பாயும் வேகம் ஜெட் லீ தாண்டா
பன்ச் வெச்சா இட்லி தாண்டா
Rated PG - for Pseudo-DK, DMK, Liberals, Marxists....
ஊர்ல சொல்றது சொலவடை
உண்மையைச் சொல்றது இட்லிவடை

Thursday, August 03, 2006

ஜூவி பற்றி நான் சென்னது உண்மையல்ல - வைகோ

ஜூ.வி.கைமாறியதாக நான் சொன்னது உண்மையல்ல! உணர்ந்து விட்டேன்... வருந்துகிறேன்!"

தமிழக சட்ட மன்றத் தேர்தலின்போது பத்திரிகைகளிலும், அரசியல் மேடைகளிலும் அதிகம் பேசப்பட்ட பெயர் வைகோ..! இவரைச் சுற்றி கிளம்பியவை ஏகப்பட்ட சர்ச்சைகள்... இவர் கிளப்பியதும் ஏகப்பட்ட சர்ச்சைகள்..

தேர்தல் அலையெல்லாம் ஓய்ந்து, எதிர்க்கட்சி அணியில் இருந்தபடி தனது அடுத்தகட்ட அரசியல் நடவடிக்கைகளில் சுறுசுறுப்பாயிருக்கும் வைகோ, இதோ ஜூ.வி-யைச் சந்திக்கிறார்-

ஜூ.வி-யை மையப்படுத்தி, தேர்தலின்போது அவர் பேசிய பேச்சுதானே நம் முதல் கேள்வியாக இருக்க முடியும்!

"சொல்லுங்க வைகோ சார்... ‘ஜூனியர் விகடன், மாறன் குடும்பத்துக்குக் கைமாறி விட்டது’ என்றும் ‘விலை போய்விட்டது’ என்றும் தேர்தலுக்கு சில நாட்கள் முன்னால் நீங்க சொன்னீங்க... உங்க மேலே மிகுந்த மதிப்பும் மரியாதையும் வச்சிருக்கவங்க- குறிப்பா எங்க வாசகர்கள், ‘வைகோ வாயிலிருந்தா இப்படியொரு பொய்!’னு எந்தளவுக்கு அதிர்ச்சியும் வருத்தமும் அடைஞ்சாங்க, தெரியுமா?"

"அப்படி பேசினதுக்கு நான் இப்ப ரொம்ப வருத்தப் படுறேன். அதுக்கு முன்னாடி ஒரு விஷயம்... இப்படிப் பேசணும்னு நான் திட்டமிட்டு பேசலை. ‘பொய்’னு சொல்றீங்களே... அந்தப் பொய்யிலேயே இரண்டு வகை இருக்கு. ஒண்ணு, யாரையாவது ஒழிச்சுக் கட்டணும்னு முடிவு பண்ணி, தீய நோக்கத்தோட சொல்லப்படுவது... சொல்றது அபாண்டமானதுனு தெரிஞ்சே சொல்றது. இன்னொரு வகை, கேள்விப்படுகிற ஒரு விஷயம் உண்மையாக இருக்குமோ என்று நம்பி, அதை வெளியில சொல்றது. ரெண்டுக்கும் வித்தியாசம் இருக்கு.

ஜூ.வி. பற்றி அப்போது நான் பேசியது இரண்டாவது வகை! அப்படிப் பேசிய ஒருசில நாட்களிலேயே, ஜூ.வி-யோ, விகடன் நிறுவனமோ யார் கைக்கும் மாறவில்லை என்பதும், அப்படி கைமாறிவிட்டதாக நான் நம்ப வைக்கப் பட்டேன் என்பதும் தெரிய வந்தது. தவறான ஒரு விஷயத்தை, உண்மைனு நம்பி சொன்னதற்காக நான் இப்பவும் ரொம்ப ஃபீல் பண்றேன்!"

"சரி, அந்த சூழ்நிலைதான் என்ன?"

"அந்த சமயத்தில், அடுத்தடுத்து என்னைக் குறிவச்சு, ‘டேமேஜ்’ செய்கிற மாதிரியான செய்திகள் ஜூ.வி-யில் தொடர்ந்து வந்தது. ‘ஏதோ ஒரு நோக்கத்தோடுதான் இப்படி நம்மைக் குறிவைக்கிறார்களோ’னு நினைக்கிற நிலைக்கு நான் தள்ளப்பட்டேன்.

என் தாயார் பாவம்... அவங்க என்ன செய்வாங்க? அவங்க பேட்டியை எடுத்து நீங்க வெளியிட்ட பிறகு, அவங்க மனசு ரொம்ப பாதிச்சுப் போச்சு. அவங்களுக்கு ஏற்கெனவே பி.பி., ஷுகர் இருக்கு. உண்மையில சொல்றேன்... எங்க ஊர்க்காரங்க எல்லாம் நான் அ.தி.மு.க. கூட்டணிக்குப் போகணும்னு விருப்பப்பட்டதைப் பார்த்து, எங்க அம்மாவும் நான் அ.தி.மு.க. கூட்டணிக்குப் போகணும்னுதான் நினைச்சாங்க... அதைத்தான் என்னிடம் சொன்னாங்க! ‘நம்ம மகன் எவ்வளவு காலம் தி.மு.க-வுக்காகப் பாடுபட்டான்..! ஆனா, அவங்க எப்படியெல்லாம் இவனை நசுக்கறாங்க’னு வருத்தம் அம்மாவுக்கு இருந்தது. அதேசமயம், ‘தி.மு.க அணியை விட்டு மாறிப்போனால் மதிப்புக் குறைவு வராதா?’னு என் கட்சிக்காரங்களோட நான் காரில் விவாதிச்சுக்கிட்டு வந்ததை, கூடவே வந்த அவங்க அமைதியா காதுகொடுத்துக் கேட்டிருக்காங்க. அதை வச்சு, ‘ஆயிரம் பிரச்னைகள் இருந்தாலும், நம்ம பையன் இப்போதைக்கு தி.மு.க. அணியில இருக்கறதுதான் சரினு நினைக்கிறான் போலிருக்கு’னு அவங்க நினைச்சிட்டாங்க. உங்க நிருபர் வந்து பார்த்தபோது, அந்த அடிப்படையில்தான் சில விஷயங் களைச் சொல்லியிருக்காங்க.

