பாயும் வேகம் ஜெட் லீ தாண்டா
பன்ச் வெச்சா இட்லி தாண்டா
Rated PG - for Pseudo-DK, DMK, Liberals, Marxists....
ஊர்ல சொல்றது சொலவடை
உண்மையைச் சொல்றது இட்லிவடை

Tuesday, February 28, 2006

மு.க.ஸ்டாலின் பேட்டி


வரும் தேர்தலில் தி.மு.க.வின் வியூகம் என்ன? வெற்றி வாய்ப்பு எப்படி இருக்கும்?

"தமிழ்நாட்டில் ஏறக்குறைய ஐந்து ஆண்டு காலம் நடந்து கொண்டிருக்கிற ஜெயலலிதாவின் ஆணவ ஆட்சிக்கு, மக்கள் விரோத ஆட்சிக்கு முற்றுப்புள்ளி வைக்கிற வகையில், எங்களது வியூகத்தை அமைத்திருக்கிறோம்.

பாராளுமன்றத் தேர்தலில் வெற்றி வாய்ப்பைத் தந்த தமிழக மக்கள், இம்முறையும் வெற்றிக்கனியை எங்களுக்குத் தருவார்கள்."

உங்கள் கூட்டணியில் உள்ளவர்கள் நிறையப் பேருக்கு காளிமுத்து வலை வீசுகிறாரே?

"காளிமுத்து அலங்கார வார்த்தைகள் பேசக்கூடியதில் எந்த அளவிற்கு வல்லவராக இருக்கிறாரோ, அதுமாதிரி கட்சி மாறுவதிலும் வல்லவர். தன் சுகத்திற்காக கொள்கையை விட்டுக் கொடுப்பதிலும் வல்லவர். சுய லாபத்திற்காக வானுயர, பலரைப் பாராட்டுவதிலும் வல்லவர். அதே போல், அதற்கு எதிர்ப்பதமாக கீழ்த்தரமாக நாராச நடையில் பேசுவதிலும் வல்லவர். சட்டமன்றத்தில் நியாயமான முறையில் பேசவிடாமல் எதிர்க்கட்சி சட்டமன்ற உறுப்பினர்கள் எல்லோரையும், தூக்கி வெளியேற்றுவதிலும் வல்லவர். இப்போது தூக்கிக் கொண்டு வருவேன் என்று புலம்புகிறார். பெற்ற கூலிக்கு மாரடிப்பதிலும் வல்லவர்."

உங்கள் சுயதிறமையில் நீங்கள் முன்னுக்கு வந்தாலும் உங்கள் மேல் வாரிசு என்ற முத்திரை குத்தப்பட்டிருக்கிறதே?

"இதைக் கேட்டுக் கேடிருக்ட்டு புளித்துப் போயிடுச்சு. தி.மு.கழகத்தில் யாரையும் வாரிசாக, நினைத்த நேரத்தில் உருவாக்கி விடமுடியாது. காரணம், தி.மு.க. ஒரு ஜனநாயக அமைப்பு. என்னைப் பொறுத்தவரையில், பள்ளி மாணவப் பருவத்தில் கோபாலபுரம் பகுதியில் இளைஞர் தி.மு.க. என்ற மன்றத்தை நிறுவி, அதன் மூலம் பொதுப்பணியில், கழகப் பணியில் என்னை ஈடுபடுத்திக் கொண்டு, அந்த வட்டப் பிரதிநிதியாகத் தேர்ந்தெடுக்கப்பட்டு, அதைத் தொடர்ந்து மாவட்ட அளவில் பிரதிநிதியாகத் தேர்ந்தெடுக்கப்பட்டு, பொதுக்குழு, செயற்குழு என்ற பொறுப்புகளிலெல்லாம் படிப்படியாக இருந்து பேச்சாளராக, பிரசார நாடகத்தில் வேடம் ஏற்று நடிக்கக் கூடிய நடிகராக உருவாகி, தி.மு.க. இளைஞர் அணியின் அமைப்புக் குழு உறுப்பினராகி, அமைப்பாளராகி அதைத் தொடர்ந்து இளைஞரணிச் செயலாளராக, இப்போது கழகத்தின் துணைப் பொதுச் செயலாளராக, இப்படிப் படிப்படியாக இந்தப் பொறுப்பிற்கு வந்திருக்கிறேனே தவிர, வாரிசு அடிப்படையில் நேரடியாக வந்தவனில்லை."

நடிகர்கள் நிறையப் பேர் அ.தி.மு.க.விற்குப் போய்க் கொண்டிருக்கிறார்களே?

