இட்லிவடை ஒரு வரலாறு ஆனால் ஆபத்தான வரலாறு - குழலி

அடிக்கிற கை தான் அணைக்கும் - அரசியலில் ராமதாஸ், வலைப்பதிவில் குழலி :-) அவர் இவ பற்றி சொல்லியது..

இட்லிவடை தமிழ் பதிவுலகின் முக்கியமான ஒரு பதிவு, செய்திகளை பிற தளங்களிலிருந்து காப்பி பேஸ்ட் செய்யப்பட்ட பதிவுகள் தான் இவைகள் என்று அலட்சியம் செய்ய முடியாத அளவிற்கு முக்கியமானதும் ஆபத்தானதும் ஆகும். இன்றைய செய்திகளே நாளைய வரலாறு. அந்த நாளைய வரலாறு எப்படி நாளைய சந்ததிகளுக்கு காண்பிக்கப்படுகிறது என்று பார்த்தோமானால் இட்லிவடைய ஏன் நான் வரலாறு என்று கூறுகிறேன் என்பது புரியும்.

வரலாறு என்பதே நமக்கு இதுவரை கிடைத்திருக்கும் தகவல்களை வைத்தே எழுதப்படுவது, நாம் வரலாறு என நினைப்பது வரலாறே இல்லாமல் இருக்கலாம்... ஏதோ ஒரு கட்டுரையில் படித்தேன், முனியாண்டி விலாஸ் கடையின் டம்ளர்களில் "இது முனியாண்டி விலாசில் இருந்து திருடப்பட்டது" என எழுதியிருக்கு என்று வையுங்கள், அகழ்வாராய்ச்சியில் பல ஆயிரம் ஆண்டுகளுக்கு பின் இது கிடைக்கிறதென்றால் அந்த ஆராய்ச்சியாளன் இப்படி எழுதினான் என்றால் இப்படியிருக்கும், "அந்த கால மக்கள் திருடினாலும் நேர்மையாக திருடிய பொருள் எங்கிருந்து திருடப்பட்டது என்பதை அந்த பொருளின் மேல் எழுதிவைப்பார்கள்". கிடைத்த அரைகுறை தகவல்கள் எழுதியவர்களின் சார்பு அதைத்தாண்டி அதை வரலாறாக்கும் ஆராய்ச்சியாளனின் சார்பு அதாவது உதாரணமாக "சாலை" என்றால் துறைமுகத்தைக் குறிக்கும். பல துறை முகத்தைக் கொண்ட பாண்டியன் என்பதற்காகப் "பல்சாலை முதுகுடுமிப் பெருவழுதி" என்று புலவர்கள் குறிப்பிட்டனர். ஆனால் "பல்யாக சாலை முதுகுடுமிப் பெருவழுதி" என்று "யாக" என்ற இரண்டெழுத்தை உட்செருகி பல யாகசாலைகள் வைத்திருந்தவன் என்று வரலாறாக எழுதப்பட்டது,
பரிமேலழகர் எழுதிய உரையில் ஆரம்பித்து பலவற்றை இன்று மீள் ஆய்வு செய்யும் நிலை.

என்னடா இவன் இட்லிவடையின் 5ம் ஆண்டு பதிவில் தொடர்பில்லாமல் எழுதுகிறேன் என்கிறீர்களா?

இட்லிவடை தொகுத்துக்கொண்டிருப்பது நிகழ்கால சமூகத்தை பற்றி வரும் செய்திகளை, ஆனால் கவனமாக இட்லிவடை தொகுக்காமல் விடுவதும்(சமீபத்திய உதாரணம் மாலேகோன் குண்டுவெடிப்பு தொடர்பான இந்து தீவிரவாத சாமியிரினி கைது), தொகுக்கும் விசயத்தில் செய்யும் திரிபுகள்(இடஒதுக்கீடு தொடர்பாக கனிமொழி பேசியதில் ஒரு பகுதியை மட்டும் வெட்டி போட்டு திரிபு செய்தது) போன்றவை
எதிர்கால தலைமுறைக்கு தவறான வரலாற்றை தொகுத்து தந்துவிடும் என்பதாலேயே இட்லிவடையை
ஆபத்தான வரலாறு என்கிறேன்.

பொதுவாக இட்லிவடையின் சாதனை பற்றி பலரும் சொல்வது

முகம் காட்டாமல் இத்தனை ஆண்டுகள் தள்ளுவது,
நானும் இதை இட்லிவடை தொடர்ந்து செய்ய வேண்டும் என்றே விரும்புகிறேன், காப்பிரைட் பிரச்சினைகளுக்காகவோ, திரில்லுக்காகவோ இல்லை, சட்டக்கல்லூரி பிரச்சினையில் கோட்டாவை இணைத்து எழுதுவது போல செய்யப்படும் பல கிறுத்தரங்களுக்கு யார் கையிலாவது கிடைத்து நாலு அப்பு அப்பாமல்"
, அம்மாதிரியெல்லாம் உணர்ச்சி வசப்பட்டு ரசாபாசமாகமல் இருக்கவாவது முகத்தை மூடிக்கொண்டே இருக்கவும்.

