கனிமொழிக்கு கண்டனம்

திருநெல்வேலியில் கோயில் ஒன்றுக்கு சென்று சிற்பங்களை பார்வையிட்ட திமுக நாடாளுமன்ற உறுப்பினரும், முதலமைச்சர் கருணாநிதியின் மகளுமான கனிமொழி, இந்து கடவுள்களை இழிவுபடுத்தியதாக இந்து முன்னணி குற்றம் சாட்டியுள்ளது.

இந்து முன்னணியின் மாநில துணைத் தலைவர் வி.பி.ஜெயக்குமார் வெளியிட்டுள்ள அறிக்கை:

திருநெல்வேலி கிருஷ்ணா புரத்திலுள்ள ஸ்ரீவெங்கடாஜலபதி கோயில் சிற்பங்களை ஜனவரி 19ம் தேதியன்று திமுக எம்.பி. கனிமொழி பார்த்தார். ஆனால் அரை மணி நேரத்திற்கு மேலாக கோவில் சிற்பங் களை பார்வையிட்டவர் பெருமாளை தரிசிக்கவில்லை. கோயில் அர்ச்சகர் சாமிக்கு தீபம் ஏற்ற முயன்ற போது வேண்டாம் என்று கூறி அவமதித்துள்ளார்.

இந்த செயல் தெய்வபக்தி உள்ளவர்களின் உள்ளங்களை புண்படுத்தியுள்ளது.

கனிமொழியுடன் டி.பி.எம். மைதீன்கான் போன்ற முஸ்லிம்களும் நுழைந்திருக்கிறார்கள். இது இந்துக்களையும், கோயில் விதிகளையும் அவமதிக்கும் செயலாகும். இதற்கு நேர்மாறாக கோவை பேரூர் கோயிலுக்கு சென்று துரைமுருகன், பொங்கலூர் பழனிச்சாமி ஆகியோர் சாமி கும்பிட்டு பிரசாதம் பெற்றுக் கொண்டுள்ளனர்.

இந்துக்கள் கோயிலுக்கு சென்றால் சாமியைப் பார்க்கிறார்கள். ஆனால் கனிமொழி கலையை ரசிக்கிறாராம். நமது முன்னோர்கள் கலைகளை தெய்வீகத்திற்கு அர்ப்பணித்தார்கள். இதில் தெய்வீகம், கலைகள் என்று பிரித்து பார்ப்பது அறிவீனம். ஆனால் இந்த விஷயத்தில் துரைமுருகனும், பழனிச்சாமியும் பாராட்டுக் குரியவர்கள்.

மசூதி, சர்ச்சுகளுக்கு செல்லும் போது தலையில் குல்லா, முக்காடு போட்டும், முழங்காலிட்டும் வழிபட்டு, அந்த மதத்தினரின் உணர்வுகளை மரியாதையோடும், கௌரவத்தோடும் ஏற்றுக் கொள்ளும் இந்த போலி நாத்திகவாதிகள் இந்து உணர்வுகளை மட்டும் அவமதிப்பது ஏன்?

இந்துக் கோயில்கள் ஒன்றும் அருங்காட்சியகம் அல்ல. பக்தி உணர்வுகளை வெளிப்படுத்தும் பக்தர் களுக்கு மட்டுமே உரியது. கனி மொழியை கோயிலுக்கு வர வேண்டும் என்று யாரும் கட்டாயப் படுத்தவில்லை. அப்படி இருக்கும் போது முதலமைச்சரின் மகள் என்பதால் ஆணவத்தோடும், நாகரீகம் தெரியாமலும் இந்து உணர்வுகளை புண்படுத்திய கனிமொழி மன்னிப்பு கேட்க வேண்டும்.