"எதையோ எதிர்பார்த்துப் போய்க் கொண்கிறார்கள். சிலருக்கு ஆசை காட்டி இழுக்கும் பணியை இன்றைய ஆளும்கட்சியான அ.தி.மு.க. செய்துகொண்டிருக்கிறது."

சட்டமன்றத்தில் நீங்கள் சரியாக செயல்படவில்லை என்று ஒரு குற்றச்சாட்டு இருக்கிறதே?

"சட்டமன்றத்தில் நான், பல விவாதங்களில் பங்கேற்று உரையாற்றியது எல்லோருக்கும் தெரியும். அண்மையில் நடைபெற்ற சட்டமன்றக் கூட்டத் தொடரில் கூட, நான் பல பிரச்னைகளை மையமாக வைத்து கவன ஈர்ப்பு தீர்மானங்கள் பலவற்றைக் கொடுத்திருக்கிறேன். அவர்கள் அதை எடுத்துக்கொள்ளவில்லை. சட்டமன்றம், சட்டமன்றமாக நடந்திருந்தால், நான் சிறப்பாகப் பணி ஆற்ற வேண்டிய உணர்வு தானாக வந்திருக்கும். சட்டமன்ற வரலாற்றில் இதுவரை இல்லாத அளவிற்கு சர்வாதிகாரத் தன்மையோடு சபாநாயகராக அன்றைக்கு இருந்த காளிமுத்து, சட்டமன்ற அவைத் தலைவராக இல்லாமல், அ.தி.மு.க. அவைத் தலைவராகவே செயல்பட்டார் என்பதை, நாடு நன்கு அறியும். அதனால்தான் அவருக்கு இப்போது அ.தி.மு.க. அவைத் தலைவர் பதவி கிடைத்திருக்கிறது."

அ.தி.மு.க. ஆட்சி பற்றி உங்கள் விமர்சனம்?

"அ.தி.மு.க. என்பதை நாங்கள் என்றைக்கும் ஒப்புக் கொண்டது இல்லை. தி.மு.க.விற்கு முன்னால் ‘அ’ வைப் போட்டிருப்பது அதிகாரம், அகங்காரம், அட்டூழியம் அதற்காகத்தான். அண்ணா என்பதற்காகப் போடவில்லை."

தி.மு.க. ஆட்சிக்கு வந்தால் கருணாநிதி முதல்வர் இல்லை, ஸ்டாலின்தான் முதல்வராகப் போகிறார் என்று அ.தி.மு.க. பிரசாரம் பண்ணுகிறதே?

"அ.தி.மு.க. மட்டுமல்ல, பல மீடியாக்களும், பத்திரிகைகளும் கூட அந்தப் பிரசாரத்தைத் திட்டமிட்டு செய்கின்றன. கூட்டணியைச் சிதைக்க வேண்டும் என்பதுதான் அதன் நோக்கம். அந்தப் பிரசாரம் முற்றிலும் தவறானது. மீண்டும் முதலமைச்சர் கலைஞர் அவர்கள்தான்."

விஜயகாந்த் உங்களைப் பற்றி சொல்லும் விமர்சனங்களுக்கு உங்கள் பதில் என்ன?

"அவர் அரசியல் கட்சியைத் தொடங்கியிருக்கிறார். அரசியலில் இருந்துகொண்டு மற்ற அரசியல் கட்சியில் இருப்பவர்களை விமர்சிப்பது, அவருக்கு இருக்கும் உரிமை. அதை மக்கள் எவ்வளவு தூரம் ஏற்றுக் கொள்வார்கள் என்பதைப் பொறுத்துதான். விமர்சனத்தின் தன்மை அமையும்."

வைகோவைப் பற்றி உங்கள் கருத்து என்ன?

"அவரிடத்தில் என்னை மிகவும் கவர்ந்தது, அவருடைய போராட்ட குணம்."

உங்களை எதிர்த்து குஷ்பு நிற்கப் போவதாகச் செய்திகள் அடிபடுகிறதே?

"பத்திரிகையில் பார்த்தேன். அதே பத்திரிகையில் அவரது மறுப்பு செய்தியும் வந்திருக்கிறது."

விஜய்யை வைத்து உங்கள் மகன் உதயநிதி படம் தயாரிக்கப் போகிறார் என்று செய்தி வருகிறதே?

"எனக்கு அதைப் பற்றி அதிகம் தெரியவில்லை. நடிகர் விஜய்யும், என் மகன் உதயநிதியும் நீண்ட கால நண்பர்கள். என் மகன் ஆரம்பித்த ஸ்நோ பெளலிங் விளையாட்டு நிறுவனத்தை விஜய்தான் திறந்து வைத்தார். என் மகன் உதயநிதி திரைப்படம் எடுக்க விருப்பப்பட்டு விஜய்யிடம் சொன்னபோது, அவர் ஒப்புக் கொண்டாராம்."

