ஞாநி விவகாரம், ஒரு கோயிஞ்சாமியின் கேள்விகள்

சற்றுமுன் எனக்கு மெயில் ஒன்று வந்தது.
"சில கேள்விகள் இருக்கு உங்க பதிவில் போட்டால் விடை கிடைக்கும் என்று நம்புகிறேன் போடமுடியுமா ?"என்றார்.
அவர் நம்பிக்கையை ஏன் கெடுப்பானேன் பதிவு கீழே....

ஞாநி விவகாரம், ஒரு கோயிஞ்சாமியின் கேள்விகள்
ஞாநி விகடனில் பேசாப்பொருளைப் பேசத்துணிந்ததும் அதன் பின்விளைவுகளையும் பார்த்தால் முதலில் சிரிப்பும், பிறகு கோபமும் வருகிறது. ஞாநியின் எழுத்துக்கள் எனக்கு ஓ பக்கங்களை மீறி அதிகப் பரிச்சயமில்லை. ஆனால், பெரியார் வாழ்க்கை வரலாற்றை தூர்தர்ஷனுக்காக முதலில் படம் பிடித்தவர், சுஜாதாவை பாய்ஸுக்காக அளவு மீறி அடித்தவர், சோவின் நிலைப்பாடுகளுக்கு வெளிப்படையான விரோதி, தலித்தியத்துக்காக பாடுபடுபவர், சமீபகாலமாக கலைஞரின் நிலைப்பாடுகளுக்கு எதிரான நிலைப்பாடு எடுத்தாலும், ஆரம்ப காலத்தில் திமுக அனுதாபியாகவே இருந்தவர், முரசொலியில் பயின்றவர் போன்ற பிம்பங்கள் அடிக்கடி படித்த சில கட்டுரைகள் மூலமாக உருவாகியிருக்கிறது.

அவர் சொன்னது - கலைஞர் ஓய்வு குறித்து - தவறா சரியா என்ற பிரச்சினைக்குள் புக நான் விரும்பவில்லை. என் கருத்துக்களினால் நான் சொல்ல வரும் விஷயத்தில் எந்த மாற்றமும் ஏற்பட வாய்ப்பும் இல்லை.

ஞாநி சொன்னதற்கு காழ்ப்புணர்ச்சி காரணமாக இருக்கலாம், அவருடைய சமீபத்திய பத்திரிக்கை நிலைப்பாடும், அரசியல் நிலைப்பாடுகளும் காரணமாக இருக்கலாம். எப்படியும் அந்தக் கட்டுரை உள்நோக்கம் கொண்டது என்பதில் ஐயமில்லை.

ஆனால், மிதக்கும் வெளி பதிவின் பின்னூட்டங்கள், லக்கிலுக்கின் விருந்தினர் பதிவு, பாலபாரதி பதிவின் பின்னூட்டங்கள், டோண்டு ஆகியோரின் பதிவுகள், அவர் சொன்னதைவிட அவர் பிறப்பையே கேள்விக்குள்ளாக்குகின்றன. இட்லிவடையும் இதுபற்றி எரிச்ச்லோடு ஒரு பதிவு போட்டிருந்தாலும், அதில் ஜாதியை இழுக்கவில்லை.

ஞாநி ஒரு பார்ப்பனர் என்பதாலேயே அவரது கருத்துக்களைப் புறந்தள்ளவேண்டுமென்பதில் எனக்கு உடன்பாடு கிடையாது என்கிறார் சுகுணா - தனக்கு எந்தத் தெரிவும் இல்லாத பிறப்பைத் தவிர, வேறெந்த விஷயத்தால் ஞாநியைப் பார்ப்பனர் என்று கண்டீர் சுகுணா? சரி அப்படியே இருந்தாலும், எப்பொருள் யார்யார்வாய்க் கேட்பினும் என்னாயிற்று?

ரோசா வசந்த் ஒரு படி மேலே போய், "ஜாதியை மீறி செயல்பட முடியும் என்பதற்கு பார்பனர்களில் உதாரணங்கள் காட்டமுடியும் என்ற எண்ணத்திற்கான ஆதாரம் பலவீனமாவது மட்டும் கொஞ்சம் வருத்தமாக இருக்கும்." என்கிறார். எப்படி இந்தக் கட்டுரையால் அந்த ஆதாரம் பலவீனமானது என்று சொல்ல முடியுமா ரோசா?

லக்கிலுக்கின் விருந்தினரோ, சட்டைக்குள் நெளியும் பூணூலை அடையாளம் கண்டுகொண்டுவிட்டார். எப்படி என்றுதான் தெரியவில்லை. கலைஞரை எதிர்ப்பவர்கள் (அல்லது ஆதரிக்காதவர்கள்) எல்லாரும் பார்ப்பனர் என்றால் தமிழக ஜனத்தொகையில் 60% பார்ப்பனர்கள்! கருத்தைக் கருத்தால் எதிர்க்காமல் ஏன் ஜாதியை உள்ளே நுழைக்கவேண்டும்?

பாலபாரதியின் பதிவில், நல்லவேளையாக ஜாதி பற்றி எதுவும் எழுதவில்லை (கிழிந்த முகமூடி பற்றி எழுதியிருக்கிறார், அது என்ன என எனக்குப் புரியவில்லை) என்றாலும் சில பின்னூட்டங்கள் மேற்கண்ட கருத்துக்களின் அடிநாதத்திலேயே!

டோண்டு பதிவு மகாமட்டம்! இப்படி ஒரு நிகழ்வுக்கென்றே காத்திருந்தது போல, பார்த்தீர்களா, முன்பே நான் சொன்னேன்.. இவர்கள் இப்படித்தான் என்று.. சட்டைக்குள்ளே போடாதீர்கள் பூணூலை, வெளியே எடுத்துவிட்டுக்கொண்டு வாருங்கள் என்று தன் கட்சிக்கு ஞாநியை ஆள்பிடிக்கும் அசிங்கம்!

எனக்கு புரியாத விவகாரம் - ஞாநி பார்ப்பனரா இல்லையா என்ற கேள்வி இன்று, கலைஞரை அவர் விமர்சிக்கும் நேரத்தில் பெரிதாவது ஏன்? பார்ப்பனீயம் எதிர்க்கப்படுகிறது என்ற சொல்லாடலை ஞாநியை பார்ப்பனவாதி என்று எதிர்ப்பதனாலேயே நீர்த்துப் போவது புரியவில்லையா?

ஜாதிக்கென்று ஒரு புத்தி இருக்கிறது என்பதுதானே வர்ணாசிரமம்? ஞாநிக்கு பிறவிப்புத்தி வந்துவிட்டது போன்ற விமர்சனத்தால் அதையே வலுப்படுத்துகிறீர்கள் இல்லையா? நிஜமாகவே எனக்குப் புரியாமல்தான் கேட்கிறேன். சொல்லுங்க ப்ளீஸ்!