செய்திகளின் வேகம்,
மிக நிச்சயமாக தொய்வில்லாமல் தொகுக்க முடிவது ஒரு மகத்தான சாதனை, தனியாகவோ குழுவாகவோ எப்படியோ இந்த ஆவணப்படுத்துதல் முடிகின்றது என்பது நிச்சயம் சாதனை, இந்த ஆவணப்படுத்துதலே இட்லிவடையின் சாதனை.
நான் இட்லிவடையை தேர்தல் முடிவுகள் சமயத்தில் சிலருக்கு அறிமுகப்படுத்தியிருக்கிறேன், தினமலர், தட்ஸ்டமில் போன்றவைகள் அதிகமான பார்வையாளர்களினால் தொங்கியபோது இட்லிவடை தேர்தல் முடிவுகளை தெரிந்து கொள்ள உதவியது. (தேர்தல் சமயத்தில் ஏன் இட்லிவடையை அறிமுகப்படுத்தவில்லை என்பது என் அரசியலுக்குட்பட்டது :-) )

இழையோடும் நகைச்சுவை:
இட்லிவடை பதிவுகளில் நகைச்சுவை இழையோடும் என்று சொல்வார்கள், அது நகைச்சுவை என்று சிரிப்பவர்களுக்கும் அது எரிச்சல் ஏற்படுத்தி கோபப்படுபவர்களு அரசியல் கண்டிப்பாக ஒன்றாக இருக்க முடியாது, நகைச்சுவை என்பவர்களின் அரசியல் வேறு... கோபப்படுபவர்களின் அரசியல் வேறு...

இட்லிவடையின் முனிக்கடிதம்:
இட்லிவடை ஸ்ரீமான் ராமச்சந்திர மூர்த்திக்கு எழுதாமல் முனிக்கு கடிதம்
எழுதுவதும் முனி எங்களுக்கெல்லாம்
கடிதம் எழுதாமல் இட்லிவடைக்கு எழுதுவதும் நிச்சயம்
ஆச்சரியப்படுவதற்கில்லை, முருகன், சிவன், ஐயப்பன், பலராமன், காமாட்சி, மீனாட்சி போன்ற கடவுளர்களுக்கு ஏற்பட்ட நிலை முனிக்கு வருங்காலத்தில் ஏற்பட்டாலும் ஆச்சரியப்படுவதற்கில்லை.

இந்த குறிப்பு தற்போது படிக்கும் வாசகர்களுக்கு அல்ல
பல ஆயிரம் ஆண்டுகளுக்கு பிறகு ஒரு வேளை இந்த இட்லிவடை தொகுப்பு மட்டுமே கிடைத்து அதை மட்டுமே கொண்டு வரலாற்றை தொகுக்கப்போகும் ஆராச்சியளருக்கு இதன் மூலம் நான் சொல்லவிரும்புவது இந்த இட்லிவடையின் தொகுப்பு சொல்வது மட்டுமே எங்கள் காலத்தில் நடந்த வரலாறு அல்ல...

இட்லிவடையின் இன்னும் 10 ஆம் ஆண்டு 15ம் ஆண்டு தொடக்க விழாக்களுக்கும் என் போன்றுபலரும் வாழ்த்து எழுத இட்லிவடையை வாழ்த்துகிறேன்.

என்றென்றும் அன்புடன்
குழலி

குழலி அவர்கள் பேசுவதை வைத்துப் பார்த்தால், என் வலைப்பதிவு பிற்காலத்தில் சோழர் காலத்து கல்வெட்டுகளுக்கு நிகரான முக்கியத்துவம் வாய்ந்த வரலாற்றுச் சான்றாக ஆகக் கூடிய சாத்தியம் அல்லது அபாயம் இருக்கிறது அதனால், இனிமேல் கட் & பேஸ்ட் பண்ணும்போது, கவனமாக முழு மேட்டரையும் எடுத்துப் போடுகிறேன், வரலாற்றில் இட்லிவடை புரட்டும் திரிபும் செய்து திரிந்த ஒருவராக பதிவு செய்யப்படுவதில் எனக்கு உடன்பாடு இல்லை, சில அரசியல்வியாதிகளைப் போல ;-)

குழலி என்னை அப்பி விடாமல் இருக்கு, சிங்கப்பூர் செல்லும்போது நிச்சயம் ராமதாஸ் மாஸ்க் போட்டுக் கொண்டு செல்லவே உத்தேசம், எதற்கு வெளியூரில் தகராறு ? :)

எனக்கும் முனிக்கும் இடையே உள்ள நெருக்கமான நட்பை புரிந்து கொண்ட குழலிக்கு என்றென்றும் அன்புடன் நன்றி.