கர்நாடகாவிலும் 'கலைஞர்' டிவி

வாக்காளர்களை கவர்வதற்காக, தி.மு.க.,வை போன்று கர்நாடக காங்., கட்சியும், சட்டசபை தேர்தலில் வெற்றி பெற்றால், பொது மக்களுக்கு இலவச கலர் “டிவி,’ கிலோ இரண்டு ரூபாய்க்கு அரிசி வழங்கப்படும் என்பது போன்ற தேர்தல் வாக்குறுதிகளை அறிவித்துள்ளது.


கர்நாடகாவில் அடுத்த மாதம் சட்டசபை தேர்தல் நடைபெறுகிறது. இத்தேர்தலில், இழந்த ஆட்சியை எப்படியாவது கைப்பற்ற வேண்டும் என்று காங்., தீவிரமாக உள்ளது. தேர்தலில் வாக்காளர்களை கவர்வதற்காக, தேர்தலில் வெற்றி பெற்று ஆட்சி அமைத்தால், பச்சை நிற ரேஷன் கார்டு உள்ளவர்களுக்கு இலவச கலர் “டிவி’ வழங்கப்படும் என அறிவித்துள்ளது. இதை காங்., கட்சியின் தேர்தல் வாக்குறுதி கமிட்டி தலைவர் ஜாபர் ஷெரீப் தெரிவித்தார்.

அதே போல், வறுமைக்கோட்டுக்கு கீழே உள்ள குடும்பங்களுக்கு மாதந்தோறும் கிலோ இரண்டு ரூபாய்க்கு 25 கிலோ அரிசியும், வேலை வாய்ப்பு இல்லாத இளைஞர்களுக்கு ரூ. ஆயிரத்து 200 உதவித்தொகை அளிக்கப்படும் என்று அறிவிக்கப்பட்டுள்ளது. கடந்த 2006ம் ஆண்டு தமிழக சட்டசபை தேர்தலுக்கு முன் தி.மு.க., கட்சியின் தேர்தல் அறிக்கையில், ஏழைகளுக்கு இலவச “டிவி’ மற்றும் கிலோ இரண்டு ரூபாய்க்கு அரிசி வழங்கப்படும் என்று அறிவிக்கப்பட்டது. இது, அக்கட்சியின் வெற்றிக்கு பெரிதும் துணை புரிந்தது.