தமிழுக்குக் கோயில்!

செய்தி இது தான்: திண்டுக்கல் அருகேயுள்ள சின்னாளபட்டியில் தமிழுக்கு ஒரு கோடி ரூபாய் செலவில் கோவில் கட்டப்படுகிறது. ( தினமலர், டைம்ஸ் பத்திரிகையில் வந்திருக்கிறது )

தமிழன்னைக்கு தினமும் தமிழின் உயிரெழுத்துக்களால் அர்ச்சனையும், பிரசாதமாக தேன், தினைமாவு, கனிகள் வழங்கப்படும் என்றும் விடுமுறை நாட்களில் பள்ளி மாணவர்களுக்கு தமிழ் இசை, பா- புனைதல், இலக்கண வகுப்பு, தமிழ் வழிக்கலைகள் கற்றுத்தரப்படும். ஆண்டுக்கு ஒருமுறை தமிழ்திருவிழாவும், இரண்டு ஆண்டுக்கு ஒருமுறை உலகளாவிய தமிழ் பெருவிழாவும் என்று அதிரடியாக அறிவித்துள்ளார்கள்.

காலையில் இதை படித்துவிட்டு பா.ராகவன் கொஞ்சம் உணர்ச்சி வசப்பட்டு ( அவரும் தமிழர் தானே ) எழுதிய பதிவு இது

தமிழன்னைக்கு தினமும் தமிழின் உயிரெழுத்துக்களால் அர்ச்சனை என்ற வரி என்னை யோசிக்க வைத்தது.

அ, ஆ, இ, ஈ, உ, ஊ, எ, ஏ, ஐ, ஒ,ஓ, ஔ, ஃ என்ற எழுத்துக்களை ராகமாக பாட போகிறார்களாம். இதைவிட

அகர முதல எழுத்தெல்லாம் அறிய வைத்தாய் தேவி
ஆதிபகவன் முதலென்றே உணரவைத்தாய் தேவி
இயல் இசை நாடக தீபம் ஏற்றி வைத்தாய்
ஈன்றவர் நெஞ்சை இன்று குளிர வைத்தாய்
உயிர் மெய் எழுத்தெல்லாம் தெரியவைத்தாய்
ஊமையின் வாய் திறந்து பேச வைத்தாயம்மா பேச வைத்தாய்
எண்ணும் எழுத்தெங்கும் கண் திறந்தாய்
ஏற்றம் தரும் புலமை ஆற்றல் தந்தாய்
ஐயம் தெளியவைத்து அறிவு தந்தாய்
ஒலி தந்து மொழி தந்து குரல் தந்தாய்
ஓங்கார இசை தந்து உயர வைத்தாய் தேவி

என்ற சரஸ்வதி சபதம் படத்தில் வரும் பாடலை பாடலாம். அட்லீஸ்ட் மக்கள் ரசிப்பார்கள்.


கடைசியாக ஒரு சந்தேகம்:

ஏன் தமிழை தமிழன்னை என்று சொல்லுகிறோம் ? ஏன் தமிழ்தந்தை என்று சொல்லுவதில்லை ?