ஜெயா டிவியின் 2 புதிய சேனல்கள்

ஜெயா டிவியின் இரண்டு புதிய சேனல்கள் ஒளிபரப்பு இன்று தொடங்கியது. ஜெயா பிளஸ் மற்றும் ஜெயா மேக்ஸ் ஆகிய சேனல்களை அதிமுக பொதுச் செயலாளர் ஜெயலலிதா இன்று காலை தொடங்கி வைத்தார்.

புதிய சேனல்களை வாழ்த்தி அவர் வெளியிட்டுள்ள வாழ்த்துச் செய்தியில் கூறியிருப்பதாவது:

"1999ம் ஆண்டு உங்கள் நல்லாசியுடன் ஜெயா டிவி தொடங்கப்பட்டது. நீங்கள் அளித்த அமோக ஆதரவினால் ஜெயா டிவி பெரும் அளவில் வளர்ச்சி அடைந்து வெற்றிகரமாக 8 ஆண்டுகளை நிறைவு செய்து, தற்போது 9வது ஆண்டில் இயங்கிக் கொண்டிருக்கிறது.

இந்த நல்ல நேரத்தில் "ஜெயா பிளஸ்' என்ற புதிய டிவி சேனலை தொடங்கி இருக்கிறார்கள். ஜெயா பிளஸ் புதிய டிவி சேனலுக்கு நீங்கள் உங்கள் மனப்பூர்வமான ஆதரவை வழங்குவீர்கள் என்று நான் நம்புகிறேன்.

ஜெயா பிளஸ் மேலும் மேலும் வளர்ச்சி அடையவும், உலகம் முழுவதும் பரவவும் எனது நல்வாழ்த்துக்களைத் தெரிவித்துக் கொள்கிறேன்.

அத்துடன் உங்களுக்கு மேலும், பல விதமான பொழுதுபோக்கு நிகழ்ச்சிகளை வழங்க வேண்டும் என்பதற்காக "ஜெயா மேக்ஸ்' என்ற மற்றும் ஒரு தொலைக்காட்சி சேனல் இன்று தொடங்கப்பட்டுள்ளது.

இதுவரை நீங்கள் ஜெயா டிவிக்கு அளித்து வந்துள்ள ஆதரவைப் போலவே, ஜெயா மேக்ஸ் தொலைக்காட்சிக்கும் உங்கள் மேலான ஆதரவை வழங்குவீர்கள் என்று நம்புகிறேன்.

ஜெயா மேக்ஸ் தொலைக்காட்சி மேலும் மேலும் வளர்ச்சியடைய எனது மனப்பூர்வமான நல்வாழ்த்துகளைத் தெரிவித்துக் கொள்கிறேன்.

இவ்வாறு ஜெயலலிதா கூறியுள்ளார்.
செய்தி: மாலைசுடர்