அரசியல் குரங்குகள் - இன்பா

"நீ என்ன பெரிய 'பருப்பா?' " என்று இனி நீங்கள் தைரியமாக கேட்கலாம். காரணம், பருப்பு முதலிய மளிகை பொருட்களின் விலைவாசி வடிவேலு பாணியில் சொல்வதானால் 'ஐயோ..கண்ணை கட்டுதே'. து.பருப்பு விலை கடந்தவாரம் சிறப்பாக ஏறி, சதமடித்துவிட்டது.


மளிகை பொருட்களின் விலைவாசியில் ஏற்பட்டுஇருக்கும் இந்த 'பொருளாதார வளர்ச்சிக்கு' உணவு பதுக்கலை ஒரு காரணமாக கூறுகிறார்கள்.

"சந்தையில் ஒரு பொருளின் விலை அதிகரித்தால், வணிக தந்திரம் என்ற பெயரில் அதை வணிகர்கள் பதுக்கிவிடுகிறார்கள். இது போன்ற பதுக்கலை முதலில் கண்டுபிடித்து, அழிக்கவேண்டும்" என்கிறார்கள்.

மளிகை போலவே, காய்கறிகளின் விலையும். ஒரு சிறிய பாலிதின்பையில் நான்கைந்து காய்கறிகள் வாங்கினாலே ரூ. 100 - 150 ஆகிவிடுகிறது. இதன் தொடர்ச்சியாக, ஹோட்டல்களும் விலையை கண்டபடி ஏற்றிவிட்டார்கள்(மளிகைசாமான்களை காட்டி ' சைக்கள் கேப்பில்' பூரி, சப்பாத்தியின் விலையும் உயர்த்திவிட்டார்கள்).

இப்படி பன்றிகாய்ச்சலைவிட மக்களை அதிகம் பாதித்துஇருக்கும் அத்தியாவசிய பொருட்களின் விலையுயர்வு நாட்டில் ஒரு 'சின்ன எமர்ஜென்சி' நிலையை உண்டாக்கிஇருக்கிறது.

விலைவாசியை கட்டுபடுத்துவது குறித்து அரசு தரப்பில் எந்தவொரு நடவடிக்கையும் எடுக்கப்படவில்லை. எந்த முறையான திட்டங்களும் அறிவிக்கப்படவில்லை.

எதிக்கட்சிகளை பார்த்தால், அன்றுவந்த ஜெ முதல் இன்றுவந்த விஜய்(!) வரை விலைவாசி உயர்வுக்காக யாரும் பெரியஅளவில் போராடவோ, கண்டன அறிகைவிடவோ ஏன் பேசக்கூட செய்யவில்லை??

மக்களுக்கு எதிராக எல்லா கட்சிகளும் எதாவது 'ரகசிய உடன்படிக்கை' செய்துவிட்டனவா? அல்லது 'இடைதேர்தல் திருவிழா' கொண்டாட்டங்களில் மக்களை மறந்துவிட்டார்களா?

திமுகவை பார்த்தால், இடைதேர்தல்பணிக்கு தொகுதிக்கு இரண்டு அமைச்சர்கள் போட்டு பண மற்றும் பிரியாணி பட்டுவாடாவில் 'பிஸி' ஆகிவிட்டார்கள். போதாகுறைக்கு அதிக வாக்குகளை வாங்கித்தரும் மாவட்ட செயலாளருக்கு 25 பவுன் தங்கசங்கிலி தன் சொந்தசெலவில் தருவதாக அழகிரி அறிவித்துஇருக்கிறார். (அவரது 'கட்டுப்பாட்டில்' வரும் ஸ்ரீவைகுண்டம், கம்பம் மற்றும் இளையான்குடி தொகுதிகளுக்கு மட்டும்!)

கோடநாட்டுக்கு ஓய்வு எடுக்கசென்ற ஜெ, அங்கு தன் வாழ்க்கையே 'ஓய்வு' என்று செட்டில் ஆகிவிட்டார். (ஊட்டியில் காய்கறி எல்லாம் 'பிரெஷ்' ஆக கிடைக்கும்போல).

தேமுதிக, தாங்கள்தான் இரண்டாவது பெரிய கட்சி என நிருபிக்கும் முயற்சியில் இருக்கிறார்கள்.( அண்ணன் எப்போ போவான், திண்ணை எப்போ காலியாகும் பாணியில்).

பாமகவினர், தங்களது பாராளுமன்ற தோல்விக்கு காரணம் மின்னணு இயந்திரங்களே என்பதான மிகப்பெரிய 'அறிவியல் ஆராய்ச்சியில்' முழ்கிவிட்டார்கள்.

காங்கிரசை பற்றி சொல்வதற்கு இல்லை. அவர்களுக்கு ராகுலின் பிறந்தநாள், அன்னை சோனியா நடத்தும்(?) இளைஞர் காங்கிரஸ் தேர்தல் போன்ற 'தேசிய' பிரச்சினைகளே அவர்களுக்கு முக்கியம்.

எந்த கூட்டணியில் இருக்கிறோம் என்று தெரியாத கம்யூனிஸ்ட் தோழர்கள், இடைதேர்தலில் தங்களுக்கு 'டெபாசிட்' தேறுமா என்று குழம்பிபோய்உள்ளார்கள்.

மதிமுக மற்றும் தமிழர் அமைப்புகள் பிரபாகரன் உயிருடன் இருக்கிறார், மீண்டும் வாருவார், தனி தமிழ்ஈழம் அமையும் என திரும்ப, திரும்ப கூறிவருகிறார்கள் (நக்கிரன் காட்டிய வழி??).

விலைவாசி உயர்வு போன்ற சாதாரண(!) மேட்டர்களுக்கு போராட யாருக்கும் இங்கே நேரம் இல்லை.

மக்கள் பிரச்சினைகளை கேட்காத,பார்க்காத,பேசாத இந்த அரசியல் குரங்குகளை எப்படி பிடித்து, எந்த zooவில் அடைக்கலாம்??

வழக்கம் போல் 'பாடி கார்டு முனியிடம்' முறையிட்டதற்கு... "இதற்குத்தான் எங்கள் தலைவர் முத்தமிழ் அறிஞர் 'தொலைநோக்கு' பார்வையோடு திட்டங்கள் தந்து இருக்காரு. அவற்றை முறையாக கடைபிடித்தாலே போதும் " என்றார்

"என்ன அவை? " என்றேன்.


"டாஸ்மாக் போய் மலிவா ஒரு சரக்கு அடிச்சிட்டு, ஒரு ரூவா அரிசியில் கஞ்சிபோட்டு குடிச்சிட்டு, இலவச டிவியில் சன் மியூசிக் கேட்டுகிட்டே சுகமா தூங்கறதுதான்"


இது எப்படி இருக்கு?


- இன்பா