கட்சியில் தொண்ணூத்து ஒன்பது சதவிகிதம் பேர் அ.தி.மு.க. அணிக்குப் போவதைத்தான் விரும்பறாங்கனு தெரிஞ்ச பிறகுதான் அந்த முடிவை எடுத்தேன். ஆனா, அதன்மூலம் வந்த விமரிசனங்களும், காயங்களும் எனக்கு மட்டும்தான்! கூட்டணித் தொடர்பாக மனப் போராட்டமும் மன அழுத்தமும் இருந்த சமயத்தில்தான், ஜூ.வி-யில் என் தாயாரோட பேட்டி வந்து, ரொம்ப பாதிக்கப்பட்டேன். அந்த வருத்தம், கோபம் இருக்கும்போது, நிதானமா யோசிச்சுச் செயல்படக் கூடிய நிலை இல்லைதானே?

ஆனா, 'தாயின் சொல்லை மீறி வைகோ ஒரு முடிவு எடுத்தார்' அப்படிங்கிற மாதிரியான தவறான பார்வை உங்க பேட்டியால ஏற்பட்டுப் போச்சு. மேலும், நீங்க வெளியிட்ட அந்தப் பேட்டியை தி.மு.க. முகாமில் இருந்தவங்க தங்களுக்குச் சாதகமாகப் பயன்படுத்திக்கப் பார்த்தாங்க. இதனாலெல்லாம் எங்கம்மா ரொம்ப வருத்தத்துல ஆழ்ந்துட்டாங்க.

எங்க அம்மா விஷயத்தில் ஜூ.வி. மீது ரொம்ப மனக்கோபத்திலும் வருத்ததிலும் இருந்தேன் என்பது உண்மை. அந்த நேரத்துல, ‘இந்த மாதிரி வாங்கிட்டாங்க’னு எங்ககிட்டே சிலர் சொன்னவுடனே, அதை அப்படியே நம்பி சொல்லிட்டேன். அப்படி நான் சொல்லியிருக்கக் கூடாது. அப்படி நான் பேசியிருக்கக் கூடாது! அப்பவே அது தவறுனு தெரிஞ்சுகிட்டேன்.

அப்படி நான் பேசிய அந்த நாளில் சிவகாசியில் இருந்தேன். அன்னிக்கு மதியம், ‘அண்ணே... தெரியுமாண்ணே... ஜூ.வி. கைமாறிடுச்சாம்... சன் டி.வி-காரங்க வாங்கிட்டாங்களாம். தி.மு.க. ஏராளமான இடங்களில் ஜெயிக்கப் போகுதுனு கணிப்பு வருதாம்’னு என்கிட்டே வந்து சிலர் சொன்னாங்க. ‘ஜூ.வி. கருத்துக்கணிப்பின் அப்படி ஒரு முடிவால், தேர்தல் முடிவில் பெரிய பாதிப்பு இருக்குமே... நாம இதை ‘டிஃப்யூஸ்’ பண்ணணுமே’னு யோசிச்சுக்கிட்டே இருந்தேன். அன்னிக்கு மதியமே என்னை ரொம்ப பாதிக்கிற மாதிரி இன்னொரு விஷயமும் கேள்விப்பட்டேன். ‘வைகோவை முடிச்சிருங்க... தீத்துருங்க’னு செல்போன் கிராஸ் டாக் பற்றிய ஒரு செய்தி வந்து சேர்ந்தது. இந்தத் தகவலால் நான் ரொம்பவே ‘டிஸ்டர்ப்’ ஆகிட்டேன். இதை வெளியில் சொல்றதா, வேண்டாமானு மனப் போராாட்டத்தில் இருந்துட்டு... கடைசியா அன்னிக்கு ராத்திரி நடந்த பொதுக்கூட்டத்துல ‘என் உயிருக்கு ஆபத்து’ங்கிற செய்தியைச் சொல்லிட்டு, ஜூ.வி. பத்தியும் பேசினேன். இதான் பேக்கிரவுண்ட்.

ஆனா, நான் பேசினது சரியுமில்ல... நியாயமுமில்லை. ‘தேர்தல்ல தோத்தா தோத்துட்டுப் போறோம். ஒரு நிறுவனத்தைக் களங்கப்படுத்தற மாதிரி சொல்லியிருக்கக் கூடாது’ என்கிற வருத்தம் எனக்கு நிறையவே உண்டு."

சிறிது நேர அமைதிக்குப் பிறகு, அரசியல் கேள்விகளை எடுத்து வைத்தோம். தனது மேடைத் தமிழில் பதில்களை முழங்கத் துவங்கினார் வைகோ.

"மத்தியில் ஆளும் ஐக்கிய முற்போக்குக் கூட்டணியில், இப்போதும் ம.தி.மு.க. பங்கு வகிக்கிறதா?"

"நிச்சயமாக! ஐக்கிய முற்போக்குக் கூட்டணியில் இந்த நிமிடம் வரை அங்கத்தினர்களாக இருக்கிறோம். ஆனால், தி.மு.க-தான் தனது செல்வாக்கை வைத்து, எப்படியாவது எங்கள் இயக்கத்தைக் கூட்டணியிலிருந்து வெளியேற்றிவிட வேண்டும் என்று பாடாய்ப் படுகிறது. வெளியில் தெரியாத வண்ணம் மத்திய அரசுக்குப் பலவிதமான மிரட்டல்களை விட்டுக் கொண்டுதான் இருக்கிறது, தி.மு.க.! சட்டமன்ற தேர்தலுக்குப் பின்னர், எதற்கு பிரதமருக்கும் சோனியா காந்திக்கும் வீண் சங்கடம் என நினைத்து, ‘கூட்டணியிலிருந்து ம.தி.மு.க. வெளியேறுகிறது’ என்று கடிதத்தையும் தயார் செய்து விட்டேன். அதை அனுப்புவதற்கு முன் பிரதமர் மன்மோகன் சிங்கிடம் தொலைபேசியில் விஷயத்தைச் சொன்னேன்.

