக்காக 'தாரை' வார்த்துபோல, சன் - கலைஞர் டிவி குழுமங்களை கர்நாடகா அரசிடம் கொடுத்துவிட்டு, ஒகெனக்கல் கூட்டு குடிநீர் திட்டத்தை நிறைவேற்றலாம்.

முதலில் கேட்ட கேள்விகளுக்கான பதில்களோடு , இது போன்ற யோசனைகளையும் பின்னூட்டத்தில் சொல்பவருக்கு, என்னோடு சேர்த்து 'பரிசு' தருவதாக இட்லிவடை சத்தியம் செய்திருக்கிறார்.


பிகு: ஹ்ம்ம்..முதலில் இதற்கு 'மஞ்ச பெயிண்ட்' அடிக்கறாரான்னு பாக்கலாம்.


- இன்பா

என் கமெண்ட் இந்த முறை பச்சையாக -
திருவள்ளுவர், சர்வக்ஞரின் சிலைகளை வெறும் சிலைகளாக நாம் பார்க்கக்கூடாது. இரு மாநில அமைதி உறவுக்கு ஏற்பட்டுள்ள முதல் அடியாக இதை நாம் பார்க்க வேண்டும். பழைய காலத்தில் அரசர்களுக்குள் சமாதானம் ஏற்படுத்த பெண் கொடுத்து பெண் எடுப்பார்கள், அது போல தான் இதுவும்.

இது எடியூரப்பாவின் ஐடியாவா அல்லது, கலைஞரின் ஐடியாவா என்று தெரியாது ஆனால் யாருடைய ஐடியாவாக இருந்தாலும் அவர்களுக்கு ஒரு சபாஷ். நிச்சயம் இரண்டு முதல்வர்களும் பாராட்டுக்குரியவர்கள். திருவள்ளுவர் சிலை திறப்பு அன்று பெங்களூரில் ஆங்கில திருக்குறள் புத்தகம் பல வியாபாரம் ஆகியது என்று செய்தி. சர்வக்ஞர் என்றால் அனைத்தும் அறிந்தவர் என்று பொருள். அவரை பற்றி முழுவதும் தெரியாவிட்டாலும் பரவாயில்லை, கொஞ்சமாவது தமிழ் மக்கள் தெரிந்துக்கொள்ளட்டுமே!

சர்வன்ஞர் எழுதிய ஒரு திரிபதி இப்படி போகிறது...

நாம் அனைவரும் ஒரே மண்ணை மிதிக்கிறோம்
ஒரே நீரை குடிக்கிறோம், அடுப்புத்தீயும் பிரிப்பதில்லை;
எங்கிருந்து சாதி வந்தது கடவுளே.

இதை தமிழ் மக்களுக்கும், கன்னட மக்களுக்கும் புரியும் மாதிரி மொழிபெயர்க்க சிபாரிசு செய்கிறேன். இந்த சிலை திறப்பு, இரு மாநில பகைமைக்கு முற்றுப்புள்ளி வைக்க அகர முதல எழுத்தாக உதித்தாக வேண்டும்
- இட்லிவடை



படம் - உட்கார்ந்து கொண்டு இருப்பவர் - திருவள்ளுவர், நின்று கொண்டு இருப்பார் சர்வக்ஞர்