மைடியர் பாடிகாட் முனீஸ்வரனே! - 11-8-2009

இட்லிவடை முனிக்கு எழுதும் கடிதம்...

ஹலோ முனி,

தமிழ் நாட்டில் மட்டும் தான் ஆடித் தள்ளுபடி என்று நினைத்திருந்தேன், ஆனால் பிரான்ஸ் நாட்டிலும் உண்டு போல. பிரான்ஸ் நாட்டைச் சேர்ந்த ஒரு இதழுக்கு டாப்லெஸ்ஸாக போஸ் கொடுத்து கலக்கியுள்ளார் ஷரோன் ஸ்டோன்!. ஆக அங்குதான் 80% வரை தள்ளுபடி. அந்தப் புத்தகத்தின் பேட்டியில் "I'm 50 years old, so what!" என்கிறார். அந்த அட்டைப் படத்தை இங்கே போட ஆசைதான்; என்ன செய்ய, இட்லிவடையை சில ஆண்களும் படிக்கிறார்களே. சில சமயம் இட்லிவடையால் கிழிச்ச கோட்டை தாண்ட முடியாமல் போய்விடுகிறது.


"The Other End of the Line" என்ற படத்தில் கடைசி காட்சியில் ஸ்ரேயா அதில் வரும் சாதாரண ஹீரோவுக்கு ஃபிரன்ச் கிஸ் தருகிறார். ஏன் சிவாஜியில் ரஜினிக்கு அது போலத் தரவில்லை என்று யாராவது கேட்பார்களா? இத்தனைக்கும் இந்த ஹீரோவை போல ரஜினியும் வெளிநாட்டிலிருந்து தான் வருவார். வெளிநாட்டு ஹீரோவுக்குத் தான் அந்தச் சலுகை எல்லாம் போல. நேற்று ரஜினி சொன்ன மெசேஜ் - மாடு மாதிரி உழைப்பதை விட அறிவைப் பயன்படுத்தி புத்திசாலித்தனமாக உழைத்தால் வெற்றிபெறலாம். அவர் சொல்லுவது எவ்வளவு நிஜம்!. நம்ம ஹீரோயின்களும் சும்மா இல்லை, படம் முடிந்தவுடன் ராக்கி கட்டி 'அண்ணா' என்று சொல்லிவிடுகிறார்களாம். அண்ணா 'நாமம்' வாழ்க!.

ரஜினி பற்றிய குறும்படத்தின் பெயர் 'தலைவர்'. இதை இயக்கியுள்ளவர் கவின் கார்த்திக். நம் ரஜினி ராம்கி மாதிரி ஒரு தீவிர ரஜினி ரசிகராம். தலைவர் டைட்டிலுக்குக் கீழே 'தலைமைப் பதவி வகிப்பவர்கள் எல்லாம் தலைவர்கள் அல்ல. தலைமைப் பண்புகள் கொண்டவர்களே தலைவர்கள்' என்று பஞ்ச் வைத்துள்ளார். பிழைக்கத் தெரிந்தவர்.

ரஜினியைச் சொல்லிவிட்டு கமலைச் சொல்லாவிட்டால் கமல் ரசிகர்கள் ரசிகைகள் கோபிப்பார்கள். கமல் களத்தூர் கண்ணம்மா படத்தில் நடிக்க ஆரம்பித்ததிலிருந்து(1959) ஐம்பதாவது ஆண்டையொட்டிய அவரது திரை வாழ்வைக் கொண்டாட விஜய் டிவி முடிவு செய்திருந்தது. பிரபலங்களின் பேட்டி, ஸ்பான்ஸர் எல்லாம் ரெடி. ஆனால் தீடீர் என்று இப்போது கலைஞர் டிவி அந்தப் பெருமையைச் செய்யப் போகிறதாம். இதைப் படித்துக்கொண்டிருக்கும்போதே சாட்டில் வந்த நண்பர் வீ.சேகரின் இயக்கத்தில் வந்த "பொண்டாட்டி சொன்னா கேட்டுக்கணும்" படத்தின் ஒரு ஜோக்கை சொன்னார்.



"முனியம்மாவுக்கு சம்பளத்தை ஏத்திட்டயா, ஏன்?"

"என் கணவரோட கையில ஒரு ராக்கி கட்டினாளே, அதுக்குத்தான்."