அதற்கு, ‘மிஸ்டர் வைகோ! நீங்கள் தயாரித்து வைத்திருக்கும் கடிதத்துக்கு எந்தத் தேவையும் இல்லை. நீங்கள் கூட்டணியை விட்டு வெளியில் போகக்கூடாது’ என்றார் பிரதமர். அவர் பிரதமர் என்பதையெல்லாம் தாண்டி எனது மதிப்புக்குரிய தலைவர். அவரது உணர்வுகளுக்கு எப்போதுமே மதிப்பளிப்பவன். அதனாலேயே அந்த சமயத்தில் அமைதியாகி விட்டேன்.

தேர்தல் முடிந்தது... தனி மெஜாரிட்டி இல்லாத ஆட்சியை இங்கே கலைஞர் அமைத்தார். அதன்பிறகு, டெல்லியில் ஐக்கிய முற்போக்குக் கூட்டணி தலைவர்களின் கூட்டம் நடைபெற்றது. ‘ம.தி.மு.க-வை இந்தக் கூட்டத்துக்கு அழைத்தால், நாங்கள் அதைப் புறக்கணிப்போம்’ என்று பிரதமரை ‘பிளாக்மெயில்’ செய்திருக்கிறார்கள் தி.மு.க-வினர்.

இது தெரிந்ததுமே ‘இதற்கு மேலும் நாங்கள் கூட்டணியில் நீடிக்கத்தான் வேண்டுமா?’ என்று பிரதமரிடம் கேட்டேன். ‘காலம்தான் இதையெல்லாம் சரிசெய்யும். நீங்கள் எனக்காக இந்த விஷயத்தில் பொறுத்துக்கொள்ள வேண்டும்’ என்றார் பிரதமர். அதனால் அப்போதும் நான் பொறுமை காத்தேன்.

பிறகு, ஐக்கிய முற்போக்குக் கூட்டணியின் எம்.பி-க்கள் கூட்டத்தில் கலந்துகொள்ளும்படி எங்களுக்குத் தொடர்ந்து அழைப்பு வருகிறது. எங்கள் கட்சி கலந்துகொண்டபடிதான் இருக்கிறது."

"சமீபத்தில் பிரதமரைச் சந்தித்து ஈழப் பிரச்னை குறித்து விரிவாகப் பேசியதாக செய்திகள் வந்ததே..?"

"நீண்ட இடைவெளிக்குப் பிறகு பிரதமரை நேரில் சந்தித்தேன். உணர்ச்சிக் கொந்தளிப்போடு வெகுநேரம் பேசினேன். ‘சிங்கள அரசின் சார்பாக இந்தியாவுக்கு வரும் பிரதிநிதிகளை நீங்கள் சந்திக்கிறீர்கள். அதேபோல், ஈழத்தின் தமிழ் எம்.பி-க்களையும் சந்திக்க வேண்டும். அவர்களை புலிகளின் ஆதரவாளர்கள் என்ற கண்கொண்டு பார்த்து, ஒரேயடியாக ஒதுக்குவது, இலங்கையில் அமைதி திரும்புவதற்குத் தடையாக இருக்கும். அவர்கள் மக்களால் தேர்ந்தெடுக்கப்பட்ட பிரதிநிதிகள். அவர்களோடு நீங்கள் ஒருமுறை பேசிவிட்டால் தமிழர்களின் உண்மை நிலவரம் உங்களுக்குப் புரிந்து விடும்’ என்று பிரதமரிடம் சொன்னேன். ‘பாதுகாப்பு அமைச்சகத்திடம் விவாதித்துவிட்டு ஈழத்தமிழ் பிரதிநிதிகளைக் கட்டாயம் சந்திக்கிறேன்’ என்றார் பிரதமர்.

வாஜ்பாய் பிரதமராக இருந்தபோது, ‘இனி இலங்கை அரசுக்கு எந்தவித ஆயுத சப்ளையையும் இந்திய அரசு செய்யாது’ என்று ஒரு கொள்கைப்பிரகடனம் செய்யப் பட்டது. ஆனால், அண்மையில் இலங்கைக்கு இந்திய அரசு ராடார் போன்ற சில சாதனங்களை அளித்து உதவி இருக்கிறது. இவற்றின் உதவியுடன் அப்பாவித் தமிழர்களை அல்லவா இலங்கை அரசு கொன்று குவிக்கிறது என்று பிரதமரிடம் முறையிட்டேன். உடனே, ‘நாம் கொடுத்த ஆயுதங்கள் தமிழர்களின் உயிர்போக்க பயன் படுமானால், அதை இந்தியா அனுமதிக்காது. இதற்கு ஒரு தீர்வை அல்லது உடனடி உத்தரவை இலங்கை அரசுக்கு இந்தியா பிறப்பிக்கும். இனி ஈழத் தமிழர் பிரச்னையில் இந்தியா கூடுதல் கவனம் காட்டும்’ என்று சொன்னார் பிரதமர்."

"ம.தி.மு.க-விலிருந்து தொடர்ந்து பலர் தி.மு.க-வுக்கு மாறி வருவதாக செய்திகளில் பார்க்கிறோமே..?"

"இது தி.மு.க-வினர் ஏற்படுத்துகிற மாயை! அண்மையில் அண்ணன் கலைஞர் அவர்கள் டெல்லிக்குப் போயிருந்தபோது, பத்திரிகையாளர்களின் ஒரு கேள்விக்கு, ‘ம.தி.மு.க-வா... அப்படி ஒரு கட்சி இருக்கிறதா?’ என்றார் எகத்தாளமாக! அவரேதான், இங்கே வந்து ‘ஏராளமான ம.தி.மு.க-வினர் தி.மு.க-வில் சேர்ந்தார்கள்’ என்று கும்பலோடு நின்று போட்டோவுக்கு போஸ் கொடுக்கிறார். எங்கள் கட்சியிலேயே இல்லாதவர்கள், எப்போதோ இருந்து செயலற்று விலகியவர்கள் ஆகியோரையெல்லாம் ம.தி.மு.க. என்று காட்டி, கூடவே தி.மு.க-வினரையும் கலந்து நிறுத்தி, போஸ் கொடுக்கிறார் அண்ணன் கலைஞர். தான் வலுவோடு இருக்கும்போதே எப்படியாவது ம.தி.மு.க-வை அழித்துவிட வேண்டும் என்று கங்கணம் கட்டிக்கொண்டு முயல்கிறார்."

