திருவிதாங்கூர் ராஜ வைத்தியர் கைது

ராஜ வைத்திய சாலை ஆயுர்வேத டாக்டர் விஜயகுமார் கைது செய்யப்பட்டார்.

சன் டிவியில் மிட் நைட் மசாலா வரும் போது, ஜெயா டிவியில் ராஜ வைத்தியர் விளம்பரம் வருவதை பலர் பார்த்திருக்கலாம். இன்று வந்த செய்தியில் இவர் மான்கறி, புலிக்கறி வைத்தியம் என்று இவர் பலரை ஏமாற்றியதாக கைது செய்யப்பட்டுள்ளார்.

சென்னை மைலாப்பூர் கற்பகாம்பாள் நகரில் திருவிதாங்கூர் ராஜ வைத்திய சாலை என்ற பிரபல ஆயுர்வேத வைத்திய சாலை உள்ளது. இந்த ஆஸ்பத்திரியை டாக்டர் விஜயகுமார் (வயது 60) என்பவர் நடத்தி வருகிறார். கேரளாவைச் சேர்ந்த இவர், 1400 வருடம் பாரம்பரியமாக வைத்தியம் பார்த்து வருவதாக விளம்பரம் செய்துள்ளார்.

ரத்த வாதம், வாதகாய்ச்சல், எலும்பு தேய்மானம், முதுகுத்தண்டு பிரச்சினை, கழுத்துவலி, ரத்த அழுத்தம், தூக்கமின்மை, சிறுநீரக கல் அடைப்பு, குடல்புண் போன்ற வியாதிகளுக்கு பரம்பரை வைத்தியம் மூலம் சிகிச்சை அளித்து குணமாக்கப்படும் என்றும் அறிவித்திருந்தார்.

இவருக்கு மதுரையிலும் கிளினிக் உள்ளது. இவரது மகனும் இதே ஆஸ்பத்திரியில் டாக்டராக உள்ளார். டாக்டர் விஜயகுமார் மதுரைக்கும், சென்னைக்கும் விமானத்தில் பறந்து சென்று நோயாளிகளுக்கு வைத்தியம் பார்த்து வந்தார். எம்.பி., பி.எச்டி., எல்.எல்.டி. மற்றும் ஆயுர்வேத படிப்பு படித்துள்ளதாகவும் இவர் தெரிவித்துள்ளார்.

தங்கபஸ்பம், வெள்ளிபஸ்பம், மான்கறி, புலிக்கறி சிகிச்சை இவரது வைத்தியத்தில் சிறப்பு அம்சம் பெற்றது. வைத்தியரத்னா, ரசசாஸ்திர ஆசான் என்பன போன்ற பட்டப்பெயர்களும் இவருக்கு உண்டு. மர்மக் கலை நிபுணர் என்றும் இவர் தன்னை விளம்பரப்படுத்திக் கொண்டார்.

இவர் மீது சமீபகாலமாக ஏராளமான நோயாளிகள் குற்றச்சாட்டுகள் கூற ஆரம்பித்தனர். லட்சக்கணக்கில் பணம் பறித்து, நோயை குணமாக்காமல் ஏமாற்றுவதாக புகார்கள் வந்தன.

கடந்த வாரம் ஈரோட்டைச் சேர்ந்த ராஜம்மாள் என்பவர் முதல்முறையாக போலீஸ் கமிஷனர் ராஜேந்திரனை சந்தித்து, விபத்தில் சிக்கி நடக்க முடியாமல் இருந்த தனது மகனை நடக்க வைப்பதாகக் கூறி ரூ.4 லட்சம் மோசடி செய்துவிட்டார் என்று புகார் கொடுத்தார். அடுத்தகட்டமாக பெங்களூரைச் சேர்ந்த பாபு என்பவரும் தனக்குள்ள தோல் வியாதியைக் குணப்படுத்துவதாக சொல்லி ரூ.6 லட்சம் வாங்கி ஏமாற்றிவிட்டதாகவும் புகார் மனு ஒன்றை தபால் மூலம் போலீஸ் கமிஷனருக்கு அனுப்பினார்.

ரமேஷ் என்பவர் இ-மெயில் மூலம் அனுப்பிய புகாரில், தனது மனைவிக்கு ஏற்பட்ட நோயைக் குணப்படுத்துவதாக சொல்லி ரூ.22 லட்சம் பிடுங்கிவிட்டதாகவும் குறிப்பிட்டிருந்தார். நேற்று காலையில் கோவையைச் சேர்ந்த காந்திமதி என்ற பெண் கண்ணீர்மல்க புகார் மனு ஒன்றை போலீஸ் கமிஷனருக்கு அனுப்பியிருந்தார்.

தனது மகன் மணிகண்டன் விபத்தில் சிக்கியதில் முதுகுத்தண்டில் காயம் ஏற்பட்டதாகவும், அதைக் குணப்படுத்த ரூ.3 லட்சம் வாங்கிக் கொண்டு டாக்டர் விஜயகுமார், நோயை குணப்படுத்தாமல் மோசடி செய்துவிட்டதாகவும் புகார் மனுவில் கூறியிருந்தார். மொத்தம் ரூ.35 லட்சம் மோசடி செய்ததாக டாக்டர் விஜயகுமார் மீது புகார்கள் வந்துள்ளன என்று போலீசார் கூறினார்கள்.


புகார்கள் அடுக்கடுக்காக குவிய ஆரம்பித்ததால் டாக்டர் விஜயகுமாரை கைது செய்யும்படி நேற்று மாலை போலீஸ் கமிஷனர் ராஜேந்திரன் உத்தரவிட்டார். அதையடுத்து நேற்றிரவு டாக்டர் விஜயகுமார் புழல் மத்திய சிறையில் அடைக்கப்பட்டார்.

போலீஸ் விசாரணையில், டாக்டர் விஜயகுமார்

"எங்கள் குடும்பம் தலைமுறை தலைமுறையாக ராஜ வைத்தியம் செய்து வருகிறது. பாரம்பரியமாக நாங்கள் இந்த தொழிலை செய்கிறோம். டாக்டர் படிப்பைவிட பரம்பரை தொழிலாக மக்கள் மத்தியில் அமோக வரவேற்போடு நாங்கள் இந்த தொழில் செய்கிறோம். நம்பிக்கைதான் நோய் தீர்க்கும் அரியமருந்து. அதன் அடிப்படையில்தான் எங்கள் சிகிச்சை உள்ளது. என்மீது நம்பிக்கை வைத்து தான் என்னிடம் வைத்தியம் பார்த்தார்கள். நான் யாரையும் ஏமாற்றவில்லை. இப்போது வேண்டுமென்றே என்னை இந்த பிரச்சினையில் மாட்டிவிட்டுள்ளனர்"

ராஜ வைத்தியர் படம் கிடைக்கவில்லை, அதனால் வசூல் ராஜா படம் கொஞ்சம் அட்ஜஸ்ட் பண்ணிக்கிடுங்க ப்ளீஸ் :-)