இந்த ராக்கி ஜோக்கைவிட 'ராக்கி கா சுயம்வர்' என்று என்.டி.டி.வி. இமேஜின் சேனலில் ஒளிபரப்பான நிகழ்ச்சி பெரிய ஜோக். ரொம்ப காலத்துக்கு பிறகு டி.ஆர்.பி-யில் செம ஹிட்டாம்.. 'ரியாலிட்டி ஷோ மொத்தமும் போங்கு என்றும் சொல்லுகிறார்கள், அதில் தோற்றவர்கள். மக்களும் டிவியின் ரிமோட்டை வைத்துக்கொண்டு சேனல் மாற்றாமல் பார்த்துவிட்டு, 'என்ன எழவு கலாசாரம்' என்று பொங்கி எழுகிறார்கள். எவ்வளவு சம்பாதித்த பிறகும் ஸ்டார் ஓட்டலுக்குப் போனாலும் தயிர்சாதம் சாப்பிடுகிற நம்ப மக்கள் வேறு என்னதான் செய்வார்கள்.

ஆனால் தயிர் சாதம் சாப்பிடும் ஒரு சாமியார் செய்த கூத்தைக் கேளு. சஹி கோபால் ஆலயத்துக்கு ஷில்பா சாமி கும்பிட சென்றார். சிறப்பு பூஜைகள் செய்து பயபக்தியோடு கடவுளை வழிபட்டுக் கொண்டு நின்றார். அப்போதுதான் இந்தச் சம்பவம் நடந்தது. கோவிலில் பூஜைகள் செய்து வரும் சாமியார் அங்கு வந்த ஷில்பா ஷெட்டியின் முகத்தைப் பிடித்து இழுத்தார். நெற்றியில் விபூதி குங்குமம் பிரசாதம் வைத்திருப்பர் என்றுதானே நினனக்கிறாய், அதுதான் இல்லை. யாரும் எதிர்பார்க்காத வகையில் திடீரென்று அவர் கன்னத்தில் முத்தமிட்டார். கோவிலுக்குள் நடந்த இந்த முத்தக்காட்சி பக்தர்களைப் பரவசப்படுத்தியது. பரவசத்துடன் பார்த்துவிட்டு சாமிக்கு நன்றியும், சாமியாரை திட்டிவிட்டும் சென்றார்கள். பொறாமை தான் வேறு என்ன? நம்மூரில் சாமியார்களுக்கு எல்லா நாளும் ஆகஸ்டு பதினைந்துதான்; சுதந்திர தினம்தான்.

இங்கே இப்படி என்றால் ஆனந்த விகடனில் பத்திரிக்கைச் சுதந்திரம் என்ற பெயரில் "பிகினி போட்டு நடிக்க முடியுமா?' என்ற தலைப்பில் சினேகாவின் படத்தை கிராஃபிக்ஸ் மூலம் மாற்றி சும்மா உல்லுல்லாயி என்று அசிங்கப்படுத்தியிருக்கார்கள். ரீசண்ட்டா குமுதத்திலிருந்து யாரோ விகடனுக்கு புதிதாகச் சேர்ந்திருக்கிறார்கள். யார் அந்தப் புண்ணியவான் என்றுதான் தெரியவில்லை.

கும்பகோணம் குழந்தைகள் தீ விபத்தில் 94 குடும்பங்களுக்கும் நிதி அளிப்பதாக தமிழ்த் திரையுலகம் விளம்பரம் செய்துகொண்டதைத் தவிர வேறு என்ன செய்தார்கள் ? யாரும் இதுவரை ஒருபைசா தரவில்லை. நடிகர் சங்க முன்னாள் செயலாளர் சரத்குமார் மொத்தமாக 86 லட்ச ரூபாய் வசூலாகி இருப்பதாகவும், ஒரு கோடி வசூலானதும் சம்பந்தப்பட்ட குடும்பங்களுக்கு ஓரொரு லட்சம் தருவோம் என்றும் சொன்னார். அதற்குப் பிறகு இன்றுவரை ஒன்றும் நடக்கவில்லை. சென்னைக்குச் சென்றாலும் அவரைப் பார்க்கவும் முடியவில்லை என்று சொல்லியுள்ளார்கள். சரத்குமாரிடமிருந்து பணமோ, மறுப்போ இன்னும் வரவில்லை. பி.ஜே.பியுடன் அவர் ரொம்ப பிஸி. ஆனால் நம்ப கேப்டன் மட்டுமே ஒவ்வொரு குடும்பத்துக்கும் 9 ஆயிரத்து சொச்சம் தந்திருக்கிறார்.