"ஒருவேளை, நீங்கள் தி.மு.க. கூட்டணியிலேயே நீடித்திருந்தால், தி.மு.க. அறுதிப் பெரும்பான்மையோடு சட்டசபைக்குள் நுழைந்திருக்கும் என்று நினைக் கிறீர்களா?"

(கடகடவென ஒரு சிரிப்பு) "உண்மையில், அ.தி.மு.க. அணி பெருவாரியான இடங்களில் வென்று தமிழகத்தில் மீண்டும் ஆட்சியமைக்கும் என்று நான் உறுதியாக நம்பினேன். இது நான் அந்த அணியில் இடம்பெற்றதால் சொல்லும் கணிப்பு அல்ல! தி.மு.க-வினர் போட்டியிட்ட தொகுதிகளில் கோடிக்கணக்கில் பணத்தை வாரி இறைத்தார்கள். இதுதான் கடைசிக் கட்டத்தில் நூறு, ஐந்நூறு ஓட்டுகளில் நிலவரத்தை மாற்றியிருக்கிறது.

பணம் மட்டும் விளையாடியிருக்காவிட்டால், முடிவுகள் இப்படி இருந்திருக்காது. எங்கள் கட்சியில் இருந்து மட்டுமே பதினைந்து எம்.எல்.ஏ-க்கள் வரை கிடைத்திருப்பார்கள். உள்ளாட்சித் தேர்தல் வரும்போது பாருங்கள். எங்கள் கூட்டணியின் பலம் என்னவென்பது பளிச்சென்று தெரியும்."

"சிறுதாவூர் நில விஷயத்தில், ஜெயலலிதாவின் பெயர் அடிபடுவது குறித்து?"

"இது கலைஞருக்கே உரிய பழிவாங்கல் நடவடிக்கை. சிறுதாவூரில் அறிஞர் அண்ணா காலத்தில் நிலம் அளிக்கப்பட்டது தலித்களுக்கு மட்டுமே அல்ல. அதில் ஒரு முஸ்லிம் மற்றும் வேற்று சாதியினரும் இருந்திருக்கிறார்கள். அந்தக் காலத்தில் யாராலுமே கவனிக்கப்படாத, குறிப்பிடத்தக்க அளவு மதிப்பு இல்லாத பகுதி அது. கிடைத்த சொற்ப பணத்துக்கு அந்த நிலத்தை அவர்கள் விற்றிருக்கிறார்கள். சாமானியர்களில் தொடங்கி, பெரிய வி.ஐ.பி-க்கள் வரை அவற்றை வாங்கி இருக்கிறார்கள்.

அதிலும்கூட, ‘தலித்களின் நிலம்’ என்று சர்ச்சை கிளப்பப்படும் இடத்தில் அந்த பங்களா இல்லை. அதையும் தாண்டி, ஜெயலலிதா அந்த பங்களாவின் உரிமையாளரும் அல்ல! அதனால்தான், ‘மடியில் கனமில்லை. எனக்குப் பயமும் இல்லை’ என்று சொல்லி, விசாரணை கமிஷனை வரவேற்று அறிக்கை கொடுத்திருக்கிறார்.

இவ்வளவு தூரம் பேசுகின்ற அண்ணன் கலைஞர், ‘அறிவாலயமும் முரசொலி அலுவலகமும் அமைந்திருப்பது பஞ்சமி நிலத்தில்தான்’ என்ற சர்ச்சைக்கு ஏன் ஒரு விசாரணை கமிஷன் வைக்கக் கூடாது?"

"நீங்களும் ஒரு எம்.எல்.ஏ-வாக சட்டசபைக்குள் போயிருந்தால், அரசியல் களம் இன்னும் சூடாகியிருக்குமே?"

"இதை சகோதரி ஜெயலலிதா அவர்களும் என்னிடத்தில் கேட்டார். ‘எப்படியும் நீங்கள்தான் முதலமைச்சராக வரப் போகிறீர்கள் என்று உறுதியாக நினைத்திருந்தேன், மேடம். நீங்கள் முதல்வர் என்றால், அங்கே கேள்வி கேட்க எனக்கு என்ன தேவை இருக்கப் போகிறது. அதனால்தான் நான் போட்டியிடவில்லை’ என்று சொன்னேன். நான் போகாவிட்டால் என்ன... என் கட்சியின் ஆறு எம்.எல்.ஏ-க்களும் தி.மு.க. அரசின் ஒவ்வொரு தவறையும் மக்களுக்கு வெளிச்சமிட்டுக்கொண்டே இருப்பார்கள்!"

நன்றி: ஜூனியர் விகடன்
படம் : தேர்தல் போது வைகோ ஆடிய டான்ஸ் :-)

26 Comments:

மனதின் ஓசை said...

//அந்த வருத்தம், கோபம் இருக்கும்போது, நிதானமா யோசிச்சுச் செயல்படக் கூடிய நிலை இல்லைதானே?//
//ஜூ.வி. கருத்துக்கணிப்பின் அப்படி ஒரு முடிவால், தேர்தல் முடிவில் பெரிய பாதிப்பு இருக்குமே... நாம இதை ‘டிஃப்யூஸ்’ பண்ணணுமே’னு யோசிச்சுக்கிட்டே இருந்தேன்.//
//ஆனா, நான் பேசினது சரியுமில்ல... நியாயமுமில்லை. ‘தேர்தல்ல தோத்தா தோத்துட்டுப் போறோம். ஒரு நிறுவனத்தைக் களங்கப்படுத்தற மாதிரி சொல்லியிருக்கக் கூடாது’ என்கிற வருத்தம் எனக்கு நிறையவே உண்டு."//

//நீங்கள் முதல்வர் என்றால், அங்கே கேள்வி கேட்க எனக்கு என்ன தேவை இருக்கப் போகிறது. //

வை.கோ. தரம் தாழ்ந்து கொண்டே போகிறார்..

