சிலை செய்திகள்

ஸ்ரீரங்கத்தில் பெரியார் சிலை உடைப்பு, டெல்லியில் எம்.ஜி.ஆர் சிலை திறப்பு

ஸ்ரீரங்கம் பெரியார் சிலை:
ஸ்ரீரங்கத்தில் பெரியார் சிலை இடிக்கப்பட்டதால் பெரும் பரபரப்பு ஏற்பட்டுள்ளது. திருச்சி மாவட்டம் ஸ்ரீரங்கத்தில் திராவிட கழகம் சார்பில் பெரியார் சிலை அமைக்கப்பட்டு விரைவில் திறக்கப்பட இருந்தது. இதற்கு அப்பகுதியில் உள்ள இந்து அமைப்பினர் எதிர்ப்பு தெரிவித்தனர். இந்நிலையில் இன்று காலையில் பெரியார் சிலையின் தலை துண்டிக்கப்பட்டு கிடந்தது. இதனால் அங்கு பெரும் பரபரப்பு ஏற்பட்டது. தமிழக சட்டசபையில் இன்று ஸ்ரீரங்கத்தில் பெரியார் சிலை சேதப்படுத்தப்பட்டது தொடர்பாக காங்கிரஸ் சார்பில் ஒரு கவன ஈர்ப்பு தீர்மானம் கொண்டு வரப்பட்டது. இதற்கு பதில் அளித்து முதல்-அமைச்சர் கருணாநிதி "பெரியார் சிலை மட்டுமல்ல பெரும் தலைவர்களுடைய சிலைகளிலும் அந்த தலைவர் சொன்ன கருத்துக்களிலும் வேறுபாடான நிலை சிலருக்கு இருக்கலாம். அதற்காக சிலைகளை சேதப்படுத்துவதை அனுமதிக்க முடியாது. இந்த அரசு அதை நிச்சயமாக அனுமதிக்காது.

பெரியாருடைய சிலை என்றால் அதை சேதப்படுத்தியவரையும் சேர்த்து மனிதனாக்கியவரின் சிலை. அதை மறந்து விடக்கூடாது. இந்த சிலையை உடைத்தவர்கள் யாராக இருந்தாலும் மன்னிக்கப்பட கூடியவர்கள் அல்ல. உடனடியாக நடவடிக்கை எடுக்கப்பட்டு இந்த விஷ மத்தனத்தில் ஈடுபட்ட 4 பேர் கைதாகி இருக்கிறார்கள்.

மேலும் விசாரணை நடக்கிறது. கருத்துக்கு கருத்து, எண்ணங்களுக்கு எண்ணம், கொள்கைக்கு கொள்கை என்ற மோதல் இருக்க வேண்டுமே தவிர சிலைகளை உடைப்பது, சீரழிப்பது என்பது என்றைக்கும் பொறுத்துக் கொள்ள முடியாது.

இன்று நடைபெற்ற இந்த விஷமத்துக்கு தகுந்த நடவடிக்கை எடுக்கப்படும். யாரும் இதை மேலும் வளர்த்து பூதாகரமாக்காமல் இருக்க வேண்டும் எனக் கேட்டுக் கொள்கிறேன்."

டெல்லியில் எம்.ஜி.ஆர் சிலை:
பார்லிமென்ட் வளாகத்தில் இன்று காலையில் எம்.ஜி.ஆர்., முழு உருவச்சிலையை லோக்சபா சபாநாயகர் சோம்நாத் சாட்டர்ஜி திறப்பு வைத்தார். விழாவில் அனைத்து கட்சி தலைவர்களும் கலந்துகொண்டனர்.
இவ்விழாவில் பங்கேற்பதற்காக முன்னாள் முதல்வர் ஜெயலலிதா, சசிகலா, அ.தி.மு.க., முன்னாள் அமைச்சர்கள் பன்னீர்செல்வம், ஜெயகுமார், செங்கோட்டையன், பாண்டுரங்கன், மதுசூதனன் தளவாய் சுந்தரம், நயினார் நகேந்திரன், வளர்மதி, செம்மலை, சத்தியமூர்த்தி மற்றும் அ.தி.மு.க., சட்டசபை உறுப்பினர்களும், கட்சி பிரமுகர்களும் நேற்று பிற்பகல் சென்னையில் இருந்து விமானம் மூலம் டில்லி சென்றனர். விழாவில் கலந்து கொண்ட பின்னர் ஜெயலலிதா இன்று மாலையே சென்னை திரும்புகிறார். சிலை திறப்பு விழாவில் கலந்து கொள்ளுமாறு காங்கிரஸ் தலைவர் சோனியா, முன்னாள் பிரதமர் வாஜ்பாய் ஆகியோருக்கும் ஜெயலலிதா அழைப்பு விடுத்திருந்தும் அவர்கள் கலந்துகொள்ளவில்லை.
நிருபர்களிடம் பேசிய ஜெயலலிதா, இச்சிலையை பார்லிமென்ட்டில் திறப்பதற்கு தமிழக முதல்வர் கருணாநிதி பல தடைகளை கொடுத்ததாகவும், அவற்றையெல்லாம் மீறி வெற்றிகரமாக இச்சிலை இன்று திறக்கப்பட்டதாகவும் கூறினார்.
(செய்தி உதவி: தினமலர், மாலைமலர், தட்ஸ்தமிழ் )