எதற்காக நெற்றிக் குறி? நெடிய பூணூல்?

கலைஞர் கவிதை

மத மோதலில் மண்டை உடைதல்
சாதிய ரீதியாக சண்டை போடுதல்
(வேட்பாளர் தேர்வு போது இதை மறந்துவிடுவோம்)
அரசியல் அடுப்புக்கு அணையாத விறகென்று
ஆனமட்டும் பற்ற வைத்துப் பார்க்கின்றார் -
அருள் பெருஞ் சோதி தனிப் பெருங் கருணை; எனும்
வள்ளலார் வாசகம் என்ன வேண்டிக் கிடக்கிறதோ?
எம்மதமும் சம்மதமே என வாழ்ந்த திருநாட்டில்;

எதற்காக நெற்றிக் குறி? நெடிய பூணூல்?

( எதற்காக மஞ்சள் துண்டு, எதற்காக பூமி பூஜை, எதற்காக வேதம் படிக்க வேண்டும்)
இடக்காக இப்படிக் கேட்கலாமா என்று;
மிடுக்காக கோபித்துக் கொள்ளும் மேலோர் என்போர்-
வள்ளுவரின் குறள் வழியில் சொன்னால்;
வைதீகக் குரங்கினத்தின் வாலோரேயாவார்!
ஆன்மீகம் என்பது ஆண்டவனை போற்றும் ஒருமுறை எனினும்
ஆத்திக நாத்திக சொற்போருக்கு அவற்றிடையே இடமில்லை -
நாத்திகமென்பது நடமாடும் கோயில்களின் திருப்பணி எனில்
ஆத்திகம் அதற்கு மறுப்பு சொல்லத் தேவை என்ன?
``நல்லதே நினை, நல்லதே செய்'' - நாத்திகமெனில்
இல்லையே அதற்கோர் ஈடு; எனப் போற்றினால் அது ஆத்திகமாம் -
நாத்திகம் ஆத்திகம் என்பதும் நமக்குள்
அம்மதம் இம்மதம் என்று போரிட்டுப் புலம்புவதும் வீண்தானே!
எல்லோரும் ஒரே குலம்- உண்மையே கடவுள்
என்று அறியாதார் பேதமையே ஆகும் என்போம்!
மதபேதமெனும் மரக்கிளைகள் ஈன்ற விழுதுகளே
மலையாக மடுவாக இருக்கின்ற ஏற்றத் தாழ்வுச் சாதிகளாம்-
மரத்தையே வெட்டிச் சாய்த்து விட்டால்;
கிளைகள், வேர்கள், விழுதுகள் பட்டுப் போகும்!
அங்கே அழகாக ஓர் உருவம் தோன்றும்
அதன் பெயர்தான் சமத்துவம் என்போம்!