மற்ற கேள்விகளுக்கு பதில்கள் அரசியல் பதில்கள்.. தவறு இல்லை..ஆனால், இப்பொழுது சொல்லும் அனைத்தையும் பின்னொரு நாளில் தவறு என ஒப்புக்கொள்ளாதவரை சரிதான்...

luckylook said...

40 கோடியாருக்கு சுத்தமாக புத்தி பேதலித்து விட்டது என்று நினைக்கிறேன்....

சிறுதாவூர் நிலப்பிரச்சினையை முதன்முதலில் கிளப்பியதே இவர் தான்....

அதிமுக கூட்டணி ஏற்படுவதற்கு சில மாதங்கள் முன்பாக கவர்னரைச் சந்தித்த மதிமுகவினர் கொடுத்த மனுவில் சிறுதாவூர் நிலம் தலித்துகளுக்கு சொந்தமானது.... அதை பறிமுதல் செய்து உரியவர்களுக்கு பகிர்ந்து கொடுக்க வேண்டும் என்று கோரிக்கை விடுத்தவர் இவர் தான்....

G.Ragavan said...

மனதின் ஓசை, நான் வேறு மாதிரி நினைக்கிறேன்.

தான் தவறு செய்து விட்டோம் என்பதை உணர்வதும் அதைச் சொல்வதும் சரியே. சொன்னது தவறு என்று தெரிந்து அதைச் சப்பைக்கட்டு கட்டி அது சரிதான் என்று வீண்வாதம் செய்வதை விட...செய்தது தவறுதான் என்று ஒப்புக்கொள்வது சரியே என்று தோன்றுகிறது.

இந்த நல்ல பண்பை இனிமேலாவது தொடர வேண்டும்.

ஜெயலலிதா பற்றிச் சொல்லியிருப்பது கூட்டணி விஷயம். எல்லா அரசியல்வாதிகளும் ஏதோ ஒரு சமயத்தில் சொன்னதுதான். இந்த விஷயத்தில் இவரும் விதிவிலக்கு அல்ல போல.

ஜோ / Joe said...

//நீங்கள் முதல்வர் என்றால், அங்கே கேள்வி கேட்க எனக்கு என்ன தேவை இருக்கப் போகிறது. //

வைகோ இன்னும் மதிமுக-வுல இருக்காரா? அல்லது அதிமுக -ல சேர்ந்துட்டாரா?

luckylook said...

////தான் தவறு செய்து விட்டோம் என்பதை உணர்வதும் அதைச் சொல்வதும் சரியே. சொன்னது தவறு என்று தெரிந்து அதைச் சப்பைக்கட்டு கட்டி அது சரிதான் என்று வீண்வாதம் செய்வதை விட...செய்தது தவறுதான் என்று ஒப்புக்கொள்வது சரியே என்று தோன்றுகிறது.////

ராகவன் இதே கருத்து வி.புலிகளுக்கு பொருந்துமா?

ஆண்டன் பாலசிங்கத்தின் என்.டி.டி.வி. பேட்டி வெளியானபோது வலையுலகில் ஏற்பட்ட அதிர்வலைகளை கொஞ்சம் ஒப்பிட்டுப் பாருங்கள்.....

ஜோ / Joe said...

//ராகவன் இதே கருத்து வி.புலிகளுக்கு பொருந்துமா?//
luckylook,
ராகவனைப் பொறுத்தவரை புலிகள் மனம் வருந்தியதை ஏற்றுக்கொள்ள வேண்டும் என்றே கருத்து சொன்னதாக ஞாபகம்.எனவே இந்த கேள்வி அவருக்கு கேட்கப்பட வேண்டியதல்ல.

luckylook said...

///luckylook,
ராகவனைப் பொறுத்தவரை புலிகள் மனம் வருந்தியதை ஏற்றுக்கொள்ள வேண்டும் என்றே கருத்து சொன்னதாக ஞாபகம்.எனவே இந்த கேள்வி அவருக்கு கேட்கப்பட வேண்டியதல்ல. ////

அது எனக்கும் தெரியும் ஜோ..... பரவலாக வலைப்பூக்களில் சொல்லப்பட்டதற்காக கேட்கிறேன்... இப்போது யூதர்களுக்கு வக்காலத்து வாங்கும் குழுக்கள் அப்போது நடந்துகொண்ட அநாகரீகமான முறையை மறுபடியும் ஞாபகப்படுத்துதற்காகவே அதுபோல ஒரு கேள்வி கேட்டேன்....

ஜயராமன் said...

தன் கொள்கைக்காகவும் தன்மானத்துக்காகவும் மட்டுமே நடத்தி வரும் அண்ணன் வைக்கோ தன் வெளிப்படையான பேட்டியால் மனதை கவர்கிறார்.

தான் தவறு சொல்லிவிட்டேன் என்று திறந்து சொல்லும் மனம் எத்தனை அரசியல்வாதிகளுக்கு உண்டு? அதிலும் இவர் 'அண்ணன்' கருணாநிதிக்கு.....? இதுதான் இவருக்குள்ள வித்தியாசம்.

மனதின் ஓசை said...

//தான் தவறு செய்து விட்டோம் என்பதை உணர்வதும் அதைச் சொல்வதும் சரியே. சொன்னது தவறு என்று தெரிந்து அதைச் சப்பைக்கட்டு கட்டி அது சரிதான் என்று வீண்வாதம் செய்வதை விட...செய்தது தவறுதான் என்று ஒப்புக்கொள்வது சரியே என்று தோன்றுகிறது.