1960களில் ஒரு குடும்பத்தின் பருப்பு நுகர்வு ஓராண்டில் சராசரியாக 27 கிலோவாக இருந்தது. 2009 ஜனவரி முதல் ஜூன் வரையிலான காலத்தில் ஆய்வு செய்தபோது இதே அளவு 11 கிலோவுக்கும் கீழே போய்விட்டது. இது கேப்டனின் பட வசனமில்லை. நிஜம். பருப்பு விலை தான் அதற்குக் காரணம் என்கிறார்கள்.

புள்ளிவிபரத்தோடு புள்ளி(ராஜா) விவகாரம் பற்றியும் கொஞ்சம் தெரிந்துகொள். எய்ட்ஸ் கட்டுப்பாடு பிரசார பேனர்களில் எனது படத்தையும், எனது மகள் படத்தையும் வெளியிட்டுள்ளதற்கு என்னிடம் எந்த அனுமதியும் பெறவில்லை என்று ரூ.1 கோடி நஷ்டஈடு கேட்டு ஒரு பெண் கோர்ட்டுக்குப் போய் உள்ளார். அரசு வக்கீல், "இணையதளத்தில் புகைப்படம் வெளியிடப்பட்டால் அதை யார் வேண்டுமானாலும் `டவுன்லோடு' செய்யலாம். அப்படி செய்து நாங்கள் உபயோகித்தோம் என்று வாதிட்டுள்ளார்கள். என்ன அறிவு!. இவர் குடும்பப் பெண்களின் அல்லது மந்திரிவீட்டு படங்களும் தான் இணையத்தில் இருக்கிறது. அதைப் போட்டால் சும்மா இருப்பார்களா ? அதற்கும் இதே போல் வாதம் செய்வார்களா?

இந்தியாவில் விரைவில் 33 சதவிகிதம் பேர் பன்றிக் காய்ச்சலால் பாதிப்படைவார்கள் என்று உலக சுகாதார நிறுவனம் எச்சரித்துள்ளது. 33% பெண்கள் மசோதா கிடைக்கிறதோ இல்லையோ இது நிச்சயம் போல. பன்றிக் காய்ச்சலுக்கும் பன்றிக்கும் உள்ள சம்பந்தம் பசுக்களுக்கும் இணையப் புனிதப்பசுக்களுக்கும் உள்ள சம்பந்தம் போன்றதுதான் என்று இங்கே எத்தனை பேருக்குத் தெரியும்?

பசுவின் கழிவிலிருந்து உரம், கொசுவத்தி போன்றவை தயாரிக்கிறார்கள் என்று தெரியும், ஆனால் தற்போது 'aftershave lotion, முக கிரீம், பினாயில் என்று பலவற்றைத் தயாரித்துள்ளார்கள். கடைசி தயாரிப்பு கோலா பானம். ஒரு பாட்டிலில் 5% மேல் இருக்காது! கவலைப்படாதீர்கள். Coca Cola கேள்விப்பட்டிருக்கிறோம், இது Cow Cola!. ஆரஞ்சு, லெமன் சுவைகளில் கிடைக்கிறதாம். எப்படி இருக்கிறது என்று சாப்பிட்டுப் பார்த்துவிட்டு சொல்லு. அடுத்த தயாரிப்பு சாணத்தில் பிஸ்கெட் செய்வார்கள் போல. அதற்கு யாராவது சமையல் குறிப்பு போடுவார்கள். எல்லாம் அந்தக் கடவுளுக்கே வெளிச்சம்.

தினமலரில் உள்ள செய்தியை படித்தால் யார் முட்டாள், யார் புத்திசாலி என்று ஒரு பட்டிமன்றமே வைக்கலாம். கூட்டுறவு வங்கியை நம்பி முதலீடு செய்தவர்களின் நிலைமையைப் பாருங்கள். கோர்ட்டுதான் ஜப்தி செய்ய அனுமதி அளிக்கிறது. அதே கோர்ட் ஜப்தி செய்யச் சென்ற நான்கு மணி நேரத்தில் ஜப்திக்கு தடையும் விதிக்கிறது. அரசியல் செல்வாக்கு இருந்தால் எதையும் சாதிக்கலாம் என்பது தெளிவாக தெரிகிறது. இதிலிருந்து பார்த்தால் கூட்டுறவு வங்கியில் முதலீடு செய்தவர்களும் முட்டாள்கள். கோர்ட் ஆணையை ஏற்று ஜப்தி செய்யச் சென்றவர்களும் முட்டாள்கள். ஏமாற்றியவன் புத்திசாலி. இனிமேல் ஓட்டுப் போட்டதும் கையில் மை வைப்பதற்கு பதில் காதில் பூ சுற்றி அனுப்பலாம்.

