தமிழக பந்த் பற்றி சுயநலவாதிகள்

டிஸ்கி: இந்த பதிவிற்கும் சில தமிழ்மணம் பதிவுகளுக்கும் சம்பந்தம் உண்டு. நெஞ்சு வலி, வயத்தெரிச்சல், கோழைகள், சுயநலவாதிகள் வேறு பதிவுகளை நாடலாம். பொதுநலவாதிகள், பகுத்தறிவு சிங்கங்கள் மேற்கொண்டு படிக்கலாம்.

இட ஒதுக்கீட்டுக்கு ஆதரவாக திராவிட முன்னேற்ற கழகம் மற்றும் கூட்டணி கட்சிகள் மற்றும் பிற கட்சிகளின் ஆதரவுடன் கடந்த வாரம் நடைபெற்ற முழு அடைப்பு பெரும் வெற்றி பெற்றதாக தமிழக முதல்வர் டாக்டர் கலைஞர் அவர்கள் அறிவித்துள்ளார். டாக்டர் கலைஞர் ஏன் எல்லா கட்சிகளையும் கூட்ட வேண்டும் ? என்று சில சுயநலவாதிகள் சிந்தித்தார்கள். அரசே ஒரு வேலை நிறுத்தத்தை அறிவிக்ககூடாது என்று உச்சநீதிமன்றம் ஒரு தீர்ப்பு வழங்கியுள்ளது. அதை சமாளிக்க, பொன் விழா காணும் நம் தமிழக முதல்வர் அனைத்துக் கட்சிகள் நடத்தும் பந்த் அறிவித்தார். ஆனால் அரசு நிறுவனங்கள், போக்குவரத்துக்கு எல்லாம் விடுமுறை அறிவித்தார்.


கர்நாடகம் காவிரி விஷயத்திலும், கேரளம் முல்லைப் பெரியாறு விஷயத்திலும், உச்ச நீதிமன்றத் தீர்ப்பை அவமதிக்க வேண்டும் என்று ஏதாவது சட்டம் இருக்கிறதா என்ன ? நீதிமன்றம் விதித்த இடைக்காலத் தடையை ஏற்க மறுத்தது ஓர் அவமதிப்பு ; அரசே முன்னின்று பந்த் நடத்தியது மற்றோர் அவமதிப்பு. ஆக டபுள் அவமதிப்பு. இதை பாராட்டாமல் கேலி சித்திரம் போட்டு வலைப்பதிவில் மறுபதிப்பு செய்யும் அறியாமையை என்ன என்று சொல்லுவது ?

இட ஒதுக்கீடு பற்றி உச்ச நீதிமன்ற தீர்ப்பு வந்தவுடனேயே பிரச்சினையின் முக்கியத்துவம் காரணமாக முழு அடைப்பு பற்றிய அறிவிப்பும் உடனேயே வந்தது. ராமதாஸோ அல்லது ஜெயலலிதாவோ முந்திக்கொண்டார்கள் என்றால் என்ன செய்வது ? என்று சில சுயநலவாதிகள் சிந்திக்கிறார்கள்.

பல பேர் பஸ் ஸ்டாண்டிலும், ரயில்வே ஸ்டேஷன் பிளாட்பாரத்தில் ரெஸ்ட் எடுத்தார்கள், பரிட்சைக்கு செல்லும் மாணவர்கள், வாக்கிங் போனார்கள், ஆட்டோகள், பஸ்கள் ஓடாததால் எறிபொருளை சேமிக்க முடிந்தது, நகரம் அமைதியாக இருந்தது. பொருளாதார ரீதியிலோ, தமிழகத்துக்குக் கோடிக் கணக்கில் நஷ்டம். ஆனால் அவர்கள் வெளியில் போய் உழைத்திருந்தால் வெயிலில் அவதிப்பட்டிருப்பார்கள் இது யாருக்கும் புரியவில்லை. பந்த அமைதியாக நடந்ததால் எல்லோரும், சன் டிவியில் 'காசேதான் கடவுளடா' படம் பார்த்து சனிக்கிழமை எண்ணை தேய்த்து குளித்தார்கள். கோழி கறி சாப்பிட்டார்கள். இதனால் இந்த பந்த் வெற்றி பெறவில்லை. கடைசியாக ‘சமூக நீதிக்கு மக்களிடமிருந்து கிடைத்த அமோக ஆதரவு’ என்று சன் டீ.வி.யில் அறிவித்த்ததால் பந்த் வெற்றி பெற்றது. இதை புரிந்துக்கொள்ளாமல் சில சுயநலவாதிகள் பிதற்றுகிறார்கள்.

