ரஜினி மன்னிப்பு - சோ கருத்து

ரஜினி மன்னிப்பு பற்றி சோ இந்த வாரம் துக்ளகில்...

இதில் "துரோகம்' எங்கே இருக்கிறது?

ஹொகேனக்கல் குடிநீர் திட்டம் தொடர்பாக திரையுலகினர் நடத்திய "உண்ணாவிரதப் போராட்டத்தில் கலந்துகொண்டு பேசுகிறபோது, கர்நாடக மக்கள் உள்ளம் புண்படுகிற மாதிரி பேசியதற்கு ரஜினிகாந்த் வருத்தம் தெரிவித்திருக்கிறார். இது "தமிழர்களுக்கு துரோகம்' என்று சிலரால் வர்ணிக்கப்பட்டிருக்கிறது.




இந்த "உண்ணாவிரதப் போராட்டம்' நடந்தபோது, 16.4.08 "துக்ளக்' இதழின்
தலையங்கத்தில் நாம் எழுதிய கருத்துக்கள் இவை :

....பொதுக்கூட்டத்தில், எலும்பை நொறுக்கினாலும், திட்டப் பணியை நிறுத்தமாட்டோம் என்று சபதமிட்ட பிறகு....

....திரையுலகினரை வீர முழக்கம் செய்ய வைத்து, அந்த முழக்கங்களை கலைஞர் டி.வி.யில் நேரடியாகக் காண்பித்த பிறகு;

அந்த முழக்கங்களுக்காக, திரையுலகினரைச் சட்டசபையில் பாராட்டிய பிறகு;

தமிழகத்தில் மக்களின் உணர்ச்சிகளை நன்றாகக் கிளறிவிட்ட பிறகு....

...புதிய ஆட்சி வருகிற வரையில் காத்திருக்கலாமே என்று எழுதியதற்காக, தினமணியை முரசொலியில் திட்டித் தீர்த்த பிறகு;

– திட்டம் நிறுத்தி வைக்கப்படுகிறது என்று அறிவித்திருக்கிறார் தமிழக முதல்வர்....

.....கலைஞர், பகுத்தறிவாளர்; பகுத்தறிந்தார். "கர்நாடகத்தில் ஏற்கெனவே, கடினமான தேர்தலைச் சந்தித்துக்கொண்டிருக்கிற காங்கிரஸ் கட்சி, இந்த ஹொகேனக்கல் பிரச்சனையையும் எதிர்கொண்டால், திண்டாடிப் போய்விடும்' என்கிற காங்கிரஸின் கஷ்டத்தைப் புரிந்துகொண்டார். மத்திய அரசில் தி.மு.க. வகிக்கிற மந்திரி பதவிகளை நினைத்துப் பார்த்தார். மாநிலத்தில் காங்கிரஸ் கூட்டணி தனக்கு எவ்வளவு தேவை என்பதைச் சிந்தித்துப் பார்த்தார். மத்திய அரசில் இன்னமும் பெறக்கூடிய பதவிகளைக் கணக்கிட்டுப் பார்த்தார். பகுத்தறிவு வென்றது. பிழைக்கும் வழி தெரிந்தது. அடித்தார் பல்டி! போட்டார் குட்டிக்கரணம்!!...

23.4.08 "துக்ளக்' இதழின் கேள்வி பதில் பகுதியிலிருந்து :

கேள்வி : திரையுலகினரின் உண்ணாவிரதப் போராட்டத்தின்போது, ரஜினிகாந்தின் கர்நாடகத்திற்கு எதிரான ஆவேசப் பேச்சு, உணர்வால் வந்ததா? நிர்பந்தத்தால்
வந்ததா? அல்லது எதிர்கால அரசியல் ஆசையினால் வந்ததா?

பதில் : இதில் அரசியல் ஆசை எதுவும் தெரிவதாக நான் நினைக்கவில்லை. சாதாரணமாக ஒரு பெரிய கூட்டத்தில் பேசுகிறபோது, கூட்டத்தினரின்
உணர்ச்சிகளுக்கு ஏற்ப பேசி, அவர்களுடைய அங்கீகாரத்தைப் பெறுகிற ஆர்வம், பலருக்கு ஏற்பட்டு விடுகிறது. அன்றைய கூட்டத்தில், எல்லோரும் உணர்ச்சிகளைக் கொட்டிப் பேசிக்கொண்டிருந்தபோது, ஒருவரை ஒருவர் மிஞ்சுகிற எண்ணமும்
சேர்ந்துவிட்டது. ஆவேசப் பேச்சு என்ற வலையில் பலர் வீழ்ந்தனர். அதில் ரஜினியும் ஒருவர் என்பது என் கருத்து....

அன்று கலைஞரால், கலைஞருக்காக நடத்தப்பட்ட கலைஞரின் "போராட்டம்' அது. அதில் "அவர்களை (கர்நாடகத்தினரை) உதைக்க வேண்டாமா?' என்று பேசியது தவறு; அதை "துக்ளக்'கில் எழுதியதோடு மட்டுமல்லாமல், ரஜினியிடமும் சொல்கிற வாய்ப்பு கிட்டியது. அப்போது, அவரே, தான் அம்மாதிரி பேசியது தவறுதான் என்று உணர்ந்துவிட்டதும் புரிந்தது.

தான் உளமாற உணர்ந்து கொண்டதை, அவர் இப்போது வெளிப்படையாகச் சொல்லியிருக்கிறார். தவறாகப் பேசியதை உணர்ந்து, அதற்காக வருத்தம் தெரிவிக்க ஒரு நேர்மைத் துணிவு தேவை. அது அவரிடம் இருப்பதால், தன் வருத்தத்தைத் தெரிவித்திருக்கிறார். இதில் "தமிழ் துரோகம்' எங்கிருந்து வந்தது? ஹொகேனக்கல் குடிநீர் திட்டத்தைச் செயல்படுத்த, தமிழகத்திற்கு உரிமை கிடையாது என்றா அவர் சொல்லிவிட்டார்? உணர்ச்சிவசப்பட்டுப் பேசியதற்கு வருந்தியிருக்கிறார். அது பாராட்டத்தக்கது.

கலைஞர் அடித்த பல்டியும், திட்டத்தையே தள்ளி வைத்ததும் துரோகமாகத் தெரியாதவர்களுக்கு, ரஜினியின் நேர்மை, துரோகமாகத் தெரிவது, விந்தைதான்.

---

ஆகஸ்ட் 2 இட்லிவடை கருத்து .....
குசேலன் படத்தில் சூப்ப்ர் ஸ்டாராக நடிக்கிறார். ஆனால் அவர் பேச்சினால் நிஜ சூப்ப்ர் ஸ்டாராக ஆகிவிட்டார். சத்தியராஜ் போல் பினாத்த தைரியம் தேவையில்லை, தப்பாக பேசியதற்கு மன்னிப்பு கேட்பதற்கு நிறைய தைரியம் வேண்டும். Hats off!