இந்த நல்ல பண்பை இனிமேலாவது தொடர வேண்டும்//

ராகவன்,
உண்மையிலேயே தெரியாமல் தவறு செய்தால் அதற்கு இது பொருந்தும்.. அவர் சொல்வதை உண்மை என நீங்கள் எடுத்துக் கொள்கிறீர்களா? சரி அப்படியானால் யார் அந்த போய் செய்தியை அவருக்கு கொடுத்தது? யாருக்கு அப்படி ஒரு போய்யான செய்தியை இவரிடம் சொல்ல வேண்டிய நிர்ப்பந்தம் இருக்கிறது?
இது அப்பொழுதே தெரிந்தே சொன்ன போய்..
//ஜூ.வி. கருத்துக்கணிப்பின் அப்படி ஒரு முடிவால், தேர்தல் முடிவில் பெரிய பாதிப்பு இருக்குமே... நாம இதை ‘டிஃப்யூஸ்’ பண்ணணுமே’னு யோசிச்சுக்கிட்டே இருந்தேன்.//
இதுதான் உண்மையான காரணம்.மீதி எல்லாம் அதனை மறைக்க கட்டும் சப்பைகட்டு.
அதனால் இப்பொழுது வடிப்பது நீலிக்கண்ணீர் என்றுதான் எனக்கு தெரிகிறது..உங்கள் கருத்தை அறிய ஆவலாக உள்ளேன்.

//ஜெயலலிதா பற்றிச் சொல்லியிருப்பது கூட்டணி விஷயம். எல்லா அரசியல்வாதிகளும் ஏதோ ஒரு சமயத்தில் சொன்னதுதான். இந்த விஷயத்தில் இவரும் விதிவிலக்கு அல்ல போல. //
இதனை நான் ஒத்துக்கொள்கிறேன்.. அனைவரும் செய்வதுதான்.. என்ன பிரச்சினை என்றால் இவர் அது போல இல்லை என்று ஒரு இமேஜ் உருவாக்கி வைத்து இருந்தார்.. அவரும் மற்றவரை போல்தான் என்று இப்பொழுது நித்தமும் நீருபித்து வருகிறார்.. அப்படி ஒரு இமேஜ் இருந்து அது இப்பொழுது தகர்வதால் அது மற்றவரைவிட இன்னும் கூடுதல் இழப்பை அவருக்கு தருகிறது...

பிருந்தன் said...

செய்த தவறை தவறு என்று ஒத்துக்கொள்ளும் மனம் எந்த அரசியல் வாதிக்கு வரும், வைகோ ஒரு உன்னத மனிதர்தான்.

G.Ragavan said...

// luckylook said...
////தான் தவறு செய்து விட்டோம் என்பதை உணர்வதும் அதைச் சொல்வதும் சரியே. சொன்னது தவறு என்று தெரிந்து அதைச் சப்பைக்கட்டு கட்டி அது சரிதான் என்று வீண்வாதம் செய்வதை விட...செய்தது தவறுதான் என்று ஒப்புக்கொள்வது சரியே என்று தோன்றுகிறது.////

ராகவன் இதே கருத்து வி.புலிகளுக்கு பொருந்துமா?

ஆண்டன் பாலசிங்கத்தின் என்.டி.டி.வி. பேட்டி வெளியானபோது வலையுலகில் ஏற்பட்ட அதிர்வலைகளை கொஞ்சம் ஒப்பிட்டுப் பாருங்கள்..... //

லக்கி லுக். இலங்கைத் தமிழர் பிரச்சனையில் எனது நிலை என்னவென்று வலைப்பூவில் மட்டுமல்ல என்னையறிந்த அனைவருக்கும் தெரியும். பாலசிங்கத்தின் பேச்சு இப்பொழுது வந்தது. இந்த ஆண்டின் முதற் பதிவாக 2006லாவது இலங்கைக்குப் போவோம் என்று பாலசிங்கம் பேசுவதற்கெல்லாம் முன்னாலேயே எனது கருத்தைச் சொல்லியிருக்கிறேன். படித்துப்பாருங்கள். பின்னூட்டத்தில் சொல்ல முடிகிறதை விட அதில் நிறைய சொல்லியிருக்கிறேன்.

சீனு said...

//தான் தவறு செய்து விட்டோம் என்பதை உணர்வதும் அதைச் சொல்வதும் சரியே. சொன்னது தவறு என்று தெரிந்து அதைச் சப்பைக்கட்டு கட்டி அது சரிதான் என்று வீண்வாதம் செய்வதை விட...செய்தது தவறுதான் என்று ஒப்புக்கொள்வது சரியே என்று தோன்றுகிறது.

இந்த நல்ல பண்பை இனிமேலாவது தொடர வேண்டும்.//

நானும் இதைத் தான் நினைகிறேன்.

G.Ragavan said...

// ராகவன்,
உண்மையிலேயே தெரியாமல் தவறு செய்தால் அதற்கு இது பொருந்தும்.. அவர் சொல்வதை உண்மை என நீங்கள் எடுத்துக் கொள்கிறீர்களா? சரி அப்படியானால் யார் அந்த போய் செய்தியை அவருக்கு கொடுத்தது? யாருக்கு அப்படி ஒரு போய்யான செய்தியை இவரிடம் சொல்ல வேண்டிய நிர்ப்பந்தம் இருக்கிறது?
இது அப்பொழுதே தெரிந்தே சொன்ன போய்..
//ஜூ.வி. கருத்துக்கணிப்பின் அப்படி ஒரு முடிவால், தேர்தல் முடிவில் பெரிய பாதிப்பு இருக்குமே... நாம இதை ‘டிஃப்யூஸ்’ பண்ணணுமே’னு யோசிச்சுக்கிட்டே இருந்தேன்.//
இதுதான் உண்மையான காரணம்.மீதி எல்லாம் அதனை மறைக்க கட்டும் சப்பைகட்டு.
அதனால் இப்பொழுது வடிப்பது நீலிக்கண்ணீர் என்றுதான் எனக்கு தெரிகிறது..உங்கள் கருத்தை அறிய ஆவலாக உள்ளேன். //

ஓசை, வைகோ ஒரு சிறந்தவர் என்று நிரூபிப்பது அல்ல எனது முயற்சி. எனது வேலையும் அதுவல்ல. சப்பைக்கட்டும் நீலிக்கண்ணீரும் என்றால் டிஃப்யூஸ் என்ற சொல்லையே சொல்லியிருக்க வேண்டியதில்லை என்று கருதுகிறேன். அப்பொழுது தவறான செய்தி வந்தது...அதை நம்பிச் சொல்லிவிட்டேன்..தவறுதான் என்று பொதுப்படையாகச் சொல்லியிருந்திருக்கலாம். டிஃப்யூஸ் என்ற சொல்லைப் பயன்படுத்தியிருப்பது தேர்தல் வெற்றிக்காக என்று தெளிவாகச் சொல்லியிருக்கிறார். தெரிந்ததே செய்தததுதான். ஆனால் தவறு செய்தேன் என்று ஒப்புக்கொள்வது ஒரு நல்ல பண்பு. அரசியல்வாதிகள் இப்படிப் பேசுவதே அபூர்வம். யாராவது அப்படிப் பேசுகையில் ஆதரிக்காவிட்டாலும் எதிர்க்காமல் இருப்பது நல்லது என்று தோன்றுகீறது. என்னுடைய கருத்து அதை ஒட்டியதே.