தாத்தா ஆகிவிட்டீர்களே? பேரனைப் பற்றி?

"சந்தோஷமாயிருக்கிறது. என்னைத் தாத்தா என்று முறையோடு அழைக்கக் கூடிய குழந்தைகள், எங்கள் இல்லத்தில் பல இருந்தாலும் அவர்களிடம், தாத்தா என்று அழைக்கக் கூடாது, ‘அங்கிள்’ என்றுதான் அழைக்க வேண்டும் என்று சொல்லியிருக்கிறேன். அப்படி கூப்பிட்டால், எனக்கு வயதானது தெரிந்துவிடும் என்ற சுயநலம்தான். (சிரிக்கிறார்) இப்போது என் பேரன் இன்பன் என்னை தாத்தா, தாத்தா என்று அழைக்கும்போதெல்லாம், என்னையே மறந்து விடக்கூடிய சுகம் கிடைக்கிறது.

இரவு நேரங்களில் பொதுக் கூட்டம் போன்ற கட்சிப் பணிகளை முடித்துவிட்டு எவ்வளவு நேரம் கழித்து வீட்டிற்குச் சென்றாலும் என்னுடைய பேரனைப் பார்க்காமல் இருக்க மாட்டேன். ஒருவேளை தூங்கிக் கொண்டிருந்தாலும் அவனை எழுப்பி, அவனிடம் பேசாமல், அவனிடம் விளையாடாமல் நான் தூங்குவது கிடையாது."

சுனாமி நிதி வழங்க ஜெயலலிதாவை சந்தித்தீர்களே, என்ன பேசினீர்கள்?

மரியாதை தெரியாத பெண்மணி என்பது அந்தச் சந்திப்பில் தெரிந்தது. சட்டமன்ற உறுப்பினர் என்ற மரியாதையையோ எதிர்க் கட்சித் தலைவர் கொடுத்த இருபத்தொரு லட்ச ரூபாயை கொண்டு வந்திருக்கிறோம் என்ற மரியாதையையோ தரவில்லை. கியூவில் நின்றுதான் உள்ளே சென்றோம். உட்காரக் கூடச் சொல்லவில்லை. ‘உங்கள் தந்தைக்கு நன்றி சொல்லுங்கள்’ என்று ஒரு வரி சொல்லிவிட்டு, அடுத்த மனிதரை கவனிக்க சென்றுவிட்டார்.

கடைசியாக ஒரு கேள்வி. ஐந்து வருட ஜெ. ஆட்சியை ஐந்து வரிகளில் சொல்லுங்கள்?

"ஐந்து வரிகள் என்ன ஐந்தே வார்த்தைகளில் சொல்கிறேன்.

அராஜகம், ஆணவம், அக்கிரமம், அகங்காரம், அத்துமீறல்."

நன்றி : குமுதம்

5 Comments:

வசந்தன்(Vasanthan) said...

///எங்கள் இல்லத்தில் பல இருந்தாலும் அவர்களிடம், தாத்தா என்று அழைக்கக் கூடாது, ‘அங்கிள்’ என்றுதான் அழைக்க வேண்டும் என்று சொல்லியிருக்கிறேன்.///

;-)

Krishna said...

Tamil engal Moochu, engal pechu tamingalish....

Anonymous said...

தமிழ் ‘அங்கிள்’ வாழ்க!!!

BALAJI said...

மக்களுக்கு என்ன செய்வாங்னு கடைசி வரைக்கும் சொல்லமாட்டாங்க....

விரோத ஆட்சிக்கு ஆணவ ஆட்சிக்கு னு டயாலாக் எல்லாம்... சும்மா...

selvan said...

Mr.Stalin told that Jaya has not given respect. Are they giving respect to their alliance. All the alliance parties meeting being held only in Arivalayam. Why they are not organising in MDMK office or PMK office or Sathyamoorthy Bhavan or Communist office. Because they need power. Stalin told so many thing against Kalimuthu. Then why he and Karunanidhi met him at hospital.Inside and outside heart thinking should be same.

Also I saw in the TV when Stalin handover the cheque to Jaya, Stalin left immediately when Jaya was telling something. But he is telling that Jaya did not speak anything.Only Jaya and Stalin knows what had happened.

It may be true that Jaya took revenge on politicians.But it did not affect common people.Public not bothered about politician revenges.

There is no doubt that Stalin is a good administrator and hard worker. Everybody will agree that he come up only with his hard work.He is fit for CM post.