சில பிரிவினரை இட ஒதுக்கீடு தந்து அவர்களை கைக்குள் போட்டுக்கொள்வது, தமிழக அரசு பணிகள் மற்றும் கல்விநிலையங்களில் முஸ்லிம்கள், கிறிஸ்தவர்களுக்கு தனி இட ஒதுக்கீடு வழங்க சட்ட ரீதியான முடிவுகளை அரசு மேற்கொள்ளும் என்று அறிவித்து, ஜாதி அரசியலை ஊக்கிவித்து பிரித்து ஆளும் தந்திரத்தை சிலர் நக்கலடிக்கிறார்கள். இவர்கள் தான் சுயநலவாதிகள். ஏன் என்று சிந்தித்தால் காரணம் உங்களுக்கு புரிந்துவிடும்.

கலைஞர் எல்லோரையும் மரியாதையாக போற்றிவார். போற்றிய லிஸ்ட் இதோ மூதறிஞர் ராஜாஜியை "குல்லுகபட்டர்' (சதிகாரர்) என்றார்; கர்மவீரர் காமராஜரை "அண்டங் காக்கா' என்று அர்ச்சித்தார்; கக்கன்ஜியை "கக்கன் என்ன கொக்கா' என்று நஞ்சைக் கக்கினார்... ஜாம்பவான் பக்தவச்சலனாரை குரங்கு போல் கார்ட்டூன் போட்டார்; வாழப்பாடியாரை "வழிப்போக்கன்' என்றார்; மூப்பனாரை "காவேரி, தென்பெண்ணைப் பாலாறு... மூப்பனார் மூளையில் கோளாறு' என்றார்; எம்.ஜி.ஆரை "மலையாளி, கூத்தாடி, கோமாளி' என்றார்; நாவலரை "நெடுமரம்' என்றார்; நாஞ்சிலாரை "மந்திரக் கோல் மைனர்' என்றார்; ஆர்.வி.,யை "கைபர் கணவாய் வழி வந்தவரே' என்றார்; ஹிந்து பத்திரிகையை "மவுண்ட்ரோடு மகாவிஷ்ணு' என்றார்...

துக்ளக் சோவை "சொட்டைத் தலையர், பபூன்' என்றார்; குமுதம் எஸ்.ஏ.பி.,யை "குள்ள நரி' என்றார்; ப.சிதம்பரத்தை "செட்டி நாட்டு சின்னப் பையன், சீமான் வீட்டு கன்றுக் குட்டி' மற்றும் சமீபத்தில் "ஈ, எறும்பு, கொசு' என்றார்; பேராசிரியரை "வெறும் உதவி விரிவுரையாளர் தான்' என்றார்; அரசியல் சட்ட அறிஞர் இரா.செழியனை "ஈனப்பிறவி' என்றார்; வைகோவை "கள்ளத் தோணி, கலிங்கப்பட்டி களிமண்' என்றார்; பா.ஜ.,வை "தீண்டத்தகாத கட்சி' என்றார்...