// //ஜெயலலிதா பற்றிச் சொல்லியிருப்பது கூட்டணி விஷயம். எல்லா அரசியல்வாதிகளும் ஏதோ ஒரு சமயத்தில் சொன்னதுதான். இந்த விஷயத்தில் இவரும் விதிவிலக்கு அல்ல போல. //
இதனை நான் ஒத்துக்கொள்கிறேன்.. அனைவரும் செய்வதுதான்.. என்ன பிரச்சினை என்றால் இவர் அது போல இல்லை என்று ஒரு இமேஜ் உருவாக்கி வைத்து இருந்தார்.. அவரும் மற்றவரை போல்தான் என்று இப்பொழுது நித்தமும் நீருபித்து வருகிறார்.. அப்படி ஒரு இமேஜ் இருந்து அது இப்பொழுது தகர்வதால் அது மற்றவரைவிட இன்னும் கூடுதல் இழப்பை அவருக்கு தருகிறது... //

உண்மைதான். ஜெயலலிதாவாகட்டும் கருணாநிதியாகட்டும் முதலிலிருந்தே அரசியல்வாதிகள். இவர் பாதியில் ஆகியிருக்கிறார். அதான் இழப்பு பெரிதாகத் தெரிகிறது. உண்மைதான்.

G.Ragavan said...

// ஜோ / Joe said...
//ராகவன் இதே கருத்து வி.புலிகளுக்கு பொருந்துமா?//
luckylook,
ராகவனைப் பொறுத்தவரை புலிகள் மனம் வருந்தியதை ஏற்றுக்கொள்ள வேண்டும் என்றே கருத்து சொன்னதாக ஞாபகம்.எனவே இந்த கேள்வி அவருக்கு கேட்கப்பட வேண்டியதல்ல. //

நன்றி ஜோ. என்னுடைய கருத்தை வலைப்பூக்களில் என்னை அறிந்தவர் அறிவார்கள் என்று சொல்லியிருந்தேன். என்னுடைய கருத்து சரியென்று நிரூபித்து விட்டீர்கள். :-)

மனதின் ஓசை said...

//தன் கொள்கைக்காகவும் தன்மானத்துக்காகவும் மட்டுமே நடத்தி வரும் அண்ணன் வைக்கோ//
ஜயராமன்,
நன்றாக சிரிக்க வைத்து விட்டீர்கள் :-))))))))))))))))))))))))

மா சிவகுமார் said...

இத்துடன் குமுத விழியாள் சூட்கேஸ் வாங்கிக் கொண்டு கணிப்பு வெளியிடுகிறாள் என்று கலைஞர் தேர்தலின் போது டிஃப்யூஸ் செய்ய முயன்றதையும் சேர்த்துப் பார்த்துக் கொள்ளலாம்.

அன்புடன்,

மா சிவகுமார்

மனதின் ஓசை said...

//ஆனால் தவறு செய்தேன் என்று ஒப்புக்கொள்வது ஒரு நல்ல பண்பு. அரசியல்வாதிகள் இப்படிப் பேசுவதே அபூர்வம்//
ராகவன்.. இந்த கருத்துடன் ஒத்துப்போகிறேன்...

//தெரிந்ததே செய்தததுதான். //

இதனைத்தான் அனைவருக்கும் தெரியப்படுத்த விரும்புகிறேன்... தெரிந்தே செய்த தவறு அது..ஒரு நிறுவனம் பாதிக்கப்படும் என தெரிந்தும் செய்தது... யாரொ சொன்னர்கள் என்று இந்த பேட்டியில் கூறி இருப்பது சப்பைகட்டுதான்..
****************
ராகவன்..அழகான வார்த்தைகளில் வாதம் செய்கிறீர்கள்..நிறைய கற்றுக்கொள்ள வேண்டும் உங்களிடம் இருந்து.
**************
இட்லிவடை.. இப்பொழுது உங்கள் பதிவுபக்கம் சற்று சீக்கிரமாக தெரிகிறது...ஏதும் மாற்றம் செய்தீர்களா?

Idly Vadai said...

மனதின் ஓசை - //இட்லிவடை.. இப்பொழுது உங்கள் பதிவுபக்கம் சற்று சீக்கிரமாக தெரிகிறது...ஏதும் மாற்றம் செய்தீர்களா?//

இந்திய அரசி blogspot தடைகளை நீக்கியதால் இருக்கலாம். :-)

luckylook said...

/////தான் தவறு சொல்லிவிட்டேன் என்று திறந்து சொல்லும் மனம் எத்தனை அரசியல்வாதிகளுக்கு உண்டு? அதிலும் இவர் 'அண்ணன்' கருணாநிதிக்கு.....? இதுதான் இவருக்குள்ள வித்தியாசம். ////

ஜயராமன் உங்க அக்கா ஜெயலலிதாவுக்கு மனதை திறந்து சொல்லும் மனம் உண்டு என்று எல்லோரும் ஒத்துக் கொள்கிறோம்....

:-D

G.Ragavan said...

// ராகவன்..அழகான வார்த்தைகளில் வாதம் செய்கிறீர்கள்..நிறைய கற்றுக்கொள்ள வேண்டும் உங்களிடம் இருந்து. //

இல்லை ஓசை. பொதுவாக வாதம் செய்ய விரும்புவதில்லை. கலந்துரையாடல் என்றால் எனக்குத் தெரிந்ததைச் சொல்வேன் அவ்வளவுதான்.