தற்போது மல்லிகை பூவின் வியாபாரம் சென்னையில் சரிந்துவிட்டதாம். . எல்லா பெண்களும் தங்கள் நீள முடியை 'பாய் கட்' செய்துவிடுவடுவதால் மல்லிகை பூ வியாபாரம் சரிந்துவிட்டது என்று செய்தி. இந்த மல்லிகைப் பூவும் பங்கு சந்தை மாதிரி விடியற்காலை மொட்டாக இருக்கும் போது 50ரூபாய், பிறகு ஒன்பது மணிக்கு பூத்தவுடன் 40 ரூபாய், மத்தியானம் கொஞ்சம் வாடியவுடன் 30 ரூபாய் சாயந்திரம் 10 ரூபாயாம். அதனால் ஆண்கள் எல்லோரும் தங்கள் மனைவிக்கு காலையிலேயே பூ வாங்கி கொடுத்தால் (வியாபாரிகளுக்கு) நல்லது.

நம்ம நாட்டில்தான் மல்லிகைப் பூவை சாமி படம், லாரி, பைக், மனைவி என்று எல்லாவற்றிருக்கும் மாட்டுவார்கள். நான் போன முறை ஓட்டு போட சென்ற போது மின்னணு வாக்குப் பதிவு இயந்திரத்தின் மீதும் வைத்திருந்தார்கள். ஆக மின்னணு வாக்கு பதிவு இயந்திரம் கூட பெண் போல.

ராமதாஸும், அம்மாவும் வாக்கு பதிவு இயந்திரம் பற்றி அறிக்கைவிடும் இந்தக் காலத்தில் தமிழ்நாட்டை சேர்ந்த ஒருவர் தனக்கு ஐஸ்வரியா ராய் சின்னம் வேண்டும் என்று மனு கொடுத்துள்ளார். ஜெயித்தால் ஐஸ்வர்யா ராயையே ஜெயித்துவிட்டதாக நம்பிக்கையா?

நான் கடவுள் நம்பிக்கை கொண்டவன். ஜோதிடம், ஆன்மிகத்தை நம்புகிறவன். எனது ஜாதகத்தை ஆராய்ந்த ஜோதிடர்கள், இந்த வாரம் முதல், நல்ல காலக்கட்டம் தொடங்குகிறது என்று தெரிவித்து உள்ளனர். அந்த வார்த்தைகள் பலித்துவிட்டன-- எஸ்.வி.சேகர் அதிமுகவிலிருந்து வெளியே வந்தவுடன் சொன்னது. இவர் வெளியே வந்த அதே நேரத்தில் அனிதா ராதாகிருஷ்ணனும் வந்துள்ளார். ஆடித் தள்ளுபடியில் ஒன்று எடுத்தால் ஒன்று இலவசம்.

குருபெயர்ச்சி, சனிபெயர்ச்சிக்கு கோயிலுக்கு போவார்கள். லேடஸ்ட் நியூஸ் மு.க.ஸ்டாலின் மகள் செந்தாமரை மற்றும் குடும்பத்தினருடன் நேற்று காலை திருவண்ணாமலை கோயிலுக்கு வந்தார். அங்கு பகல் 12 மணியளவில் நடைபெற்ற விசேஷ நண்பகல் பூஜையில் அவரும், குடும்பத்தினரும் கலந்து கொண்டனர். அதன் பின்னர் ஆலயத்தின் மற்ற சன்னதிகளுக்கும் சென்று அவர்கள் பயபக்தியுடன் சாமி கும்பிட்டனர். திருவள்ளுவர் சிலை பெங்களூரில் திறந்ததற்கு நேர்த்தி கடனாக இருக்குமோ?

கனிமொழி ரீசண்டா 'பகுத்தறிவாக இருப்பதற்கு நிறைய மன உறுதி வேண்டும்' என்று சொல்லியுள்ளார். இலக்கியவாதிகள் அரசியல்வாதி ஆன இப்படி தான் ஏதாவது சொல்லுவார்கள்.

சொல்வனத்தில் இலக்கிய அரசியல் கட்டுரை ஒன்று வந்திருக்கிறது. டைம் கிடைத்தால் படித்து பாரு மன்னவன் கோல்நோக்கி வாழும் குடி

சனிபெயர்ச்சி, குருபெயர்ச்சி என்ன வித்தியாசம் ?


மனைவி அம்மா வீட்டுக்குப் போனால் - சனிபெயர்ச்சி.
தன் தங்கையுடன் திரும்பி வந்தால் - குருபெயர்ச்சி!


இப்படிக்கு,
இவ