வாஜ்பாய், அத்வானியை "விஷ ஜந்துக்கள்' என்றார்; பா.ஜ., தலைவர்களை "பண்டாரம், பரதேசி, காவி உடை, கமண்டலம், ஆக்டோபஸ்' என்றார்; பா.ஜ., பொதுச் செயலாளர் எச்.ராஜாவை "கூஜா' என்றார்; முதல்வர் ஜெ.,யை "பாப்பாத்தி, பத்ரகாளி, காந்தாரி' என்றார்; ஒட்டு மொத்த இந்துக்களை "திருடன்' என்று திட்டினார்; இரண்டு கோடி தமிழக வாக்காளர்களை "பருத்தி விதை, தவிடு, புண்ணாக்கு தின்னும் மாக்கள், வாழை மட்டைகள், மடச் சாம்பிராணிகள், புத்திகெட்ட ஜென்மங்கள், சோற்றால் அடித்த பிண்டங்கள்' என்றார்.
இந்திராகாந்தியை, "கிராப் வெட்டிய காஷ்மீர் பாப்பாத்தி' என்றும், பெருந்தலைவர் காமராஜரை, "கோமாளி ராஜா' என்றார். ரஜினி பா.ஜ., அ.தி.மு.க., கூட்டணிக்கு ஆதரவு அளித்து "வாய்ஸ்' கொடுத்துள்ளதால், "மராட்டியரே, கர்நாடக வழி வந்தவரே, கண்டக்டரே, பரட்டையரே, கோமாளியே, கூத்தாடியே...' என்றார். தினமும் பஜனை செய்து, கடைசி வரை 'ராம் ராம்' என்று சொன்ன காந்தியை கலைஞர் பின்பற்றுகிறார், என்று சொன்னால் மிகையாகாது. இது தெரியாமல் சில சுயநலவாதிகள் தூற்றுகிறார்கள்.

இன்று உச்சநீதிமன்றத்தில் வந்த இந்த வழக்கு, முதலில் விசாரணைக்கு வந்தபோது, அந்த வழக்கைத் தொடர்ந்த இளைஞர் இயக்கம், ஸ்ட்ரைக் செய்து கொண்டிருந்தது. அப்போது வந்த இடைக்கால உத்திரவு, அரசு தரப்புக்குச் சாதகமாக அமைந்தது. அந்த நிலையில் ஸ்ட்ரைக் நிறுத்தப்பட வேண்டும் என்று சுப்ரீம் கோர்ட் கூறிய அறிவுரையை ஏற்று, அந்த இளைஞர் இயக்கம் ஸ்ட்ரைக்கை வாபஸ் பெற்றது. "இப்போது, சுப்ரீம் கோர்ட்டை சற்றும் மதிக்காமல், இடைக்கால தீர்ப்பை எதிர்த்து, தமிழக அரசே முன்வந்து பந்த் நடத்துகிறது. இளைஞர்களுக்கு இருக்கிற பொறுப்புணர்வு, அரசுக்கு மட்டும் வேண்டாமா?' விஜயன் அவர்கள் எழுப்புகிற கேள்வி பகுத்தறிவு இல்லாமல் கேட்கப்படும் கேள்வி. இவர்களை சுயநலவாதிகள் என்று சொல்லுவதை தவிற வேறு என்ன சொல்லமுடியும்.

1931 மக்கள் தொகை கணக்கெடுப்பின் அடிப்படையில், இதர பிற்படுத்தப்பட்டவர்களைப் பற்றிய ஒரு முடிவு எடுப்பது சரியல்ல; இந்த பழைய கணக்கெடுப்பின் அடிப்படையில் 27 சதவிகித இடஒதுக்கீடு என்று நிர்ணயம் செய்யப்படுவது ஏற்க முடியாதது என்று உச்சநீதிமன்றம் பிதற்றுகிறது. குழந்தையை கேட்டால் கூட சொல்லும், கடந்த 50 ஆண்டுகளில் இந்தியாவில் உள்ள அரசியல் கட்சிகள் யாரையும் முன்னேற்றவில்லை என்று. குழந்தைக்கு தெரிந்தது, உச்சநீதி மன்றத்துக்கு தெரியவில்லை. இவர்களுடைய பென்சிலால் எந்த சமயத்தில் சித்திரம் வரையும் என்று தெரிந்திருக்கும். ஆம் இவர்கள் தாம் சுயநலவாதிகள்.