// //தெரிந்ததே செய்தததுதான். //

இதனைத்தான் அனைவருக்கும் தெரியப்படுத்த விரும்புகிறேன்... தெரிந்தே செய்த தவறு அது..ஒரு நிறுவனம் பாதிக்கப்படும் என தெரிந்தும் செய்தது... யாரொ சொன்னர்கள் என்று இந்த பேட்டியில் கூறி இருப்பது சப்பைகட்டுதான்.. //

ஓசை, மா.சிவக்குமார் எடுத்துக்காட்டியபடி குமுதவிழியாள் பெட்டி வாங்கியதற்கு என்ன ஆதாரம்? அது சரியா பொய்யா என்று எதுவும் சொல்வாரா கருணாநிதி? வைகோ இத்தனை நாள் கருணாநிதியிடம் இருந்தும் இந்த மாதிரி நீக்குப் போக்காகக்ப் பேசக் கற்றுக்கொள்ளாதது வைகோவிற்கு இழப்பே.

இன்னொரு விஷயம். கருணாநிதியை எதுவும் சொன்னால்....ஜெயலலிதா ஆதரவாளராக்குவது. ஜெயலலிதாவை எதிர்க்கின்றவர்கள் கருணாநிதியை ஆதரிக்க வேண்டும் என்ற கட்டாயம் இல்லை. இவர்கள் இருவரையும் நான் எதிர்க்கிறேன். யாரை ஆதரிக்கிறேன் என்று கேட்கிறீர்களா? யாரையும் இல்லை...இன்னாரை ஆதரிக்க வேண்டும் என்று எண்ணமும் இப்பொழுது இல்லை.

luckylook said...

////ஓசை, மா.சிவக்குமார் எடுத்துக்காட்டியபடி குமுதவிழியாள் பெட்டி வாங்கியதற்கு என்ன ஆதாரம்? அது சரியா பொய்யா என்று எதுவும் சொல்வாரா கருணாநிதி?/////

பெட்டி வாங்காததுக்கு நீங்கள் ஏதாவது ஆதாரம் வைத்திருக்கிறீர்களா?

குமுதம் பெட்டி வாங்கியது என்று கலைஞர் சொன்னார்.... இன்றுவரை அதை வாபஸ் வாங்கவில்லை.....

ஏதாவது எடக்குமடக்காகச் சொல்லிவிட்டு அதுக்காக அப்பப்போ மன்னிப்பு கேட்பவர் அல்ல கலைஞர்....

இன்னும் கொஞ்சநாள் போனால் தயாநிதி பற்றிய குற்றச்சாட்டுக்கும் மன்னிப்பு கேட்பார் இந்த பொய்க்கோ.....

Vazhipokan said...

Karunanidhi did not directly mention Kumudam by name. It's like a Gossip - you don't have to take it for granted. That's how most magazines including Kumudham are able to publish Kisukisu on the personal life of hapless actors without facing legal threats. Vaiko directly mentioned Junior Vikatan by name and can be sued for slander by Junior Vikatan.

பொய் சொல்பவன் said...

இந்த உலகத்திலே கருணாநிதி ஒருவர் மட்டும்தான் யோக்கியவான்.
மற்றவர்கள் அனைவரும் கோமாளிகள்தானே?
அட போங்கப்பா,அரசியலில் குட்டிக் கரணம் அடிக்காதவர்கள் யாரு?
மூப்பனாரு என்ன பண்ணுனாரு?
ஜெயலலிதா பேசியது என்ன?
கம்யூனிஸ்ட்கள் செய்றது என்ன?
ராமதாஸ் செய்யாததா?
அட காங்கிரஸ் அடிக்காத கரணம் தெரியாதா?
இன்னும் முன்னப் போனா காமரஜும்,ராஜாஜியும் கூட்டணி வச்ச கதை என்ன?
இதுல வைகோவப் போயி....

இங்கே கடைந்தெடுத்த அரசியல்வாதி கருணாநிதி மட்டும்தான்.

மனதின் ஓசை said...

//ஓசை, மா.சிவக்குமார் எடுத்துக்காட்டியபடி குமுதவிழியாள் பெட்டி வாங்கியதற்கு என்ன ஆதாரம்? அது சரியா பொய்யா என்று எதுவும் சொல்வாரா கருணாநிதி? //

ராகவன்.. நீங்களும் இந்த சம்பவத்தை பற்றி மட்டும் பேசாமல் மற்றவையையும் துணைக்கு அழைக்கிறீர்கள்.. எனிவே அது தவறு இல்லை..

குமுதம் விஷயத்தில் மாறுபட்ட கருத்துக்கள் உள்ளன..எனக்கும் குமுதத்தின் அப்பொழுதைய செயல்பாடுகள் சந்தேகத்தை கொடுக்கின்றன.. உண்மையிலேயெ நடுநிலையாக நடந்து கொண்டது என நம்புகிறீர்களா?..இதனை பற்றி பேசினால் விவாதம் வேறு திசைக்கு செல்லும்...

அது மட்டுமின்றி நீங்கள் செய்யம் வாதம் வேறு விதம்..மற்றவர்கள் சொல்லுவது வேறு விதமாக இருக்கிறது.. வை.கோ தெரியாமல் செய்து விட்டதாகவே சொல்லப் பார்க்கிறார்கள்.. அவரை புனிதர், கொள்கை காப்பவர் என்றெல்லாம் கூறுவதை யாரலும் எற்றுக்கொள்ள முடியாது...சரியா இல்லயா என ஒற்றை வார்த்தை பதிலை உங்களிடம் எதிர்பார்க்கிறேன்.

கலைஞரும் சென்னையில் பல இடங்களை இழந்த பிறகு அது பற்றிய கேள்விக்கு "அது பின்னடைவு என ஒப்புக்கொள்கிறேன்" என ஒற்றை வரியில் எந்த சப்பைகட்டும் இல்லாமல் பதில் சொன்னார்.. அது பற்றிய உங்கள் கருத்தும் அறிய ஆவலாக உள்ளேன்..

Anonymous said...

Luckylook,

Are you a binami of Kalaignar?

Sivabalan said...

வைகோ பேட்டி....Hi..Hi..Hi...

அரசியலில் இது எல்லா சகஜமப்பா....