கிரிக்கெட் வீரர் முகமது ஆசிப் கைது

பாகிஸ்தானை சேர்ந்த கிரிக்கெட் வீரர் முகமது ஆசிப் தடை செய்யப்பட்ட போதை பொருட்களை வைத்திருந்ததாக துபாயில் கைது செய்யப்பட்டார்.

பாகிஸ்தான் வேகப்பந்து வீச்சாளரான முகமது ஆசிப் இந்தியாவில் நடைபெற்ற ஐபிஎல் போட்டியில் டெல்லி அணி சார்பில் விளையாடினார்.

இந்நிலையில் மும்பையிலிருந்து பாகிஸ்தான் செல்லும் வழியில் அவர் துபாய் சென்றார். துபாய் விமான நிலையத்தில் தடை செய்யப்பட்ட போதை பொருட்களை வைத்திருந்ததாக அவர் கைது செய்யப்பட்டார்.

முகமது ஆசிப் ஏற்கனவே போதைப் பொருள் சர்ச்சையில் சிக்கியவர் என்பது குறிப்பிடத்தக்கது. 2006 ஆம் ஆண்டு சாம்பியன்ஸ் கோப்பையின் போது தடை செய்யப்பட்ட ஊக்க மருந்தை பயன்படுத்தியதாக அவரும், அக்தரும் பிடிபட்டனர். இருவருக்கும் இரண்டு ஆண்டு தடை விதிக்கப்பட்டு பின்னர் அது ரத்து செய்யப்பட்டது.

தற்போது முகமது ஆசிப் மீண்டும் பாகிஸ்தான் அணியில் சேர்க்கப்பட்டுள்ள நிலையில் போதைப் பொருள் வைத்திருந்ததாக கைது செய்யப்பட்டிருக்கிறார். இந்த சம்பவம் கிரிக்கெட் வட்டாரத்தில் பெரும் பரபரப்பை ஏற்படுத்தி உள்ளது.